Iż-​Żgħażagħ Jistaqsu . . .

Kif Nistaʼ Nkun Magħruf għal Min Jien u Mhux għal Min Huma l-​Ġenituri Tiegħi?

“Missieri huwa anzjan magħruf fil-​kongregazzjoni tax-​Xhieda taʼ Jehovah. Jien nirrispettah, imma kultant idejjaqni l-​fatt li kulfejn immur in-​nies jafuni sempliċement bħala t-​tifel taʼ Bill.”​—Larry.a

“Minħabba li missieri huwa anzjan magħruf, ħassejt li kulħadd jistenna ħafna minni, u sibtha verament diffiċli biex inkun kif jien verament.”—Alexander.

META tibda tikber, hija xi ħaġa naturali li tkun tixtieq issir ftit indipendenti—li jirnexxilek tibni isem, jew reputazzjoni, għalik. Meta twilidt, il-​ġenituri tiegħek għażlulek isem li jogħġobhom. Issa, iktar ma tikber bħala adolexxent, int trid iċ-​ċans li tagħżel “isem” għalik—jiġifieri, tikseb reputazzjoni għalik innifsek.

Is-Sultan Salamun kiteb: “Aħjar isem tajjeb minn ħafna ġid, aħjar fama tajba mill-​fidda u d-​deheb.” (Proverbji 22:1) Avolja għadek żgħir, wisq probabbli int trid tibda tistabbilixxi l-​identità tiegħek stess.

Il-​Fama Tiegħek Skond il-​Ġenituri

Bħal Larry u Alexander, xi żgħażagħ iħossu li huma magħrufin minħabba r-​reputazzjoni tal-​ġenituri tagħhom jew dak li jkunu għamlu. Forsi l-​ġenituri tagħhom ikunu wħud magħrufin fil-​komunità minħabba x-​xogħol jew l-​edukazzjoni tagħhom. Jew jistaʼ jkun li dawn ikunu magħrufin fil-​kongregazzjoni Kristjana. Jekk il-​ġenituri tiegħek huma wħud bħal dawn, għandek mnejn kultant tħoss li l-​attenzjoni hija dejjem fuqek u li f’kulma tagħmel dejjem ikun hemm xi ħadd għajnejh fuqek. Forsi tiddejjaq minħabba l-​pressjoni li tħoss biex taġixxi b’ċertu mod sempliċement minħabba min huma l-​ġenituri tiegħek.

Per eżempju, missier Ivan jaqdi bħala anzjan f’kongregazzjoni lokali tax-​Xhieda taʼ Jehovah. Ivan jgħid: “Minħabba li missieri kien magħruf sew u rispettat, jien dejjem ħassejt li għandi nkun t’eżempju fl-​iskola u d-​dar. Kont inħoss li l-​ġenituri l-​oħra jużawni bħala eżempju biex jirreferu għalija għaliex jistennew li wliedhom jaġixxu bħali. Għalkemm din kienet xi ħaġa sabiħa, imma lili kienet tagħmilli pressjoni kbira biex inġib ruħi b’mod eżemplari quddiem l-​oħrajn. Minħabba f’hekk, kultant ma kontx inkun modest u ma kontx nammetti d-​difetti li kelli fil-​personalità tiegħi.” Alexander jgħid: “Kont inħossni dejjem osservat u jekk nagħmel xi żball, dejjem ikun hemm xi ħadd lest biex jipponta subgħajh lejja.”

Larry, li ssemma fil-​bidu, ipprova ma jkunx fiċ-​ċentru taʼ l-​attenzjoni billi ma jurix x’kien il-​kunjom tal-​familja tiegħu. Hu jgħid: “Meta kont niltaqaʼ maʼ xi ħadd ġdid f’xi laqgħa soċjali, kont ngħidlu, ‘Hello, jien jisimni Larry,’ u nieqaf hemm—mingħajr ma nsemmi kunjomi. Meta jkun possibbli, anki l-​formoli kont niffirmahom bl-​ewwel isem tiegħi biss. Kont nibżaʼ li n-​nies se jittrattawni differenti jekk ikunu jafu min hu missieri. Jien ridt li sħabi jittrattawni b’mod normali.”

M’għandniex xi ngħidu, huwa raġunevoli li l-​oħrajn jistennew ħafna minnek jekk missierek jaqdi bħala anzjan jew qaddej ministerjali Kristjan. Wara kollox, irġiel li huma maħturin f’dawn il-​pożizzjonijiet għandhom “ikunu jafu jmexxu ’l uliedhom u ’l djarhom sewwa.” (1 Timotju 3:​5, 12) Mhux taʼ b’xejn, mela, li l-​oħrajn jistennewk tkun eżemplari! Imma huwa dan verament ħażin? Mhux meta tikkunsidra li ż-​żagħżugħ Kristjan Timotju, forsi waqt li kien għadu adolexxent, intgħażel minn Pawlu biex jivvjaġġa miegħu u jieħu sehem fix-​xogħol ministerjali vitali. (1 Tessalonikin 3:​1-3) Għalhekk għandek tistinka biex tkun t’eżempju, kemm jekk missierek hu maħtur bħala anzjan u kemm jekk le.

Ir-​Ribelljoni M’Hijiex Għażla Għaqlija

Xorta waħda, xi żgħażagħ jipprovaw ikunu differenti mill-​ġenituri tagħhom billi jirribellaw. Ivan jgħid: “Kien hemm drabi meta kont niddejjaq minħabba li ridt inkun taʼ eżempju. Bdejt nirribella billi pprovajt nara kemm nistaʼ nħalli xagħri twil qabel ikun hemm min jgħidli xi ħaġa.”

Absalom, wieħed mill-​ulied tas-​Sultan David, qabad triq ribelluża. Missieru kien magħruf għad-​devozzjoni tiegħu lejn Jehovah u kien maħbub minn ħafna fil-​ġens taʼ Iżrael. In-​nies kienu jistennew ħafna minn Absalom bħala t-​tifel taʼ David. Imma minflok ma għex b’mod raġunevoli skond dak li stennew minnu, Absalom għażel li jibni isem għalih innifsu billi rribella kontra missieru. Peress li David kien ir-​rappreżentant midluk taʼ Jehovah, Absalom fir-​realtà kien qed jirribella kontra Jehovah. L-​azzjonijiet tiegħu ġabu diżunur lill-​familja tiegħu u diżastru għalih innifsu.—2 Samwel 15:​1-15; 16:​20-22; 18:​9-15.

Ir-ribelljoni tistaʼ bl-​istess mod ikollha konsegwenzi taʼ ħsara kbira għalik. Ikkunsidra x’tgħidilna l-​Bibbja dwar Neħemija. Xi wħud mill-​għedewwa tiegħu pprovaw iqarrqu bih billi jdeffsuh f’imġiba mhix xierqa. Għala? “[Biex] ikolli isem ħażin magħhom, u jkollhom fuqiex iċanfruni,” qal Neħemija. (Neħemija 6:13) Ir-​ribelljoni tistaʼ tagħtik isem ħażin—wieħed li n-​nies għandhom mnejn ma jinsewhx malajr.

M’għandekx tinsa kemm l-​imġiba ribelluża tistaʼ teffettwa lil oħrajn. Minn taʼ l-​inqas, se tikkaġuna wġigħ bla bżonn lill-​ġenituri tiegħek. (Proverbji 10:1) L-​azzjonijiet tiegħek jistgħu wkoll jeffettwaw ħażin lil żgħażagħ oħrajn. Ivan jammetti: “Il-​kondotta tiegħi kellha effett ħażin fuq ħija. Għal xi żmien hu telaq għalkollox il-​kongregazzjoni Kristjana, u għamel dak kollu li kien jaf li m’huwiex fi qbil mal-​livelli tal-​Bibbja. B’ferħ, ġie f’sensih u issa reġaʼ qed jaqdi lil Jehovah u jinsab kuntent.”

Eżempju Aqwa

Salamun, ħu Absalom mill-​missier, għażel triq differenti. Hu kien lest li bl-​umiltà kollha jitgħallem minn missieru, David. (1 Slaten 2:​1-4) Minflok ma fittex il-​ġieħ tal-​bnedmin, Salamun għamel ħiltu biex jikseb isem tajjeb m’Alla. Sakemm baqaʼ jagħmel hekk, hu onora lill-​familja tiegħu u kiseb reputazzjoni bħala wieħed mill-​akbar slaten taʼ Iżrael.—1 Slaten 3:​4-14.

L-eżempju tajjeb taʼ Salamun jenfasizza żewġ fatti importanti: L-​ewwel, li int tistabbilixxi l-​identità tiegħek, mhux billi tipprova titbiegħed mill-​familja tiegħek, imma billi titgħallem mill-​kwalitajiet pożittivi tal-​familja tiegħek. Il-​ġurnal Adolescence (Adolexxenza) jgħid: “L-​adolexxenza m’għandha bl-​ebda mod tkun żmien li fiha ż-​żagħżugħ jinqataʼ mill-​ġenituri tiegħu sabiex jikseb identità qawwija għalih innifsu.” Il-​ġurnal ikompli jgħid li “l-​appoġġ tal-​ġenituri ma jtellfikx” milli tistabbilixxi identità għalik, “minflok [dan] se jgħinek.”

Huwa interessanti l-​fatt li Salamun innifsu ħeġġeġ: “Ismaʼ minn missierek li tak il-​ħajja, u tmaqdarx ’l ommok meta tixjieħ.” (Proverbji 23:22) Jidher ċar li Salamun ma kienx qed jikteb lit-​tfal żgħar għaliex sakemm il-​ġenituri ‘jixjieħu,’ wisq probabbli t-​tfal isiru adulti. Xi jfisser dan? Anki meta tikber u tistabbilixxi familja għalik, xorta tistaʼ tibbenefika mill-​għerf tal-​ġenituri tiegħek. Ivan irrealizza dan waħdu. Hu jgħid: “Jien u nikber, nipprova nimita l-​kwalitajiet pożittivi tal-​ġenituri tiegħi waqt li nipprova ma nagħmilx l-​iżbalji li għamlu huma.”

It-tieni punt li għandek tikkunsidra hu li liktar ħaġa importanti għal Salamun ma kinitx li jistabbilixxi “identità” għalih innifsu, imma li jogħġob lil Jehovah. Veru, in-​nies stennew ħafna minnu bħala t-​tifel taʼ David. Imma peress li hu straħ fuq Jehovah irnexxielu jerfaʼ r-​responsabbiltajiet tiegħu. Alexander rabba attitudni simili. Hu jgħid: “Issa naċċetta l-​fatt li oħrajn ġeneralment jistennew iktar mit-​tfal taʼ l-​anzjani. Iddeċidejt li nuża dan b’mod pożittiv, u dan kien taʼ protezzjoni għalija. Irrealizzajt li l-​mod kif jarani Jehovah hu l-​iktar ħaġa importanti għalija. Hu jafni għal dak li jien u mhux għal min jiġi minni.”

Daryn, li missieru ggradwa mill-​Iskola taʼ Gilgħadb​—skola li tħarreġ il-​missjunarji—ukoll tgħallem kif ikampa mal-​fatt li l-​ġenituri tiegħu huma magħrufin. Hu jgħid: “Meta tgħammidt, iddedikajt ruħi lil Jehovah u lil ħadd iktar. Jekk ngħix skond id-​dedikazzjoni tiegħi bl-​aħjar mod li nistaʼ, ikolli paċi ġewwinija li tiġi mill-​fatt li naf li Jehovah kuntent bija, anki jekk ma nistax inwettaq dak kollu li wettqu l-​ġenituri tiegħi.”

Is-Sultan Salamun osserva dan: “Mqar tifel jingħaraf minn għemilu, jekk hux safi u tajjeb f’imġibtu.” (Proverbji 20:11) Fl-​aħħar mill-​aħħar, in-​nies se jiftakruk għal dak li tgħid u tagħmel. Kun eżemplari “fi kliemek u fl-​imġiba tiegħek, fl-​imħabba, fil-​fidi, fis-​safa.” Jekk tagħmel dan, l-​oħrajn se jħobbuk u jirrispettawk għal dak li int tassew!—1 Timotju 4:12.

Madankollu, żgħażagħ oħrajn għandhom l-​isfida li jkunu magħrufin għal min huma ħuthom li jkunu rnexxew f’ħajjithom. Artiklu li se joħroġ iktar ’il quddiem se jiddiskuti kif tistaʼ tiffaċċja din l-​isfida.

[Noti taʼ taħt]

[Kumment f’paġna 26]

L-​uniku riżultat tar-​ribelljoni hu wġigħ għall-​ġenituri tiegħek u reputazzjoni mħassra

[Stampa f’paġna 26]

L-​eżempju tajjeb tiegħek jistaʼ jkun taʼ benefiċċju għal oħrajn