Għala Għandna Nitolbu bla Heda?

“Itolbu bla heda, iżżu ħajr lil Alla f’kollox.” ​—1 Tessalonikin 5:​17, 18.

1, 2. Danjel kif wera li apprezza l-​privileġġ tat-​talb, u dan x’effett kellu fuq ir-​relazzjoni tiegħu m’Alla?

IL-​PROFETA Danjel kellu d-​drawwa jitlob lil Alla tliet darbiet kuljum. Kien jinżel għarkopptejh ħdejn it-​tieqa fil-​kamra taʼ fuq tiegħu, li kienet tħares lejn il-​belt taʼ Ġerusalemm, u kien joffri t-​talb tiegħu. (1 Slaten 8:​46-​49; Danjel 6:​11 [6:​10, NW]) Anki meta digriet tas-​sultan ipprojbixxa li ma jsir ebda talb ħlief lil Darju, is-​sultan Midjan, Danjel qatt ma ħasibha darbtejn biex jitlob. Sew jekk kellu ħajtu fil-​periklu u sew jekk le, dan ir-​raġel li kien iħobb jitlob tkellem maʼ Jehovah bla heda.

² Jehovah kif kien iħares lejn Danjel? Meta l-​anġlu Gabrijel ġie biex iwieġeb waħda mit-​talbiet taʼ Danjel, hu ddeskriva lill-​profeta bħala xi ħadd “għażiż” jew “maħbub wisq.” (Danjel 9:​20-​23, KŻ) Fil-​profezija taʼ Eżekjel, Jehovah irrefera għal Danjel bħala raġel ġust. (Eżekjel 14:​14, 20) Matul is-​snin, it-​talb taʼ Danjel ovvjament wassal għal relazzjoni mill-​qrib m’Alla tiegħu, fatt li anki Darju rrikonoxxieh.—Danjel 6:​17 (6:​16, NW).

3. Bħalma wriet l-​esperjenza taʼ wieħed missjunarju, it-​talb kif jistaʼ jgħinna nżommu l-​integrità?

³ Talb regulari jistaʼ jgħinna niffaċċjaw provi ħorox. Per eżempju, ikkunsidra l-​każ taʼ Harold King, missjunarju fiċ-​Ċina li ngħata sentenza taʼ ħames snin iżolat f’ċella waħdu. Rigward l-​esperjenza tiegħu, Ħuna King qal: “Veru li kont maqtugħ minn maʼ sħabi fit-​twemmin, iżda ħadd ma setaʼ jiżolani minn Alla. . . . Għalhekk, quddiem kulmin kien jgħaddi minn ħdejn iċ-​ċella tiegħi, kont ninżel għarkopptejha tliet darbiet kuljum u nitlob b’leħen għoli, hekk kif żammejt f’moħħi lil Danjel, li titkellem dwaru l-​Bibbja. . . . F’okkażjonijiet bħal dawn kien bħallikieku l-​ispirtu t’Alla qed jiggwida lil moħħi lejn l-​affarijiet l-​iktar importanti u ħassejtni kalm. X’saħħa spiritwali u faraġ ġabli t-​talb!”

4. Liema mistoqsijiet li jikkonċernaw it-​talb se nikkunsidraw f’dan l-​artiklu?

⁴ Il-​Bibbja tistqarr: “Itolbu bla heda, iżżu ħajr lil Alla f’kollox.” (1 Tessalonikin 5:​17, 18) B’dan il-​parir f’moħħna, ejja nikkunsidraw il-​mistoqsijiet li ġejjin: Għala għandna noqogħdu attenti x’talb noffru? Liema raġunijiet għandna biex navviċinaw lil Jehovah kontinwament? U x’għandna nagħmlu jekk inħossuna li ma jistħoqqilniex nitolbu lil Alla minħabba n-​nuqqasijiet tagħna?

Ibni Ħbiberija Permezz tat-​Talb

5. It-​talb liema ħbiberija unika jgħinna ngawdu?

⁵ Tixtieq li Jehovah iqisek bħala l-​ħabib tiegħu? Hu tkellem dwar il-​patrijarka Abraham b’dan il-​mod. (Isaija 41:8; Ġakbu 2:​23) Jehovah iridna niżviluppaw dan it-​tip taʼ relazzjoni miegħu. Hu jistidinna nersqu qrib tiegħu. (Ġakbu 4:8) M’għandhiex din l-​istedina ġġagħalna nirriflettu fuq il-​provvediment uniku tat-​talb? Hu diffiċli li tikseb appuntament biex tkellem lil xi uffiċjal tal-​gvern importanti, aħseb u ara li ssir il-​ħabib tiegħu! Madankollu, il-​Ħallieq taʼ l-​univers jinkuraġġina biex nersqu lejh liberament fit-​talb, kulmeta rridu jew kulmeta għandna bżonn. (Salm 37:5) It-​talb bla heda tagħna jgħinna jkollna ħbiberija mill-​qrib maʼ Jehovah.

6. L-​eżempju taʼ Ġesù x’jgħallimna dwar il-​bżonn li ‘nitolbu kontinwament’?

⁶ Iżda, kemm hu faċli li nittraskuraw it-​talb! Tant nistgħu nkunu aljenati biex illaħħqu mal-​pressjonijiet taʼ kuljum li ma nagħmlu ebda sforz sabiex nitkellmu m’Alla. Ġesù inkuraġġixxa lid-​dixxipli tiegħu biex ‘jitolbu [“kontinwament,” NW],’u hu nnifsu hekk għamel. (Mattew 26:41) Għalkemm dejjem kellu ħafna x’jagħmel minn fil-​għodu sa fil-​għaxija, hu warrab il-​ħin biex jitkellem maʼ Missieru tas-​sema. Kultant, Ġesù qam “fil-​għodu kmieni, qabel ma żernaq,” sabiex imur jitlob. (Mark 1:​35) F’okkażjonijiet oħra, hu telaq f’post għall-​kwiet fl-​aħħar tal-​ġurnata sabiex jitkellem maʼ Jehovah. (Mattew 14:23) Ġesù dejjem warrab il-​ħin biex jitlob, u anki aħna għandna nagħmlu dan.​—1 Pietru 2:21.

7. Liema ċirkustanzi għandhom iqanqluna biex nitkellmu maʼ Missierna tas-​sema kuljum?

⁷ Matul il-​ġurnata kemm-il darba jiġu mumenti xierqa għal talb persunali hekk kif niffaċċjaw problemi, niltaqgħu maʼ tentazzjonijiet, u nieħdu deċiżjonijiet. (Efesin 6:​18) Meta nfittxu l-​gwida t’Alla f’kull aspett tal-​ħajja, il-​ħbiberija tagħna miegħu żgur se tikber. M’huwiex minnu li jekk żewġt iħbieb jiffaċċjaw il-​problemi flimkien, l-​għaqda taʼ ħbiberija taʼ bejniethom tissaħħaħ iktar? (Proverbji 17:17) L-​istess jiġri meta nistrieħu fuq Jehovah u nesperjenzaw l-​għajnuna tiegħu.​—2 Kronaki 14:10 (14:​11, NW).

8. Mill-​eżempji taʼ Neħemija, Ġesù, u Anna, x’nitgħallmu dwar it-​tul tat-​talb persunali tagħna?

⁸ Kemm nistgħu nkunu grati li Alla ma jpoġġi ebda limitu fuq kemm indumu jew kemm-il darba nitkellmu miegħu fit-​talb! Neħemija qal talba f’qalbu malajr malajr qabel ma tkellem mas-​sultan tal-​Persja. (Neħemija 2:​4, 5) Ġesù wkoll offra talba qasira meta talab lil Jehovah biex jagħtih il-​qawwa ħalli jqajjem lil Lazzru. (Ġwanni 11:​41, 42) Mill-​banda l-​oħra, Anna “damet titlob ħafna quddiem il-​Mulej” meta fetħet qalbha miegħu. (1 Samwel 1:​12, 15, 16) It-​talb persunali tagħna jistaʼ jkun qasir jew twil skond il-​ħtieġa u ċ-​ċirkustanzi.

9. It-​talb tagħna għala għandu jinkludi tifħir u ringrazzjament għal dak kollu li Jehovah jagħmel għalina?

⁹ Ħafna talb fil-​Bibbja jesprimi apprezzament mill-​qalb għall-​pożizzjoni suprema taʼ Jehovah u għall-​għemejjel meraviljużi tiegħu. (Eżodu 15:​1-​19; 1 Kronaki 16:​7-​36; Salm 145) F’viżjoni, l-​appostlu Ġwanni ra l-​24 anzjan​—in-​numru komplet taʼ Kristjani midlukin fil-​pożizzjoni tagħhom fis-​smewwiet—ifaħħru lil Jehovah, billi jgħidu: “Jistħoqqlok, Mulej Alla tagħna, li tilqaʼ l-​glorja u l-​ġieħ u s-​setgħa, għax int ħlaqt il-​ħlejjaq kollha, u huma kienu u nħolqu bir-​rieda tiegħek.” (Apokalissi 4:​10, 11) Aħna wkoll għandna għalxiex infaħħru lill-​Ħallieq regolarment. Kemm iħossuhom ferħanin il-​ġenituri meta wliedhom jirringrazzjawhom mill-​qalb għal xi ħaġa li jkunu għamlu għalihom! Il-​fatt li nirriflettu b’apprezzament fuq il-​qalb tajba taʼ Jehovah u nesprimu ringrazzjament mill-​qalb għaliha huwa mod tajjeb taʼ kif intejbu l-​kwalità tat-​talb tagħna.

‘Itlob bla Heda’ —Għala?

10. It-​talb kif isaħħaħ il-​fidi tagħna?

¹⁰ Talb regulari huwa essenzjali għall-​fidi tagħna. Wara li enfasizza l-​bżonn li “jitolbu bla ma jaqtgħu,” Ġesù staqsa: “Imma taħsbu intom li Bin il-​bniedem se jsib il-​fidi fuq l-​art meta jiġi?” (Luqa 18:​1-8) Talb ħerqan u mill-​qalb jibni l-​fidi. Meta l-​patrijarka Abraham kien qed jixjieħ u kien għadu ma kellux tfal, hu tkellem m’Alla dwar il-​kwistjoni. Bi tweġiba, Jehovah l-​ewwel talbu biex iħares ’il fuq lejn is-​smewwiet u jgħodd l-​istilel, jekk dan kien possibbli. Imbagħad Alla assigura lil Abraham: “Hekk għad ikun nislek.” Ir-​riżultat? Abraham “emmen fil-​Mulej, u dan għaddhulu b’ġustizzja.” (Ġenesi 15:​5, 6) Jekk niftħu qalbna maʼ Jehovah fit-​talb, naċċettaw l-​assiguranzi li jagħtina fil-​Bibbja, u nobduh, hu se jsaħħaħ il-​fidi tagħna.

11. It-​talb kif jistaʼ jgħinna nkampaw mal-​problemi?

¹¹ It-​talb jistaʼ jgħinna wkoll biex nittrattaw il-​problemi. Hija l-​ħajja taʼ kuljum tagħna taʼ piż u huma ċ-​ċirkustanzi li niffaċċjaw ħorox? Il-​Bibbja tgħidilna: “Qiegħed it-​tagħbija tiegħek fuq il-​Mulej, u hu jgħinek: hu qatt ma jħalli l-​ġust jitfixkel.” (Salmi 55:​22, KŻ) Meta niffaċċjaw deċiżjonijiet diffiċli, aħna nistgħu nimitaw l-​eżempju taʼ Ġesù. Hu qattaʼ lejl sħiħ f’talb privat qabel ma ħatar lit-​12-il appostlu tiegħu. (Luqa 6:​12-​16) U fil-​lejla taʼ qabel ma miet, Ġesù tant talab bil-​ħerqa li “l-​għaraq sarlu bħal qtar tad-​demm iċarċar sa l-​art.” (Luqa 22:44) Ir-​riżultat? Hu “kien mismugħ favorevolment minħabba l-​biżaʼ tiegħu minn Alla.” (Lhud 5:​7, NW) It-​talb imħeġġeġ u bla heda tagħna se jgħinna nkampaw maʼ sitwazzjonijiet stressanti u provi diffiċli.

12. L-​aspett tat-​talb kif juri l-​interess persunali li Jehovah għandu fina?

¹² Raġuni oħra biex nersqu eqreb lejn Jehovah permezz tat-​talb hi li, min-​naħa tiegħu, hu se jersaq iktar qrib tagħna. (Ġakbu 4:8) Meta niftħu qalbna maʼ Jehovah fit-​talb, ma nħossux aħna li hu interessat fil-​bżonnijiet tagħna u li jieħu ħsiebna b’mod teneru? Aħna nesperjenzaw l-​imħabba t’Alla b’mod persunali ħafna. Jehovah lil ħadd ma ta r-​responsabbiltà li jismaʼ kull talba li l-​qaddejja tiegħu jindirizzaw lilu bħala Missierhom tas-​sema. (Salm 66:​19, 20; Luqa 11:2) U hu jistidinna biex ‘nixħtu fuqu l-​ħsibijiet kollha tagħna għax hu jaħseb fina.’​—1 Pietru 5:​6, 7.

13, 14. Liema raġunijiet għandna biex nitolbu bla heda?

¹³ It-​talb jistaʼ jimliena b’żelu akbar għall-​ministeru pubbliku u jsaħħaħna meta l-​apatija jew l-​oppożizzjoni forsi jġagħluna nħossuna li rridu nieqfu nxandru. (Atti 4:​23-​31) It-​talb jistaʼ wkoll iħarisna mit-​“tnassis tax-​Xitan.” (Efesin 6:​11, 17, 18) Meta nissieltu biex inkampaw mal-​provi taʼ kuljum, nistgħu kontinwament nitolbu lil Alla biex isaħħaħna. It-​talba mudell taʼ Ġesù tinkludi l-​petizzjoni li Jehovah ‘jeħlisna mid-​deni [“mill-​wieħed ħażin,” NW],’ Satana x-​Xitan.​—Mattew 6:​13.

¹⁴ Jekk inkomplu nitolbu għall-​għajnuna biex inkunu nistgħu nikkontrollaw il-​ġibdiet midinba tagħna, aħna se nesperjenzaw lgħajnuna taʼ Jehovah. Għandna din l-​assiguranza: “Alla hu [“leali,” NW] u ma jħallikomx tiġġarrbu aktar milli tifilħu; jaħseb li mat-​tiġrib jagħtikom il-​qawwa u l-​għajnuna biex tkunu tifilħu għalih.” (1 Korintin 10:13) L-​appostlu Pawlu nnifsu esperjenza t-​tħassib taʼ Jehovah li saħħu f’ħafna ċirkustanzi differenti. Hu qal: “Għal kollox niflaħ bis-​saħħa taʼ dak li jqawwini.”​—Filippin 4:​13; 2 Korintin 11:​23-​29.

Itlob bla Waqfien Minkejja n-​Nuqqasijiet

15. X’jistaʼ jiġri meta l-​kondotta tagħna tonqos li tilħaq il-​livelli t’Alla?

¹⁵ Sabiex it-​talb tagħna jiġi mismugħ favorevolment, m’għandniex niċħdu l-​pariri tal-​Kelma t’Alla. L-​appostlu Ġwanni kiteb: “Kull ma nitolbu naqilgħuh mingħandu, għax qegħdin inżommu l-​kmandamenti tiegħu u nagħmlu dak li jogħġob lilu.” (1 Ġwanni 3:​22) Però, x’jistaʼ jiġri meta l-​kondotta tagħna tonqos li tilħaq il-​livelli t’Alla? Adam u Eva marru jistaħbew wara li dinbu fil-​ġnien taʼ l-​Għeden. Aħna wkoll forsi nħossuna inklinati li nistaħbew “minn wiċċ il-​Mulej” u nieqfu nitolbu. (Ġenesi 3:8) “Jien innotajt li kważi dejjem l-​ewwel pass ħażin li jieħdu dawk li jitilqu lil Jehovah u l-​organizzazzjoni tiegħu huwa li jieqfu jitolbu,” josserva Klaus, indokratur li jivvjaġġa t’esperjenza. (Lhud 2:1) Hekk ġralu José Ángel. Hu jgħid: “Għal kważi tmien snin bil-​kemm kont nitlob lil Jehovah. Ħassejt li ma jistħoqqlix inkellmu, għalkemm kont xorta nikkunsidrah bħala Missieri tas-​sema.”

16, 17. Agħti eżempji taʼ kif talb regulari jistaʼ jgħinna negħlbu dgħjufijiet spiritwali.

¹⁶ Xi wħud minna forsi nħossu li ma jistħoqqilniex nitolbu minħabba xi dgħjufija spiritwali jew minħabba li nkunu waqajna f’xi ħażen. Imma dan hu preċiż meta jeħtieġ li nieħdu vantaġġ sħiħ mill-​provvediment tat-​talb. Ġona ħarab mill-​inkarigu tiegħu. Imma ‘fid-​dwejjaq tiegħu lill-​Mulej sejjaħ, u hu wieġbu; mill-​ġuf taʼ Art l-​Imwiet karab għall-​għajnuna, u leħnu semgħu.’ (Ġona 2:3 [2:​2, NW]) Ġona talab, Jehovah wieġeb it-​talba tiegħu, u Ġona tfejjaq spiritwalment.

¹⁷ José Ángel ukoll talab bil-​ħerqa għall-​għajnuna. Hu jirrakkonta: “Ftaħt qalbi u tlabt bil-​ħniena lil Alla jaħfirli. U hu vera għenni. Ma naħsibx li kont nerġaʼ lura lejn il-​verità mingħajr l-​għajnuna tat-​talb. Issa nitlob regolarment kuljum, u nħares ’il quddiem għal dan il-​ħin.” Għandna dejjem inħossuna liberi li nitkellmu bil-​miftuħ m’Alla dwar l-​iżbalji tagħna u bl-​umiltà nitolbuh jaħfrilna. Meta s-​Sultan David stqarr in-​nuqqasijiet tiegħu, Jehovah ħafirlu. (Salm 32:​3-5) Jehovah irid jgħinna, u mhux jikkundannana. (1 Ġwanni 3:​19, 20) U t-​talb taʼ l-​irġiel ixjeħ tal-​kongregazzjoni jistaʼ jgħinna spiritwalment, għax dan it-​talb għandu “qawwa kbira.”​—Ġakbu 5:​13-​16.

18. Liema fiduċja jistaʼ jkollhom il-​qaddejja t’Alla minkejja kemm ikunu tbiegħdu minnu?

¹⁸ Liema missier se jiċħad lil ibnu li umilment idur lejh għall-​għajnuna u l-​parir wara li jkun żbalja? Il-​parabbola taʼ l-​iben il-​ħali turi li minkejja kemm inkunu tbegħedna minnu, Missierna tas-​sema jifraħ ħafna meta nerġgħu lura għandu. (Luqa 15:​21, 22, 32) Jehovah iħeġġeġ lil dawk kollha li jitbiegħdu minnu biex isejħulu, “għax hu jaħfer ħafna.” (Isaija 55:​6, 7) Għalkemm David ikkommetta diversi dnubiet serji, hu sejjaħ lil Jehovah, billi qal: “Agħti widen, o Alla, għat-​talba tiegħi, titwarrabx mit-​talb umli tiegħi.” Hu qal ukoll: “Fil-​għaxija, fil-​għodu u f’nofsinhar nokrob u nitniehed; u hu [Jehovah] jismaʼ l-​leħen tiegħi.” (Salm 55:​2, 18 [55:​1, 17, NW]) Kemm hu taʼ faraġ dan!

19. Għala m’għandniex nikkonkludu li t-​talb li jidher li mhux qed jiġi mismugħ huwa evidenza li Alla ma japprovahx?

¹⁹ X’jiġri jekk it-​talb tagħna ma jinstemax mill-​ewwel? F’dan il-​każ għandna nkunu żguri li t-​talba tagħna tkun fi qbil mar-​rieda taʼ Jehovah u li tkun offruta f’isem Ġesù. (Ġwanni 16:23; 1 Ġwanni 5:​14) Id-​dixxiplu Ġakbu rrefera għal xi Kristjani li t-​talb tagħhom baqaʼ ma nstemax minħabba li kienu qed ‘jitolbu [“għal skop,” NW] ħażin.’ (Ġakbu 4:3) Mill-​banda l-​oħra, m’għandniex ngħaġġlu biex nikkonkludu li t-​talb li jidher li ma nstemax huwa dejjem evidenza li Alla mhux qed japprovah. Forsi kultant Jehovah iħalli lill-​qaddejja leali tiegħu jibqgħu jitolbu dwar xi ħaġa jew oħra għal tul taʼ żmien qabel ma t-​tweġiba tiegħu tkun tidher ċara. Ġesù qal: “[“Ibqgħu,” NW] itolbu, u jingħatalkom.” (Mattew 7:7) B’hekk, irridu ‘nitolbu bla waqfien.’​—Rumani 12:12.

Itlob Regolarment

20, 21. (a) Għala għandna bżonn nitolbu bla heda f’dan iż-​żmien taʼ “l-​aħħar tad-​dinja”? (b) X’se nirċievu meta kuljum navviċinaw it-​tron taʼ Jehovah mimli qalb tajba mhix mistħoqqa?

²⁰ Il-​pressjonijiet u l-​problemi qed jiżdiedu f’dan iż-​żmien taʼ “l-​aħħar tad-​dinja,” li hu mmarkat minn “żmien iebes.” (2 Timotju 3:1) U l-​provi jistgħu malajr iġagħluna naljenaw rasna. Madankollu, it-​talb bla heda tagħna se jgħinna nżommu ħajjitna ffokata fuq affarijiet spiritwali minkejja l-​problemi, it-​tentazzjonijiet, u l-​iskuraġġiment persistenti. It-​talb tagħna taʼ kuljum lil Jehovah jistaʼ jipprovdilna l-​appoġġ vitali li għandna bżonn.

²¹ Jehovah, li hu “Semmiegħ it-​talb,” qatt m’għandu tant x’jagħmel li ma jistax jismagħna. (Salm 65:​2, NW) Jalla aħna qatt ma jkollna tant x’nagħmlu li ma nistgħux inkellmuh. Il-​ħbiberija tagħna m’Alla hija l-​iktar ħaġa prezzjuża li għandna. Jalla dejjem napprezzawha. “Ħa nersqu, mela, b’qalbna qawwija lejn it-​tron [“tal-​qalb tajba mhix mistħoqqa,” NW], biex naqilgħu ħniena u nsibu f’waqtha l-​[“qalb tajba mhix mistħoqqa,” NW] li neħtieġu.”​—Lhud 4:​16.

Int Kif Twieġeb?

• X’nitgħallmu mill-​profeta Danjel dwar il-​valur tat-​talb?

• Kif nistgħu nsaħħu l-​ħbiberija tagħna maʼ Jehovah?

• Għala għandna nitolbu bla heda?

• Anki jekk inħossu li ma jistħoqqilniex, għala m’għandniex nieqfu milli nitolbu lil Jehovah?

[Stampa f’paġna 16]

Neħemija qal talba qasira f’qalbu qabel ma tkellem mas-​sultan

[Stampa f’paġna 17]

Anna “damet titlob ħafna quddiem il-​Mulej”

[Stampi f’paġna 18]

Ġesù dam lejl sħiħ jitlob qabel ma ħatar lit-​12-il appostlu tiegħu

[Stampi f’paġna 20]

Matul il-​ġurnata jkollna ħafna opportunitajiet biex nitolbu