Kapitlu 10
Saltna “li M’Hijiex Se Tinġieb f’Rovina”
1, 2. (a) Liema fatt huwa enfasizzat kuljum permezz tal-ġrajjiet dinjin, u kif? (b) Liema hija l-unika soluzzjoni?
ĠRAJJIET dinjin taʼ kuljum jiġbdu l-attenzjo-ni lejn il-fatt li l-bnedmin ma sabux hena billi ċaħdu s-sovranità taʼ Jehovah u, minflok, ipprovaw jiggvernaw lilhom infushom. Ebda sistema taʼ gvern uman ma ġabet benefiċċji b’mod imparzjali lill-umanità. Għalkemm il-bnedmin żviluppaw il-ħila xjentifika tagħhom sa livell li bħalu qatt ma kien hemm, ma kellhomx il-ħila jqaċċtu ’l barra d-dnub, jegħlbu l-mard u jtemmu l-mewt, lanqas saħansitra għal wieħed mis-sudditi tagħhom. Għall-kuntrarju, il-ġnus ikomplu jiżviluppaw armamenti ġodda u iktar orribbli. Il-vjolenza kriminali tiffjorixxi. It-teknoloġija, ir-regħba u l-injoranza jingħaqdu flimkien biex iniġġsu l-art, l-ilma u l-arja. L-inflazzjoni m’għola s-smewwiet u n-nuqqas taʼ xogħol qegħdin jagħmluh estremament iebes għal ħafna biex jakkwistaw in-neċessitajiet tal-ħajja. In-nies huma ddisprati għal mezz taʼ ħelsien.—Ekkl. 8:9.
2 X’inhi s-soluzzjoni? Is-Saltna t’Alla, li għaliha Ġesù kien għallem lis-segwaċi tiegħu biex jitolbu. (Matt. 6:9, 10) Kemm għandna nkunu grati li s-serħan li din se ġġib issa huwa tant fil-qrib!
3. (a) F’konnessjoni maʼ din is-Saltna, x’seħħ fis-sema fl-1914 E.K.? (b) Dak għala huwa importanti għalina?
3 Diġà, mill-1914 E.K. ’l hawn, kienet qiegħda topera s-Saltna t’Alla f’idejn Ġesù Kristu.a F’dik is-sena l-ġrajjiet li Danjel kien ra ġo viżjoni profetika attwalment twettqu fis-sema. L-“Antik tal-Jiem,” Alla Jehovah, ta lil Bin il-bniedem, Ġesù Kristu, “stat taʼ ħakkiem u dinjità u saltna, biex il-popli, gruppi nazzjonali u lingwi għandhom ilkoll jaqdu saħansitra lilu.” Billi kien qiegħed jirrapporta l-viżjoni, Danjel kiteb: “L-istat taʼ ħakkiem tiegħu huwa stat taʼ ħakkiem li jdum għal żmien indefinit u li m’huwiex se jgħaddi, u saltnatu waħda li m’hijiex se tinġieb f’rovina.” (Dan. 7:13, 14) Huwa permezz taʼ din is-Saltna li Alla se jagħmilha possibbli għal dawk li jħobbu t-tjieba li jgawdu l-affarijiet bla għadd tajbin li lilhom hu għamel bħala l-iskop tiegħu meta poġġa l-ewwel ġenituri umani tagħna fil-Ġenna.
4. Liema dettalji rigward is-Saltna huma taʼ interess kbir għalina, u għala?
4 Sudditi leali tas-Saltna huma interessati ferm fl-istruttura taʼ dan il-gvern u fil-mod kif jopera. Iridu jkunu jafu x’inhu jagħmel issa, x’se jwettaq fil-futur u x’jinħtieġ minnhom. Jeżaminawh bir-reqqa, u, fil-waqt li jagħmlu dan, l-apprezzament tagħhom għalih jikber u jarmaw lilhom infushom biex jgħidu lil oħrajn dwaru.—Salm 48:12, 13.
SPEZZJONI LI TQANQAL IL-QALB
5. (a) L-Iskrittura kif turi s-sovranità taʼ min hija espressa permezz tas-Saltna Messjanika? (b) Mela kif aħna effettwati b’dak li nitgħallmu dwar is-Saltna?
5 Waħda mill-ewwel affarijiet li eżami bħal dan jirrivela hija li din is-Saltna Messjanika hija espressjoni tas-sovranità taʼ Jehovah innifsu. Huwa hu l-wieħed li ta “stat taʼ ħakkiem u dinjità u saltna” lil Ibnu. B’hekk, wara li din is-Saltna bdiet taħkem, ilħna fis-sema b’mod xieraq iddikjaraw: “Is-saltna tad-dinja tassew saret is-saltna tal-Mulej tagħna [Alla Jehovah] u tal-Kristu tiegħu, u hu [Jehovah] se jaħkem bħala Sultan għal dejjem taʼ dejjem.” (Riv. 11:15) Mela dak kollu li nosservaw dwar din is-Saltna u dak li din twettaq iressaqna eqreb lejn Jehovah innifsu. Din tnissel ġo fina xewqa li nissottomettu lilna nfusna lejn is-sovranità tiegħu għal dejjem.
6. Għala huwa taʼ interess speċjali għalina li Ġesù Kristu hu l-ħakkiem sostitut taʼ Jehovah?
6 Kemm huwa tajjeb li Jehovah poġġa lil Ġesù Kristu fuq it-tron bħala l-ħakkiem sostitut Tiegħu! Bħala l-Imgħallem li lilu Alla uża biex jagħmel l-art u l-bniedem, Ġesù jaf il-bżonnijiet tagħna aħjar minn kwalunkwe wieħed minna. Barra minn hekk, hu wera mill-bidu taʼ l-istorja umana ‘l-għaxqa tiegħu għal ulied il-bnedmin.’ (Prov. 8:30, 31; Kol. 1:15-17) Tant hija kbira dik l-imħabba li hu personalment ġie fuq l-art u ta ħajtu bħala rahan għan-nom tagħhom. B’hekk għamel disponibbli għalina l-mezz għal ħelsien mid-dnub u l-mewt, u l-opportunità għal ħajja eterna.—Matt. 20:28.
7. (a) F’kuntrast maʼ l-istat taʼ ħakkiem minn kwalunkwe bniedem, dan il-gvern għala se jkun dejjiemi? (b) L-“irsir leali u diskret” liema relazzjoni għandu mal-gvern tas-sema?
7 Dan huwa gvern stabbli, dejjiemi. Il-kwalità dejjiema tiegħu hija assigurata mill-fatt li Jehovah innifsu m’huwiex suġġett għall-mewt. (Ħab. 1:12; Salm 146:3-5, 10) F’kuntrast mas-slaten umani, Ġesù Kristu, il-wieħed li lilu Alla fada l-istat taʼ Sultan, hu wkoll immortali. (Rum. 6:9; 1 Tim. 6:15, 16) Fi sħubija maʼ Kristu fuq tronijiet tas-sema se jkun hemm 144,000 oħrajn, qaddejja leali t’Alla meħudin minn “kull tribù u lsien u poplu u ġens.” Dawn, ukoll, jiġu mogħtijin ħajja immortali. (Riv. 5:9, 10; 1 Kor. 15:42-44, 53) Diġà l-parti l-kbira minnhom huma fis-smewwiet, u l-fdal tagħhom li għadhom fuq l-art jifformaw il-klassi taʼ l-“irsir leali u diskret,” li bil-lealtà jmexxi ’l quddiem l-interessi taʼ dik is-Saltna hawnhekk.—Matt. 24:45-47.
8, 9. (a) Is-Saltna se tneħħi liema influwenzi li jifirdu u korrotti? (b) Mela, jekk irridu nevitaw li nsiru għedewwa tas-Saltna t’Alla, f’liema organizzazzjonijiet u attivitajiet se nevitaw li niġu involuti?
8 Dalwaqt issa, fil-ħin maħtur taʼ Jehovah, il-forzi tiegħu t’esekuzzjoni se jmorru fl-azzjoni biex inaddfu l-art. Se jeqirdu għal dejjem lil dawk il-bnedmin li minħabba l-għażla tagħhom stess ma jafux lil Alla, billi jirrifjutaw li jirrikonoxxu s-sovranità tiegħu, u li jittrattaw b’disprezz il-provvedimenti taʼ mħabba li hu jagħmel permezz taʼ Ġesù Kristu. (2 Tess. 1:6-9) Dan se jkun il-jum taʼ Jehovah, iż-żmien tant mistenni għall-ivvindikar tiegħu bħala s-Sovran Universali.
9 Ir-reliġjon falza kollha, u wkoll il-gvernijiet umani kollha u l-armati tagħhom, li kienu qegħdin jiġu mmanipulati mill-ħakkiem mill-agħar li ma jidhirx taʼ din id-dinja, se jinġiebu fix-xejn għal dejjem. Dawk kollha li jidentifikaw lilhom infushom bħala parti minn din id-dinja billi jsegwu mod taʼ ħajja ċċentrat fuqhom infushom, diżonest u immorali se jiġu maqtugħin permezz tal-mewt. Satana u d-demonji tiegħu se jiġu mneħħijin milli jkollhom kuntatt maʼ l-abitanti taʼ l-art, miżmumin f’sigurtà għal elf sena. X’serħan se jkun dan għal dawk kollha li jħobbu t-tjieba!—Riv. 18:21, 24; 19:11-16, 19-21; 20:1, 2.
L-OĠĠETTIVI TAGĦHA—KIF JINTLAĦQU
10. (a) Is-Saltna Messjanika kif se twettaq l-iskop taʼ Jehovah għall-art infisha? (b) Dan x’se jkun ifisser għan-nies li jkunu qegħdin jgħixu fuq l-art f’dak iż-żmien?
10 Din is-Saltna Messjanika se twettaq għalkollox l-iskop oriġinali t’Alla għall-art. (Ġen. 2:8, 9, 15; 1:28) Sal-ġurnata tal-lum, il-bniedem falla f’li jesegwixxi dak l-iskop. Madankollu, “l-art abitata li għandha tiġi” ġiet sottomessa lejn Bin il-bniedem, Ġesù Kristu. Dawk kollha li jibqgħu ħajjin wara l-esekuzzjoni tal-ħaqq taʼ Jehovah fuq din is-sistema qadima se jaħdmu magħqudin taħt Kristu bħala Sultan, u bil-ferħ jagħmlu dak kollu li hu jesiġi sabiex l-art issir Ġenna globali. (Eb. 2:5-9) Il-bnedmin kollha se jgawdu xogħol idejhom u jibbenefikaw bis-sħiħ mill-abbundanza taʼ dak li l-art tipproduċi.—Salm 72:1, 7, 8, 16-19; qabbel Isaija 65:21, 22.
11. (a) Il-perfezzjoni fil-moħħ u l-ġisem kif se tiġi mwettqa għas-sudditi tas-Saltna? (b) Dan x’se jinkludi?
11 Meta Adam u Eva ġew maħluqin kienu perfetti, u kien l-iskop t’Alla li l-art timtela bin-nisel tagħhom, billi kollha kemm huma jgawdu l-perfezzjoni fil-moħħ u l-ġisem. Taħt il-ħakma tas-Saltna, dak l-iskop se jwassal għal realtà glorjuża. Dan jirrikjedi t-tneħħija taʼ l-effetti kollha tad-dnub, u għal dak l-għan Kristu jaqdi mhux biss bħala Sultan imma wkoll bħala Qassis il-Kbir. Bis-sabar hu se jgħin lis-sudditi ubbidjenti tiegħu biex jibbenefikaw mill-valur li jpatti għad-dnub tas-sagrifiċċju tal-ħajja umana tiegħu stess. Għajnejn għomja se jinfetħu. Widnejn torox se jkunu mhux misdudin. Il-laħam sfigurat biż-żmien jew bil-mard se jsir iktar tari minn dak taʼ tarbija. Dgħjufijiet kroniċi se jċedu posthom għal saħħa vigoruża. Tasal il-ġurnata meta ħadd ma se jkollu għalfejn jgħid, “jien marid,” għaliex bnedmin li jkollhom il-biżaʼ t’Alla se jiġu meħlusin mit-toqol tad-dnub u l-effetti gravi tiegħu.—Qabbel Isaija 33:22, 24; 35:5, 6; Ġob 33:25; Luqa 13:11-13.
12. (a) Il-perfezzjoni umana x’tirrikjedi iktar? (b) Dak kif se jintlaħaq, u x’se jirriżulta minnu?
12 Li tintlaħaq il-perfezzjoni, madankollu, jinvolvi ferm iktar milli jkollok ġisem f’sikktu u moħħ f’sikktu. Dan jinkludi li b’mod xieraq wieħed jirrifletti l-kwalitajiet tal-personalità taʼ Jehovah, għaliex il-bniedem kien magħmul ‘fix-xbiha t’Alla, skond ix-xebh tiegħu.’ (Ġen. 1:26) Għal dak l-għan, se tinħtieġ ħafna edukazzjoni. Dan huwa Ordni Ġdid fejn “għandha tgħammar it-tjieba,” u għalhekk bħalma bassar il-profeta Isaija, “it-tjieba hija dik li żgur se jitgħallmu l-abitanti taʼ l-art produttiva.” (2 Piet. 3:13; Isa. 26:9) Din il-kwalità twassal għall-paċi—bejn popli tal-ġnus kollha, fost dawk fi sħubija mill-qrib, fil-familja taʼ dak li jkun u, fuq kollox, m’Alla nnifsu. (Isa. 32:17; Salm 85:10-13) Dawk li jitgħallmu t-tjieba se jiġu edukati b’mod progressiv f’dik li hija r-rieda t’Alla għalihom. Hekk kif l-imħabba għall-mogħdijiet taʼ Jehovah tiġi mnissla fil-fond taʼ qlubhom, huma se jsegwu dawn il-mogħdijiet fi kwalunkwe aspett taʼ ħajjiethom. Il-bniedem perfett Ġesù setaʼ jgħid, ‘Jien dejjem nagħmel l-affarijiet li jogħġbu lil Missieri.’ (Ġwn. 8:29) Kemm se tkun taʼ tgawdija l-ħajja meta dak se jkun veru għall-ispeċi umana kollha!
TWETTIQIET DIĠÀ EVIDENTI
13. Uża l-mistoqsijiet taʼ fuq biex tenfasizza twettiqiet tas-Saltna u dak li għalhekk għandna nkunu qegħdin nagħmlu.
13 Diġà t-twettiqiet impressjonanti tas-Saltna huma evidenti b’mod ċar għal persuni li għandhom l-għajnejn tal-fidi. Il-mistoqsijiet u Skritturi ċċitati li ġejjin se jfakkruk dwar xi wħud minn dawn, kif ukoll dwar xi affarijiet li s-sudditi kollha tas-Saltna jistgħu u għandhom jagħmlu issa:
Is-Sultan kontra min ħa azzjoni l-ewwel, u b’liema riżultat? (Riv. 12:7-10, 12)
F’Mattew 24:14, Ġesù liema xogħol ieħor bassar li kellu jagħmel wara li jieħu t-tron tiegħu u qabel ma jeqred lill-uħud mill-agħar?
Dan ix-xogħol kif jitwettaq? Min qiegħed jipparteċipa fih? (Salm 110:3; Riv. 14:6, 7)
Opponenti politiċi u reliġjużi għala ma kellhomx il-ħila jwaqqfuh? (Atti 5:38, 39; Żakk. 4:6)
Bħala riżultat tax-xogħol edukattiv li qiegħed isir, liema bidliet saru diġà fil-ħajjiet taʼ persuni li jissottomettu rwieħhom għall-ħakma tas-Saltna? (Isa. 2:4; 1 Kor. 6:9-11)
IL-KWALITÀ DEJJIEMA TAS-SALTNA
14. (a) Għal kemm żmien se jaħkem Kristu? (b) X’se jiġi mwettaq matul dak iż-żmien?
14 Wara t-tfigħ fl-abbissi taʼ Satana u d-demonji tiegħu, Ġesù Kristu flimkien mal-144,000 werrieta mseħbin tiegħu se jaħkmu għal elf sena. (Riv. 20:6) Matul dak iż-żmien l-umanità se tinġieb għal perfezzjoni. Kull gvern u awtorità u poter f’oppożizzjoni lejn Jehovah se jitneħħa. B’dak imwettaq, Ġesù se jdawwar is-Saltna lura lejn Missieru, “biex Alla jistaʼ jkun l-affarijiet kollha għal kulħadd.”—1 Kor. 15:24, 28.
15. Kif inhu veru li din is-Saltna “qatt ma se tinġieb f’rovina”?
15 Il-pożizzjoni taʼ Ġesù stess f’relazzjoni maʼ l-art sejra għalhekk tinbidel. Minkejja dan, l-istat taʼ ħakkiem tiegħu se “jdum għal żmien indefinit” u s-Saltna tiegħu “m’hijiex se tinġieb f’rovina.” (Dan. 7:14) F’liema sens? Fis-sens li l-awtorità li qiegħda taħkem m’hijiex se tgħaddi f’idejn oħrajn li għandhom miri differenti. It-twettiqiet tas-Saltna ‘qatt ma se jinġiebu f’rovina.’ Dak li tagħmel is-Saltna biex tivvindika l-isem taʼ Jehovah u l-iskop tiegħu rigward l-art se jibqaʼ għal dejjem.
[Nota taʼ taħt]
a Ara l-ktieb “Let Your Kingdom Come,” paġni 127-139.
Diskussjoni Bħala Reviżjoni
● Is-Saltna t’Alla għala hija l-unika soluzzjoni għall-problemi taʼ l-umanità? Meta bdiet taħkem?
● Liema ħaġa tappella għalik speċjalment dwar is-Saltna t’Alla u dak li din se twettaq? Għala?
● Liema twettiqiet tas-Saltna nistgħu naraw diġà? Liema parti għandna f’dawn?
[Stampa f’paġna 84, 85]
It-tjieba hija dik li n-nies se jitgħallmu