Kul il-​Ħaxix!

MINN KITTIEB TAʼ STENBAĦ! FIL-​BRAŻIL

“Morr wisq.” “Għandu togħma ħażina.” “Qatt ma kiltu.”

DAWN huma ftit biss mir-​raġunijiet għala ħafna ma jkunux iridu jieklu l-​ħaxix. Xi ngħidu għalik? Int kuljum tiekol il-​ħaxix? Stenbaħ! intervista lil xi individwi biex jiskopri għala xi wħud iħobbuh il-​ħaxix u għala oħrajn ma jħobbuhx.

Dawk li jieklu l-​ħaxix qalu li l-​ġenituri tagħhom kienu għallmuhom kemm hu importanti li jieklu l-​ħaxix u l-​frott. Mill-​banda l-​oħra, ħafna minn dawk li ma jħobbux il-​ħaxix ma kinux imdorrijin jikluh meta kienu żgħar. Minflok, kienu jippreferu ikel li ma tantx huwa sustanzjuż. Madankollu, dawn l-​uħud ukoll qablu li l-​ħaxix huwa importanti għal saħħa tajba.

Ġenituri, għallmu lil uliedkom jieklu l-​ħaxix! Kif? Facts for Life, pubblikat mill-​Fond tal-​Ġnus Magħquda għat-​Tfal, jissuġġerixxi li għallinqas darba kuljum wara li jiġu misqijin il-​ħalib taʼ l-​omm jew il-​flixkun, it-​trabi taʼ madwar sitt xhur għandhom jingħataw il-​ħaxix. Dan il-​ħaxix irid ikun ġie mgħolli, imqaxxar, u mbagħad mgħaffeġ. Iktar ma tkun kbira l-​varjetà taʼ ikel, iktar jagħmlilha ġid lit-​tarbija. Dr. Vagner Lapate, speċjalista tat-​tfal mill-​Brażil, jgħid li filwaqt li l-​ħalib huwa l-​ikel prinċipali tat-​tfal fl-​ewwel sentejn tagħhom, il-​fatt li ddaħħal ikel ieħor “jinkuraġġixxi lit-​tarbija biex tiskopri togħmiet ġodda.”

Fil-ktieb Medicina—Mitos y Verdades (Il-Mediċina—Ħrejjef u Veritajiet), Carla Leonel tat is-​suġġeriment li kwantità żgħira taʼ meraq tal-​larinġ, frott mgħaffeġ (bħal banana, tuffieħ, u papaja), ċereali, u soppa tal-​ħaxix jistgħu jibdew jingħataw lit-​tarbija qabel iż-​żmien li hu msemmi hawn fuq. M’għandniex xi ngħidu, peress li l-​opinjonijiet dwar dan ivarjaw, ikun għaqli li tikkonsulta mat-​tabib tat-​tfal.