Attitudni Ferriħija Minkejja Diżabilitajiet Estremi

KIF RAKKONTAT MINN KONSTANTIN MOROZOV

Meta twelidt fl-​20 taʼ Lulju, 1936, ma kellix għadam żviluppat għalkollox f’ġismi ħlief il-​qorriegħa u s-​sinsla taʼ dahri. L-​iskeletru kollu kemm hu tiegħi kien magħmul minn qarmuċa fraġli mhux iktar soda mill-​qarmuċa tal-​widna taʼ bniedem adult. Kont niżen inqas minn nofs kilo. L-​uniċi sinjali taʼ ħajja li kienu jidhru fija kienu t-​taħbit tal-​qalb dgħajjef, in-​nifs batut, u xi ftit movimenti.

KONT is-​sebaʼ wieħed minn disat itfal f’familja li kienet tgħix fir-​raħal taʼ Sara, f’Ul’yanovsk Oblast, fil-​qalba tar-​Russja. Meta kelli tliet ġimgħat, il-​ġenituri tiegħi ħaduni l-​knisja biex jgħammduni. Il-​qassis malajr raxxaxni bl-​ilma u qal lill-​ġenituri tiegħi biex jiħduni d-​dar malajr kemm jistaʼ jkun, peress li hu qal li kont se mmut fi ftit sigħat.

F’Jannar taʼ l-​1937, il-​ġenituri tiegħi ħaduni fil-​belt taʼ Kazan’, il-​kapitali tar-​repubblika Russa taʼ Tatarstan, biex jarawni xi speċjalisti. Sa daż-żmien kont stajt ngħid “Mamà,” “Papà,” u “Babushka” (Nanna), u kont naf l-​ismijiet taʼ ħuti. Wara li eżaminawni, it-​tobba qalu lill-​ġenituri tiegħi li kont se mmut fi żmien sena. Huma rrikkmandaw li ningħata l-​mewt u niġi preservat f’vażett tal-​ħġieġ bħala ħaġa esibita biex tintuża bħala mezz taʼ tagħlim għall-​istudenti tal-​mediċina. Kemm jien grat lejn l-​għeżież ġenituri tiegħi talli rrifjutaw dan b’mod sod!

Tfulija Kollha Tbatija

Minn sakemm nistaʼ niftakar, ġismi kien kontinwament imkisser bl-​uġigħ. Madankollu, anki bħala tifel, stinkajt biex inżomm dispożizzjoni mentali pożittiva u pprovajt nidħaq taʼ spiss u ngawdi l-​ħajja. Din hija l-​attitudni li żammejt. L-​iskeletru tiegħi bil-​mod il-​mod beda jissaħħaħ, u stajt inqum bil-​qegħda u nitkaxkar xi ftit. Ma kbirtx bħat-​tfal normali u kont sfigurat waħda u sew. Imma kont student tajjeb, u sa meta kelli ħames snin, kont naf naqra u nikteb.

F’Mejju taʼ l-​1941, ommi ħaditni l-​knisja għat-​tieni darba. Kien hemm għadd taʼ nies hemm, u kollha kienu għarkobbtejhom jitolbu. Attendant mara resqet lejn ommi biex tistaqsiha għala ma kinitx mielet hi wkoll. Meta ommi wrietha lili, din il-​mara marret tkellem lill-​qassis. Meta ġiet lura, l-​attendant ħaditna fejn il-​bieb taʼ barra u ssuġġeriet li ommi tħallini barra u tidħol hi waħedha. Din sostniet li minħabba d-​dnubiet tal-​ġenituri tiegħi, ngħatajt lilhom mill-​“wieħed imniġġes.” Ommi marret lura d-​dar bid-​dmugħ f’għajnejha. Jien ħsibt dwar dan għal żmien twil. Kont nistaqsi bejni u bejn ruħi, ‘Min hu dan “il-​wieħed imniġġes”?’

Fl-1948, meta kelli 12-il sena, ommi ħaditni fir-​raħal taʼ Merenki fir-​Repubblika taʼ Chuvash, madwar 80 kilometru ’l bogħod mid-​dar tagħna. Hemmhekk kien hemm nixxigħat mediċinali, u ommi ttamat li stajt infiq b’dan l-​ilma. Fost il-​kundizzjonijiet li poġġewli l-​qassisin biex inkun nistaʼ nfiq kien hemm li ma stajtx niekol għal tlett ijiem. Kelli wkoll nitqarben fil-​knisja. Għalkemm ma tantx kelli fiduċja fil-​knisja, qbilt maʼ dawn il-​kundizzjonijiet. Il-​vjaġġ għalija kien wieħed twil u diffiċli, imma ssaportejt, billi pprovajt nedha bis-​sbuħija tal-​veduti.

Il-knisja kienet mimlija bin-​nies. Waqt li ommi kienet qed iġġorrni fost il-​folla, waħda mara xiħa tatni ħelwa. Jien ħadtha u poġġejtha fil-​but. Meta kien imissni nitqarben, dik ix-​xiħa bdiet tgħajjat: “Father, tqarbnux! Għadu kemm kiel ħelwa!” Spjegajt li dik il-​ħelwa kienet fil-​but, imma l-​qassis għajjat: “Ja mostru insolenti! Trid tigdeb ukoll? Oħorġuh mill-​knisja!” L-​għada, madankollu, qassis ieħor qarbinni u ħasilni bl-​ilma “mirakoluż.” Madankollu, ma sar l-​ebda miraklu. Id-​diżabilitajiet tiegħi hemm baqgħu.

Kisbiet Intelletwali

Għalkemm kont inkapaċitat sew fiżikament, matul l-​adolexxenza tiegħi segwejt ħafna miri akkademiċi u intellettwali. Fl-​1956, ngħaqadt mal-​Komsomol (Lega tal-​Komunisti Żgħażagħ) u, maż-​żmien, għallimt l-​istorja tal-​Komsomol liż-​żgħażagħ. Kont membru tal-​Kummissjoni Kulturali u tad-​Dar, f’dar għall-​inkapaċitati, u hemm kont naqdi bħala direttur tar-​radju u nintroduċi l-​programmi fuq ir-​radju wkoll.

Iktar minn hekk, kont librar taʼ librerija mobbli taʼ kotba rekordjati għall-​għomja, u ġejt elett biex inkun membru fil-​Kummissjoni taʼ l-​Imħallef għall-​Ġlieda Kontra l-​Abbuż taʼ l-​Alkoħol. Kont nieħu sehem ukoll fi klabb t’artisti dilettanti, kont inkanta, u ndoqq diversi strumenti mużikali.

Fid-​Dar għall-​Inkapaċitati

Fl-​1957, meta għalaqt 21 sena, minħabba d-​diżabilitajiet tiegħi kelli nidħol f’dar għall-​inkapaċitati. Madankollu, ma kelli l-​ebda ħsieb li naqtaʼ qalbi. F’Ottubru taʼ l-​1963, tlaqt lejn l-​Istitut tar-​Riċerka Xjentifika tal-​Prostesi f’Moska. Hemmhekk eventwalment għamilt 18-il operazzjoni biex niddritta saqajja.

L-ewwel, saqajja ġew stirati. Imbagħad, wara tmint ijiem, saritli operazzjoni. Wara dan, qegħduli saqajja ġo forma biex iżommuhomli f’posthom sa l-​operazzjoni taʼ wara. L-​infermiera kienet tibki meta kienet tara kemm kont qed inbati.

Matul l-​erbaʼ xhur taʼ wara, tgħallimt nimxi bil-​krozzi. Bil-​krozzi nistaʼ nerfaʼ lili nnifsi sakemm inkun għoli xi metru u ftit. Niżen ftit iktar minn 25 kilo. Meta tgħallimt nimxi sew bil-​krozzi, fl-​1964, erġajt lura lejn id-​dar għall-​inkapaċitati. Sfortunatament, l-​għadam dgħajjef taʼ saqajja ma setax jiflaħ l-​piż taʼ ġismi, u malajr kelli nerġaʼ nibda niċċaqlaq billi nitkaxkar jew permezz taʼ siġġu tar-​roti. Sal-​lum, is-​siġġu tar-​roti huwa l-​mezz prinċipali li bih immur minn post għal ieħor.

Qatt ma rġajt mort il-​knisja. Dak li ntqal li twelidt mill-​“wieħed imniġġes” baqaʼ jitturmentani. Kont inħobbhom ħafna lil missieri u lil ommi, u sempliċement ma stajtx naċċetta li huma u Alla kienu jaħtu għall-​qagħda tiegħi. Ipprovajt nibqaʼ pożittiv. Ridt nagħmel il-​ġid lill-​oħrajn u, fuq kollox, nuri lili nnifsi li jien ukoll kont kapaċi li nagħmlu dan.

Ngħix Ħajja Indipendenti

Fl-​1970, iżżewwiġt lil Lidia, li kienet parzjalment paralizzata minn mindu kienet żgħira. Ħadna dar żgħira, li għexna fiha għal 15-il sena. Matul dak iż-​żmien it-​tnejn li aħna konna naħdmu biex naqilgħu l-​għajxien tagħna. Tgħallimt insewwi l-​arloġġi u apparat ieħor żgħir u regolat.

Għal ftit taż-​żmien użajt kelb trenjat biex iwettaqli għadd taʼ servizzi utli. Fil-​fatt, wieħed li jittrennja l-​klieb u jien ivvintajna xedd magħmul b’mod speċjali. Kelli żewġt iklieb—wieħed jismu Vulkan u l-​oħra Palma. Palma kienet ħabiba leali għal ħafna snin. Għand tal-​ħanut kienet taqbad xi prodotti taʼ l-​ikel għalija. L-​unika ħaġa li ma kinitx tħobb tagħmel, kienet li toqgħod tistenna fil-​kju biex inħallsu. Kienet iġġorrli l-​kartiera f’ħalqha, u kellha grampun żgħir mal-​kullar tagħha għall-​basket tax-​xiri tiegħi.

Fl-1973 ommi mardet serjament. Peress li dejjem kont inkun id-​dar, marti u jien iddeċidejna li nġibuha toqgħod magħna. Sa dak iż-​żmien missieri u ħamsa minn ħuti kienu mietu, u t-​tlieta l-​oħra kienu jgħixu f’partijiet oħra tar-​Russja. Waqt li ommi kienet qed tgħix magħna, ipprovajt nagħmel li nistaʼ għaliha. Eventwalment hi mietet fl-​età taʼ 85 sena.

Fl-1978 iddeċidejt li nibni karozza għalija nnifsi. Wara li esperimentajt fuq diversi karozzi, ħriġt b’waħda tajba. L-​Ispettorat lokali tal-​Vetturi taʼ l-​Istat ħallewni nagħmel it-​test tas-​sewqan u nirreġistra l-​karozza tiegħi. Semmejtha Osa (Żunżana). Marti u jien għamilna karavan żgħir għaliha li setaʼ jġorr sa 300 kilo. It-​tnejn li aħna stajna nivvjaġġaw bih u nġorru l-​affarijiet magħna. Din il-​vettura servietna sa l-​1985.

Bejn wieħed u ieħor f’dan iż-​żmien għamejt minn għajni x-​xellugija, u l-​vista t’għajni l-​leminija bdiet sejra lura. Imbagħad Lidia mardet bi problemi tal-​qalb. Minħabba l-​limitazzjonijiet tagħna, f’Mejju taʼ l-​1985, ġejna mġagħlin immorru noqogħdu f’dar għall-​inkapaċitati fil-​belt taʼ Dimitrovgrad.

Għala Ħajti Hija tant Ferħana issa

Fis-​sajf taʼ l-​1990, ix-​Xhieda taʼ Jehovah żaru d-​dar tagħna għall-​inkapaċitati. Dak li bdew jgħallmu sibtu interessanti ħafna. Urewni s-​silta fl-​Evanġelju taʼ Ġwanni dwar ir-​raġel li twieled agħma. Dwaru Ġesù qal: “Mhux għax dineb hu jew il-​ġenituri tiegħu.” (Ġwann 9:​1-3) Spjegawli li aħna writna d-​dnub u l-​mard mill-​antenat tagħna Adam.—Rumani 5:12.

Madankollu, l-​iktar li laqatni kien il-​fatt li fl-​aħħar mill-​aħħar Alla se jfejjaq lil dawk kollha li jaslu għall-​ħajja taħt il-​ħakma tas-​Saltna taʼ Ibnu, Ġesù Kristu, meta l-​Ġenna se tiġi restawrata fuq l-​art. (Salm 37:​11, 29; Luqa 23:43; Apokalissi 21:​3, 4) Dmugħ taʼ ferħ beda jgelgel maʼ wiċċi, u għedt minn taħt l-​ilsien: “Sibt il-​verità, il-​verità, il-​verità!” Studjajt il-​Bibbja max-​Xhieda taʼ Jehovah għal sena, u fl-​1991, tgħammidt fl-​ilma b’simbolu tad-​dedikazzjoni tiegħi lejn Alla Jehovah.

Għalkemm żviluppajt xewqa qawwija li naqdi lil Jehovah u li nippriedka dwar l-​iskopijiet taʼ l-​għaġeb tiegħu, jien iffaċċjajt ħafna ostakli. Qabel, ma tantx kelli għalfejn immur minn post għall-​ieħor, imma issa ridt noħroġ biex naqsam il-​fidi tiegħi m’oħrajn. L-​ewwel territorju tiegħi għall-​ippridkar kien id-​dar għall-​inkapaċitati fejn konna noqogħdu, li fiha kienu jgħixu iktar minn 300 persuna. Sabiex stajt niġi f’kuntatt maʼ kemm jistaʼ jkun nies, tlabt biex niġi assenjat naħdem fil-​kamra għal kwistjonijiet domestiċi.

Kull fil-​għodu kont noqgħod bil-​qegħda fejn kont naħdem u kont nieħu ħsieb taʼ l-​inkarigi tiegħi. Fix-​xogħol tiegħi, għamilt ħafna ħbieb ġodda li magħhom ikolli diskussjonijiet interessanti fuq suġġetti mill-​Bibbja. Uħud minnhom aċċettaw kotba u rivisti li għenuhom biex jifhmu l-​Bibbja. Dawk li jkunu qed iżuru d-​dar drawni naqralhom mill-​Bibbja u minn pubblikazzjonijiet ibbażati fuq il-​Bibbja. F’nofsinhar, tant ikun hemm nies fil-​kamra fejn noqogħdu marti u jien, li xi kultant ħadd iktar ma jkun jistaʼ jidħol.

Ħuti Kristjani mill-​kongregazzjoni tax-​Xhieda taʼ Jehovah għenuni ħafna fix-​xogħol taʼ l-​ippridkar. Iġibuli l-​letteratura Biblika u jqattgħu l-​ħin miegħi u maʼ marti. Jgħinuni wkoll biex nasal fis-​Sala tas-​Saltna għal-​laqgħat tal-​kongregazzjoni. Ċertu Xhud xtara mutur b’kaxxa fil-​ġenb għal passiġġier bl-​iskop li jwassalni ’l hawn u ’l hemm. Oħrajn, li għandhom il-​karozzi, bil-​ferħ jiġu għalija fix-​xhur kesħin tax-​xitwa.

Minħabba li ħadu ħsiebi bl-​imħabba, stajt nattendi iktar minn tnax-il konvenzjoni, jew seminarji edukattivi, tax-​Xhieda taʼ Jehovah. L-​ewwel waħda kienet konvenzjoni internazzjonali kbira li saret f’Moska f’Lulju taʼ l-​1993, fejn kien hemm attendenza b’quċċata taʼ 23,743 ruħ, minn 30 pajjiż u fuqhom. Sabiex nattendi din il-​laqgħa kien ifisser li nagħmel vjaġġ taʼ xi 1,000 kilometru. Minn dak in-​nhar ’l hawn ma tliftx konvenzjoni waħda tax-​Xhieda taʼ Jehovah.

Id-diretturi tad-​dar tagħna għall-​inkapaċitati għandhom rispett profond lejja, u jien grat ħafna għal dan. Is-​sieħba tiegħi, Lidia, li għext f’armonija magħha għal 30 sena, ukoll tappoġġani u tgħinni, għalkemm ma taqsamx l-​istess ħarsiet reliġjużi li għandi jien. Imma fuq kollox, Jehovah jappoġġani bl-​id setgħana tiegħu u jagħtini l-​barkiet taʼ l-​għaġeb tiegħu. M’ilux ħafna, fl-​1 taʼ Settembru, 1997, ġejt maħtur bħala pijunier, kif jissejħu l-​ministri full-time tax-​Xhieda taʼ Jehovah.

Kien hemm diversi okkażjonijiet f’ħajti meta qalbi setgħet waqfitli u stajt mitt. Kemm jien ferħan issa li dan ma seħħx u li sirt naf u nħobb lis-​Sors tal-​ħajja, Alla Jehovah! Jien nixtieq inkompli naqdih flimkien maʼ ħuti spiritwali mad-​dinja kollha sakemm qalbi tkompli tħabbat.

[Stampa f’paġna 20]

Maʼ marti Lidia

[Stampa f’paġna 21]

Ngħallem lil student fid-​dar għall-​inkapaċitati fejn konna ngħixu