Ejja, Ismaʼ t-​Taħdita Pubblika

“Ix-​Xena taʼ Din id-​Dinja Qiegħda Tinbidel”

DAN HUWA ŻMIEN TAʼ TAQLIB KBIR. Ġrajjiet li qed jheżżu d-​dinja qed jiġru tant taʼ spiss li jaqtgħulek nifsek. Qatt tħossok li ma tistaʼ tagħmel xejn u tibqaʼ mbellah b’dan kollu​—li kulma hemm madwarek qed jinbidel f’daqqa waħda?

Il-Bibbja tagħmel din l-​osservazzjoni f’waqtha dwar l-​għemejjel tal-​bniedem: “Ix-​xena taʼ din id-​dinja qiegħda tinbidel.” (1 Korintin 7:​31, NW) L-​appostlu Pawlu, li kiteb dan il-​kliem, kien qed iqabbel il-​ġrajjiet tad-​dinja maʼ xeni li l-​ħin kollu jinbidlu fuq xi palk f’teatru. Matul l-​istorja tal-​bniedem, il-​ħakkiema tad-​dinja u dawk li jdaħħlu ideat ġodda jiġu u jmorru, il-​ġdid jieħu post il-​qadim, b’mod ripetut. Iżda fi żmienna​—speċjalment minn dik is-​sena kruċjali taʼ l-​1914—il-​proċess jidher li ħaffef il-​pass.

Iżda, kont taf li dawn il-​problemi dinjin​—anki dawk l-​iktar reċenti​—ifissru wkoll aħbar tajba għall-​umanità? Iva, dawn jagħtu prova li x-​xena tad-​dinja dalwaqt se tinbidel għall-​aħjar. Ħafna żmien ilu l-​Bibbja bassret in-​niket kbir li kellu jkun hawn fi żmienna. Tispjega wkoll li dan it-​taqlib kollu huwa biss introduzzjoni għall-​akbar bidla li qatt se teffettwa lis-​soċjetà umana kollha. Dan it-​taqlib f’daqqa li riesaq, jidher kemm jidher tal-​biżaʼ, huwa fil-​fatt l-​aħjar aħbar għan-​nies twajbin kullimkien. Ix-​xena taʼ din id-​dinja se tinbidel f’waħda taʼ paċi u hena għall-​familja umana.

Tixtieq tkun taf iktar dwar dawn il-​bidliet u kif tispjegahom il-​Bibbja? Aħna nistidnuk minn qalbna biex tattendi għat-​taħdita pubblika intitolata “Ix-​Xena taʼ Din id-​Dinja Qiegħda Tinbidel,” fil-​konvenzjonijiet distrettwali tax-​Xhieda taʼ Jehovah li se jibdew mill-​bidu taʼ dan ix-​xahar. Il-​konvenzjonijiet se jsiru f’mijiet taʼ postijiet madwar id-​dinja. Jekk tixtieq tkun taf fejn se ssir l-​eqreb konvenzjoni għalik, jekk jogħġbok agħmel kuntatt max-​Xhieda taʼ Jehovah fl-​inħawi tiegħek jew ara l-​ħarġa tal-​15 taʼ Frar, 2002, taʼ It-​Torri taʼ l-​Għassa.

[Stampa f’paġna 32]

Bomba atomika teqred lil Hiroshima, fl-​1945

[Sors]

USAF photo

[Stampa f’paġna 32]

Iwaqqgħu l-​ħajt taʼ Berlin, fl-​1989

[Sors]

AP Photo/Lionel Cironneau

[Stampa f’paġna 32]

It-​terroristi jattakkaw il-​World Trade Center fi New York, fl-​2001