Hemm Werqa fl-​Għanqbuta!

MINN KITTIEB GĦAL STENBAĦ! FL-​AWSTRALJA

QED taraha l-​werqa niexfa u romblata sew? Innota li hi mdendla f’għanqbuta. Maʼ l-​ewwel daqqa t’għajn, tistaʼ tidher li qiegħda fl-​għanqbuta għax taret bir-​riħ. Imma hemm xi ħaġa speċjali dwar din il-​werqa.

Quddiemek għandek id-​dar unika tal-​brimba tal-​werqa romblata—ħlejqa tassew taʼ l-​għaġeb. Din il-​brimba biss hija magħrufa li tagħmel id-​dar tagħha billi tirrombla werqa u tiksiha minn ġewwa bil-​ħarir, l-​istess materjal li tuża’ biex tagħmel l-​għanqbuta. Imma tuża l-​brimba sempliċement werqa li b’kumbinazzjoni tkun taret fl-​għanqbuta? Għandu mnejn li hekk jidher. Imma jekk neżaminawha mill-​qrib se naraw b’mod ċar li l-​werqa qiegħda hemm bi ħsieb. Il-​brimba tagħżel werqa bir-​reqqa, forsi minn dawk li jkun hemm taħtha maʼ l-​art. Meta l-​brimba tkun għamlet il-​werqa romblu, torbotha sew bi ħjut tal-​ħarir biex ma tinħallx.

Madankollu, dan il-​brimb m’huwiex limitat f’li juża werqa bħala d-​dar tiegħu. Fil-​btieħi tad-​djar taʼ xi bliet, taʼ spiss din il-​brimba tuża’ biċċiet tal-​gazzetti, kartun ħafif, jew biljetti tad-​dħul mormijin. Ħaġa taʼ l-​iskantament, din tistaʼ tagħżel ukoll qoxra vojta taʼ bebbuxu. F’każ minnhom, il-​qoxra kienet sitt darbiet itqal mill-​brimba li ġarritha lejn l-​għanqbuta u għexet fiha!

Immaġina li qed niċċekkjaw jekk bħalissa l-​brimba tagħna hix id-​dar fil-​werqa tagħha. Intektku ftit fuq il-​werqa. Hemm qiegħda! Qed taraha? Brimba żgħira kulurita nieżla minn fuq il-​werqa bil-​ħabel tal-​ħarir lejn l-​art. Tinkwieta xejn! M’hemmx periklu. Din l-​ispeċi taʼ brimba ma tagħmillux ħsara lill-​bniedem, għalkemm jistaʼ jkun li toqroslok sebgħek jekk tmissha bil-​goff.

Matul il-​ġurnata, il-​brimba tal-​werqa romblata ġeneralment tqattaʼ l-​ħin tistrieħ ġewwa d-​dar tagħha fil-​werqa. Imma bil-​lejl, meta jkun hemm iktar insetti jduru, tistaʼ taraha preparata għall-​attakk fid-​daħla tal-​werqa tagħha. Minn din il-​pożizzjoni, hi tgħasses bir-​reqqa l-​għanqbuta tagħha billi sserraħ sieq minnhom fuq ħajta speċjali tal-​ħarir li tibda mill-​werqa u tasal sal-​parti ċentrali taʼ l-​għanqbuta. Jekk insett jolqot l-​għanqbuta, il-​brimba titlaq tiġri mill-​ewwel lejh, ma tħallihx jiċċaqlaq minn postu, u mbagħad tieklu.

Din il-​bennejja żgħira intelliġenti hi biss waħda mill-​ħafna ħlejjaq taʼ l-​għaġeb fix-​xagħri Awstraljan.