Il-​Kura tat-​Trabi fl-​Istil tal-​Kangarù Soluzzjoni għal Meta l-​Ħajja Tkun Mhedda?

Il-​post kien sptar f’Bogotá, fil-​Kolumbja, fl-​1979. Ir-​rata taʼ trabi li jitwieldu qabel iż-​żmien u jibqgħu ħajjin kienet baxxa b’mod allarmanti, u għalhekk ċertu tabib Kolombjan ħareġ b’soluzzjoni ġdida u li mhux tas-​soltu—li jikkuraw lit-​trabi fl-​istil tal-​kangarù.

Hija sfida kbira għat-​tobba biex iżommu ħajjin lit-​trabi li jitwieldu qabel iż-​żmien. Ħafna drabi, it-​trabi li jitwieldu neqsin mill-​piż jitqiegħdu fis-​sħana ġewwa inkubatur, u jitħallew hemmhekk sakemm jiżdiedu fil-​piż. Madankollu, il-​pajjiżi li qed jiżviluppaw taʼ spiss ikollhom firxa allarmanti taʼ infezzjonijiet minħabba problemi bħan-​nuqqas taʼ spazju, kundizzjonijiet xejn tajbin taʼ iġjene, u nuqqas taʼ staff mediku u apparat.

Ċertu tabib fil-​Kolumbja ssuġġerixxa metodu li donnu jtaffi daqsxejn din il-​problema. Dan x’jinvolvi? Meta tarbija titwieled qabel iż-​żmien, din tingħata kura bħas-​soltu sakemm il-​kundizzjoni tagħha tkun iktar stabbli. Sadattant, l-​omm tingħata taħriġ fuq kif tieħu ħsieb lit-​tarbija tagħha. Meta t-​tarbija tkun b’saħħitha biżżejjed, l-​omm issir inkubatur ħaj. Kif? Billi tpoġġi lit-​tarbija f’pożizzjoni vertikali u torbotha bejn sidirha, u b’hekk iżżomm lit-​tarbija magħha kemm jistaʼ jkun. F’din l-​ispeċi taʼ borża bħal dik tal-​kangarù, it-​tarbija tkun protetta, sħuna, u tkun tistaʼ tingħata l-​ħalib taʼ l-​omm. Huwa għalhekk li dan il-​metodu taʼ spiss jissejjaħ il-​kura tat-​trabi fl-​istil tal-​kangarù.

M’huwa meħtieġ l-​ebda apparat li jiswa l-​flus. L-​omm tilbes qmis addattata jew libsa normali b’terħa mal-​qadd. Meta t-​tarbija tkun kisbet piż biżżejjed, l-​omm u t-​tarbija jkunu jistgħu jirritornaw id-​dar. Kulma jkun jonqos hu li jmorru l-​isptar regolarment għal eżami mediku.

L-istudji li saru qabel jindikaw li din il-​kura hija effettiva u mingħajr periklu. Iżjed minn hekk, donnha ssaħħaħ iktar ir-​rabta bejn l-​omm u t-​tarbija tagħha. M’għandniex għalfejn niskantaw li dan il-​metodu qed jiġi użat f’ħafna pajjiżi. Fil-​Messiku, il-​missirijiet, in-​nanniet, u saħansitra l-​aħwa qed jiġu mħarrġin biex jagħmluha taʼ “kangarù” biex b’hekk ikunu jistgħu jgħinu lill-​omm meta, bix-​xieraq, din tkun trid tistrieħ daqsxejn. It-​Tabiba Guadalupe Santos, li tieħu ħsieb programm taʼ kura taʼ dan it-​tip fil-​Messiku, qalet lil Stenbaħ!: “Ilna nużaw dan il-​metodu mill-​1992 u rajna kemm huwa effettiv. Jinħtieġu inqas inkubaturi u ferm inqas ħin l-​isptar.”