L-​Ommijiet Għandhom Ħafna X’Jagħmlu

4:50 a.m. Iċ-​ċkejken Alex imur maġenb is-​sodda fejn kienet rieqda ommu, Helen, jibki u nofsu rieqed. Żewġt itfal oħra—Penny (5 snin) u Joanna (12-il sena)—u r-​raġel, Nick, huma reqdin. Helen ittellaʼ lil Alex fis-​sodda ħdejha u tibda treddgħu. Ma tkunx tistaʼ terġaʼ torqod.

5:45 a.m. Helen tmur inkiss inkiss fil-​kċina, tagħmel il-​kafè, u toqgħod taqra.

6:15–7:20 a.m. Iqum Nick. Helen tqajjem lil Penny u lil Joanna, tħejji l-​kolazzjon, u tagħmel xi faċendi tad-​dar. Fis-​7:​15, Nick iwassal lil Joanna l-​iskola u jibqaʼ sejjer għax-​xogħol. Tasal omm Helen biex tiħdilha ħsieb Alex.

7:30 a.m. Helen twassal lil Penny l-​iskola. Hi u sejra x-​xogħol, toqgħod taħseb dwar xi jfisser verament l-​irwol taʼ l-​omm. “Qatt ma kelli xogħol daqshekk iebes,” tgħid hi.

8:10 a.m. X’ħin tasal, Helen issib skrivanija se ssiefer bix-​xogħol. L-​inkwiet tagħha hu li jekk terġaʼ toħroġ tqila tistaʼ titlef l-​impjieg. Il-​paga tagħha hija bżonnjuża għall-​familja.

10:43 a.m. Helen tagħmel telefonata dwar it-​tfal. X’ħin tpoġġi t-​telefon f’postu, Nancy, seħbitha tax-​xogħol, tikkonslaha billi tgħidilha: “Veru qed tagħmel l-​aħjar li tistaʼ għalihom.” Helen jaqbżilha d-​dmugħ minn għajnejha.

12:05 p.m. Helen tiekol panina malajr u tirrifletti fuq iż-​żmien qabel ma twieldet l-​ewwel tifla tagħha. Dakinhar hi kellha ħafna proġetti mfasslin għal waqt il-​ħin “liberu” tagħha. ‘X’jiswa li qgħadt nippjana!’ hi tikkonkludi.

3:10 p.m. Wara diversi telefonati mid-​dar dwar il-​mutetti li jagħmel Alex, Helen issemmi r-​relazzjoni mill-​qrib u speċjali li tgawdi maż-​żgħar tagħha: “Qatt ma ħassejt din it-​tip taʼ mħabba.” Dawn is-​sentimenti profondi għenuha tegħleb id-​diffikultajiet mhux mistennija li nqalgħu fil-​bidu.

5:10 p.m. Wara li tmur għal Joanna l-​iskola, Helen tagħmel xi qadjiet. Iċċempel lil Nick biex tfakkru li kien imissu hu jgħaddi għal Penny.

6:00–7:30 p.m. Lura d-​dar, Helen tieħu ħsieb Alex wara ġurnata man-​nanna, tagħmel il-​faċendi tad-​dar, u tħejji l-​ikel. Meta tiġi mistoqsija dwar il-​bżonnijiet urġenti taʼ tarbija, Helen tieħu nifs ’il ġewwa u tgħid: “Tarbija tokrob għal ommha kollha kemm hi: tixxennaq għal dirgħajha, għal ġisimha, u għall-​ħalib, u tiħdilha l-​ħin mill-​irqad.”

8:30–10:00 p.m. Helen tgħin lil Joanna fil-​ħowmwerk u treddaʼ lil Alex. Waqt li Nick joqgħod jaqra maʼ Penny għal nofs siegħa, Helen tagħmel iktar faċendi tad-​dar.

11:15 p.m. Penny u Joanna diġà marru jorqdu imma Alex għadu mqajjem f’dirgħajn ommu. Fl-​aħħar jorqod. “Nistaʼ npoġġih fis-​sodda tiegħu issa,” Helen tgħid lil Nick, li diġà nofsu rieqed.