Mingħand il-​Qarrejja

Il-​Logħob Elettroniku Għandi 13-il sena. Meta rajt ir-​rivista bl-​artikli “Il-​Logħob Elettroniku—Fih Xi Aspett Negattiv?” kont naf li kienet għalija! (8 taʼ Jannar, 2003) F’paġna 7, ġiet deskritta logħba li darba kont vizzjat biha. Nixtieq nirringrazzjakom talli inkludejtu dawn l-​artikli fir-​rivista għaliex għenuni nbiddel triqati u nħobb iktar lil Jehovah.

J. L., l-​Istati Uniti

Għandi kważi 15-il sena, u l-​iskola kellna nagħmlu rapport fuq suġġett kurrenti magħżul minna. Ir-​rivista Stenbaħ! ġiet preċiż fil-​ħin. Ir-​rapport tiegħi kellu suċċess kbir fil-​klassi. Ħadt marki tajbin ukoll! Jekk jogħġobkom komplu iktbu artikli bħal dawn.

J. A., il-​Ġermanja

Dejjem ridt nesprimi l-​apprezzament tiegħi għall-​informazzjoni provduta fir-​rivisti li tippubblikaw, imma meta qrajt l-​artikli dwar il-​logħob elettroniku, iddeċidejt li nikteb din in-​nota immedjatament. Jien omm taʼ żewġt itfal, waħda għandha 11-il sena u l-​ieħor 3 snin. Għalhekk, l-​informazzjoni kienet f’waqtha ferm għalija. Permezz taʼ dawn il-​pubblikazzjonijiet, l-​imħabba u l-​protezzjoni tal-​Ħallieq tagħna nistaʼ narahom tassew ċari.

O. V., l-​Istati Uniti

Pressjoni minn taʼ Madwari Bħala familja dejjem ridna niktbu biex nirringrazzjawkom għar-​rivisti meraviljużi. Fl-​aħħar, iddeċidejna li nagħmlu dan wara li qrajna l-​artiklu “Iż-​Żgħażagħ Jistaqsu . . . Kif Nistaʼ Nkampa mal-​Pressjoni minn taʼ Madwari?” (8 taʼ Jannar, 2003) Dan l-​artiklu għenna naraw kemm iż-​żagħżugħ David kien jafu lil Jehovah u kemm kien jafda fih. David irnexxa għax ma straħx fuq il-​fehma tiegħu stess jew fuq dik taʼ bnedmin oħrajn. Tassew, jekk Jehovah qiegħed magħna, għalfejn għandna nibżgħu minn dawk taʼ madwarna?

F. H., l-​Estonja

Ili sentejn naqra Stenbaħ!, u qatt ma ħassejtni ispirata u impressjonata daqs meta qrajt dan l-​artiklu. Ħassejtni bħallikieku kien miktub għalija biss. Grazzi ħafna għall-​informazzjoni f’waqtha li tajtuna.

T. C., l-​Istati Uniti

Inqas Perikli fit-​Tqala Irrid nirringrazzjakom għall-​artiklu “Kif Tnaqqas il-​Perikli fit-​Tqala.” (8 taʼ Jannar, 2003) Dan l-​artiklu għenni nifhem sew x’tinvolvi t-​tqala. Għandi 32 sena, u tassew kelli bżonnu dan l-​artiklu. Issa qed nifhem x’għandi nagħmel biex it-​tqala tkun inqas perikoluża u nuri l-​apprezzament lejn dan ir-​rigal meraviljuż.

B. C., l-​Italja

Dan l-​artiklu jsemmi li mara tistaʼ tiġi testjata għall-​marda taʼ l-​istreptokokku grupp B bejn is-​26 u t-​28 ġimgħa tat-​tqala. Iż-​żmien rikkmandat bħalissa għall-​ittestjar hu bejn il-​35 u s-​37 ġimgħa tat-​tqala u mhux bejn is-​26 u t-​28 ġimgħa. Il-​qarrejja taʼ dan l-​artiklu x’aktarx li se jistaqsu lit-​tabib tagħhom għala mhux qed jiġu testjati wara 26 jew 28 ġimgħa. It-​tobba tagħhom għandhom mnejn ma jibqgħux iqisu lil Stenbaħ! bħala sors kredibbli taʼ informazzjoni għall-​pazjenti tagħhom.

L. S., l-​Istati Uniti

Iwieġeb “Stenbaħ!”: Il-​ħarġiet tagħna jitħejjew xhur minn qabel biex ikun hemm żmien biżżejjed għat-​traduzzjoni f’iktar minn 80 lingwa. Meta nkiteb l-​artiklu dwar li jkun hemm inqas perikli fit-​tqala, kienu ħafna dawk li aċċettaw li bejn 26 u 28 ġimgħa kien iż-​żmien xieraq għall-​ittestjar. Madankollu, f’Awissu 2002, l-​Akkademja Amerikana tal-​Pedjatriċi ħarġet informazzjoni aġġornata li ġiet provduta lilha miċ-​Ċentri Amerikani għall-​Kontroll tal-​Mard. Bħalissa, bħalma jsemmi b’mod korrett dan il-​qarrej, hu rikkmandat li ż-​żmien għall-​ittestjar hu bejn 35 u 37 ġimgħa.

F’paġna 13 hemm nota taʼ taħt li tgħid li l-​folic acid u l-​ħadid jistgħu jinstabu fil-​fwied u fil-​lewż. Madankollu, il-​fwied fih ħafna vitamina A—li, bħalma jgħid l-​artiklu tagħkom, tistaʼ tkun perikoluża għat-​tarbija.

B. J., il-​Britannja

Iwieġeb “Stenbaħ!”: Grazzi għat-​twissija.