Tfal Fi Kriżi
“Sakemm ma ninvestux fit-tfal, il-biċċa l-kbira taʼ l-iktar problemi fundamentali tal-bniedem li ilhom għal żmien twil se jibqgħu problemi fundamentali għal żmien twil.”—Fond tal-Ġnus Magħquda għat-Tfal.
TFAL madwar id-dinja kollha jinsabu fi kriżi. Evidenza konvinċenti taʼ kemm hi kbira din it-traġedja ġiet preżentata fil-Kungress Dinji Kontra l-Isfruttar Sesswali u Kummerċjali tat-Tfal li nżamm fi Stokkolma, l-Isvezja, fl-1996 u li għalih attendew rappreżentanti minn 130 pajjiż. Per eżempju, ġie dokumentat li f’ħafna partijiet tad-dinja hemm miljuni taʼ tfajliet, xi wħud saħansitra t’għaxar snin, li huma mġagħlin jaħdmu bħala prostituti.
Il-Melbourne University Law Review Awstraljana qalet li prostituzzjoni inforzata bħal din ġiet imsejħa “waħda mill-agħar forom kontemporanji taʼ jasar.” Wara snin taʼ moħqrija fiżika, mentali, u emozzjonali, dawn it-tfajliet jibqgħu jġorru l-marka tagħhom għal għomorhom. Fil-biċċa l-kbira tal-każi, it-tfajliet joqogħdu għal din il-brutalità sempliċement għaliex ikunu jridu jieklu biex jibqgħu ħajjin. L-alternattiva l-oħra hi li jmutu bil-ġuħ. B’sogħba, ħafna minn dawn it-tfal bla dar ġew imġagħlin jidħlu fil-prostituzzjoni mill-ġenituri tagħhom stess, li tant kienu foqra li bigħuhom għall-flus.
Minbarra din it-traġedja ovvja tat-tfal hemm dik il-kwistjoni taħraq tax-xogħol mill-minorenni. Fl-Asja, fl-Amerka t’Isfel u fi bnadi oħrajn, u f’xi komunitajiet taʼ l-emigranti fl-Istati Uniti, saħansitra tfal taʼ ħames snin huma mġagħlin jagħmlu dak li nistgħu nsejħulu “xogħol taʼ lsiera.” Huma jaħdmu qishom robots żgħar f’kundizzjonijiet li jkexkxu, li jħassrulhom il-ġisem u l-moħħ żgħar tagħhom. Il-biċċa l-kbira ma jkollhom ebda edukazzjoni, imħabba tal-ġenituri, djar fejn iħossuhom fis-sigurtà, ġugarelli, jew ġonna fejn jilagħbu. Ħafna minnhom jiġu sfruttati bla ebda ħniena mill-ġenituri tagħhom.
Suldati Tfal u Orfanatrofji
Biex din it-traġedja tkompli tiżdied, kien hawn żjieda fl-użu taʼ suldati tfal fl-eżerċti tal-gwerilli. It-tfal għandhom mnejn jinsterqu jew jinxtraw mis-swieq taʼ l-ilsiera u mbagħad jiġu brutalizzati b’mod sistematiku, xi drabi billi jġagħluhom jaraw xi qtil. Xi wħud saħansitra ġew ordnati joqtlu lill-ġenituri tagħhom stess jew jieħdu d-drogi sabiex ikabbru l-istint tagħhom taʼ qattiela.
Dan li ġej huwa eżempju taʼ l-effetti tal-brainwashing li kien sar fuq eluf taʼ suldati tfal fl-Afrika. Din il-konversazzjoni li tkexkex seħħet bejn social worker u suldat tifel li mid-dehra kien qed jipprova jippreserva l-ftit innoċenza li kien għad baqagħlu:
“Int qtilt? ‘Le.’
Kellek xkubetta? ‘Iva.’
Immirajtha l-ixkubetta? ‘Iva.’
Sparajt? ‘Iva.’
U x’ġara? ‘Sempliċement waqgħu maʼ l-art.’”
Xi wħud minn dawn iż-żgħażagħ huma ftit iktar minn tfal meta tqis li għandhom biss sitt snin jew iktar. Ġie rapportat li saħansitra sa mill-1988, it-tfal suldati kienu jgħoddu madwar 200,000 mad-dinja kollha.
Jingħad li fis-snin taʼ bejn l-1988 u l-1992, ġewwa orfanatrofju f’pajjiż Asjatiku, intgħażlu 550 tifel u tifla, il-biċċa l-kbira minnhom bniet, biex imutu bil-ġuħ. Waħda tabiba tirrapporta: “Dawk l-orfni ma kellhom ebda pilloli biex itaffulhom l-uġigħ. Saħansitra waqt li kienu qed imutu, kienu jkunu marbutin mas-sodda tagħhom.”
Xi ngħidu għall-Ewropa? Pajjiż minnhom twaħħax meta nkixef grupp internazzjonali tal-pornografija tat-tfal, li kien jisraq it-tfajliet għall-isfruttament sesswali. Xi tfajliet sfortunati nqatlu jew tħallew imutu bil-ġuħ.
Dawn ir-rapporti ċertament jindikaw li ħafna pajjiżi għandhom problema serja bl-abbuż u bl-isfruttament tat-tfal. Imma nkunu qed nesaġeraw jekk ngħidu li din hi problema madwar id-dinja kollha? L-artiklu li jmiss se jwieġeb din il-mistoqsija.
[Stampa f’paġna 4]
Suldat tifel fil-Liberja
[Sors]
John Gunston/Sipa Press
[Stampa f’paġna 4]
Ġewwa fabbrika tal-briks fil-Kolombja, it-tfal iservu taʼ karretti umani
[Sors]
UN PHOTO 148000/Jean Pierre Laffont
[Sors tal-Istampa f’paġna 3]
Ritratt tal-FAO /F. Botts