Min Kien Ġesù Kristu?

F’dan iż-​żmien tas-​sena, f’ħafna pajjiżi madwar id-​dinja, qed jiġi ċċelebrat il-​Milied. Mijiet taʼ miljuni taʼ nies jemmnu li Ġesù Kristu twieled fil-​25 taʼ Diċembru, madwar 2,000 sena ilu. Fil-​pitturi u l-​iskulturi nsibu diversi rappreżentazzjonijiet grafiċi tiegħu bħala tarbija f’maxtura. Imma, m’għandniex xi ngħidu, hu kiber u sar raġel, u għex fuq l-​art għal 33 sena u nofs.

QATT ġietek il-​kurżità dwar l-​apparenza fiżika taʼ Ġesù meta kien adult? X’karnaġġjon kellu? Kien hu raġel sabiħ kollu muskoli, jew kellu dehra taʼ wieħed xîpli u kemxejn marradi, bħalma pinġewh diversi artisti matul is-​sekli? Kellu daqna jew le? Kellu xagħru twil?

Ukoll, kellu Ġesù xi dija li tindika qdusija, bħal xi dawl forma taʼ raġġiera madwar rasu, bħalma jpinġuh ċerti artisti? Jew ir-​realtà kienet xi ħaġa differenti​—li ma kellu ebda waħda minn dawn il-​karatteristiċi li jiddistingwuh, imma setaʼ faċilment jitħallat mal-​folla mingħajr ħadd ma jagħrfu?

Matul iż-​żmien, storjografi sekulari u artisti pproponew ideat li xejn ma jaqblu rigward id-​dehra taʼ Ġesù. Iktar minn hekk, ngħataw indikazzjonijiet taʼ min joqgħod fuqhom minn rakkonti taʼ nies li rawh b’għajnejhom stess, kittieba tal-​Bibbja li għexu fl-​ewwel seklu u li kienu jkunu fil-​kumpanija tiegħu.

Madankollu, dawn li ġejjin huma mistoqsijiet bil-​wisq iktar importanti minn dawk li għandhom x’jaqsmu mal-​bixra tiegħu: Min tassew kien Ġesù Kristu? Liema rwol għandu fl-​iskop t’Alla? Wettqu dan l-​irwol? X’qed jagħmel issa, u fejn qiegħed? Hija l-​pożizzjoni tiegħu tant importanti li se teffettwa lill-​umanità kollha, saħansitra lil ħafna li diġà mietu?

Ejjew l-​ewwel neżaminaw l-​evidenza dwar l-​apparenza taʼ Ġesù. X’bixra kellu?