Esperjenzajna l-​qalb tajba mhix mistħoqqa t’Alla b’ħafna modi

BĦALA raġel żagħżugħ li ħabb lil Alla, missieri, Arthur, ried isir saċerdot Metodist. Imma hu biddel ħsiebu meta qara xi letteratura mingħand l-​Istudenti tal-​Bibbja u beda jassoċja magħhom. Missieri tgħammed fl-​1914, meta kellu 17-​il sena. Matul l-​Ewwel Gwerra Dinjija, ġie ordnat biex jaqdi fil-​militar, iżda rrifjuta li jmur jiġġieled. Allura ġie ssentenzjat għal għaxar xhur fil-​Kingston Penitentiary, Ontario, il-​Kanada. Wara li ħareġ mill-​ħabs, hu sar colporteur, bħalma kienu jissejħu l-​pijunieri dak iż-​żmien.

Fl-​1926, missieri żżewweġ lil Hazel Wilkinson. Ommha kienet tgħallmet il-​verità fl-​1908. Jien twelidt fl-​24 t’April 1931, it-​tieni minn erbat itfal. Missieri kien iħobb u jirrispetta l-​Bibbja, u għallimna nagħmlu l-​istess. Il-​qima lejn Ġeħova kienet l-​iktar ħaġa importanti f’ħajjitna. Konna nippritkaw regolarment minn dar għal dar bħala familja.—Atti 20:20.

BĦAL MISSIERI, BQAJT NEWTRALI U KONT PIJUNIER

Fl-​1939 bdiet it-​Tieni Gwerra Dinjija. Is-​sena taʼ wara, ix-​xogħol tax-​Xhieda taʼ Ġeħova fil-​Kanada ġie pprojbit. It-​tfal tal-​iskola kellhom isellmu lill-​bandiera u jkantaw l-​innu nazzjonali fil-​klassijiet tagħhom. Normalment, l-​għalliema ħallew lili u lil oħti Dorothy noħorġu mill-​kamra waqt li dan kien qed jiġri. Iżda darba minnhom, l-​għalliem tiegħi pprova jġegħelni nistħi billi qal li jien kont beżżiegħ. Wara l-​iskola, diversi tfal tal-​klassi attakkawni u sabbtuni mal-​art. Dan ġegħelni biss inkun iżjed determinat biex ‘nobdi lil Alla bħala ħakkiem u mhux lill-​bnedmin.’—Atti 5:29.

F’Lulju tal-​1942, meta kelli 11-​il sena, tgħammidt f’tank tal-​ilma f’razzett. Kont nieħu pjaċir nagħmel ix-​xogħol taʼ pijunier kull meta kien ikolli l-​vaganzi tal-​iskola. Illum jissejjaħ pijunier awżiljarju. Sena minnhom, stajt immur maʼ tliet aħwa oħra fit-​Tramuntana t’Ontario, fejn konna nippritkaw lin-​nies li jaqtgħu s-​siġar.

Fl-​1 taʼ Mejju 1949, bdejt ix-​xogħol taʼ pijunier regolari. Imbagħad ġejt mistieden biex ngħin fix-​xogħol taʼ kostruzzjoni fil-​fergħa tal-​Kanada u iktar tard sirt membru tal-​familja taʼ Betel tal-​Kanada. Ġejt assenjat fl-​istamperija, fejn tgħallimt kif inħaddem il-​flatbed press. Niftakarni naħdem il-​lejl kollu għal diversi ġimgħat biex ngħin fl-​istampar taʼ fuljett dwar il-​persekuzzjoni tan-​nies taʼ Ġeħova fil-​Kanada.

Wara dan, ħdimt fid-​Dipartiment tas-​Servizz. Kont assenjat biex nintervista lill-​pijunieri li kienu se jaqdu fi Quebec, fejn kien hemm persekuzzjoni ħarxa. Waħda minn dawn il-​pijunieri kienet Mary Zazula minn Edmonton, Alberta. Il-​ġenituri tagħha kienu membri tal-​Knisja Ortodossa. Meta Mary u ħuha ikbar minnha rrifjutaw li jieqfu jistudjaw il-​Bibbja, il-​ġenituri tagħhom tefgħuhom ’il barra mid-​dar. Mary u ħuha tgħammdu f’Ġunju tal-​1951, u sitt xhur wara bdew jaqdu bħala pijunieri. Matul l-​intervista, stajt nara li Mary kienet tħobbu ħafna lil Ġeħova. Niftakarni naħseb li din kienet it-​tfajla li xtaqt niżżewweġ. Disaʼ xhur wara żżewwiġna—fit-​30 taʼ Jannar 1954. Ġimgħa wara t-​tieġ tagħna, jien u Mary ġejna mistidnin biex nitħarrġu għax-​xogħol tas-​circuit. Fis-​sentejn taʼ wara, għamilna dan ix-​xogħol fit-​Tramuntana t’Ontario.

Hekk kif ix-​xogħol tal-​ippritkar madwar id-​dinja kiber, kien hemm bżonn taʼ iktar u iktar missjunarji. Jien u Mary ħsibna li jekk stajna nissaportu t-​temp inġazzat tal-​Kanada fix-​xitwa u n-​nemus fitt fis-​sajf, allura stajna nissaportu kullimkien. Aħna attendejna s-​27 klassi tal-​Iskola taʼ Gilegħad u ggradwajna f’Lulju 1956. Sa Novembru konna fid-​dar il-​ġdida tagħna—il-​Brażil.

XOGĦOL MISSJUNARJU FIL-​BRAŻIL

Meta wasalna l-​Brażil, bdejna nitgħallmu l-​Portugiż. L-​ewwel tgħallimna modi ħfief biex nibdew konversazzjoni. Wara dan, tgħallimna bl-​amment preżentazzjoni qasira għar-​rivisti. Imbagħad, morna fis-​servizz tal-​għalqa u ltqajna maʼ mara li wriet interess fil-​messaġġ li tajnieha. Konna ddeċidejna li jekk inkwilin juri interess, konna naqrawlu skrittura dwar il-​ħajja taħt is-​Saltna t’Alla. Allura qrajt Rivelazzjoni 21:3, 4—u mbagħad tani ħass ħażin! Ma kontx imdorri f’temp sħun u umdu. Is-​sħana kompliet tkun taʼ sfida għalija.

L-​inkarigu missjunarju tagħna kien fil-​belt taʼ Campos. Illum hemm 15-​il kongregazzjoni! Imma meta wasalna, kien hemm grupp iżolat wieħed biss fil-​belt kif ukoll dar għall-​missjunarji b’erbaʼ aħwa nisa: Esther Tracy, Ramona Bauer, Luiza Schwarz, u Lorraine Brookes (issa Wallen). L-​inkarigu tiegħi fid-​dar missjunarja kien li ngħin fil-​ħasil tal-​ħwejjeġ u li nġib l-​injam għat-​tisjir. Darba waħda, it-​Tnejn filgħaxija, wara l-​Istudju tat-​Torri tal-​Għassa, Mary kienet qed tistrieħ fuq is-​sufan b’rasha fuq kuxin. Konna qed nitkellmu fuq dak li għaddejna minnu matul il-​ġurnata. Meta Mary qamet, ħareġ serp minn taħt il-​kuxin! Konna eċċitati mhux ftit sakemm qtilt lil dan il-​viżitatur mhux mistenni.

Wara sena nitgħallmu l-​Portugiż, bdejna fix-​xogħol tas-​circuit. Qdejna fi nħawi fejn ma kienx hemm elettriku. Irqadna fuq it-​tapiti u vvjaġġajna biż-​żiemel u l-​karozzin. Darba morna f’belt fil-​muntanji bit-​trejn biex inkunu nistgħu nippritkaw f’post iżolat. Krejna kamra hemmhekk. L-​uffiċċju tal-​fergħa bagħtilna 800 rivista biex nużawhom fil-​ministeru. Tgħidx kemm domna ġejjin u sejrin l-​uffiċċju tal-​posta biex nieħdu l-​kaxxi bir-​rivisti.

Fl-​1962, l-​Iskola tal-​Ministeru tas-​Saltna saret f’ħafna postijiet differenti fil-​Brażil. Għal sitt xhur, ġejt assenjat biex nivvjaġġa waħdi minn skola għall-​oħra. Għallimt klassijiet taʼ studenti f’Manaus, Belém, Fortaleza, Recife, u Salvador. Meta kont Manaus, organizzajt konvenzjoni tad-​distrett f’teatru tal-​opra famuż. Minħabba xita bil-​qliel, ma kienx hemm wisq ilma nadif x’nixorbu, u ma kellniex post adattat għall-​aħwa biex jieklu matul il-​konvenzjoni. Jien kellimt lil uffiċjal tal-​militar u spjegajtlu l-​problema tagħna. B’qalb tajba rranġalna biex ikollna biżżejjed ilma tajjeb għax-​xorb tul il-​konvenzjoni kollha. Ukoll, bagħat suldati biex jarmaw żewġ tined kbar, li użajna bħala kċina u kamra tal-​ikel.

Meta kont inkun ’il bogħod mid-​dar, Mary kienet tagħti xhieda fi nħawi taʼ negozju fejn ħadd ma kien interessat jitkellem dwar il-​Bibbja. In-​nies hemmhekk kienu ġew mill-​Portugall għall-​Brażil biex jagħmlu l-​flus. Mary kienet skuraġġita u qalet lil uħud minn ħbiebha, “L-​aħħar post fid-​dinja li nixtieq ngħix fih hu l-​Portugall.” Ftit wara dan irċivejna ittra. Kienet stedina biex naqdu fil-​Portugall, fejn ix-​xogħol tal-​ippritkar tagħna kien projbit. Mary kienet ixxokkjata! Imma aħna aċċettajna l-​inkarigu u morna l-​Portugall.

L-​INKARIGU TAGĦNA FIL-​PORTUGALL

Wasalna Lisbona, il-​Portugall, f’Awwissu tal-​1964. Il-​pulizija sigrieta kienu qed jagħmlu l-​ħajja taʼ ħutna hemmhekk veru diffiċli. Allura kien jidher għaqli li ma nikkuntattjawx lix-​Xhieda tal-​lokal mill-​ewwel. Fil-​bidu, konna noqogħdu f’kamra mikrija. Imbagħad, meta ġibna l-​viża, krejna appartament. Wara ħames xhur, ma kienx għad hemm periklu biex nikkuntattjaw lill-​aħwa fil-​fergħa. Kemm konna ferħanin li fl-​aħħar stajna nattendu laqgħa!

Minħabba li x-​xogħol tagħna kien projbit, is-​Swali tas-​Saltna ngħalqu u l-​laqgħat tal-​kongregazzjoni kienu qed isiru fid-​djar tal-​aħwa. Il-​pulizija kienu jfittxu regolarment fi djarhom. Mijiet minn ħutna rġiel u nisa kienu qed jittieħdu fl-​għases tal-​pulizija biex jiġu interrogati. Il-​pulizija ttrattawhom ħażin u pprovaw jisforzawhom biex jikxfu l-​ismijiet tal-​aħwa responsabbli. Allura, biex jipproteġu lil xulxin, l-​aħwa waqfu jużaw il-​kunjomijiet u sejħu lil xulxin bl-​ewwel isem biss.

L-​iskop prinċipali tagħna kien li naċċertaw ruħna li ħutna xorta setaʼ jkollhom il-​letteratura li kienet se tgħinhom jissaportu. Mary kienet tittajpja l-​artikli għall-​istudju tat-​Torri tal-​Għassa u letteratura oħra fuq tip taʼ karta speċjali. Il-​karta mbagħad kienet tintuża bħala stensil biex isiru ħafna kopji għall-​aħwa.

NIDDEFENDU L-​AĦBAR TAJBA FIL-​QORTI

F’Ġunju tal-​1966, f’Lisbona kien hemm każ importanti l-​qorti. Id-​49 membru kollha tal-​Kongregazzjoni taʼ Feijó ġew akkużati li attendew laqgħa illegali f’dar taʼ xi ħadd. Biex nippreparahom għall-​ġuri, għamilt tabirruħi li kont l-​avukat li kien se jipprova juri li l-​aħwa kellhom tort. Imma proprju kif stennejna, tlifna l-​każ. Id-​49 ħu u oħt kollha weħlu xi żmien il-​ħabs, minn 45 ġurnata sa ħames xhur u nofs. Imma l-​ġuri kien taʼ xhieda kbira. Fil-​fatt, matul il-​ġuri, l-​avukat tagħna saħansitra kkwota kliem Gamaljel mill-​Bibbja. (Atti 5:33-​39) Wara, il-​mezzi tax-​xandir irrapportaw dwar il-​każ. Konna ferħanin ħafna meta l-​avukat tagħna beda jistudja l-​Bibbja magħna u jattendi l-​laqgħat.

F’Diċembru tal-​1966 ġejt inkarigat biex inkun l-​indokratur tal-​fergħa u qattajt ħafna ħin naħdem fuq kwistjonijiet legali. Għamilna kulma stajna biex nistabbilixxu raġunijiet legali għala x-​Xhieda taʼ Ġeħova għandhom ikunu jistgħu jqimu bil-​libertà fil-​Portugall. (Filippin 1:7) Fl-​aħħar, fit-​18 taʼ Diċembru 1974, ġejna rikonoxxuti legalment. Ħutna Nathan Knorr u Frederick Franz ġew mill-​kwartieri ġenerali biex jifirħu magħna. Kellna laqgħa li bqajna niftakruha f’Oporto u Lisbona, b’attendenza taʼ 46,870 ruħ.

Ġeħova wkoll għen ix-​xogħol tal-​ippritkar jikber fi gżejjer fejn in-​nies jitkellmu bil-​Portugiż, bħall-​Azores, Cape Verde, Madejra, u São Tomé u Príncipe. Hekk kif in-​numru taʼ Xhieda f’dawn il-​postijiet żdied, kellna bżonn taʼ fergħa ikbar. Wara li nbniet, Ħuna Milton Henschel ta t-​taħdita tad-​dedikazzjoni fit-​23 t’April 1988. Kien hemm 45,522 ħu u oħt fl-​attendenza, inkluż 20 li kienu missjunarji fil-​Portugall u li kienu ġew għad-​dedikazzjoni.

TGĦALLIMNA MINN EŻEMPJI TAʼ LEALTÀ

Mal-​medda taż-​żmien, jien u Mary tassew ħadna gost nitgħallmu minn aħwa leali. Pereżempju, meta ħdimt maʼ Ħuna Theodore Jaracz matul żjara taż-​żona, tgħallimt lezzjoni imprezzabbli. Il-​fergħa li konna qed inżuru kellha problema kbira, u l-​Kumitat tal-​Fergħa għamel kulma setaʼ biex jgħin. Ma ħassewhomx tajjeb li ma setgħux jagħmlu iktar. Allura Ħuna Jaracz farraġhom billi qalilhom: “Issa huwa l-​waqt li nagħtu l-​wisaʼ lill-​ispirtu qaddis biex jaħdem.” Ukoll, mhu se ninsa qatt xi ħaġa li Ħuna Franz qal ħafna snin ilu meta jien u Mary konna qed inżuru Brooklyn. Grupp minna talbuh parir, u qalilna: “Is-​suġġeriment tiegħi hu: Ibqgħu mal-​organizzazzjoni viżibbli taʼ Ġeħova kemm fil-​maltemp u kemm fil-​bnazzi. Hija l-​unika waħda li qed tagħmel ix-​xogħol li Ġesù kkmanda lid-​dixxipli tiegħu biex jagħmlu—ippritkaw l-​aħbar tajba tas-​Saltna t’Alla!”

Dan ix-​xogħol għamel lili u lil Mary tassew ferħanin. Ukoll, għandna memorji prezzjużi taż-​żjajjar taż-​żona li għamilna fil-​fergħat madwar id-​dinja. Ħadna gost niltaqgħu mal-​qaddejja taʼ Ġeħova kbar u żgħar u nassigurawhom li s-​servizz tagħhom lil Ġeħova hu apprezzat. Dejjem inkuraġġejniehom biex ikomplu jaqduh.

Għaddew ħafna snin, u t-​tnejn li aħna issa qbiżna t-​80 sena. Mary għandha diversi problemi taʼ saħħa. (2 Korintin 12:9) U kellna provi oħrajn. Imma dawn il-​provi saħħewlna l-​fidi u għamluna iktar determinati li nżommu l-​integrità tagħna lejn Ġeħova. Meta nħarsu lura lejn is-​snin li qattajna naqdu lil Ġeħova, aħna nafu li berikna bil-​qalb tajba li ntweritilna b’mod ġeneruż b’ħafna u ħafna modi.a—Ara n-​nota taʼ taħt.