Ħarsa Lejn id-​Dinja

◼ In-​New World Translation of the Holy Scriptures sħiħa hija disponibbli bi 43 lingwa u bi 3 lingwi tal-​Braille; It-​Traduzzjoni tad-​Dinja l-​Ġdida taʼ l-​Iskrittura Griega hija disponibbli bi 18-il lingwa oħra u b’lingwa waħda tal-​Braille. B’seħħ minn Lulju 2007, l-​istampar totali kien taʼ 143,458,577 kopja.

◼ L-​eqdem test tal-​Bibbja magħruf li għadu jeżisti huwa l-​hekk imsejjaħ Barka tal-​Qassis taʼ Numri 6:24-26. Dan kien instab imnaqqax fuq żewġ amuleti tal-​fidda, imremblin bħal skrolli, li jmorru lura għas-​sebaʼ jew is-​sitt seklu Q.E.K.—BIBLICAL ARCHEOLOGY REVIEW, STATI UNITI.

◼ B’seħħ mill-​31 taʼ Diċembru, 2006, in-​numru taʼ lingwi u djaletti li ġew reġistrati bħala li fihom il-​pubblikazzjoni taʼ mill-​inqas ktieb wieħed tal-​Bibbja kien taʼ 2,426—żjieda taʼ 23 fuq is-​sena taʼ qabel.—GĦAQDA SOĊJETAJIET TAL-​BIBBJA, BRITANNJA.

◼ Madwar 28 fil-​mija mill-​Amerikani jqisu l-​Bibbja bħala “l-​kelma proprja t’Alla . . . li għandha tittieħed b’mod letterali,” 49 fil-​mija bħala “l-​kelma ispirata t’Alla iżda mhux kulma hemm fiha jrid jittieħed f’sens letterali,” u 19 fil-​mija bħala “ktieb tal-​ħrejjef.”—GALLUP NEWS SERVICE, STATI UNITI.

L-​Eqdem Bibbja biċ-​Ċiniż?

“L-​eqdem dokumentazzjoni dwar traduzzjoni tal-​Bibbja Ebrajka biċ-​Ċiniż tinstab fuq stela tal-​ġebel [xellug] li tmur lura għas-​sena 781 EK,” jgħid l-​istudjuż Yiyi Chen mill-​Università taʼ Peking. Il-​ġebla, imwaqqfa mill-​Kristjani Nestorjani, instabet fil-​belt taʼ Xi’an fl-​1625. “L-​isem Ċiniż taʼ l-​istela huwa tradott formalment bħala ‘It-​Tifkira tat-​Tixrid tar-​Reliġjon taʼ Tidwil mid-​Daqin fiċ-​Ċina’ (. . . Daqin kien it-​terminu Ċiniż għall-​Imperu Ruman),” jispjega Chen. “Fost l-​ittri fuq l-​istela, insibu espressjonijiet biċ-​Ċiniż bħal ‘kanoni veri’ u ‘traduzzjoni tal-​Bibbja.’”

[Stampa Credit Line f’paġna 30]

© Réunion des Musées Nationaux/Art Resource

Teżor minn Marsa

Fl-​2006, xi ħaddiema li kienu qed iħaffru f’marsa fl-​Irlanda skoprew ktieb tas-​Salmi li huwa maħsub li jmur lura għat-​8 seklu E.K. Il-​manuskritt bil-​Latin, wieħed mill-​ftit li għadhom jeżistu mill-​era tiegħu, huwa meqjus bħala teżor. Fih hemm bejn wieħed u ieħor 100 paġna tal-​parċmina fina li huma taʼ kwalità tajba ħafna u li għadhom illegati kif kienu oriġinalment. “Il-​fdalijiet taʼ saff taʼ tapit li jgħatti u basket tal-​ġilda jindikaw li l-​ktieb tas-​Salmi kien ġie moħbi bi skop, forsi biex jinżamm protett minn attakk mill-​Vikingi li seħħ 1,200 sena ilu,” tgħid The Times taʼ Londra. Għalkemm il-​paġni weħlu flimkien u tmermru xi ftit, l-​esperti huma fiduċjużi li se jkunu kapaċi jifirduhom u jippreservawhom.

Trakkijiet Mimlijin Storja

Rapporti jgħidu li xi arkeoloġi li kienu qed jgħarblu l-​ħamrija li kienet fi trakkijiet u li nġabret mis-​sit tat-​tempju f’Ġerusalemm, ġabru eluf t’artefatti li jmorru lura miż-​żminijiet taʼ qabel l-​Iżraelin saż-​żminijiet moderni. Fosthom kien hemm ponta taʼ vleġġa bħal dawk li kienu jintużaw mill-​armata taʼ Nabukodonosor, li qered l-​ewwel tempju Lhudi f’dan is-​sit. L-​iktar sejba interessanti kienet siġill tat-​tafal, li jmur lura għas-​sebaʼ jew is-​sitt seklu Q.E.K. li jingħad li fuqu għandu l-​isem Ebrajk Gedalyahu Ben Immer Ha-Cohen. Skond l-​arkeologu Gabriel Barkai, sidu “setaʼ kien ħu Pasħur Bin Immer, deskritt fil-​Bibbja [Ġeremija 20:1] bħala qassis u uffiċjal tat-​tempju.”