Hemm Miktub li Ħa Narah

Kif rakkontata minn Rosalía Phillips

“Int għad tagħmel suċċess kbir! Għandek it-​talent biex tirnexxi!” Bil-​qiegħda mal-​pjanu, id-​direttur tagħna qalli dan il-​kliem ftit tas-​sekondi qabel ma telgħet il-​purtiera tal-​palk. L-​erbaʼ membri l-​oħra tal-​grupp għamlu sinjal bħala merħba. Kont liebsa libsa ħamra tleqq, u kont il-​kantanta l-​ġdida tal-​grupp. Ħakimni eċċitament kbir. Hawnhekk, f’wieħed mill-​iktar teatri importanti f’Mexico City, kont qed niddebutta f’karriera fid-​dinja taʼ l-​ispettaklu! Kien Marzu taʼ l-​1976, u kien jonqosni xahar biex nagħlaq it-​18-il sena.

MISSIERI kien miet tliet snin qabel, u qalbi u moħħi kienu għadhom mimlijin bil-​memorji tiegħu. Il-​pubbliku wkoll kien jiftakru sew. Kien maħbub u ammirat bħala wieħed mill-​atturi komiċi ewlenin tal-​pajjiż. Kien deher f’iktar minn 120 film matul perijodu li spiss jissejjaħ l-​era tad-​deheb taċ-​ċinema Messikana. Ismu, Germán Valdés, “Tin-Tán,” kien jidher fuq tined tat-​teatri maʼ l-​Amerika Ċentrali u l-​Amerika t’Isfel kollha, kif ukoll fi nħawi taʼ l-​Amerika taʼ Fuq u l-​Ewropa fejn jitkellmu bl-​Ispanjol. Anki llum, iktar minn 30 sena wara mewtu, il-​films tiegħu għadhom jintwerew ripetutament fuq it-​televixin.

Minn mindu kont naqra taʼ tifla, id-​dar tagħna kienet post fejn jiltaqgħu nies magħrufa. Ommi u ħutha l-​bniet kienu jifformaw trio taʼ kantanti msejjaħ Las Hermanitas Julián (LAħwa Julián). Ħuha, Julio Julián, kien tenur operistiku magħruf fl-​Ewropa, filwaqt li mart Julio, li kienet Spanjola u kien jisimha Conchita Domínguez, kienet sopran. Iktar minn hekk, ħut missieri, Manuel “Loco” (il-miġnun) Valdés u Ramón Valdés, magħruf aħjar bħala Don Ramón, kienu komiċi famużi tat-​televixin.

Studjos tal-​films, teatri tal-​varjetà, u studjos fejn jirrekordjaw id-​diski kienu postijiet familjari għalija u għal ħija Carlos, għax missieri spiss kien jiħodna miegħu fuq ix-​xogħol u fuq mawriet taʼ l-​ispettaklu. Kien b’dan il-​mod li kien iżomm il-​familja magħquda. X’kuntrast kien hemm bejn dak l-​ambjent superfiċjali u d-​dar tagħna, fejn kienu jirrenjaw l-​armonija u l-​imħabba vera! Niftakar lil missieri bħala raġel t’affezzjoni kbira, mimli enerġija u mħabba għall-​ħajja. Kien ferm u ferm ġeneruż, kultant saħansitra żżejjed. Hu għallimni li l-​kuntentizza ma tiddependix minn kemm ikollok iżda minn kemm tagħti.

Bidla li Ġabitli Niket Kbir

Lejn it-​tmiem taʼ l-​1971, ommi tat lili u lil ħija l-​aħbar kerha li missierna kellu marda li m’hemmx kura għaliha. Għal sena u nofs sħaħ, rajtu jsofri u jissara taħt l-​influwenza taʼ mediċini qawwija.

Għadni niftakar dakinhar li rajt l-​ambulanza ġejja d-​dar tagħna biex tieħdu l-​isptar. Kont naf li ma kienx se jerġaʼ jiġi lura. Ma nistax niddeskrivi l-​uġigħ li ħassejt. Iddeċidejt li ladarba hu kien qed isofri, jien kelli nsofri wkoll. Ħraqt il-​pala taʼ idi b’sigarett u ma stajtx nieqaf nibki. Missieri miet fid-​29 taʼ Ġunju, 1973. Bdejt nistaqsi lili nnifsi: ‘Għala kellu jħallina xi ħadd tant twajjeb u li kien iġib tant ferħ? Fejn qiegħed issa? Jistaʼ jismagħni jekk inkellmu? Issa x’sinifikat għandha ħajti mingħajru?’

Karriera bla Skop

Wara li ħadt xi żmien biex infiq emozzjonalment, bdejt nistudja dwar it-​tisbiħ tad-​djar (interior decorating). Iżda, kont għaddejja minn fażi taʼ ribelljoni u ma bqajtx immur l-​iskola. Jien u ommi ddeċidejna li nibdew noħorġu iżjed. Konna nattendu parties eleganti fid-​dinja taʼ l-​ispettaklu. Spiss, min kien jagħmel il-​festa kien jikkonkludi billi jgħidli, “Rosalía, issa, jekk jogħġbok kantalna waħda mill-​kanzunetti tiegħek.” Kienet togħġobhom il-​vuċi tiegħi u l-​emozzjoni qawwija li kont inkanta biha, u kienu jgħidu li writt it-​talent tal-​ġenituri tiegħi.

F’wieħed minn dawk il-​parties, il-​kompożitur u direttur taʼ l-​Arturo Castro and His Castros 76 semagħni nkanta u stidinni biex ningħaqad mal-​grupp tiegħu. Għall-​ewwel m’għoġbitnix l-​idea. Għalkemm kont inħobb inkanta u kien ili ndoqq il-​kitarra u nikkomponi minn mindu kelli 14-il sena, ma xtaqtx nagħmel dan ix-​xogħol b’mod professjonali. Iżda ommi ħeġġitni u, biex ngħin lill-​familja tiegħi finanzjarjament, finalment aċċettajt. Dan wassal għad-​debutt tiegħi li ddeskrivejt qabel.

Bdejt ingawdi xogħol stabbli mill-​bidu tal-​karriera tiegħi. Il-​grupp tagħna kien jagħmel mawra mal-​Messiku u jagħti żewġ spettakli kull lejla. Konna naħdmu fil-​Gwatemala, il-​Venezwela, New York, u Las Vegas. Jien bqajt mal-​grupp sentejn. Imbagħad ngħatajt l-​opportunità li naħdem fil-​films. Ngħatajt żewġ partijiet sekondarji fil-​films u parti prinċipali, li għaliha ħadt żewġ awards importanti.

Darba minnhom irċivejt telefonata mingħand kumpanija televiżiva ewlenija fil-​pajjiż. Offrewli kuntratt esklużiv, bħala parti minn pjan speċjali għall-​atturi, u l-​parti ewlenija f’sensiela televiżiva msemmija għalija. Dan kien jelevani għall-​ogħla pożizzjoni fid-​dinja taʼ l-​ispettaklu. Kont nibda nirċievi salarju eċċellenti, anki jekk ma naħdimx regolarment. Peress li ħassejt li ma kienx jixraqli dan kollu u għax bżajt li tonqosli l-​libertà, irrifjutajt l-​offerta. Aċċettajt li naħdem fis-​sensiela televiżiva għax b’hekk stajt nibqaʼ nistudja t-​teatru fl-​università. Madankollu ma kontx kuntenta. Kont ninkwieta meta nara atturi jistinkaw għal snin sħaħ biex jiksbu parti prinċipali, filwaqt li jien kont ningħata l-​irwol prinċipali​—prinċipalment għax kont bint Tin-Tán.

Imbagħad bdejt nirrekordja d-​diski. L-​ewwel rikording kien jinkludi t-​tema prinċipali tas-​sensiela televiżiva. Jien stess kont ktibt il-​kliem u l-​mużika taʼ din il-​kanzunetta. Wara rrekordjajt fi studjo famuż f’Londra. Komplejt nagħmel iktar rikordings, films, u sensieli televiżivi. Fil-​gazzetti, l-​ewwel faċċata tas-​sezzjoni dwar l-​ispettaklu bdiet tinkludi artikli dwari, u għalhekk tistaʼ tgħid li kont ilħaqt il-​quċċata tas-​suċċess. Xorta waħda, kien hemm xi ħaġa nieqsa. Jien osservajt kemm kienu arroganti u kompetittivi n-​nies fid-​dinja taʼ l-​ispettaklu, u fosthom kien hemm ħafna immoralità u nuqqas taʼ sinċerità. Bdejt nitlef il-​fiduċja fin-​nies.

Imbagħad fil-​ħarifa taʼ l-​1980, rajt liz-​ziju Julio f’festa tal-​familja. Kien iddeċieda li ma jibqax fl-​opra, u qgħadt nisimgħu jitkellem dwar ġenna mwiegħda minn Alla. Iz-​ziju Julio qal li l-​inġustizzja u n-​niket kienu se jisparixxu minn fuq l-​art u tibda taħkem l-​imħabba. Qal ukoll li l-​veru Alla jismu Ġeħova. Dak li laqatni l-​iktar kien meta smajt li fil-​Ġenna l-​maħbubin mejtin tagħna se jiġu rxoxtati. Fraħt bil-​prospett li nerġaʼ nara lil missieri. Kont għadni nimmissjah ħafna u kont imxennqa għall-​appoġġ u l-​affezzjoni tiegħu. Kemm tkun ħaġa taʼ lgħaġeb li jkun jistaʼ jerġaʼ jkun miegħi! Imma fil-​fond taʼ qalbi dehret bħal xi ħaġa impossibbli. Iz-​ziju Julio tani Bibbja u stieden lili u ’l ommi biex nattendu konvenzjoni tax-​Xhieda taʼ Ġeħova li kellha ssir fi ftit ġimgħat. Għednielu li forsi mmorru.

Iddeċidejt li Nbiddel Ħajti

Darba minnhom bil-​lejl, kont qed inpejjep fis-​sodda waqt li kont qed naqra l-​Bibbja li kien tani zijuwi. Dak li qrajt mill-​ktieb taʼ Proverbji ġagħalni nikkonkludi li d-​dawl, il-​ftehim, u l-​ħajja ġew minn Alla, filwaqt li d-​dlam, il-​konfużjoni, u l-​mewt ġew minn sors li hu loppost. Dak l-​istess lejl, tfejt l-​aħħar sigarett li qatt kont se npejjep u stennejt lil ommi tidħol. Bid-​dmugħ f’għajnejja, tlabtha tagħtini l-​appoġġ f’xi deċiżjonijiet kbar li ridt nieħu. Imbagħad mort it-​teatru fejn kont qed nirriħersja l-​parti taʼ Cordelia fid-​dramm King Lear taʼ Shakespeare. Tlaqt mid-​dramm u temmejt ir-​relazzjoni li kelli maʼ wieħed mill-​atturi prinċipali.

Iżda, kont għadni ma tgħallimtx naqdi lil Alla, u għalhekk ma kellix mezz kif nakkwista l-​kuraġġ. Waqajt f’dipressjoni qawwija. Tlabt lil Alla biex jgħinni ħalli nħossni parti minn xi ħaġa fuq il-​mertu tiegħi nnifsi, għal dak li jien bħala persuna, u mhux fuq il-​mertu taʼ xi talent li writt jew taʼ xi isem magħruf. Inqtajt minn mal-​ħbieb u l-​attivitajiet regulari tiegħi.

It-​Triq Lejn is-​Suċċess Veru

F’nofs il-​konfużjoni li kelli, ftakart fl-​istedina taʼ zijuwi biex nattendi l-​konvenzjoni. Ċempiltlu u ħadni l-​istejdjum. Dak li rajt hemmhekk impressjonani. Rajt nies organizzati li ma kinux jitkellmu ħażin jew ipejpu u ma kinux jipprovaw jimpressjonaw lil ħaddieħor. Dak li smajt mill-​Bibbja fakkarni f’dak li kont qrajt mill-​ktieb żgħir li jismu Is the Bible Really the Word of God?a li kont sibt id-​dar tiegħi ftit wara li miet missieri.

Għall-ħabta taʼ dan iż-​żmien ġejt offruta parti prinċipali oħra f’sensiela televiżiva. Il-​parti għoġbitni, għax dehret li tappoġġa l-​valuri li jogħġbu lil Alla u li kont tgħallimt dwarhom fil-​konvenzjoni. Minħabba f’hekk, aċċettajt il-​parti. Mill-​banda l-​oħra, kien jiġini f’moħħi kontinwament dan il-​ħsieb mill-​Bibbja: “Tintrabtux taħt madmad li mhux indaqs maʼ dawk li ma jemmnux. Għax . . . x’għandu x’jaqsam id-​dawl mad-​dlam?”​—2 Korintin 6:14.

Kienet qed tikber fija xewqa li nogħġob lil Alla. Ridt nattendi laqgħa fis-​Sala tas-​Saltna maʼ zijuwi u maʼ ziti. Il-​kongregazzjoni tagħhom kienet siegħa ’l bogħod mid-​dar tiegħi, iżda attendejt tlett Iħdud wara xulxin. Zijuwi ddeċieda li jiħodni f’kongregazzjoni viċin id-​dar tiegħi. Wasalna waqt li l-​laqgħa kienet qed tispiċċa, u hemmhekk iltqajt maʼ Isabel, żagħżugħa taʼ l-​età tiegħi. Kienet umli u qalbha tajba. Meta zijuwi introduċieni magħha bħala Rosalía Valdés, ma tatx kas taʼ ismi. Dik kienet xi ħaġa li ħadt gost biha. Offriet li tistudja l-​Bibbja miegħi f’dari stess.

Fl-istudju bdejna nużaw il-​ktieb Il-​Verità li Twassal għal Ħajja Eterna.b Isabel kienet lesta li taddatta għal maʼ l-​iskeda tiegħi. Xi drabi kien ikollha tistenna sa tard bil-​lejl, meta kont nispiċċa niffilmja s-​sensiela televiżiva. Kemm kont grata li kien hemm xi ħadd li kien interessat fija sempliċement għax ridt nitgħallem il-​veritajiet tal-​Bibbja! Kienet persuna ġenwina, onesta, u raffinata, dawn kienu kwalitajiet li jien kont naħseb li jinkisbu biss bl-​istudju tal-​filosofija u l-​arti. Konna nistudjaw għal perijodi twal, kultant ħafna drabi fil-​ġimgħa.

Fil-​bidu kien diffiċli li neħles mill-​ideat żbaljati li kelli, iżda ftit ftit il-​veritajiet tal-​Bibbja ħadulhom posthom. Niftakar li kienet tinkuraġġini l-​wegħda t’Alla: “Ftit ieħor, u l-​ħażin ma jkunx aktar; għad tħares fejn kien u ma ssibux. Imma l-​ġwejdin għad jirtu l-​art, u bi sliem kotran jitgħaxxqu.” (Salm 37:​10, 11) Ukoll, dik il-​ħabta t-​tama li nerġaʼ nara lil missieri f’Ġenna taʼ l-​art bdiet issir realtà għalija. Spiss kont naħseb fil-​kliem taʼ Ġesù: “Tistagħġbux b’dan, għax ġejja s-​siegħa li fiha dawk kollha li qegħdin fl-​oqbra tat-​tifkira jisimgħu leħnu u joħorġu, dawk li għamlu t-​tajjeb għal irxoxt taʼ ħajja, dawk li pprattikaw affarijiet vili għal irxoxt taʼ ġudizzju.”​—Ġwanni 5:​28, 29.

Spiċċajt ix-​xogħol fuq is-​sensiela televiżiva u rċivejt offerti oħra immedjatament. Għalkemm x’aktarx il-​proġetti kienu se jagħmluni iktar famuża, il-​parteċipazzjoni tiegħi fihom kienet tissuġġerixxi li jien napprova l-​immoralità, l-​idolatrija, u ideat foloz oħra. Kont tgħallimt li Satana kien reali u li ma jridniex naqdu lil Ġeħova. Għalhekk irrifjutajt l-​offerti u bdejt nattendi l-​laqgħat kollha. M’għandniex xi ngħidu, ommi u ħija ma setgħux jifhmu għala kont qed nitlef tant opportunitajiet u tant flus. Fl-​istess ħin, setgħu jaraw bidla fija. Kont qed ninbidel minn bniedma mdejqa u bla ħeġġa għal waħda bi ftit entużjażmu u ferħ. Fl-​aħħar kelli skop f’ħajti!

Ħassejt ix-​xewqa li naqsam dak li kont qed nitgħallem m’oħrajn u ma domtx ma sirt pubblikatriċi tal-​messaġġ sabiħ tas-​Saltna t’Alla. Meta kont immur nippriedka, xi drabi kien ikun diffiċli li nżomm l-​attenzjoni taʼ l-​inkwilin; ħafna kienu jagħrfuni bħala personalità taʼ l-​ispettaklu. F’iktar minn okkażjoni waħda, jien u l-​oħt li kienet tkun qed takkumpanjani konna naslu għand in-​nies waqt li s-​sensiela li kont nidher fiha jien kienet tkun qed tintwera fuq it-​televixin. L-​inkwilini ma kinux iridu jemmnu li kont qed inħabbtilhom il-​bieb!

B’simbolu tad-​dedikazzjoni tiegħi lil Ġeħova, jien tgħammidt fil-​11 taʼ Settembru, 1982. Issa ħajti kellha skop veru, u kelli quddiemi tip taʼ karriera differenti. Iż-​żelu taʼ Isabel għall-​ministeru kien taʼ ispirazzjoni għalija. Hi kienet taqdi bħala pijuniera regulari, kif jissejħu l-​ministri full-time tax-​Xhieda taʼ Ġeħova. Ma domtx ma bdejt nakkumpanjaha waqt li tistudja l-​Bibbja m’oħrajn. Isabel saret l-​aqwa ħabiba tiegħi.

Kont kważi abbandunajt għalkollox ix-​xogħol tiegħi fid-​dinja taʼ l-​ispettaklu, u għalhekk jien u ommi kellna nikkuntentaw b’livell t’għajxien iktar limitat. Sadattant, ikkomponejt il-​mużika għar-​rabaʼ album tiegħi li kien jinkludi xi kanzunetti dwar il-​valuri u ttwemmin ġdid tiegħi. Ktibt kanzunetta dwar it-​tama soda li kelli li nerġaʼ nara lil missieri. Semmejtha, “Hemm Miktub li Ħa Narah.” Meta kantajtha l-​ewwel darba lil ommi, hi ħassitha mqanqla ferm. Setgħet tara li jien kont konvinta ġenwinament. Ridt intir bil-​ferħ meta hi esprimiet ix-​xewqa li tistudja l-​Bibbja. Sentejn wara, hi saret qaddejja mgħammda taʼ Ġeħova. Għadha attiva fil-​ministeru sal-​ġurnata taʼ llum.

Iktar ma beda jgħaddi ż-​żmien, iktar kien qed isir faċli għalija li nirrifjuta offerti taʼ xogħol. Meta kont niffaċċja xi prova jew xi tentazzjoni kont inġib quddiem għajnejja x-​xena meraviljuża taʼ missieri flimkien magħna f’ġenna sabiħa, u dan kien jibni l-​fiduċja u d-​determinazzjoni tiegħi biex nibqaʼ naqdi lil Ġeħova.

Darba minnhom talbuni biex nieħu sehem fil-​verżjoni bil-​Latin-Amerikan tal-​programm għat-​tfal Sesame Street. Jien ħsibt li ma stajtx nieħu sehem u għedt lill-​produttur li l-​prinċipji Bibliċi li kont inħaddan ma kinux jippermettuli li nippromwovi affarijiet bħall-​festi t’għeluq is-​snin. Hu wieġeb li jekk kont naċċetta li nieħu sehem, hu kien jirrispetta t-​twemmin tiegħi u jiffirmali kuntratt li jispeċifika l-​pożizzjoni tiegħi. Għalhekk aċċettajt u ffilmjajt 200 episodju. Dan kien l-​aħħar xogħol li ħadt bħala attriċi.

Kien għad baqaʼ kuntratt wieħed mal-​kumpanija tad-​diski li kien għadu għaddej; u għalhekk irrekordjajt għaxra mill-​kompożizzjonijiet tiegħi għal din il-​kumpanija, inkluż il-​kanzunetta li kont ikkomponejt dwar missieri u l-​irxoxt. Kelli l-​opportunità nkanta din il-​kanzunetta fuq it-​televixin u f’shows fejn dhert personalment u fihom dejjem tkellimt dwar it-​twemmin tiegħi. Iżda, il-​kumpanija tad-​diski bdiet tagħmel pressjoni fuqi biex ikolli dehra iktar senswali, u għalhekk tajthom ir-​riżenja tiegħi.

Barkiet fis-​Servizz t’Alla

F’Diċembru taʼ l-​1983, jien u Isabel morna biex inżuru l-​bini li x-​Xhieda taʼ Ġeħova għandhom fi Brooklyn, New York. Hemmhekk iltqajt maʼ Russell Phillips, li iktar tard sar ir-​raġel tiegħi. Domna niktbu lil xulxin kważi sentejn. Għadni niftakar sew dakinhar li bdejt is-​servizz tiegħi bħala pijuniera regulari​—minn New York, Russell bagħatli bukkett ward!

Għal sena sħiħa għamilt ix-​xogħol taʼ pijuniera maʼ Isabel. Imbagħad hi ġiet mistiedna biex taqdi fl-​uffiċċju tal-​fergħa tax-​Xhieda taʼ Ġeħova fil-​Messiku. Il-​konversazzjonijiet tagħha dwar l-​inkarigu ġdid li ngħatat kebbsu fija x-​xewqa li nżid fil-​ministeru tiegħi u li naqdi f’Betel jien ukoll, jekk Ġeħova jrid.

Russell kien barka oħra f’ħajti. Minħabba l-​imħabba tiegħu lejn Ġeħova u lejn l-​organizzazzjoni tiegħu, jien tgħallimt ngħożż is-​servizz full-time. Kien iħobbha l-​Betel peress li kien qeda fil-​Betel taʼ Brooklyn għal tliet snin. Wara li żżewwiġna, qdejna flimkien bħala pijunieri regulari f’Colorado, l-​Istati Uniti. Iktar tard, ġejna mistidnin biex naħdmu fuq proġetti internazzjonali taʼ kostruzzjoni taʼ fergħat ġodda f’pajjiżi oħrajn. Kemm kienet kbira s-​sorpriża li ħadna meta sirna nafu li konna se nintbagħtu l-​Messiku! F’April taʼ l-​1990, aċċettajna mill-​qalb il-​privileġġ mill-​isbaħ li nsiru membri tal-​familja taʼ Betel fil-​Messiku. L-​eżempju taʼ Russell inkuraġġieni ħafna. Ammirajt l-​ispirtu taʼ sagrifiċċju li qanqlu biex jitlaq lil art twelidu u lill-​familja tiegħu u jiġi l-​Messiku biex iġib ’il quddiem l-​interessi tas-​Saltna hawnhekk.

Jien u Russell fraħna ħafna bil-​privileġġ taʼ servizz fil-​fergħa tal-​Messiku. Iżda l-​affarijiet inbidlu f’daqqa meta ħriġt tqila. L-​aħbar issorprendietna ħafna. Minkejja dan, aħna dejjem ammirajna ġenituri li jrabbu lil uliedhom fit-​triq tal-​verità, u bil-​ferħ aċċettajna dan l-​inkarigu ġdid. F’Ottubru taʼ l-​1993 twieled Evan, u Gianna twieldet sentejn u nofs wara. Għalkemm it-​trobbija tat-​tfal titlob sforz kontinwu, aħna nħossuna premjati kull darba li t-​tifel, li għandu 11-il sena, u t-​tifla, li għandha 8 snin, jesprimu l-​fidi tagħhom waqt li jieħdu sehem fil-​ministeru.

Russell issa qed jaqdi f’Kumitat Reġjonali tal-​Bini, u dan l-​aħħar jien erġajt bdejt naqdi fil-​ministeru full-time bħala pijuniera. Matul dawn l-​aħħar 20 sena, stajt ngħin 12-il membru tal-​familja, kif ukoll tmienja oħra, jitgħallmu l-​verità tal-​Bibbja u jibdew jaqdu lil Ġeħova.

Meta t-​tfal tiegħi jistaqsuni, “Ma, kien diffiċli għalik li titlaq id-​dinja taʼ l-​ispettaklu?” nikkwota l-​kliem taʼ l-​appostlu Pawlu: “Jien tabilħaqq inqis ukoll kollox bħala telf minħabba l-​valur imprezzabbli taʼ l-​għarfien dwar Kristu Ġesù l-​Mulej tiegħi. Minħabba fih aċċettajt li nitlef l-​affarijiet kollha u nqishom bħala qabda skart, sabiex nirbaħ lil Kristu.” (Filippin 3:8) Kemm jien grata li Ġeħova ħelisni minn ħajja fiergħa u bla skop u ħallieni nsir parti mill-​poplu meraviljuż tiegħu! Qatt ma negħja niżżih ħajr tal-​barkiet bla għadd li jipprovdilna permezz taʼ Ibnu, Ġesù Kristu. Spiss inkanta bil-​ferħ il-​kanzunetta li ktibt dwar missieri. Jien fiduċjuża li ħa nerġaʼ narah.

[Noti taʼ taħt]

[Stampa f’paġna 10]

Mal-​ġenituri tiegħi u maʼ ħija meta kelli sena

[Stampa f’paġna 12, 13]

Inkanta maʼ “Arturo Castro and His Castros 76”

[Sors]

Angel Otero

[Stampa f’paġna 14]

Mal-​familja tiegħi llum

[Sors taʼ l-​Istampa f’paġna 10]

Activa, 1979