L-​Imħabba fl-​Azzjoni—Maratona taʼ Xogħol t’Għajnuna

RICHARD VARA, editur taʼ l-​esperjenza għall-​Houston Chronicle, ma jimpressjonax ruħu malajr, imma s-​sena l-​oħra baqaʼ b’ħalqu miftuħ. “Qatt ma rajt xi ħaġa bħal din!” esklama hu. “Ma nistax nemmen.” Lee P. Brown, is-​sindku taʼ Houston, Texas fl-​Istati Uniti, ħassu l-​istess. Hu qal: “Nixtieq li kieku kulħadd fi Houston setaʼ jara x’għamiltu. Bqajt impressjonat ferm.” Dwar xiex kienu qed jgħaddu dawn il-​kummenti? L-​editur u s-​sindku kienu qed jikkummentaw dwar xogħol t’għajnuna li sar mix-​Xhieda taʼ Jehovah fi Houston. Dan ix-​xogħol x’involva? Għala kien meħtieġ? U għala ħalla impressjoni daqshekk kbira? Biex insiru nafu, ejja nibdew mill-​bidu.

L-​Agħar Dilluvju li Qatt Seħħ

Kmieni f’Ġunju taʼ l-​2001, maltempata tropikali qawwija bl-​isem taʼ Allison laqtet bl-​ikrah lil inħawi watjin fix-​xlokk taʼ Texas. Fi tmiemha, il-​Ġimgħa, 8 taʼ Ġunju, fi żmien 24 siegħa, Allison tefgħet metru taʼ xita qawwija fuq Houston—ir-​rabaʼ l-​akbar belt tal-​pajjiż.a Fi ftit żmien, l-​ilma li kien dejjem tielaʼ daħal jiġri fil-​ħwienet, fl-​uffiċċji, u f’għaxriet t’eluf taʼ djar. It-​toroq kbar u wesgħin taʼ madwar il-​belt saru xmajjar qawwija, u għattew il-​vetturi abbandunati u t-​trakkijiet kbar. Minħabba l-​livell għoli taʼ l-​ilma, kien impossibbli saħansitra għat-​trakkijiet tat-​tifi tan-​nar u vetturi oħrajn taʼ salvataġġ biex jgħaddu minn ċerti toroq mgħarrqin. Biex isalvaw lin-​nies, bdew jintużaw il-​ħelikopters u l-​vetturi militari b’saħħithom ħafna.

Finalment, meta t-​Tnejn, 11 taʼ Ġunju, l-​ajru fetaħ għajnu, il-​ħsara kbira u l-​imwiet li kkaġunat Allison bdew jidhru b’mod ċar. Tnejn u għoxrin ruħ kienu tilfu ħajjithom, inkluż tnejn mix-​Xhieda taʼ Jehovah: Jeffrey Green, anzjan Kristjan, u oħt il-​mara tiegħu Frieda Willis.b Iktar minn hekk, xi 70,000 dar sofrew ħsarat. Minħabba f’hekk, dan id-​dilluvju sar wieħed mill-​agħar diżastri naturali li qatt laqtu ċ-​ċentru kbir taʼ xi belt. Fil-​fatt, Allison saret l-​iktar maltempata tropikali li swiet flus fl-​istorja taʼ l-​Istati Uniti, peress li kkaġunat kważi Lm2 biljun fi ħsarat taʼ propjetà.

Dilluvju taʼ Volontieri

In-​nies kienu xxokkjati. Ħaddiem wieħed li ta l-​għajnuna qal: “Is-​sodod tagħhom kienu għasra. It-​twapet kienu mxarrbin. Ir-​ritratti tal-​familja kienu sparixxew.” Ħafna mis-​16,000 Xhud taʼ Jehovah u iktar fl-​inħawi taʼ Houston ġarrbu telf t’affarijiet. Tmien Swali tas-​Saltna u mijiet taʼ djar tax-​Xhieda saritilhom il-​ħsara. Xi wħud minn dawn id-​djar daħlilhom ċentimetri taʼ ilma; oħrajn kellhom ilma sas-​saqaf taʼ fuqnett. B’kollox, ġew effettwati iktar minn 80 kongregazzjoni tax-​Xhieda taʼ Jehovah. Madankollu, dawn il-​vittmi ma tħallewx ifendu għal rashom. Ftit jiem wara kien hemm dilluvju—imma din id-​darba taʼ volontieri—li ġie biex jagħti l-​għajnuna. Dan kif ġara?

Saħansitra qabel ma l-​ilmijiet bdew ibattu, l-​anzjani Kristjani tal-​kongregazzjonijiet tax-​Xhieda taʼ Jehovah fi Houston malajr bdew jieħdu azzjoni. “Ċempilna lil ħutna u morna narawhom,” qal wieħed mill-​anzjani. “Imbagħad ikkalkulajna kemm kienet kbira l-​ħsara, u sat-​Tnejn, 11 taʼ Ġunju, konna għamilna rapport sħiħ li kien fih l-​ismijiet tal-​vittmi, in-​numru taʼ djar bil-​ħsara, u kemm kienet kbira l-​ħsara. Dan intbagħat lill-​kwartieri ġenerali tax-​Xhieda taʼ Jehovah fi Brooklyn, New York.” Ftit jiem wara, l-​uffiċċju tal-​fergħa tax-​Xhieda taʼ Jehovah fl-​Istati Uniti waqqaf kumitat għall-​għajnuna magħmul minn tmien anzjani Kristjani minn Houston u pprovda fondi għall-​għajnuna. X’kellu jagħmel il-​kumitat? Kellu jgħin lill-​vittmi jirkupraw emozzjonalment u wkoll isewwi d-​djar tax-​Xhieda li kellhom il-​ħsara—iktar minn 700 dar!

‘Kif nistgħu nwettqu din il-​biċċa xogħol kbira ferm?’ ħasbu l-​membri tal-​Kumitat għall-​Għajnuna fi Houston 2001 tax-​Xhieda taʼ Jehovah li kien għadu kemm ġie fformat. Dawn qattgħu sigħat twal fil-​għaxija jipprovaw joħorġu bl-​ewwel pjan u stiednu lil iktar minn 160 kongregazzjoni tax-​Xhieda fl-​inħawi taʼ Houston biex jgħinu. “Ir-​reazzjoni kienet taʼ l-​għaġeb,” qal iċ-​chairman tal-​kumitat. “Iktar minn 11,000 Xhud offrew ruħhom, offrew il-​ħin, ix-​xogħol, u s-​snajjaʼ tagħhom bla ħlas.”

Il-​Moffa Kontra l-​Volontieri

Ftit jiem wara d-​dilluvju, il-​volontieri marru jaħdmu fid-​djar tal-​vittmi, ineħħu t-​twapet għasra, l-​art imħarbta tal-​kmamar, il-​ħitan irvinati, il-​kċina mxarrba kollha, il-​bibien imbewqin, u kulma kien sarlu l-​ħsara mill-​ilma taʼ l-​għargħar li kien imniġġes bid-​drenaġġ. “Konna inkwetati mhux biss dwar li nsewwu d-​djar taʼ ħutna,” qal volontier wieħed, “imma wkoll dwar li nieħdu ħsieb saħħithom.” Peress li l-​moffa tossika malajr kienet se tibda ħierġa wara l-​ħitan u ġewwa l-​armarji, id-​djar l-​ewwel riedu jiġu diżinfettati sewwa.

Biex jitgħallmu kif jagħmlu din il-​biċċa xogħol bla periklu, diversi Xhieda talbu taħriġ mill-​Aġenzija Federali għall-​Immaniġġar taʼ l-​Emerġenza (Federal Emergency Management Agency [FEMA]), aġenzija tal-​gvern li tispeċjalizza f’li jiġu trattati d-​diżastri. Wara dan, kull Xhud li kien tħarreġ mill-​FEMA stieden għaxar volontieri biex imorru miegħu f’dar li kienet saritilha l-​ħsara, fejn hemmhekk għallimhom kif jiddiżinfettaw id-​dar kif suppost. Il-​ġurnata taʼ wara, kull wieħed mill-​għaxar volontieri li kienu għadhom kemm ġew imħarrġin kien jieħu jerġaʼ għaxar volontieri oħra miegħu. “Fi ftit jiem,” irrakkonta volontier wieħed, “in-​numru taʼ dawk li kienu jafu kif jagħmlu dan kiber għal diversi mijiet.” Il-​moffa li kienet qed tinfirex ma setgħetx tlaħħaq man-​numru li dejjem kien qed jiżdied taʼ volontieri! Dawk li rtiraw mix-​xogħol u l-​adolexxenti li kienu bil-​vaganzi taʼ l-​iskola kienu jaħdmu matul il-​ġurnata. Bil-​lejl, volontieri oħra kienu jieħdu l-​affarijiet f’idejhom u jkomplu bix-​xogħol huma. Fi żmien sitt ġimgħat id-​djar kollha tax-​Xhieda li kienu kontaminati issa tnaddfu u kienu bla periklu.

Ċentru Amministrattiv u Sebaʼ Ċentri Reġjonali Iżgħar

Sadanittant, il-​kumitat għall-​għajnuna xtara ammonti kbar taʼ plasterbord u tunnellati taʼ materjal ieħor għall-​bini. Imma dan kollu fejn setaʼ jinħażen? “Meta l-​maniġer taʼ kumpanija sar jaf dwar dak li kellna bżonn,” qal il-​kelliemi tal-​kumitat għall-​għajnuna, “hu offrielna li nużaw maħżen—bi spazju taʼ 5,000 metru kwadru t’art—bla ħlas!” Minbarra li setgħu jintrefgħu fih l-​affarijiet tal-​bini, fil-​maħżen kien hemm ukoll spazju għal uffiċċji. Dan ma damx wisq ma sar iċ-​ċentru amministrattiv għax-​xogħol t’għajnuna, fejn madwar 200 sa 300 volontier ħadmu lejl u nhar, u anki fi tmiem il-​ġimgħa.

Ladarba d-​djar li kienet saritilhom il-​ħsara kienu mferrxin f’żona kbira, twaqqfu ċentri reġjonali għall-​għajnuna f’sebaʼ Swali tas-​Saltna. Fi tmiem il-​ġimgħa kull wieħed minn dawn iċ-​ċentri kien jimtela bil-​volontieri. (Ara l-​kaxxa “Ċentru t’Attività.”) Ħafna minnhom kienu ħadmu qabel flimkien fil-​bini tas-​Swali tas-​Saltna f’dak ir-​reġjun. Fil-​fatt, volontieri b’xi sengħa fil-​bini minn 11-il Kumitat Reġjonali tal-​Bini f’Arkansas, Louisiana, Oklahoma, u Texas taw l-​għajnuna tagħhom.c F’kull ċentru minn dawn kien hemm mastrudaxxi, bajjada, plamers, u ħaddiema oħra tas-​sengħa li ħadu t-​tmexxija fix-​xogħol u ħarrġu lil oħrajn.—Ara l-​kaxxa “Programmi taʼ Taħriġ.”

Pjan u Ġabra taʼ Informazzjoni

Il-​volontieri segwew pjan għal bini f’sebaʼ fażijiet differenti. Il-​materjal tal-​bini tqassam lejn id-​djar f’erbaʼ konsenji, u x-​xogħol taʼ tiswija f’kull dar kien pjanat li jsir fi tliet Sibtijiet u Ħdud. B’dan il-​mod, ix-​xogħol kollu t’għajnuna kellu jitlesta f’madwar sitt xhur.

Biex dan il-​pjan jirnexxi, il-​kumitat waqqaf 22 dipartiment li kienu jinkludu dawk tal-​loġistika, tax-​xiri, taʼ l-​akkomodazzjoni, u tal-​ġarr bit-​trakkijiet. Id-​dipartimenti kollha ġew megħjunin bl-​informazzjoni kbira li nġabret u li ġiet organizzata mill-​volontieri b’tali mod li setgħet tinstab malajr fuq il-​kompjuter. Qabel ma beda x-​xogħol taʼ tiswija, il-​volontieri qattgħu għaxart ijiem idaħħlu l-​informazzjoni fil-​kompjuter. “Kienet maratona biex tiddaħħal l-​informazzjoni,” innota rapport taʼ l-​aħbarijiet. Madankollu, fi tmiem din il-​“maratona,” kien hemm disponibbli ġabra taʼ fatti utli. Malli wieħed kien jikklikkja l-​mouse, mill-​ġabra taʼ informazzjoni kien jistaʼ jara meta l-​11,000 volontier kienu se jkunu disponibbli, liema snajjaʼ kellhom, u kif setgħu jiġu kuntattjati. U meta jerġaʼ jikklikkja jara fejn waslu t-​tiswijiet, x’permessi kien hemm bżonn għall-​bini, u dettalji oħra tad-​djar li kienet saritilhom il-​ħsara. Din il-​ġabra taʼ informazzjoni saret magħrufa bħala “l-​qalba tax-​xogħol t’għajnuna.”

Impressjonati u Grati

Ċertu volontieri marru jaraw id-​djar li ma kellhomx moffa u li kienu xotti biex jiddeterminaw x’kienet tirrikjedi t-​tiswija tal-​ħsara. “Dawn il-​volontieri kienu jikkalkulaw il-​materjal anki sa kemm-il musmar kien hemm bżonn,” ikkummenta l-​kelliemi. “Ma ridna naħlu xejn mill-​fondi jew mill-​materjal li ngħata b’donazzjoni.” Fl-​istess ħin, volontieri oħrajn kisbu l-​permessi meħtieġa għall-​bini mill-​uffiċjali tal-​belt.

Imbagħad, il-​familji li ntlaqtu mill-​għargħar ġew mistidnin imorru fil-​maħżen biex jagħżlu minn selezzjoni limitata taʼ tapiti, armarji, materjal li wieħed jistaʼ jiksi l-​art bih, u affarijiet oħra biex jieħdu post dawk li tilfu. Il-​vittmi taʼ l-​għargħar baqgħu impressjonati ferm u taʼ spiss kienu jibku meta jaraw dak kollu li ġie provdut għalihom. Il-​vittmi rċivew ukoll pariri mill-​volontieri bl-​esperjenza f’affarijiet t’assigurazzjoni u direttivi tal-​gvern. Imbagħad, saru pjanijiet għal meta kellhom isiru t-​tiswijiet fid-​djar, u dakinhar eżatt li t-​timijiet tat-​tiswijiet kellhom bżonn il-​materjal tal-​bini, il-​volontieri li kienu jsuqu t-​trakkijiet kienu jwassluhomlhom. Raġel mhux Xhud li daru kienet qed tissewwa mill-​ħsara qal lil martu li kienet Xhud: “Ħutek huma taʼ l-​għaġeb. Grupp wieħed jitlaq, u ieħor jiġi sparat. Jaħdmu iebes ħafna!”

It-tiswijiet bażiċi ħadu madwar tliet Sibtijiet u Ħdud għal kull dar. “Iżda xi drabi kienu jieħdu xi ħames ġimgħat jew tmienja,” qal iċ-​chairman tal-​kumitat. Meta tneħħew il-​ħitan fid-​djar antiki, taʼ spiss il-​volontieri kienu jinnotaw ħsara li kienet ilha teżisti, u ma ridux iqiegħdu l-​ħitan ġodda mingħajr maʼ l-​ewwel jirranġaw il-​problemi antiki. Wieħed mill-​volontieri tas-​sengħa qal: “Xi drabi konna naraw li l-​pilastri kienu invażati bin-​nemel abjad, allura konna nkunu ċerti li dan kien jiġi meqrud. Għamilna ħafna xogħol fuq l-​istruttura biex nirranġaw l-​affarijiet. Id-​djar ħallejniehom f’qagħda tajba.” Vittma taʼ l-​għargħar, irrifletta s-​sentimenti taʼ ħafna minn dawn is-​sidien tad-​djar meta qal bi gratitudni lil wieħed viżitatur: “Id-​dar tiegħi issa hija aħjar minn meta xtrajtha!”

Ikliet Preparati u Servuti Malajr

Biex jipprovdu l-​ikel għall-​ħafna volontieri, grupp taʼ Xhieda bidlu maħżen wara Sala tas-​Saltna f’ċentru għall-​preparazzjoni u t-​tqassim taʼ l-​ikel. Ix-​Xhieda madwar il-​pajjiż taw friġġijiet, friżers, magni tal-​ħasil tal-​platti, kukers, u apparat ieħor tal-​kċina. Kull nhar taʼ Sibt u Ħadd, 11-il kok u xi 200 volontier ieħor kienu jippreparaw eluf taʼ ikliet fiċ-​ċentru. Il-​volontier li ħa ħsieb din il-​kċina qal: “Ilna nippreparaw ikliet matul il-​proġetti tal-​bini tas-​Swali tas-​Saltna għal 19-il sena, imma dan il-​proġett kien akbar milli qatt immaġinajna.”

L-ikliet ġew ippakkjati f’120 kontenitur kbir. Dawn tqiegħdu f’60 vettura li kienu qed jistennewhom, li kienu jqassmu l-​ikel fiċ-​ċentri reġjonali kollha u fiċ-​ċentru amministrattiv. Sadanittant, kull tim li kien qed jaħdem f’xi dar kien jibgħat volontier wieħed lejn iċ-​ċentru reġjonali li kienu taħtu biex imur jiġbor l-​ikel għat-​tim kollu. Il-​volontieri kienu jieklu fid-​djar u mbagħad imorru dritt għax-​xogħol.

Ix-​Xogħol Sar!

Fl-​aħħar, f’April 2002, il-​11,700 volontier waslu fi tmiem il-​maratona tagħhom, waħda mill-​itwal kampanji t’għajnuna li qatt wettqu x-​Xhieda taʼ Jehovah. Il-​volontieri qattgħu 1,000,000 siegħa jsewwu jew jibnu mill-​ġdid total taʼ 8 Swali tas-​Saltna u 723 dar. Wieħed mill-​vittmi taʼ l-​għargħar tkellem f’isem ħafna oħrajn meta mimli bi gratitudni qal bid-​dmugħ f’għajnejh: “Nirringrazzja lil Jehovah u l-​volontieri għall-​għajnuna kollha li taw. Huwa taʼ faraġ kbir li nkun parti minn fratellanza li għandha ħafna mħabba!”

[Noti taʼ taħt]

[Kaxxa/Stampa f’paġna 21]

ĊENTRU T’ATTIVITÀ

Huwa s-​Sibt, is–7:00 a.m., fiċ-​Ċentru Reġjonali Nru. 4 fil-​grigal taʼ Houston. Il-​volontieri qed jissieħbu flimkien fis-​Sala tas-​Saltna waqt li qed jitkellmu, jidħqu, jieħdu belgħa kafè u xi pasta. Xi wħud minnhom saqu mijiet taʼ kilometri mid-​dar tagħhom sa ma waslu hawn. Imma fis–7:30 a.m., l-​ilħna vivaċi jitbaxxew, u l-​indokratur taʼ dan iċ-​ċentru reġjonali jikkonduċi diskussjoni taʼ vers mill-​Bibbja. Hu jħabbar ukoll li l-​Istudju tat-​Torri taʼ l-​Għassa se jsir il-​Ħadd fis–7:30 a.m., qabel ma l-​volontieri jitilqu lejn il-​postijiet tagħhom tax-​xogħol, u jinkuraġġixxi lil kulħadd biex jieħu sehem fl-​istudju billi jikkummenta bl-​Ingliż jew bl-​Ispanjol. Hu jgħaddi messaġġ mill-​kwartieri ġenerali tax-​Xhieda taʼ Jehovah, li ntlaqaʼ b’applaws qawwi u twil.

L-​indokratur taʼ dan iċ-​ċentru mbagħad jaġġorna lil kulħadd dwar fiex wasal ix-​xogħol u jirringrazzja mill-​qalb lill-​volontieri għall-​ispirtu tagħhom li wrew billi kienu lesti joffru ruħhom. Hu jistaqsi: “Hawn xi ħadd li ma jafx fejn sejjer jew x’se jagħmel illum?” L-​ebda id ma tidher. “Kemm-il ikla għandna bżonn?” L-​idejn kollha telgħu sparati ’l fuq, u kulħadd jinfaqaʼ jidħaq. Finalment tintqal talba, u l-​250 volontier—irġiel, nisa, kbar u żgħar—jinsabu fi triqithom, lesti għal jum twil ieħor taʼ xogħol iebes.

L-​istess xena tiġri fis-​sitt ċentri reġjonali l-​oħra u fil-​maħżen. Sadanittant, il-​volontieri l-​oħra li qed jaħdmu fi kċina ċentrali diġà jinsabu mħabbtin iħawdu l-​borom—wara kollox, sa nofsinhar taʼ llum iktar minn 2,000 volontier imġewwaħ madwar Houston se jkunu lesti għal ikla sħuna!

[Kaxxa/Stampa f’paġna 22]

PROGRAMMI TAʼ TAĦRIĠ

Matul ix-​xogħol t’għajnuna, il-​volontieri tas-​sengħa taw lezzjonijiet biex lill-​volontieri bla sengħa jħarrġuhom għal xogħlijiet speċifiċi. Xi wħud ġew imħarrġin biex jiddiżinfettaw id-​djar. Oħrajn tgħallmu jwaqqfu l-​ħitan u jwaħħlu l-​armarji. Jerġaʼ kien hemm min tgħallem jiksi l-​ħitan u jbajjad. Dawn is-​Seminars għal Ħaddiema tas-​Sengħa ġew rekordjati fuq vidjo, u l-​vidjos imbagħad intużaw fiċ-​ċentri reġjonali biex jitħarrġu iktar volontieri. “Permezz taʼ dawn is-​seminars,” innota membru tal-​kumitat għall-​għajnuna, “konna ċerti li x-​xogħol taʼ tiswija jkun taʼ l-​aqwa kwalità.”

[Stampa]

Nies tas-​sengħa jagħtu l-​lezzjonijiet

[Kaxxa f’paġna 24]

“L-​GĦEMIL VERU T’ALLA”

“Il-​kumpaniji taʼ l-​assigurazzjoni jsejħu d-​diżastri naturali bħala għemejjel t’Alla,” innota membru tal-​kumitat għall-​għajnuna. “Madankollu,” żied hu, “il-​volontieri li ħadmu hawn għal dawk ix-​xhur kollha huma l-​għemil veru t’Alla. Il-​fratellanza tagħna hija miraklu!” Matul dan ix-​xogħol t’għajnuna, 2,500 volontier jew iktar kienu jiġu jaħdmu fi tmiem il-​ġimgħa. Iċ-​chairman tal-​kumitat qal: “Dawk il-​volontieri mhux imħallsin ħassru l-​vaganzi li kienu ppjanaw, irranġaw mill-​ġdid l-​iskedi tagħhom tal-​familja, u ħallew affarijiet persunali għal iktar tard biex jgħinu f’wieħed mill-​akbar xogħlijiet t’għajnuna li qatt saru mix-​Xhieda taʼ Jehovah.”

Il-​kampanja twila t’għajnuna kienet teħtieġ sagrifiċċji. Volontier wieħed li appoġġa x-​xogħol mill-​bidu sa l-​aħħar kellu impjieg sekulari taʼ 50 siegħa fil-​ġimgħa. Madankollu, hu qattaʼ 40 siegħa kull ġimgħa fix-​xogħol t’għajnuna. “Jehovah tani s-​saħħa,” qal hu. “Xi nies li jafuni jistaqsuni, ‘Titħallas għalih dax-xogħol?’ Jien ngħidilhom, ‘L-​ebda ammont taʼ flus ma kien se jġagħalni nagħmlu.’” Fi tmiem il-​ġimgħa, wara ġimgħa sħiħa taʼ xogħol sekulari, familja mill-​istat taʼ Louisiana kienet tivvjaġġa bil-​karozza 800 kilometru biex tgħin fix-​xogħol t’għajnuna. Ħafna ħadmu minn fil-​għodu sa fil-​għaxija u mbagħad kienu jivvjaġġaw lura d-​dar bil-​karozza. Grupp wieħed taʼ 30 volontier tas-​sengħa, li kien jagħmel vjaġġ bil-​karozza taʼ bejn sebgħa u għaxar sigħat biex jasal fuq il-​post, qal: “Sewa ħafna li għamilna dan.” Volontiera oħra kienet titlaq mix-​xogħol sekulari tagħha fit-​3:30 p.m. u mbagħad kienet taħdem b’mod volontarju fiċ-​ċentru amministrattiv sa l-​10:00 p.m. Kienet tgħin ukoll fi tmiem il-​ġimgħa. “Inħossni sodisfatta,” qalet hi.

Tabilħaqq, dawn u l-​volontieri l-​oħrajn kollha kienu lesti li jgħinu għax kellhom imħabba għal ħuthom—il-​marka li tidentifika lill-​Kristjani veri. (Ġwann 13:35) Is-​sindku taʼ Houston żar iċ-​ċentru amministrattiv għax-​xogħol t’għajnuna u ġie mqanqal jgħid hekk lil grupp taʼ Xhieda: “Intom temmnu li tridu tagħmlu dak li Alla jgħidilna nagħmlu. Intom qed tipprattikaw dak li temmnu.”

[Stampa f’paġna 20, 21]

L-​ilmijiet jinvadu lil Houston, 9 taʼ Ġunju, 2001

[Sors]

© Houston Chronicle

[Stampa f’paġna 21]

Toroq kbar u wesgħin saru xmajjar

[Stampa f’paġna 21]

L-​ilma daħal jiġri fid-​djar

[Stampa f’paġna 23]

Xi wħud mill-​eluf taʼ Xhieda li qdew bħala volontieri

[Stampa f’paġna 24]

It-​tim tal-​kċina pprepara iktar minn kwart taʼ miljun ikla!

[Sors taʼ l-​Istampa f’paġna 19]

NOAA