Minn Enerġija Elettrika għal Dawl Spiritwali

MINN KITTIEB GĦAL STENBAĦ! FL-​ITALJA

◼ Kmieni fis-​seklu 20, fuq il-​muntanji taʼ Pistoia, l-​Italja, bdew jitfaċċaw xi industriji. Sabiex tinġarr kemm il-​materja prima kif ukoll dik maħduma, inbniet linja ferrovjarja li taħdem bl-​elettriku. Din il-​linja ferrovjarja, bil-​wisaʼ taʼ bejn il-​linji idjaq mis-​soltu, ġiet inawgurata fil-​21 taʼ Ġunju, 1926, u kienet tibqaʼ tielgħa sserrep fuq l-​għoljiet u l-​muntanji għal madwar ħmistax-il kilometru.

Il-​ferrovija kienet tingħata l-​enerġija elettrika permezz taʼ stazzjon sekondarju li jiġġenera l-​elettriku (xellug fuq). Madankollu, maż-​żmien, it-​tnaqqis fit-​traffiku kummerċjali wassal biex il-​linja ma tibqax tintuża iżjed, u fl-​1965 ngħalqet għalkollox. Imma xi ġralu l-​bini taʼ mat-​triq tal-​linja ferrovjarja? Biċċa minnu spiċċa mitluq u fi stat ħażin ħafna; bini ieħor maż-​żmien ġie rranġat fi ħwienet tax-​xorb u vendi tal-​karozzi tal-​linja.

L-istazzjon li jiġġenera l-​elettriku ġie restawrat. Fl-​1997 inxtara mill-​Assoċjazzjoni tax-​Xhieda taʼ Ġeħova taʼ San Marcello Pistoiese u ġie mibdul f’waħda mill-​iktar Swali tas-​Saltna uniċi fit-​Toskana (xellug isfel). Il-​membri tal-​kongregazzjoni li jiltaqgħu f’dak li qabel kien stazzjon li jiġġenera l-​elettriku huma okkupati ħafna f’li ‘jiddu bħala dawwala’ f’dawn l-​inħawi muntanjużi, billi jippridkaw l-​aħbar tajba dwar is-​Saltna t’Alla. (Filippin 2:15; Mattew 24:14) Iva, il-​bini li fil-​bidu kien jintuża biex jagħti l-​enerġija elettrika f’sens letterali issa qed jiġi użat biex ixerred dawl spiritwali.—Mattew 5:14-16; 28:19, 20.