Il-​Logħob tal-​Flus—Isaħħar lil Kulħadd

JOHN, li trabba l-​Iskozja, kien joħlom li xi darba jirbaħ il-​lotterija. “Kont nixtri biljett tal-​lotterija kull ġimgħa,” jgħid hu. “Ma tantx kien jiswieli flus, imma dak il-​biljett kien jagħtini t-​tama li nikseb kulma kont nixtieq.”

Kazushige, li jgħix il-​Ġappun, kien iħobb it-​tiġrijiet taż-​żwiemel. “Tgħidx kemm kont nieħu pjaċir nilgħab il-​flus maʼ sħabi f’dawn it-​tiġrijiet, u kultant kont nirbaħ somom kbar taʼ flus,” jiftakar hu.

“It-​tombla kienet il-​logħba favorita tiegħi,” tgħid Linda, li tgħix l-​Awstralja. “Dan il-​vizzju kien jiswieli madwar 14-il lira Maltija, imma l-​eċċitament taʼ meta nirbaħ kont veru nħobbu.”

John, Kazushige, u Linda kienu jħarsu lejn il-​logħob tal-​flus bħala għamla taʼ divertiment li ma tantx tagħmel ħsara. Mijiet taʼ miljuni taʼ nies madwar il-​globu għandhom l-​istess ħarsa. Stħarriġ li sar fl-​1999 wera li tnejn minn kull tliet Amerikani huma favur il-​logħob tal-​flus. Fl-​1998, l-​Amerikani li jilagħbu l-​flus nefqu madwar Lm23 biljun fuq logħob tal-​flus legalizzat—iktar milli nefqu fuq biljetti tal-​films, mużika rekordjata, sport li jiġbed ħafna nies, parkijiet tad-​divertiment, u video games kollha f’daqqa.

Skond studju li sar dan l-​aħħar, f’perijodu taʼ sena, iktar minn 80 fil-​mija mill-​popolazzjoni Awstraljana lagħbu l-​flus mill-​inqas darba, u 40 fil-​mija minnhom lagħbu l-​flus kull ġimgħa. L-​adulti f’dan il-​pajjiż, bejn wieħed u ieħor, jonfqu iktar minn Lm180 fis-​sena fuq il-​logħob tal-​flus, madwar id-​doppju taʼ l-​ammont li jonfqu l-​Ewropej jew l-​Amerikani. B’hekk, l-​Awstraljani huma fost l-​iktar akkaniti għal-​logħob tal-​flus fid-​dinja.

Ħafna Ġappuniżi huma vizzjati bil-​pachinko, logħba qisha tal-​pinball, u jonfqu biljuni fis-​sena jilagħbu l-​imħatri fuq din il-​logħba. Fil-​Brażil, mill-​inqas jintefqu Lm1.8 biljuni kull sena fuq il-​logħob tal-​flus, u ħafna minnhom fuq biljetti tal-​lotterija. Imma l-​Brażiljani m’humiex l-​uniċi li jħobbu l-​lotteriji. Ir-​rivista Public Gaming International dan l-​aħħar ikkalkulat li hemm “306 lotteriji f’102 pajjiżi.” Il-​logħob tal-​flus verament isaħħar lil kulħadd—mhux hekk biss, jgħidu xi wħud, imma jġib ukoll benefiċċji kbar.

Sharon Sharp, rappreżentanta tal-​Public Gaming Research Institute, tgħid li fl-​Istati Uniti, mill-​1964 sa l-​1999, id-​dħul mil-​lotteriji “ammonta għal madwar Lm57 biljun mill-​budget taʼ l-​istat, u l-​akbar parti minn dan id-​dħul daħlet mill-​1993 ’l hawn.” Ħafna minn dawn il-​flus kienu pjanati biex imorru għal programmi t’edukazzjoni għall-​pubbliku, parkijiet taʼ l-​istat, u l-​iżvilupp taʼ faċilitajiet sportivi għall-​pubbliku. L-​industrija tal-​logħob tal-​flus tħaddem ukoll ħafna nies, u fl-​Awstralja biss, timpjega madwar 100,000 ruħ f’iktar minn 7,000 negozju.

B’hekk, dawk li huma favur il-​logħob tal-​flus jargumentaw li minbarra li jipprovdi divertiment, il-​logħob tal-​flus legalizzat joħloq impjiegi, jipprovdi dħul mit-​taxxi, u jtejjeb l-​ekonomiji lokali li jkunu batuti ħafna.

Għalhekk, ħafna nies jistaqsu, ‘X’hemm ħażin fil-​logħob tal-​flus?’ It-​tweġiba għal din il-​mistoqsija, li se tiġi diskussa fl-​artikli li ġejjin, tistaʼ tbiddillek il-​ħarsa lejn il-​logħob tal-​flus.

[Stampa f’paġna 3]

John

[Stampa f’paġna 3]

Kazushige

[Stampa f’paġna 3]

Linda