Negozju li Ilu Mwaqqaf għal Ħafna Żmien

Il-​garaxx fejn John kien jaħdem l-​għamara kien l-​aqwa wieħed fil-​komunità tiegħu. Kien mibni bl-​aħjar mod u mgħammar bl-​aqwa għodda. Għal John dan il-​garaxx kien l-​għaxqa tiegħu u kien veru kburi bih. Imma lejl wieħed il-​garaxx ħa n-​nar. Fi ftit sigħat, il-​garaxx sabiħ li kellu spiċċa rmied.

IKTAR kmieni, John kien għaddielu minn moħħu li juża ftit flus milli kien warrab għall-​bini tal-​garaxx ħalli jagħmel assigurazzjoni kontra l-​ħruq. Madankollu, hu rraġuna: ‘Jien noqgħod attent ħafna. Jekk il-​garaxx qatt ma jieħu n-​nar, l-​assigurazzjoni tkun ħela taʼ flus.’ Imma fl-​aħħar il-​garaxx ħa n-​nar. Li kieku l-​garaxx taʼ John kien assigurat, x’aktarx li kien ikun jistaʼ jerġaʼ jibnih. Mingħajr assigurazzjoni, ma kellux biex.

X’Inhi l-​Assigurazzjoni?

L-​assigurazzjoni m’hijiex neċessarjament investiment fejn wieħed jistenna li jiġbor flusu lura. Lanqas m’hija logħba taʼ l-​ażżard. Min jilgħab flusu jkun qed jidħol f’riskju, filwaqt li l-​assigurazzjoni toffri protezzjoni kontra riskji li diġà jkunu jeżistu. L-​assigurazzjoni hija mod kif ir-​riskju jinqasam maʼ ħaddieħor.

Sa mill-​qedem, komunitajiet taʼ nies kienu jagħtu xi ħaġa mir-​riżorsi li kellhom biex jgħinu lil individwi li jġarrbu xi ħsara. Madwar 3,500 sena ilu, Mosè qal lill-​familji tal-​ġens taʼ Iżrael biex kull tant żmien jikkontribwixxu porzjon mill-​prodotti tagħhom għall-​“barrani, l-​iltim u l-​armla.”—Dewteronomju 14:​28, 29.

Kif Bdiet l-​Assigurazzjoni

L-​assigurazzjoni ilha teżisti għal eluf taʼ snin. Għamla t’assigurazzjoni fuq kreditu kienet inkluża fil-​Kodiċi taʼ Ħammurabi, ġabra taʼ liġijiet Babiloniżi li jaħsbu li tmur lura fiż-​żmien qabel il-​Liġi taʼ Mosè. Fl-​antik, is-​sidien tal-​bastimenti kienu jissellfu l-​flus mingħand investituri sabiex ikunu jistgħu jbaħħru u jagħmlu l-​kummerċ. Jekk xi bastiment kien jinqered, is-​sidien ma kinux responsabbli li jħallsu lura d-​djun. Ladarba ħafna bastimenti kienu jirritornaw b’wiċċ il-​ġid, l-​imgħax li kienu jħallsu l-​bosta sidien kien jagħmel tajjeb għar-​riskji li kien jidħol għalihom min kien jislef.

Waħda mill-​iktar kumpaniji t’assigurazzjoni famużi fid-​dinja, Lloyd’s taʼ Londra, iktar tard ġiet ifformata f’ambjent marittimu simili. Sa l-​1688, Edward Lloyd kellu ħanut tal-​kafè fejn il-​kummerċjanti u l-​bankieri taʼ Londra kienu jiltaqgħu f’ambjent rilassat u jagħmlu n-​negozju. Hemmhekk il-​finanzieri li kienu joffru kuntratti t’assigurazzjoni lill-​baħħara kienu jiktbu isimhom taħt l-​ammont speċifiku taʼ riskju li kienu lesti jaċċettaw jekk jirċievu ċertu pagament, jew primjum. Fl-​aħħar, fl-​1769, Lloyd’s sar grupp formali t’assiguraturi u maż-​żmien sar l-​aqwa soċjetà t’assigurazzjoni involuta f’riskji marittimi.

L-​Assigurazzjoni Llum

Illum, meta n-​nies jixtru poloz t’assigurazzjoni, xorta jkunu qed jaqsmu r-​riskju tagħhom m’oħrajn. Kumpaniji moderni t’assigurazzjoni jagħmlu studji fuq statistiċi li juru kemm kien hemm każi taʼ telf fil-​passat, per eżempju, telf minn garaxxijiet taʼ negozju li ħadu n-​nar. B’hekk huma jkunu jistgħu jbassru x’telf se jġarrbu l-​klijenti tagħhom fil-​futur. Il-​kumpanija t’assigurazzjoni tuża l-​flus li tiġbor mill-​ħafna klijenti tagħha biex tkun tistaʼ tikkumpensa lil dawk il-​klijenti li jġarrbu xi telf.

Għandek bżonnha assigurazzjoni? Jekk iva, liema għamla t’assigurazzjoni tgħodd għalik fiċ-​ċirkustanzi li tinsab fihom? U sew jekk għandek assigurazzjoni u sew jekk le, liema prekawzjonijiet jistgħu jgħinuk biex tvinċi mar-​riskji li ġġib il-​ħajja?

[Stampa f’paġna 3]

Waħda mill-​iktar kumpaniji t’assigurazzjoni famużi fid-​dinja bdiet f’ħanut tal-​kafè

[Sors]

Bil-​korteżija taʼ Lloyd’s taʼ Londra