Mingħand il-​Qarrejja

Il-​Pornografija Grazzi taʼ l-​artikli bit-​titlu “Il-​Pornografija—Tagħmel Ħsara jew Le?” (8 t’Awissu, 2003) Kelli bżonn dan il-​parir dirett. Qabel ma sirt Kristjan kont ili ħafna nara l-​pornografija. L-​artikli għenuni niċċara l-​ħarsa tiegħi iktar minn qatt qabel dwar kemm hi taʼ ħsara u liema passi deċiżivi hemm bżonn biex dak li jkun jeħles mill-​ġibda qawwija tal-​pornografija.

E. P., l-​Istati Uniti

Jien kelli żwieġ hieni għal 22 sena li spiċċa b’divorzju sentejn ilu. Il-​pornografija letteralment serqitilna raġel meraviljuż u missier kollu mħabba. Dan il-​vizzju ikrah biddillu l-​personalità tiegħu u minn raġel taʼ qalb tajba u ġentili sar raġel irrabjat, giddieb, u qisu annimal. Veru kont inħossni waħdi bħala vittma tal-​pornografija, imma issa nirrealizza li din hi kriżi li teffettwa lil ħafna. Grazzi għal dawn l-​artikli li tant inkitbu sew.

L. T., l-​Istati Uniti

Qabel ma bdejt nistudja l-​Bibbja, kelli l-​vizzju tal-​pornografija għal iktar minn għaxar snin. Minkejja dak li jisħqu dawk li jirreklamawha, m’hemm assolutament xejn pożittiv dwarha. Qabel ma sirt Xhud taʼ Jehovah, kelli l-​vizzju taʼ kważi kull tip taʼ droga komuni. Mill-​vizzji kollha li kelli, il-​pornografija kienet bil-​wisq l-​iktar waħda diffiċli biex neħles minnha. Jekk jogħġobkom komplu ippubblikaw artikli bħal dawn.

J. A., l-​Istati Uniti

Iż-​Żgħażagħ Jistaqsu Nirringrazzjakom minn qalbi taʼ l-​artiklu “Iż-​Żgħażagħ Jistaqsu . . . Għala Nħossni li Għandi Nkun Perfett?” (8 t’Awissu, 2003) Jien evanġelizzatur full-time taʼ 25 sena. Minn meta kont żgħir, dejjem kont inqabbel lili nnifsi m’oħti u ħija, li huma erbaʼ snin u tliet snin akbar minni. Kelli nissielet miegħi nnifsi għax kont inħossni inferjuri, kont naħseb li ma jien tajjeb għal xejn. Biex inkampa maʼ dawn is-​sentimenti, stinkajt biex inkun perfett. Dan l-​artiklu spjega eżatt kif inħossni. Irrid nibdel il-​mod kif naħsibha.

M. Y., il-​Ġappun

Għandi 16-il sena u dan l-​aħħar skoprejt li nbati mid-​dipressjoni. Dejjem kont nipprova nagħmel kollox perfett, u spiss nirrabja miegħi nnifsi li ma jien tajba għal xejn. Dan l-​artiklu ġie verament f’waqtu. Ma stajtx nieqaf nibki meta qrajtu. Qatt ma rrealizzajt li hawn ħafna oħrajn li jiġġieldu maʼ l-​istess sentimenti. Grazzi taʼ l-​artikli “Iż-​Żgħażagħ Jistaqsu.” Inħares ’il quddiem għall-​ħarġa li jmiss.

L.S., l-​Istati Uniti

Għajnuna fid-​Diżastru Qrajt l-​artiklu “Xi Ħaġa li Ebda Maltempata Ma Tistaʼ Tkissirha.” (8 t’Awissu, 2003) Il-​mod kif ix-​Xhieda taʼ Jehovah iffaċċjaw l-​emerġenzi li qamu minħabba d-​diżastri naturali ġagħalni napprezza saħansitra iktar il-​fatt li jien parti minn din l-​organizzazzjoni. Grazzi talli tippubblikaw artikli bħal dawn li jgħinuna nuru kwalitajiet li ebda maltempata ma tistaʼ tkissirhom.

M. P., l-​Italja

Personalment għaddejt minn diversi katastrofi, inkluż l-​għargħar u t-​terremoti. Kont fl-​ippridkar minn dar għal dar meta seħħ terremot fl-​1989. Tifel t’14-il sena li kien miegħi nfixel u telaq jiġri! Jien qbadtu minn idu u tlabt għalih biex jikkalma. Wara ftit sekondi, waqgħu madwarna wajers li jġorru l-​elettriku. In-​nies kienu se jiġġennu! Fid-​dar tiegħi stess kien hemm xaqq kbir fl-​art tal-​konkrit. Imma dakinhar stess wara nofsinhar erġajna morna fis-​servizz minn bieb għal bieb biex ngħinu lil oħrajn ikampaw. Kemm ġabli memorji dan l-​artiklu!

B. S., l-​Istati Uniti

Nirringrazzjakom ħafna talli tippubblikaw artikli inkuraġġanti bħal “Xi Ħaġa li Ebda Maltempata Ma Tistaʼ Tkissirha.” Tgħidx kemm bkejt meta qrajtu! Żgur li ebda maltempata ma tistaʼ tkisser l-​imħabba li għandna għal sħabna l-​Kristjani u l-​imħabba mhix egoista li għandna għal ġârna.

I. A., il-​Ġappun

L-​Abbuż tad-​Droga Grazzi ħafna taʼ l-​artikli bit-​titlu “L-​Abbuż tad-​Drogi fil-​Familja—Int X’Tistaʼ Tagħmel?” (8 t’April, 2003) Issa ili għal xi żmien nistudja l-​Bibbja max-​Xhieda taʼ Jehovah, imma ma rnexxilix nagħmel progress spiritwali minħabba din il-​problema. Malli qrajt il-​kaxxa “Għajnuna għal Dawk li Jridu Jirkupraw mill-​Vizzju tad-​Drogi,” irrealizzajt li jekk naqra l-​Bibbja kuljum u napplika l-​prinċipji tagħha se jgħinni fl-​isforz tiegħi biex nirkupra. Anki l-​fatt li naf li Alla jimpurtah minni effettwani ħafna.

R.S.A., il-​Brażil