Iż-​Żgħażagħ Jistaqsu . . .

Kif Jistaʼ Jgħinni t-​Talb?

“Kien it-​talb li għenni nerġaʼ lura fit-​triq it-​tajba.” —Brad.a

HEMM ħafna żgħażagħ li jitolbu—forsi ħafna iktar milli timmaġina. Stħarriġ tal-​Gallup dwar iż-​Żgħażagħ fost dawk taʼ bejn it-​13 u s-​17-il sena fl-​Istati Uniti wera li 56 fil-​mija minnhom jgħidu talba qabel l-​ikel. Stħarriġ fost adulti żgħażagħ indika li 62 fil-​mija minnhom jitolbu kuljum.

Xorta waħda, għal ħafna żgħażagħ it-​talb huwa biss drawwa bla sens jew sempliċement rutina. Ftit huma ż-​żgħażagħ li għandhom “l-​għarfien [eżatt] taʼ Alla.” (Kolossin 1:9, 10) Bħala riżultat, Alla m’huwiex importanti ħafna f’ħajjithom. Fi stħarriġ wieħed l-​adolexxenti ġew mistoqsijin jekk qattx kienu talbu lil Alla għall-​għajnuna biex jieħdu xi deċiżjoni importanti. Waħda tifla wieġbet: “Jien dejjem nitlob lil Alla biex jiggwidani ħalli nagħżel it-​triq it-​tajba fil-​ħajja.” Madankollu, hi ammettiet: “Bħalissa ma nistax niftakar f’deċiżjoni partikulari.” Mela mhux taʼ b’xejn li ħafna żgħażagħ m’għandhomx fiduċja biżżejjed li t-​talb għandu xi qawwa jew li se jgħinhom f’xi ħaġa!

Minkejja dan, bħal Brad, li kkwotajnieh fil-​bidu, eluf taʼ żgħażagħ esperjenzaw personalment il-​qawwa tat-​talb. Int tistaʼ tagħmel hekk ukoll! Artiklu fil-​ħarġa taʼ qabel wera għala nistgħu nkunu fiduċjużi li Alla se jismaʼ t-​talb tagħna.b Issa tqum il-​mistoqsija, Kif jistaʼ jgħinek it-​talb? L-​ewwel, ejja neżaminaw kif Alla jwieġeb it-​talb tagħna.

Kif Alla Jwieġeb it-​Talb

Fi żminijiet Bibliċi xi nies taʼ fidi rċivew tweġibiet diretti—u anki mirakolużi—għat-​talb tagħhom. Per eżempju, meta s-​Sultan Ħeżekija sar jaf li kellu marda qattiela, hu talab bil-​ħniena lil Alla biex jeħilsu minnha. Alla wieġbu: “Jien smajt it-​talba tiegħek, rajt id-​dmugħ tiegħek. Arani, issa se nfejjqek.” (2 Slaten 20:1-6) Bl-​istess mod, Alla aġixxa għan-​nom taʼ rġiel u nisa oħra li kellhom il-​biżaʼ tiegħu.—1 Samwel 1:​1-20; Danjel 10:​2-12; Atti 4:​24-31; 10:​1-7.

Madankollu, anki fi żminijiet Bibliċi ma kinitx ħaġa normali li Alla jwieġeb it-​talb b’dan il-​mod. Kważi dejjem, Alla wieġeb it-​talb tal-​qaddejja tiegħu, mhux permezz taʼ miraklu, imma billi għenhom ‘jagħrfu sewwa r-​rieda tiegħu bl-​għerf kollu u d-​dehen spiritwali.’ (Kolossin 1:9, 10) Iva, Alla ta l-​għajnuna tiegħu billi saħħaħ lin-​nies tiegħu spiritwalment u moralment—billi tahom l-​għerf u l-​għarfien biex jieħdu deċiżjonijiet għaqlin. Meta l-​Kristjani kienu f’sitwazzjoni diffiċli, Alla mhux bilfors li neħħielhom il-​prova. Minflok, hu pprovdielhom qawwa iktar min-​normal sabiex ikunu jistgħu jissaportuha!—2 Korintin 4:7; 2 Timotju 4:17.

Bl-istess mod illum, x’aktarx li t-​tweġiba għat-​talba tiegħek m’hijiex se tkun xi ħaġa straordinarja. Imma bħalma għamel fil-​passat, Alla jistaʼ jagħtik l-​ispirtu qaddis tiegħu u jsaħħek biex tkun tistaʼ tiflaħ kwalunkwe sitwazzjoni li tiffaċċja. (Galatin 5:22, 23) Biex nagħtu eżempju taʼ dan, ejja nħarsu lejn erbaʼ modi li bihom it-​talb jistaʼ jgħinek.

Jgħinek Tieħu Deċiżjonijiet

Karen kienet qed toħroġ maʼ ġuvni li kien jidher li kellu miri spiritwali tajbin ħafna. “Kien dejjem jgħidli li ried isir anzjan fil-​kongregazzjoni,” tgħid hi. Dan kien jinstemaʼ sabiħ. Imma “kien jitkellem ħafna wkoll dwar in-​negozju li kien se jibda u l-​affarijiet kollha li kien se jkun jistaʼ jixtrili. Bdew jiġuni d-​dubji dwar kemm kien sinċier.” Karen talbet dwar dan. “Tlabt bil-​ħniena lil Jehovah biex jiftaħli għajnejja u jurini dak li kelli bżonn inkun naf dwaru.”

Xi kultant, il-​fatt stess li titlob huwa taʼ benefiċċju, għax jistaʼ jgħinek tieqaf u toqgħod taħseb fil-​fond bil-​mod kif Jehovah jħares lejn l-​affarijiet li qed jinkwetawk. Imma Karen kellha bżonn ukoll pariri prattiċi. Kienet hi se tirċievi xi tweġiba mirakoluża? Tajjeb, ikkunsidra rakkont mill-​Bibbja dwar is-​Sultan David. Meta sar jaf li Aħitofel, il-​ħabib tiegħu tant fdat, kien qed jagħti l-​pariri lil ibnu Absalom li kien traditur, David talab: “Ġib fix-​xejn, Mulej, il-​fehma taʼ Aħitofel!” (2 Samwel 15:31) Imma David aġixxa wkoll fi qbil mat-​talba tiegħu. Hu fada l-​biċċa xogħol f’idejn il-​ħabib tiegħu Ħusaj biex ‘iħassar il-​fehma taʼ Aħitofel.’ (2 Samwel 15:34) B’mod simili, Karen aġixxiet fi qbil mat-​talba tagħha billi tkellmet maʼ anzjan Kristjan matur li kien jaf lill-​ġuvni. Hu kkonfermalha d-​dubji li kellha dwaru: Il-​ġuvni ma tantx kien għamel progress spiritwali.

Karen tgħid: “Din is-​sitwazzjoni ġagħlitni nifhem eżatt kemm għandu qawwa t-​talb.” Jiddispjaċina ngħidu li l-​ġuvni li kienet toħroġ miegħu ġera wara l-​għana u waqaf jaqdi lil Alla. Karen tgħid: “Kieku żżewwiġtu, forsi issa kont inkun qed niġi għal-​laqgħat Kristjani waħdi.” It-​talb għen lil Karen tieħu deċiżjoni tajba.

Jgħinek Trażżan l-​Emozzjonijiet

Il-​Bibbja tgħid fi Proverbji 29:11: “L-​iblah jagħdab b’saħħtu kollha, imma l-​għaref irażżan għadbu.” Il-​problema hija li ħafna nies illum jgħixu taħt pressjoni emozzjonali qawwija u ħafna drabi jitilfu l-​kontroll—xi kultant b’riżultati koroh ferm. Iż-​żagħżugħ Brian jiftakar: “Kelli xi problemi maʼ sieħbi fuq ix-​xogħol u darba waħda ħareġ mus għalija.” Kieku int x’kont tagħmel? Brian talab. Hu jgħid: “Jehovah għenni nibqaʼ kalm, u qgħadt nitkellem maʼ sieħbi u kkonvinċejtu biex ma jużax il-​mus. Hu rema l-​mus maʼ l-​art u telaq ’l hemm.” Billi rażżan l-​emozzjonijiet tiegħu, Brian evita li jiżbroffa bir-​rabja, u x’aktarx li dan salvalu ħajtu.

Jistaʼ jkun li m’intix se tkun spiss f’sitwazzjoni fejn ikollok mus ippontat lejk. Imma se jkun hemm ħafna sitwazzjonijiet f’ħajtek fejn ikollok bżonn trażżan l-​emozzjonijiet tiegħek. It-​talb jistaʼ jgħinek tibqaʼ kalm.

Jgħinek Meta Tinkwieta

Barbara tiftakar “żmien ikrah taʼ prova li kienet għaddejja minnu” xi snin ilu. Hi tgħid: “Xejn donnu ma kien qed jirnexxi—la fuq ix-​xogħol, la fil-​familja u lanqas mal-​ħbieb. Ma kontx naf x’se naqbad nagħmel.” Barbara mill-​ewwel talbet għall-​għajnuna. Imma kien hemm problema. “Ma kontx naf għalxiex nitolbu lil Jehovah,” tgħid hi. “Fl-​aħħar tlabtu għall-​paċi tal-​moħħ. Kull fil-​għaxija kont nitolbu jgħinni biex ma ninkwetax fuq kull ħaġa.”

Dan it-​talb kif għenha? Hi tgħid: “Xi ftit tal-​ġranet wara, indunajt li għalkemm il-​problemi tiegħi ma kinux telqu, ma kontx għadni daqshekk moħħi fihom jew nhewden fuqhom.” Il-​Bibbja twiegħed: “Uru lil Alla xi jkollkom bżonn. . . . U s-​sliem taʼ Alla, sliem li jgħaddi kull ma l-​moħħ jistaʼ jifhem, iżommilkom qalbkom u moħħkom sħaħ fi Kristu Ġesù.”—Filippin 4:6, 7.

Jgħinek Ikollok Relazzjoni Eqreb m’Alla

Qis naqra l-​esperjenza taʼ żagħżugħ jismu Paul. “Kont għadni kemm mort noqgħod maʼ xi qraba,” jgħid hu. “Lejl wieħed ħassejtni mdejjaq ferm. Ma tantx kien ili li ħriġt mill-​iskola, u kont qed nimmissja lil ħbiebi kollha. Dak il-​lejl infqajt nibki meta qgħadt niftakar kemm konna nieħdu pjaċir flimkien.” X’setaʼ jagħmel Paul? Għall-​ewwel darba, hu talab bil-​ħerqa. Hu jgħid: “Ftaħt qalbi maʼ Jehovah u tlabtu jagħtini s-​saħħa u l-​paċi tal-​moħħ.”

X’kien ir-​riżultat? Paul jiftakar: “L-​għada fil-​għodu, meta qomt ħassejt moħħi mistrieħ iktar milli qatt ħassejtu f’ħajti kollha. Minn daqstant dwejjaq li kelli, sibt ‘is-​sliem t’Alla li jgħaddi kull ma l-​moħħ jistaʼ jifhem.’” Issa li qalbu kienet kalma, Paul setaʼ jqis l-​affarijiet minn ħarsa inqas emozzjonali. U malajr intebaħ li ‘ż-​żmien sabiħ taʼ qabel’ ma tantx kien sabiħ wara kollox. (Koħèlet 7:10) Fil-​fatt, “il-​ħbieb” li tant kien immissja ma kinux ħallew influwenza tajba fuqu.

Fuq kollox, Paul esperjenza personalment il-​fatt li Jehovah ħa ħsiebu. Hu ħass il-​verità tal-​kliem taʼ Ġakbu 4:8: “Ersqu lejn Alla, u hu jersaq lejkom.” Għal Paul dan kien punt taʼ bidla importanti f’ħajtu. Hu tqanqal biex ipoġġi lil Jehovah l-​ewwel u qabel kollox f’ħajtu u jiddedika ħajtu lilu.

Tkellem m’Alla!

Dawn l-​esperjenzi pożittivi jipprovdu assiguranza li t-​talb jistaʼ jgħinek. M’għandniex xi ngħidu, dan japplika biss jekk int trid bis-​serjetà ssir taf lil Alla, billi tiżviluppa ħbiberija miegħu. Sfortunatament, ħafna żgħażagħ idumu ma jagħmlu dan. Carissa trabbiet f’familja Kristjana. Imma hi tammetti: “Naħseb li kien biss f’dawn l-​aħħar snin illi fhimt eżattament kemm ir-​relazzjoni unika tagħna maʼ Jehovah għandha tifsira taʼ l-​għaġeb.” Brad, li ssemma fil-​bidu, trabba bħala Kristjan imma għal xi snin ma baqax parti mill-​qima vera. Hu jgħid: “Kien biss meta indunajt xi tlift li dort fuq Jehovah. Naf kemm il-​ħajja tistaʼ tkun mejta u vojta mingħajr din ir-​relazzjoni.”

Madankollu, toqgħodx tistenna li jiġrilek xi ħaġa kbira qabel ma tibni relazzjoni mill-​qrib m’Alla. Ibda tkellem miegħu minn issa—regolarment! (Luqa 11:9-13) ‘Iftaħ qalbek quddiemu.’ (Salm 62:9 [62:8, NW]) Malajr se tiskopri li t-​talb tassew jistaʼ jgħinek!

[Noti taʼ taħt]

[Kaxxa/Stampi f’paġna 15]

It-​Talb Jistaʼ Jgħinek

● Tieħu deċiżjonijiet aħjar

● Tibqaʼ kalm f’mumenti taʼ tensjoni

● Issib is-​serħan meta tkun se tinkwieta

● Tibni relazzjoni eqreb m’Alla