“Ejjew Għandi, . . . U Jiena Nserraħkom”

“Ħa Nagħmlu l-​Ġid maʼ Kulħadd”

L-​ATTIVITÀ primarja taʼ Ġesù kienet li jippriedka u jgħallem l-​aħbar tajba tas-​Saltna t’Alla. (Mark 1:14; Luqa 8:1) Peress li s-​segwaċi taʼ Kristu jixtiequ jimitawh, huma jħarsu lejn ix-​xogħol taʼ li jgħallmu l-​messaġġ Bibliku dwar is-​Saltna t’Alla bħala l-​iktar attività importanti f’ħajjithom. (Luqa 6:40) Ix-​Xhieda taʼ Jehovah iqawwu qalbhom tabilħaqq hekk kif jaraw li l-​messaġġ tas-​Saltna qed iġib serħan dejjiemi lil dawk li jaċċettawh—l-​istess bħalma għamel meta Ġesù kien fuq l-​art.—Mattew 11:​28-30.

Minbarra li għallem il-​Kelma t’Alla, Ġesù wettaq għemejjel tajbin oħra, bħal meta fejjaq lill-​morda u temaʼ lill-​imġewħin. (Mattew 14:​14-21) Bl-​istess mod, ix-​Xhieda taʼ Jehovah, minbarra li jagħmlu x-​xogħol tagħhom taʼ li jgħallmu l-​Bibbja, jgħinu wkoll lin-​nies fil-​bżonn. Fil-​fatt, l-​Iskrittura tħejji lill-​Kristjani “għal kull ħidma tajba” u tħeġġiġhom biex ‘jagħmlu l-​ġid maʼ kulħadd.’—Korsiv tagħna; Galatin 6:10; 2 Timotju 3:​16, 17.

“Ħutna Kienu Hawn”

F’Settembru taʼ l-​1999, terremot qawwi heżżeż lit-​Tajwan. Ftit xhur wara dan, xita bil-​qliel u valangi ġabu wieħed mill-​agħar diżastri naturali li qatt ġraw fl-​istorja tal-​Venezwela. Dan l-​aħħar, għargħar qawwi ħarbat il-​pajjiż tal-​Możambik. Fit-​tliet każijiet, ix-​Xhieda taʼ Jehovah malajr waslu fil-​post bi provvisti taʼ ikel, ilma, mediċina, ħwejjeġ, tined, u apparat tat-​tisjir għall-​vittmi. Volontieri li għandhom kwalifiki fil-​kura medika waqqfu kliniki temporanji sabiex idewwu lil dawk li weġġgħu, u ħaddiema volontieri tal-​bini bnew djar ġodda għal dawk li spiċċaw bla dar.

Il-vittmi ġew imqanqlin mill-​għajnuna f’waqtha li ngħataw. “Meta konna l-​iktar fil-​bżonn, ħutna kienu hawn,” tgħid Malyori, li d-​dar tagħha fil-​Venezwela nqerdet għalkollox b’valanga. Wara li l-​volontieri bnew dar ġdida fjamanta għall-​familja tagħha, Malyori esklamat: “Qatt ma nistgħu nirringrazzjawh biżżejjed lil Jehovah għal dak kollu li għamel magħna!” U meta l-​vittmi taʼ l-​għargħar fil-​Możambik ngħataw iċ-​ċwievet għad-​djar tagħhom li nbnew mill-​ġdid, il-​grupp kollu nfexx ikanta l-​għanja tas-​Saltna “Jehovah Hu l-​Kenn Tagħna.”a

L-għajnuna lil uħud fil-​bżonn kienet taʼ serħan għall-​volontieri wkoll. “Ħassejtni kuntent li stajt inkun t’għajnuna għall-​aħwa li tant batew,” osserva Marcelo, li qeda bħala infermier f’kamp tar-​refuġjati fil-​Możambik. Huang, volontier fit-​Tajwan, osserva: “Kemm ħadt pjaċir li stajt nagħti sehmi biex inqassam l-​ikel u t-​tined lill-​aħwa fil-​bżonn! Veru saħħaħli l-​fidi dan.”

Programm tal-​Volontieri li Jagħti r-​Riżultati

Ix-​xogħol volontarju ġab serħan ukoll lil għaxriet t’eluf taʼ priġunieri madwar id-​dinja. Kif? F’dawn l-​aħħar snin, ix-​Xhieda taʼ Jehovah ipprovdew letteratura Biblika għal iktar minn 30,000 persuna miżmumin f’xi 4,000 ħabs fl-​Istati Uniti biss. Barra minn hekk, fejn ikun possibbli, ix-​Xhieda jżuru l-​ħabsijiet personalment sabiex jistudjaw il-​Bibbja mal-​ħabsin u jikkonduċu laqgħat Kristjani. Jibbenefikaw il-​ħabsin?

Xi ħabsin li jistudjaw il-​Bibbja jibdew jaqsmu maʼ sħabhom il-​ħabsin it-​tagħlim li jġib serħan tal-​Kelma t’Alla. Bħala riżultat, f’xi ħabsijiet madwar id-​dinja issa hemm gruppi ġodda taʼ ħabsin li jqimu lil Jehovah flimkien. “Il-​grupp tagħna qed ikollu suċċess,” irrapporta ħabsi f’Oregon, l-​Istati Uniti taʼ l-​Amerika, fl-​2001. “Għandna 7 pubblikaturi tas-​Saltna u qed nikkonduċu 38 studju tal-​Bibbja. Iktar minn 25 persuna jattendu għat-​taħdita pubblika u l-​Istudju tat-​Torri taʼ l-​Għassa, u kellna 39 fl-​attendenza għall-​Mafkar [tal-mewt taʼ Kristu]. Tliet persuni oħra se jitgħammdu dalwaqt!”

Il-​Benefiċċji u l-​Ferħ

L-​uffiċjali tal-​ħabs innotaw li dan il-​programm tal-​volontieri jirnexxi. Dak li jimpressjona lill-​uffiċjali l-​iktar huwa l-​benefiċċju dejjiemi taʼ dan il-​programm tal-​volontieri. Rapport wieħed jinnota: “Fl-​għaxar snin li ilu għaddej dan il-​programm, l-​ebda ħabsi li nħeles u kien ġie mgħammed fil-​ħabs bħala Xhud taʼ Jehovah ma reġaʼ lura l-​ħabs—b’kuntrast mal-​50-60 fil-​mija taʼ dawk li jirritornaw mill-​gruppi l-​oħra.” Imqanqal mir-​riżultati li kisbu x-​Xhieda volontieri, kappillan taʼ ħabs f’Idaho qal f’ittra li kiteb lill-​kwartieri ġenerali tax-​Xhieda taʼ Jehovah: “Minkejja li personalment ma naqbilx mat-​teoloġija tagħkom, ninsab verament impressjonat bl-​organizzazzjoni tagħkom.”

Il-volontieri jħossuhom premjati wkoll meta jgħinu lil dawk fil-​ħabs. Wara li mexxa laqgħa maʼ grupp taʼ ħabsin li kantaw għanja tas-​Saltna għall-​ewwel darba, wieħed volontier kiteb: “Kien verament inkuraġġanti li tara 28 minn dawn l-​irġiel jingħaqdu flimkien biex jgħannu tifħir lil Jehovah. U tgħidx kemm kantaw b’leħen għoli! Xi privileġġ li tkun preżenti għal okkażjoni bħal din!” Volontier li jżur il-​ħabsijiet taʼ Arizona qal: “Kemm kien taʼ barka li stajna nieħdu sehem f’dan ix-​xogħol speċjali!”

Xhieda volontieri madwar id-​dinja jaqblu minnufih maʼ Ġesù, li qal: “Min jagħti hu aktar hieni minn min jieħu.” (Atti 20:35) Huma jikkonfermaw ukoll li meta jsegwu t-​twissija tal-​Bibbja li jagħmlu l-​ġid maʼ kulħadd ikollhom serħan tassew.—Proverbji 11:25.

[Nota taʼ taħt]

[Stampa f’paġna 8]

Venezwela

[Stampa f’paġna 8]

Tajwan

[Stampa f’paġna 8]

Możambik