Mingħand il-​Qarrejja

Tbatija Grazzi ħafna taʼ l-​artiklu “Iż-​Żgħażagħ Jistaqsu . . . Alla Għala Jħallina Nbatu?” (8 t’April, 2004) Jien għandi 14-il sena, u ftit ilu mietu żewġ persuni li kelli relazzjoni mill-​qrib magħhom—nannuwi u ziti. Kont naf li ma kienx it-​tort t’Alla li mietu. It-​tort huwa taʼ Satana, u ftit żmien biss baqagħlu. Dan l-​artiklu vera farraġni. Jekk jogħġobkom komplu iktbu artikli bħal dawn. Grazzi għal darb’oħra minn qiegħ qalbi.

B. B., Stati Uniti

Ftit ilu, it-​tfajla li kont se niżżewweġ mietet f’inċident tat-​traffiku. Kienet traġedja terribbli—għalija, għall-​kongregazzjoni, u speċjalment għall-​ġenituri tagħha. Nirringrazzja lil Ġeħova talli għenni biex noħroġ mill-​istat taʼ niket profond li waqajt fih. Nirringrazzja wkoll lilkom taʼ l-​artiklu “Alla Għala Jħallina Nbatu?” Ġie eżatt fil-​waqt.

I. D., Ġermanja

Għall-​ewwel, ma ridtx naqra dan l-​artiklu. Ħsibt li l-​kontenut kien se jkun dipressanti. Sentejn ilu, ħija l-​kbir miet kaġun taʼ marda, u għadni nħossni mnikkta minħabba l-​mewt tiegħu. Iżda l-​artiklu fakkarni li Ġeħova jagħtina affarijiet tajbin. Bdejt inħoss li l-​feriti tiegħi bdew jiġu mfejqin, u ksibt il-​kuraġġ biex nibqaʼ niffaċċja l-​ħajja f’din id-​dinja instabbli.

S. H., Ġappun

Xorb Żejjed Grazzi taʼ l-​artiklu “Il-​Ħarsa tal-​Bibbja: Huwa x-​Xorb Żejjed Tassew Ħażin?” (8 taʼ Marzu, 2004) Issa nirrealizza li l-​użu taʼ l-​alkoħol kien il-​kaġun tal-​ġlied bejni u bejn marti, u nirrealizza li ħlejt ħafna flus fl-​alkoħol. Illum il-​ġurnata nixrob inqas u inqas spiss.

G. K., Tanzanija

Pjanta taʼ l-​Għaġeb Qatt ma qrajt xi ħaġa daqshekk interessanti u taʼ l-​għaġeb daqs l-​artiklu “Pjanta li Tibqaʼ Tgħix b’Mod taʼ l-​Għaġeb.” (8 taʼ Marzu, 2004) Il-​welwitschia hija pjanta tassew straordinarja. Kif jirnexxilha tgħix daqshekk fit-​tul f’kundizzjonijiet diffiċli? Artikli bħal dawn jirrivelawlna iktar l-​għerf taʼ Ġeħova, il-​Ħallieq tagħna li għandu kapaċità kbira.

A. C., Russja

Ili naqra l-​ħarġiet taʼ din ir-​rivista għal iktar minn 15-il sena! Minħabba li ċ-​ċirkustanzi tiegħi ma jippermettulix li nsiefer, artikli bħal dawn jgħinuni nikseb informazzjoni fid-​dettall dwar il-​ħolqien taʼ Ġeħova. Qatt ma kont se nkun naf dwar il-​ħajja twila tal-​welwitschia kieku ma kienx għal Stenbaħ!

L. Z., Franza

Grupp tad-​Demm  Grazzi taʼ l-​artiklu “Il-​Ħarsa tal-​Bibbja: Hija l-​Personalità Tiegħek Determinata mill-​Grupp tad-​Demm?” (8 taʼ Frar, 2004) Kont daqsxejn imħassba dwar din il-​kwistjoni. L-​iskola qaluli li l-​personalità ma tistax tiġi determinata mill-​grupp tad-​demm. Innotajt ukoll li f’xi kotba l-​idea li l-​grupp tad-​demm jistaʼ jiddeterminalek il-​personalità hija marbuta maʼ l-​ispiritiżmu. Iżda naf xi persuni li taʼ spiss tkellmu dwar il-​grupp tad-​demm u ġġudikaw lil oħrajn minn dan. Eżattament meta sibt lili nnifsi nitħasseb dwar x’kien tajjeb u x’kien ħażin, ħareġ dan l-​artiklu, u stajt nifhem biċ-​ċar il-​ħarsa tal-​Bibbja.

R. K., Ġappun