Il-​Pulizija X’Inhu l-​Futur Tagħhom?

X’AKTARX li mingħajr pulizija jkollna anarkija. Imma anki bil-​pulizija, hija d-​dinja tagħna ħielsa minn kull periklu? F’ħafna bliet illum, bħal f’ħafna postijiet rurali, jeżisti sens taʼ kriżi rigward is-​sigurtà. Nistgħu nistennew li l-​pulizija jsalvawna mill-​kriminalità organizzata u minn kriminali reċidivi? Nistgħu nistennew li l-​pulizija jeliminaw kull periklu mit-​toroq tagħna? Se jirbħuha l-​ġlieda kontra l-​kriminalità?

David Bayley juri x’jaħseb fil-​ktieb tiegħu Police for the Future. Hu jgħid li l-​pulizija ma jistgħux iwaqqfu l-​kriminalità. Hu jżid li l-​pulizija fil-​fatt huma rimedju taʼ malajr għall-​kanċer, u li aħna ma nistgħux nistrieħu fuqhom, anki jekk ikunu dedikati fix-​xogħol tagħhom li jeħilsu s-​soċjetà mill-​kriminalità. L-​istudji wrew li t-​tliet attivitajiet prinċipali li għandhom il-​pulizija—jagħmlu r-​rondi fit-​toroq, iwieġbu għas-​sejħiet taʼ emerġenza, u jinvestigaw atti kriminali—ma jwaqqfux il-​kriminalità. Għala?

Li tipprova twaqqaf il-​kriminalità billi jkollok iżjed pulizija preżenti jinvolvi spejjeż kbar wisq. Il-​kriminali donnhom ma tantx jinnotaw jew jagħtu kas taż-​żjidiet fir-​rondi, jekk dawn ikunu jistgħu jiġu affordjati. Lanqas l-​azzjoni fil-​pront tal-​pulizija ma tant tnaffarhom. Il-​pulizija rrapportaw li sakemm ma jaslux fuq il-​post f’inqas minn minuta, ikun diffiċli li jaqbdu l-​ħati. Il-​kriminali qishom jafu li ħeffa bħal din hija rari. Lanqas l-​investigazzjoni ma tgħin. Anki meta l-​pulizija jirnexxilhom jaqbdu l-​kriminali u jitfgħuhom il-​ħabs, milli jidher dan ma jwaqqafx il-​kriminalità. L-​Istati Uniti hija l-​iktar pajjiż li jitfaʼ nies il-​ħabs, iżda xorta waħda għandha rata għolja ferm taʼ kriminalità. Mill-​banda l-​oħra, il-​Ġappun għandu inqas nies il-​ħabs, u għandu waħda mill-​iktar rati baxxi. Saħansitra skemi bħan-​neighborhood watch ma tantx urew li kellhom effett fit-​tul, speċjalment f’żoni fejn isiru ħafna atti kriminali. Meta jittieħdu miżuri ħorox kontra reati speċifiċi, bħat-​traffikar tad-​drogi u s-​serq, dawn iħallu effett qawwi għal ftit żmien, imma mbagħad, għal darb’oħra, l-​effett ma jdumx wisq.

“In-​nies li joqogħdu jaħsbu ftit m’għandhomx għalfejn jiħduha bi kbira li l-​pulizija ma jistgħux iwaqqfu l-​kriminalità,” jgħid il-​ktieb Police for the Future. “Fil-​biċċa l-​kbira, kulħadd jifhem li l-​kundizzjonijiet soċjali li m’humiex fil-​kontroll tal-​pulizija, u lanqas fil-​kontroll tas-​sistema tal-​ġustizzja kriminali kollha kemm hi, jiddeterminaw il-​livell tal-​kriminalità fil-​komunitajiet.”

X’Jiġri jekk Ma Jkunx Hawn Pulizija?

Kif taġixxi jekk ma jkun hemm l-​ebda pulizija jarak? Tieħu int vantaġġ mill-​fatt li m’humiex preżenti biex tikser il-​liġi? Huwa sorprendenti kemm hawn nies rispettabbli mill-​hekk imsejħin klassi għolja u medja li lesti li jirriskjaw ir-​reputazzjoni u l-​futur tagħhom għall-​benefiċċji inċerti li toffri l-​kriminalità fil-​qasam amministrattiv. The New York Times dan l-​aħħar irrapportat dwar ‘112-il ruħ li ġew mixlijin bi frodi, li ntqal li kienu mdaħħlin fi skema biex iqarrqu bil-​kumpaniji taʼ l-​assigurazzjoni tal-​karozzi. Fost dawk akkużati kien hemm avukati, tobba, kiropratiki, fiżjoterapista, agupunturista, u assistenta fl-​amministrazzjoni taʼ Dipartiment tal-​Pulizija.’

Dan l-​aħħar, każ ieħor taʼ frodi fuq skala tassew kbira xxokkja l-​patruni sinjuri tad-​dinja artistika. Dan kien meta l-​amministraturi ewlenin li kellhom qabel Sotheby’s taʼ New York u Christie’s taʼ Londra (kumpaniji taʼ l-​irkant) instabu ħatja li bagħbsu l-​prezzijiet. Dawn l-​amministraturi u l-​kumpaniji tagħhom ġew imġagħlin iħallsu maʼ Lm324 miljun f’multi u rikompensi! Għalhekk, il-​kilba għall-​flus tolqot lil kull klassi tas-​soċjetà.

Dak li ġara fl-​1997 f’Recife, il-​Brażil, meta l-​pulizija ħarġu fuq strajk, juri li ħafna nies malajr iduru għall-​kriminalità meta ma jkun hemm xejn xi jżommhom. Kwalunkwe konvinzjonijiet reliġjużi li jistaʼ jkollhom ma jħallu l-​ebda effett fuq il-​kondotta tagħhom. Huma jistgħu faċilment isiru dgħajfa jew jabbandunaw l-​etika u l-​prinċipji. Mela, mhux taʼ b’xejn li l-​pulizija f’ħafna pajjiżi qed jiġġieldu battalja li ma jistgħux jirbħuha f’dinja inklinata għall-​ksur tal-​liġi, sew f’affarijiet żgħar kif ukoll f’affarijiet kbar.

Mill-banda l-​oħra, xi nies jobdu l-​liġijiet għaliex għandhom rispett lejn l-​awtorità. L-​appostlu Pawlu qal lill-​Kristjani f’Ruma li huma għandhom ikunu sottomessi lejn l-​awtoritajiet li Alla jippermetti li jeżistu, ladarba dawn għallinqas iżommu daqsxejn taʼ ordni fis-​soċjetà. Dwar dawn l-​awtoritajiet hu kiteb: “Hu l-​ministru taʼ Alla biex jikkastiga u jitħallas minn min jagħmel il-​ħażen. Għalhekk jeħtieġ li toqogħdu għall-​awtoritajiet, mhux biss minħabba l-​korla, imma wkoll minħabba l-​kuxjenza.”—Rumani 13:​4, 5.

Tibdil fil-​Kundizzjonijiet Soċjali

Ix-​xogħol tal-​pulizija ċertament li jgħin biex jitjiebu l-​kundizzjonijiet soċjali. Meta fit-​toroq ma jkunx hemm iktar drogi u vjolenza, in-​nies iħabirku iżjed biex jgħixu fi qbil mar-​reputazzjoni mtejba tal-​komunità. Imma fil-​verità, ir-​riforma tas-​soċjetà m’hijiex fil-​kapaċità tal-​pulizija.

Tistaʼ timmaġina soċjetà fejn in-​nies tant ikollhom rispett għal-​liġi li ma jkollhomx bżonn pulizija? Tistaʼ ġġib quddiem għajnejk dinja fejn in-​nies tant għandhom interess f’xulxin li l-​ġirien huma dejjem lesti li jgħinu u ħadd ma jkollu għalfejn iċempel lill-​pulizija għall-​għajnuna? Forsi dan jidher biss ħolma. Imma l-​kliem taʼ Ġesù, għalkemm intqal f’kuntest ieħor, żgur japplika. Hu qal: “Għall-​bnedmin dan ma jistax ikun: għal Alla kollox jistaʼ jkun.”—Mattew 19:26.

Il-Bibbja tiddeskrivi żmien fil-​futur meta l-​umanità kollha se tkun suġġetta għal gvern imwaqqaf minn Alla Jehovah. “Alla tas-​sema jqajjem saltna . . . Hija tfarrak u ttemm is-​saltniet l-​oħra kollha.” (Danjel 2:44) Billi jgħallem lin-​nies sinċieri kollha fit-​triqat mimlija mħabba t’Alla, dan il-​gvern ġdid se jbiddel il-​kundizzjonijiet soċjali li jġibu l-​kriminalità. “L-​art [tkun mimlija] bl-​għarfien tal-​Mulej bħalma l-​baħar hu miksi bl-​ilmijiet.” (Isaija 11:9) Is-​Sultan taʼ Jehovah, Ġesù Kristu, se jkun kapaċi jwaqqaf kull att kriminali. “Ma jiġġudikax skond ma jidher fl-​għajnejn, u ma jagħtix sentenza skond ma jismaʼ, iżda jiġġudika l-​imsejknin skond il-​ġustizzja, u jagħti sentenza skond is-​sewwa lill-​fqajrin taʼ l-​art.”—Isaija 11:​3, 4.

La se jkun hemm kriminali u lanqas kriminalità. Il-​pulizija mhux se jkunu meħtieġa iżjed. Kulħadd se jkun jistaʼ joqgħod “taħt id-​dielja tiegħu, u taħt is-​siġra tat-​tin tiegħu; u ma jkunx hemm min iwerwirhom.” (Mikea 4:4) Jekk tixtieq tkun parti mid-​dinja ġdida deskritta fil-​Bibbja, issa huwa ż-​żmien li tinvestiga dak li wiegħed Alla fil-​Kelma tiegħu.—2 Pietru 3:13.

[Kumment f’paġna 12]

Tistaʼ timmaġina soċjetà fejn in-​nies tant ikollhom rispett għal-​liġi li ma jkollhomx bżonn pulizija?

[Kumment f’paġna 12]

La se jkun hemm kriminali u lanqas kriminalità

[Kaxxa f’paġna 11]

Il-​Pulizija Kontra t-​Terroristi

Bħalma wrew il-​ġrajjiet tal-​11 taʼ Settembru, 2001, fil-​Belt taʼ New York u Washington, D.C., il-​pirati taʼ l-​ajru, uħud li jżommu n-​nies ostaġġi, u t-​terroristi jippreżentaw lill-​pulizija b’xi ftit mill-​iktar sfidi diffiċli fil-​ħarsien tal-​pubbliku. Skwadri speċjali f’ħafna partijiet tad-​dinja ġew imħarrġin biex jidħlu f’leħħa taʼ berqa ġo ajruplani pparkjati u jiħduhom taħt idejhom. Huma tgħallmu wkoll it-​teknika taʼ li jidħlu f’binja għal għarrieda, billi jinżlu bil-​ħbula minn fuq il-​bjut, jidħlu mit-​twieqi, iwaddbu granati li jġagħlu lil dak li jkun jintilef minn sensih, u jitfgħu l-​gass tad-​dmugħ. Uffiċjali mħarrġin bħal dawn irnexxielhom ħafna drabi jissorprendu u jegħlbu t-​terroristi bl-​inqas periklu għall-​ostaġġi.

[Sors]

James R. Tourtellotte/U.S. Customs Service

[Stampa f’paġna 12]

Oġġetti li mhux se jkunu meħtieġa iżjed fid-​dinja l-​ġdida t’Alla