Kapitlu Għaxra

Saltna “li Ma Tinqered Qatt”

1. Liema fatt ġie enfasizzat mill-​ġrajjiet dinjin matul l-​istorja taʼ l-​umanità?

IL-​ĠRAJJIET dinjin kuljum jenfasizzaw il-​fatt li l-​bnedmin ma sabux l-​hena meta ċaħdu s-​sovranità taʼ Jehovah u pprovaw jaħkmu lilhom infushom. L-​ebda sistema taʼ gvern uman ma ġabet benefiċċji imparzjali għall-​bnedmin. Għalkemm il-​bnedmin żviluppaw l-​għarfien xjentifiku tagħhom sal-​punt li qatt ma kien hawn bħalu, ma kinux kapaċi jegħlbu l-​mard jew itemmu l-​mewt, lanqas saħansitra għal individwu wieħed. Il-​ħakma umana ma neħħietx il-​gwerer, il-​vjolenza, il-​kriminalità, il-​korruzzjoni, jew il-​faqar. Gvernijiet tiranni għadhom qed jiddominaw lin-​nies f’ħafna pajjiżi. (Koħèlet 8:9) It-​teknoloġija, ir-​regħba, u l-​injoranza huma fatturi li qed jingħaqdu flimkien biex iniġġsu l-​art, l-​ilma, u l-​arja. Tmexxija ħażina taʼ l-​ekonomija minn xi uffiċjali tagħmilha diffiċli għal ħafna biex jiksbu n-​neċessitajiet tal-​ħajja. Eluf taʼ snin taʼ ħakma umana għamlu ovvju dan il-​fatt: “Triq il-​bniedem m’hijiex f’idejh, anqas min jimxi ma jistaʼ jiddirieġi l-​passi tiegħu.”—Ġeremija 10:23.

2. X’inhi l-​unika soluzzjoni għall-​problemi tal-​bnedmin?

² X’inhi s-​soluzzjoni? Is-​Saltna t’Alla, li dwarha Ġesù għallem lis-​segwaċi tiegħu biex jitolbu: “Tiġi saltnatek, ikun li trid int, kif fis-​sema, hekkda fl-​art.” (Mattew 6:​9, 10) Fit-​2 Pietru 3:​13, is-​Saltna t’Alla fis-​sema hija deskritta bħala s-​“smewwiet ġodda” li se jaħkmu fuq l-​“art ġdida,” jiġifieri, fuq soċjetà taʼ nies sewwa. Tant hija importanti s-​Saltna t’Alla, li se taħkem mis-​sema, li Ġesù għamilha t-​tema ċentrali taʼ l-​ippridkar tiegħu. (Mattew 4:17) Hu wera l-​prijorità li din għandha tieħu f’ħajjitna, meta ħeġġeġ: “Mela fittxu l-​ewwel is-​Saltna u l-​ġustizzja taʼ Alla.”—Mattew 6:33.

3. Li nitgħallmu dwar is-​Saltna t’Alla għala huwa taʼ urġenza kbira issa?

³ Il-​fatt li nitgħallmu dwar is-​Saltna t’Alla huwa taʼ urġenza kbira issa, għax dalwaqt din is-​Saltna se tieħu azzjoni biex tbiddel għal dejjem it-​tmexxija taʼ din l-​art. Danjel 2:44 ibassar: “Fi żmien dawn is-​slaten [il-gvernijiet li qed jaħkmu issa], Alla tas-​sema jqajjem saltna [fis-sema] li ma tinqered qatt, u li l-​ħakma tagħha ma tgħaddix għal poplu ieħor [il-bnedmin qatt iktar ma se jerġgħu jaħkmu l-​art]. Hija tfarrak u ttemm is-​saltniet [preżenti] l-​oħra kollha, waqt li hi tibqaʼ wieqfa għal dejjem.” B’hekk, is-​Saltna se ttemm dawn l-​aħħar jiem billi teqred din is-​sistema t’affarijiet mill-​agħar kollha. Il-​ħakma taʼ l-​art permezz tas-​Saltna tas-​sema se tkun definita. Kemm għandna għalfejn inkunu grati li s-​serħan li din se ġġib huwa tassew fil-​qrib!

4. F’konnessjoni mas-​Saltna, x’seħħ fis-​sema fl-​1914, u dan għala huwa importanti għalina?

⁴ Fl-​1914, Kristu Ġesù nħatar bħala Sultan u ġie awtorizzat biex ‘jaħkem f’nofs l-​għedewwa tiegħu.’ (Salm 110:​1, 2) Ukoll f’dik is-​sena, bdew l-​aħħar jiem taʼ din is-​sistema t’affarijiet preżenti u mill-​agħar. (2 Timotju 3:1-5, 13) Fl-​istess ħin, il-​ġrajjiet li ra Danjel fil-​viżjoni profetika seħħew attwalment fis-​sema. Ix-​“Xiħ fl-​għomor,” Alla Jehovah, ta lil Bin il-​bniedem, Ġesù Kristu, “ħakma, ġieħ, u saltna, biex lilu jaqdi kull ġens, u poplu, u lsien.” Waqt li rrapporta dwar il-​viżjoni, Danjel kiteb: “Ħakmietu ħakma għal dejjem li ma tgħaddix, u saltnatu li ma tinqeridx.” (Danjel 7:​13, 14) Huwa permezz taʼ din is-​Saltna tas-​sema f’idejn Kristu Ġesù li Alla se jġiegħel lil dawk li jħobbu s-​sewwa jgawdu l-​affarijiet tajbin bla għadd, fi qbil maʼ l-​iskop li kellu meta poġġa lill-​ewwel ġenituri umani tagħna fil-​Ġenna taʼ l-​art.

5. Liema dettalji dwar is-​Saltna huma taʼ interess kbir għalina, u għala?

⁵ Hija x-​xewqa tiegħek li tkun sudditu leali tas-​Saltna? Jekk iva, int se tkun interessat ferm f’li tkun taf kif inhu magħmul dan il-​gvern tas-​sema u fil-​mod kif jaħdem. Trid tkun taf x’qed jagħmel issa, x’se jwettaq fil-​futur, u x’jeħtieġ minnek. Hekk kif teżamina s-​Saltna mill-​qrib, l-​apprezzament tiegħek għaliha għandu jikber. Jekk tirreaġixxi favur il-​ħakma tagħha, se tkun mgħammar aħjar biex tgħid lil oħrajn dwar l-​affarijiet meraviljużi li se tagħmel is-​Saltna t’Alla għall-​bnedmin ubbidjenti.—Salm 48:​13, 14 (48:​12, 13, NW).

Il-​Ħakkiema tas-​Saltna t’Alla

6. (a) L-​Iskrittura kif turi liema sovranità hija espressa permezz tas-​Saltna Messjanika? (b) Kif għandna niġu effettwati minn dak li nitgħallmu dwar is-​Saltna?

⁶ Waħda mill-​affarijiet li jirrivela eżaminar bħal dan hi li din is-​Saltna Messjanika hija turija tas-​sovranità taʼ Jehovah stess. Kien Jehovah li ta “ħakma, ġieħ, u saltna” lil Ibnu. Wara li Bin Alla ngħata l-​qawwa biex jibda jaħkem bħala Sultan, ilħna mis-​sema ddikjaraw b’mod xieraq: “Is-​saltna tad-​dinja saret taʼ Sidna [Alla Jehovah] u tal-​Messija tiegħu, u hu [Jehovah] se jsaltan għal dejjem taʼ dejjem.” (Apokalissi 11:15) Għalhekk, kull ħaġa li ninnotaw dwar din is-​Saltna u dak li se twettaq tistaʼ tressaqna eqreb taʼ Jehovah innifsu. Dak li nitgħallmu għandu jnaqqax ġewwa fina xewqa li nissottomettu ruħna għas-​sovranità tiegħu għal dejjem.

7. Għala huwa taʼ interess speċjali għalina li Ġesù Kristu huwa l-​Viċi Ħakkiem taʼ Jehovah?

⁷ Ikkunsidra wkoll il-​fatt li Jehovah poġġa lil Ġesù Kristu fuq it-​tron bħala l-​Viċi Ħakkiem. Bħala l-​Imgħallem użat minn Alla biex jagħmel l-​art u l-​bnedmin, Ġesù jaf x’inhuma l-​bżonnijiet tagħna aħjar milli nafu aħna. Barra minn hekk, mill-​bidu taʼ l-​istorja umana, hu wera kemm ‘jitgħaxxaq b’ulied il-​bnedmin.’ (Proverbji 8:​30, 31, KŻ; Kolossin 1:​15-17) Tant hija kbira l-​imħabba tiegħu għall-​bnedmin li hu ġie personalment fuq l-​art u ta ħajtu bħala fidwa għalina. (Ġwann 3:16) B’hekk, hu għamel disponibbli għalina l-​mezz tal-​ħelsien mid-​dnub u l-​mewt u l-​opportunità għal ħajja taʼ dejjem.—Mattew 20:28.

8. (a) B’kuntrast mal-​ħakmiet umani, għala l-​gvern t’Alla se jibqaʼ? (b) Liema relazzjoni “l-​ilsir leali u diskret” għandu mal-​gvern tas-​sema?

⁸ Is-​Saltna t’Alla hija gvern stabbli u dejjiemi. Il-​kwalità dejjiema tagħha hija żgurata mill-​fatt li Jehovah innifsu m’huwiex suġġett għall-​mewt. (Ħabakkuk 1:12) B’kuntrast mas-​slaten umani, Ġesù Kristu, li lilu Alla fdalu l-​ħakma f’idejh, huwa immortali wkoll. (Rumani 6:9; 1 Timotju 6:​15, 16) Assoċjati maʼ Kristu fuq tronijiet tas-​sema se jkun hemm 144,000 ruħ oħra, qaddejja leali t’Alla minn “kull tribù u lsien, minn kull poplu u ġens.” Dawn ukoll jingħataw ħajja immortali. (Apokalissi 5:​9, 10; 14:​1-4; 1 Korintin 15:​42-44, 53) Il-​biċċa l-​kbira minnhom diġà qegħdin fis-​sema, u l-​bqija li għadhom fuq l-​art jifformaw “l-​ilsir leali u diskret” taʼ żmienna, li jmexxi lealment l-​interessi taʼ din is-​Saltna hawnhekk.—Mattew 24:​45-47, NW.

9, 10. (a) Liema influwenzi korrotti u li jġibu firda se tneħħi s-​Saltna? (b) Jekk ma rridux insiru għedewwa tas-​Saltna t’Alla, f’liema affarijiet m’għandniex ninvolvu ruħna?

⁹ Dalwaqt, fiż-​żmien maħtur minnu, Jehovah se jibgħat il-​qawwiet esekuzzjonali tiegħu mis-​sema biex jieħdu azzjoni ħalli jnaddfu l-​art. Huma se jeqirdu għal dejjem lil dawk il-​bnedmin li, minn jeddhom, jirrifjutaw li jagħrfu s-​sovranità tiegħu u jżebilħu l-​provvedimenti kollha mħabba li hu jagħmel permezz taʼ Ġesù Kristu. (2 Tessalonikin 1:​6-9) Dan se jkun jum Jehovah, iż-​żmien li ilu mistenni biex jiġi vindikat bħala s-​Sovran Universali. “Araw, Jum il-​Mulej għad jasal, kiefer, mgħaddab, ħuġġieġa nar bil-​korla, . . . u jeqred minnha l-​midinbin.” (Isaija 13:9) “Hu jum taʼ korla dak il-​Jum, jum taʼ dwejjaq u niket, jum taʼ qerda u diqa, jum taʼ dlam u swied, jum imsaħħab u taʼ ċpar magħqud.”—Sofonija 1:15.

¹⁰ Ir-​reliġjon falza kollha u l-​gvernijiet umani kollha u l-​armati tagħhom, li ġew kontrollati mill-​ħakkiem mill-​agħar li ma jidhirx taʼ din id-​dinja, se jinqerdu għal dejjem. Dawk kollha li jissieħbu maʼ din id-​dinja billi jsegwu ħajja egoista, diżonesta, u immorali se jinqerdu. Satana u d-​demonji tiegħu mhux se jkollhom iktar kuntatt maʼ l-​abitanti taʼ l-​art, ladarba se jkunu maqfulin fis-​sigurtà fl-​abbiss għal elf sena. Imbagħad, is-​Saltna t’Alla se jkollha kontroll sħiħ fuq kulma jiġri fuq l-​art. X’serħan se jkun dan għal dawk kollha li jħobbu s-​sewwa!—Apokalissi 18:​21, 24; 19:​11-16, 19-21; 20:​1, 2.

Il-​Miri tas-​Saltna—Kif Jinkisbu

11. (a) Is-​Saltna Messjanika kif se twettaq l-​iskop taʼ Jehovah għall-​art? (b) X’se tkun tfisser il-​ħakma tas-​Saltna għan-​nies li jkunu qed jgħixu fuq l-​art dak iż-​żmien?

¹¹ Is-​Saltna Messjanika se twettaq bis-​sħiħ l-​iskop oriġinali t’Alla għall-​art. (Ġenesi 1:28; 2:​8, 9, 15) Sa llum, il-​bnedmin fallew li jappoġġaw dan l-​iskop. Madankollu, “id-​dinja li għandha tiġi” se tkun suġġetta għal Bin il-​bniedem, Ġesù Kristu. Dawk kollha li jsalvaw mill-​esekuzzjoni tal-​ġudizzju taʼ Jehovah fuq din is-​sistema qadima se jaħdmu magħqudin flimkien taħt Kristu s-​Sultan, filwaqt li jagħmlu b’ferħ dak kollu li hu jidderieġi, sabiex l-​art issir ġenna globali. (Lhud 2:​5-9) L-​umanità kollha se tgawdi xogħol idejha u tibbenefika bis-​sħiħ mill-​abbundanza taʼ dak li tipproduċi l-​art.—Salm 72:​1, 7, 8, 16-19; Isaija 65:​21, 22.

12. Il-​perfezzjoni fil-​moħħ u l-​ġisem kif se sseħħ għas-​sudditi tas-​Saltna?

¹² Meta Adam u Eva ġew maħluqin, kienu perfetti, u l-​iskop t’Alla kien li l-​art timtela bin-​nisel tagħhom. Ilkoll riedhom igawdu perfezzjoni fil-​moħħ u l-​ġisem. Dan l-​iskop se jsir realtà meraviljuża taħt il-​ħakma tas-​Saltna. Dan jirrikjedi t-​tneħħija taʼ l-​effetti kollha tad-​dnub, u għal dan l-​iskop, Kristu jaqdi mhux biss bħala Sultan imma wkoll bħala l-​Qassis il-​Kbir. Bil-​paċenzja, hu se jgħin lis-​sudditi ubbidjenti tiegħu biex jibbenefikaw mis-​sagrifiċċju tal-​ħajja umana tiegħu li jiswa biex ipatti għad-​dnub.

13. Liema benefiċċji fiżiċi se jiġu realizzati taħt il-​ħakma tas-​Saltna?

¹³ Taħt il-​ħakma tas-​Saltna, l-​abitanti taʼ l-​art se jgawdu benefiċċji fiżiċi meraviljużi. “Mbagħad jinfetħu għajnejn l-​għomja, jinfetħu widnejn it-​torox. Mbagħad iz-​zopp jaqbeż bħal għażżiela u lsien l-​imbikkma jinħall bil-​ferħ.” (Isaija 35:​5, 6) Il-​ġisem sfigurat mill-​età jew mard se jsir iktar f’sikktu minn dak taʼ tifel żgħir, u minflok dgħjufijiet kroniċi se jkun hemm saħħa u enerġija. “Jixxettel ġismu bħal meta kien tfajjel u jerġaʼ għaż-​żmien taʼ żgħożitu.” (Ġob 33:25) Se jiġi ż-​żmien meta ħadd ma jkollu għalfejn jgħid, “Jien marid.” Għala? Għax il-​bnedmin li għandhom il-​biżaʼ t’Alla se jinħelsu mit-​toqol tad-​dnub u l-​effetti kollha niket tiegħu. (Isaija 33:24; Luqa 13:​11-​13) Iva, Alla se “jixxuttalhom kull demgħa minn għajnejhom: ma jkunx hemm iżjed mewt, anqas biki jew għajat jew tbatija ma jkun hemm iżjed, għax għabu l-​ħwejjeġ taʼ qabel.”—Apokalissi 21:4.

14. X’jinkludi li wieħed jikseb il-​perfezzjoni umana?

¹⁴ Madankollu, biex niksbu l-​perfezzjoni jinvolvi ħafna iktar minn ġisem u moħħ f’saħħithom. Jinkludi li nirriflettu b’mod xieraq il-​kwalitajiet taʼ Jehovah, ladarba ġejna magħmulin ‘fuq is-​sura u x-​xbieha t’Alla.’ (Ġenesi 1:26) Biex nilħqu dan l-​għan hemm bżonn taʼ ħafna edukazzjoni. Fid-​dinja l-​ġdida, se “tgħammar il-​ġustizzja.” Għalhekk, bħalma bassar Isaija, “in-​nies tad-​dinja jitgħallmu l-​ġustizzja.” (2 Pietru 3:13; Isaija 26:9) Din il-​kwalità twassal għall-​paċi—bejn in-​nies taʼ kull razza, fost dawk li jassoċjaw mill-​qrib, fil-​familja, u fuq kollox, m’Alla nnifsu. (Salm 85:​11-14 [85:​10-13, NW]; Isaija 32:17) Dawk li jitgħallmu l-​ġustizzja u s-​sewwa se jiġu mgħallmin b’mod progressiv dwar x’inhi r-​rieda t’Alla għalihom. Hekk kif l-​imħabba għal Jehovah tinżeraʼ profondament fi qlubhom, huma se jsegwu l-​mogħdijiet tiegħu f’kull aspett taʼ ħajjithom. Se jkunu jistgħu jgħidu bħalma qal Ġesù, ‘Jiena dejjem nagħmel dak li jogħġob lil Missieri.’ (Ġwann 8:29) Kemm se tkun pjaċevoli l-​ħajja meta nkunu nistgħu ngħidu dan għall-​umanità kollha!

Twettiq li Diġà Huwa Evidenti

15. Permezz tal-​mistoqsijiet f’dan il-​paragrafu, enfasizza t-​twettiq tas-​Saltna u uri x’għandna nkunu qegħdin nagħmlu issa.

¹⁵ It-​twettiq impressjonanti tas-​Saltna t’Alla u s-​sudditi tagħha huwa evidenti. Il-​mistoqsijiet u l-​iskritturi li ġejjin se jfakkruk dwar ftit minn dan it-​twettiq, kif ukoll dwar l-​affarijiet li s-​sudditi kollha tas-​Saltna jistgħu u għandhom ikunu qed jagħmlu issa.

Kontra min ħadet azzjoni l-​ewwel is-​Saltna, u b’liema riżultat? (Apokalissi 12:​7-10, 12)

Il-​ġbir tal-​fdal mill-​membri taʼ liema grupp qed jingħata attenzjoni minn mindu Kristu tqiegħed fuq it-​tron? (Apokalissi 14:​1-3)

Liema xogħol bassar Ġesù li kellu jagħmel wara li tfaqqaʼ t-​tribulazzjoni l-​kbira, kif insibu f’Mattew 25:​31-33?

Liema xogħol taʼ tħejjija qed jitwettaq illum? Min qed jieħu sehem fih? (Salm 110:​3, Saydon; Mattew 24:14; Apokalissi 14:​6, 7)

L-​opponenti politiċi u reliġjużi għala ma kinux kapaċi jwaqqfu x-​xogħol taʼ l-​ippridkar? (Żakkarija 4:6; Atti 5:​38, 39)

Liema bidliet seħħew fil-​ħajjiet taʼ dawk li jissottomettu ruħhom għall-​ħakma tas-​Saltna? (Isaija 2:4; 1 Korintin 6:​9-11)

Saltna t’Elf Sena

16. (a) Kemm se jdum jaħkem Kristu? (b) Liema affarijiet meraviljużi se jseħħu matul u wara dak iż-​żmien?

¹⁶ Wara li Satana u d-​demonji tiegħu jiġu mitfugħin fl-​abbiss, Ġesù Kristu u l-​144,000 werrieta sħabu se jaħkmu bħala slaten u qassisin għal elf sena. (Apokalissi 20:6) Matul dan il-​perijodu, l-​umanità se titwassal għall-​perfezzjoni, filwaqt li d-​dnub u l-​mewt minn Adam se jinqerdu għal dejjem. Fit-​tmiem tar-​Renju t’Elf Sena, wara li jkun wettaq b’suċċess l-​inkarigu tiegħu bħala l-​Qassis il-​Kbir Messjaniku, Ġesù “jerħi s-​saltna” lil Missieru, “sabiex Alla jkun kollox f’kollox.” (1 Korintin 15:​24-28) F’dan il-​punt, Satana jiġi meħlus għal ftit sabiex jittestja lill-​umanità mifdija dwar l-​appoġġ tagħha lejn is-​sovranità universali taʼ Jehovah. Wara li jitlesta dan it-​test finali, Jehovah se jeqred lil Satana u lir-​ribelli li jkunu appoġġawh. (Apokalissi 20:​7-10) Dawk li jkunu appoġġaw is-​sovranità taʼ Jehovah—id-​dritt tiegħu li jaħkem—ikunu wrew bis-​sħiħ il-​lealtà soda tagħhom. Imbagħad, huma se jinġiebu fir-​relazzjoni xierqa tagħhom maʼ Jehovah, billi jiġu aċċettati minnu bħala wliedu, approvati b’mod divin għal ħajja taʼ dejjem.—Rumani 8:21.

17. (a) X’se jiġrilha s-​Saltna fi tmiem l-​elf sena? (b) F’liema sens huwa minnu li s-​Saltna “ma tinqered qatt”?

¹⁷ Għalhekk, f’dak li għandu x’jaqsam maʼ l-​art, l-​irwol taʼ Ġesù u dak tal-​144,000 se jinbidel. X’se tkun l-​attività futura tagħhom? Il-​Bibbja ma tgħidilniex. Imma jekk nappoġġaw lealment is-​sovranità taʼ Jehovah, se nkunu ħajjin fi tmiem ir-​Renju t’Elf Sena biex inkunu nafu x’inhu l-​iskop taʼ Jehovah għalihom kif ukoll għall-​univers taʼ l-​għaġeb tiegħu. Minkejja dan, il-​ħakma t’elf sena taʼ Kristu se tkun “għal dejjem” u Saltnatu “ma tinqeridx.” (Danjel 7:14) F’liema sens? Fattur wieħed hu li l-​ħakma mhix se tgħaddi f’idejn oħrajn li għandhom miri differenti, għax Jehovah se jkun il-​Ħakkiem. Ukoll, is-​Saltna “ma tinqered qatt” għax dak li tkun wettqet se jibqaʼ għal dejjem. (Danjel 2:44) Barra minn hekk, il-​Qassis il-​Kbir Messjaniku u s-​slaten u l-​qassisin imseħbin miegħu se jkunu onorati għal dejjem minħabba s-​servizz leali tagħhom lejn Jehovah.

Diskussjoni Bħala Reviżjoni

• Għala s-​Saltna t’Alla hija l-​unika soluzzjoni għall-​problemi tal-​bnedmin? Meta beda jaħkem is-​Sultan tas-​Saltna t’Alla?

• X’inhu li jqanqlek b’mod speċjali dwar is-​Saltna t’Alla u dak li se twettaq?

• Liema twettiq tas-​Saltna nistgħu diġà naraw, u liema parti għandna aħna f’dan?

[Stampa f’paġna 92, 93]

Taħt is-​Saltna t’Alla, in-​nies kollha se jitgħallmu s-​sewwa