Ħabsijiet fi Kriżi
“Jekk nibnu iktar ħabsijiet biex insibu tarf tal-kriminalità nkunu qisna qed nibnu iktar ċimiterji biex insibu tarf taʼ marda qattiela.”—ROBERT GANGI, ESPERT KORREZZJONALI.
ILKOLL ngħixu f’dinja fejn jeżistu ċerti attitudnijiet, aġir, u lingwaġġ li huma aċċettabbli fis-soċjetà u maħsubin biex ma jweġġgħux is-sentimenti taʼ ħaddieħor. Imma dawn l-affarijiet ġeneralment jaħbu r-realtà kerha tal-ħajja. Per eżempju, aħna nużaw kliem li jinstemaʼ isbaħ mill-kelma “ħabs” li ġġib id-dwejjaq. Nippreferu nużaw il-kelma “penitenzjarju” jew “faċilità korrezzjonali,” fejn jiġu provduti “taħriġ vokazzjonali” u “servizzi soċjali.” Xi wħud jippreferu jużaw kliem ieħor milli jużaw il-kelma “priġunier,” għax iħossu li din timplika li l-ħabsin m’humiex nies normali bi kwalitajiet bħal ħaddieħor. Madankollu, jekk tneħħi dan il-kliem sabiħ se ssib li llum il-ħabsijiet qed jiffaċċjaw problemi serji, bħal per eżempju l-ispiża enormi involuta biex il-kriminali jinżammu l-ħabs, u d-differenza li dejjem tikber bejn x’inhi r-raġuni li n-nies jintefgħu l-ħabs u dak li fil-fatt jirriżulta fl-aħħar mill-aħħar.
Xi nies jiddubitaw jekk il-ħabsijiet jagħmlux effett jew le. Huma jinnotaw li filwaqt li l-għadd taʼ ħabsin madwar id-dinja żdied għal iktar minn tmien miljun ruħ, ma kien hemm l-ebda tnaqqis sinifikanti fir-rata tal-kriminalità taʼ ħafna pajjiżi. Barra minn hekk, filwaqt li għadd kbir taʼ ħabsin jinsabu l-ħabs f’konnessjoni mad-drogi, xorta għadha teżisti l-problema kbira tad-drogi jiġru fl-idejn.
Madankollu, in-nies b’mod ġenerali jippreferu l-ħabs bħala kastig. Huma jħossu li meta individwu li jikser il-liġi jintbagħat il-ħabs, tkun saret ġustizzja. Waħda ġurnalista semmiet li xi nies għandhom ċertu ġenn biex jaraw il-kriminali maqfulin fil-ħabs.
Hemm erbaʼ raġunijiet prinċipali għala min jikser il-liġi jintefaʼ l-ħabs: (1) biex il-kriminali jingħataw kastig, (2) biex is-soċjetà tkun protetta, (3) biex jiġu evitati reati oħra fil-futur, u (4) biex il-kriminali jiġu riabilitati, billi jiġu mgħallmin jobdu l-liġi u jkunu produttivi wara li jinħelsu. Ejja naraw jekk il-ħabsijiet humiex iwettquhom dawn l-iskopijiet.