Kapitlu 21

Jum Il-​Ġudizzju u Wara

1. Liema hija opinjoni komuni dwar Jum il-​Ġudizzju?

LIEMA STAMPA jġiblek f’moħħok Jum il-​Ġudizzju? Xi wħud jimmaġinaw tron kbir, u quddiemu ringiela twila taʼ persuni li ġew imqajmin mill-​imwiet. Hekk kif kull wieħed minnhom jgħaddi minn quddiem it-​tron, jiġi ġġudikat skond l-​għemejjel tiegħu taʼ l-​imgħoddi, li jkunu kollha miktubin fil-​ktieb taʼ l-​Imħallef. Skond l-​affarijiet li jkun għamel, dak li jkun jintbagħat jew fis-​sema jew f’infern tan-​nar.

2. (a) Min irranġa għal Jum il-​Ġudizzju? (b) Lil min ħatar bħala mħallef?

² Il-Bibbja, madankollu, tagħti stampa ferm differenti taʼ Jum il-​Ġudizzju. M’huwiex xi jum li jkexkxek jew li għandek tibżaʼ minnu. Innota x’tgħid il-​Bibbja dwar Alla: “Hu stabbilixxa jum li fih bi ħsiebu jiġġudika lill-​art abitata fit-​tjieba bi bniedem li hu ħatar.” (Atti 17:31) Dan l-​imħallef maħtur minn Alla hu, m’għandniex xi ngħidu, Ġesù Kristu.

3. (a) Għala nistgħu nkunu ċerti li Kristu se jkun ġust fil-​ġudizzju tiegħu? (b) In-​nies fuq liema bażi se jiġu ġġudikati?

³ Nistgħu nkunu ċerti li Kristu se jkun ġust u rett fil-​ġudizzju tiegħu. Profezija dwaru f’​Isaija 11:3, 4 tiżgurana minn dan. Mela, kuntrarju għall-​opinjoni komuni, hu mhux se jiġġudika lil persuni fuq il-​bażi tad-​dnubiet tagħhom taʼ qabel, li ħafna minnhom setgħu twettqu fl-​injoranza. Il-​Bibbja tispjega li mal-​mewt wieħed jiġi lliberat jew meħlus mid-​dnubiet kollha li jkun għamel. Hija tgħid: “Dak li miet ġie meħlus mid-​dnub tiegħu.” (Rumani 6:7) Dan ifisser li meta wieħed jiġi rxoxtat se jiġi ġġudikat fuq il-​bażi taʼ dak li jagħmel matul Jum il-​Ġudizzju, mhux fuq dak li jkun għamel qabel ma miet.

4. (a) Kemm se jkun twil Jum il-​Ġudizzju? (b) Min huma dawk li se jkunu mħallfin maʼ Kristu?

⁴ Jum il-​Ġudizzju, għalhekk, m’huwiex jum litterali t’24 siegħa. Il-​Bibbja dan turih ċar meta titkellem dwar dawk li se jieħdu sehem maʼ Ġesù Kristu f’li jagħmlu l-​iġġudikar. (1 Korintin 6:​1-3) “Rajt tronijiet,” jgħid il-​kittieb tal-​Bibbja, “u kien hemm dawk li qagħdu bil-​qiegħda fuqhom, u l-​poter li jiġġudikaw ngħata lilhom.” Dawn l-​imħallfin huma s-​segwaċi leali u midlukin taʼ Kristu li, bħalma tkompli tgħid il-​Bibbja, “ħadu l-​ħajja u ħakmu bħala slaten mal-​Kristu għal elf sena.” Mela Jum il-​Ġudizzju se jkun twil 1,000 sena. Huwa l-​istess perijodu taʼ 1,000 sena li matulu Kristu u l-​144,000 segwaċi leali u midlukin tiegħu se jaħkmu bħala “smewwiet ġodda” għal fuq l-​“art ġdida.”​—Rivelazzjoni 20:​4, 6; 2 Pietru 3:13.

5, 6. (a) Salmista Bibliku kif iddeskrivieh Jum il-​Ġudizzju? (b) Kif se tkun il-​ħajja fuq l-​art matul Jum il-​Ġudizzju?

⁵ Ħares lejn dawn il-​paġni. Dawn jagħtu xi idea taʼ kemm se jkun meraviljuż Jum il-​Ġudizzju għall-​bnedmin. Is-​salmista Bibliku kiteb dwar dak iż-​żmien glorjuż: “Ħalli teżalta l-​kampanja u dak kollu li hemm fiha. Fl-​istess ħin ħalli s-​siġar kollha tal-​foresta jgħajtu mimlijin ferħ quddiem Jehovah. Għax hu ġie; għax hu ġie biex jiġġudika lill-​art. Hu se jiġġudika lill-​art produttiva bit-​tjieba u lill-​popli bil-​fedeltà tiegħu.”​—Salm 96:​12, 13.

⁶ Matul Jum il-​Ġudizzju dawk li jgħaddu ħajjin minn Armageddon se jaħdmu biex l-​art jagħmluha ġenna. F’din il-​ġenna jiġu milqugħin lura l-​mejtin. (Luqa 23:43) X’hena se jkun hemm meta familji li jkunu ilhom mifrudin żmien twil minħabba l-​mewt jingħaqdu flimkien mill-​ġdid! Iva, xi pjaċir li tgħix fil-​paċi, li tgawdi s-​saħħa u li tirċievi struzzjonijiet rigward l-​iskopijiet t’Alla! Il-​Bibbja tgħid: “Meta jkun hemm ġudizzji mingħandek għall-​art, it-​tjieba hija dak li l-​abitanti taʼ l-​art produttiva ċertament li se jitgħallmu.” (Isaija 26:9) Matul Jum il-​Ġudizzju n-​nies kollha se jitgħallmu dwar Jehovah, u se jingħataw kull opportunità biex jobduh u jaqduh.

7. Matul Jum il-​Ġudizzju, x’se jsir minn dawk li jagħżlu li jaqdu ’l Alla u minn dawk li jirrifjutaw li jagħmlu dan?

⁷ Huwa taħt kundizzjonijiet taʼ ġenna bħal dawn li Ġesù Kristu u l-​144,000 slaten sħabu se jiġġudikaw lill-​bnedmin. In-​nies li jagħżlu li jaqdu lil Jehovah se jkunu f’qagħda li jirċievu l-​ħajja taʼ dejjem. Imma, saħansitra taħt dawn iċ-​ċirkostanzi mill-​aqwa, xi wħud se jirrifjutaw li jaqdu ’l Alla. Bħalma tgħid l-​Iskrittura: “Għalkemm il-​wieħed mill-​agħar għandu jiġi muri favur, hu sempliċement mhux se jitgħallem it-​tjieba. Fl-​art fejn kollox huwa rett hu se jaġixxi bla ġustizzja.” (Isaija 26:10) Mela wara li jingħataw kull opportunità biex ibiddlu t-​triqat tagħhom u jitgħallmu t-​tjieba, uħud mill-​agħar bħal dawn se jiġu meqrudin. Xi wħud jingħataw il-​mewt saħansitra qabel jispiċċa Jum il-​Ġudizzju. (Isaija 65:20) Ma jitħallewx jibqgħu hemmhekk biex jikkorrompu jew iħassru l-​art magħmula ġenna.

8. X’kienet il-​kundizzjoni morali taʼ l-​irġiel taʼ Sodom?

⁸ Se jkun verament privileġġ grandjuż li tkun irxoxtat fuq l-​art matul Jum il-​Ġudizzju l-​kbir taʼ Jehovah. Madankollu, il-​Bibbja tindika li dan se jkun privileġġ li mhux kulħadd se jgawdih. Ikkunsidra, per eżempju, in-​nies taʼ Sodom tal-​qedem. Il-​Bibbja tgħid li l-​irġiel taʼ Sodom fittxew li jkollhom relazzjonijiet sesswali maʼ “l-​irġiel” li kienu qegħdin iżuru lil Lot. L-​imġieba mmorali tagħhom kienet tant estrema li saħansitra meta kienu milqutin b’mod mirakoluż bil-​għama, “kienu qegħdin jaħlu saħħithom jipprovaw isibu d-​daħla” tad-​dar biex jidħlu ġewwa ħalli jkollhom x’jaqsmu mal-​viżitaturi taʼ Lot.​—Ġenesi 19:​4-11.

9, 10. L-Iskrittura x’tindika dwar il-​prospett taʼ rxoxt għall-​persuni mill-​agħar taʼ Sodom?

⁹ Se jkunu persuni mill-​agħar b’mod terribbli bħal dawn irxoxtati matul Jum il-​Ġudizzju? L-​Iskrittura tindika li mid-​dehra m’humiex se jkunu. Per eżempju, Ġuda, wieħed mid-​dixxipli mnebbħin taʼ Ġesù, kiteb l-​ewwel dwar l-​anġli li abbandunaw il-​post tagħhom fis-​sema biex ikollhom relazzjonijiet mal-​bniet tal-​bnedmin. Imbagħad żied: “Hekk ukoll Sodom u Gomorra u l-​ibliet taʼ madwarhom, wara li huma bl-​istess manjiera bħal dawn taʼ qabel kienu żnew b’mod eċċessiv u telqu wara l-​laħam għal użu m’huwiex naturali, huma mqegħdin quddiemna bħala eżempju taʼ twissija billi għaddew mill-​kastig ġudizzjarju taʼ nar taʼ dejjem.” (Ġuda 6, 7; Ġenesi 6:​1, 2) Iva, għall-​immoralità eċċessiva tagħhom in-​nies taʼ Sodom u taʼ l-​ibliet taʼ madwarhom sofrew qerda li minnha milli jidher qatt ma se jiġu rxoxtati.​—2 Pietru 2:​4-6, 9, 10a.

¹⁰ Ġesù wkoll indika li s-​Sodomiti jistgħu ma jiġux irxoxtati. Meta tkellem dwar Kapernahum, waħda mill-​ibliet li fiha wettaq il-​mirakli, hu qal: “Kieku x-​xogħlijiet setgħanin li seħħew fik [Kapernahum] kienu seħħew f’Sodom, din kienet tibqaʼ sal-​ġurnata tal-​lum. Għaldaqstant ngħidilkom, Se jkun iktar li tissaportih għall-​art taʼ Sodom f’Jum il-​Ġudizzju milli għalik.” (Mattew 11:​22-24) Ġesù hawnhekk kien qiegħed jenfasizza kemm kienu ħatjin in-​nies taʼ Kapernahum billi qal li kellu jkun iktar li tissaportih għas-​Sodomiti tal-​qedem li, fl-​imħuħ taʼ l-​udjenza Iżraelita tiegħu, kienu totalment ma jistħoqqilhomx irxoxt nhar Jum il-​Ġudizzju.

11. Għala se jkun eħfef f’Jum il-​Ġudizzju għat-​“twajbin” milli għal kwalunkwe wieħed minn dawk li “m’humiex twajbin”?

¹¹ Żgur, allura, li għandna nagħmlu kulma nistgħu biex ngħixu l-​ħajjiet tagħna sabiex nimmeritaw irxoxt. Imma xorta waħda tistaʼ ssir il-​mistoqsija: Se jkun iktar diffiċli għal xi wħud mill-​mejtin irxoxtati biex jitgħallmu u jipprattikaw it-​tjieba milli se jkun għal oħrajn? Sewwa, ikkunsidra: Qabel ma persuni “twajbin” bħal Abraham, Iżakk, Ġob, Debora, Rut u Danjel mietu, huma kollha ħarsu ’l quddiem lejn il-​miġja tal-​Messija. Kemm se jkunu henjin matul Jum il-​Ġudizzju biex jitgħallmu dwaru, u li qiegħed jaħkem fis-​sema! Mela se jkun ferm iktar faċli għal dawn il-​persuni “twajbin” biex jipprattikaw it-​tjieba f’dak iż-​żmien milli għal dawk kollha li “m’humiex twajbin” li jiġu rxoxtati biex jagħmlu hekk.​—Atti 24:15.

IRXOXTIJIET TAʼ “ĦAJJA” U TAʼ “ĠUDIZZJU”

12. Skond Ġwann 5:​28-30, min jirċievi “rxoxt taʼ ħajja,” u min jirċievi “rxoxt taʼ ġudizzju”?

¹² Meta ddeskriva s-​sitwazzjoni f’Jum il-​Ġudizzju, Ġesù qal: “Dawk . . . fl-​oqbra tal-​mafkar se jisimgħu leħnu u joħorġu, dawk li għamlu affarijiet tajbin għal irxoxt taʼ ħajja, dawk li pprattikaw affarijiet vili għal irxoxt taʼ ġudizzju. . . . sewwa sew bħalma nismaʼ, niġġudika; u l-​ġudizzju li jien nagħti huwa taʼ tjieba, għaliex jien infittex, mhux ir-​rieda tiegħi stess, imma r-​rieda tiegħu li bagħatni.” (Ġwann 5:​28-30) X’inhu dan l-​“irxoxt taʼ ħajja,” u x’inhu l-​“irxoxt taʼ ġudizzju”? U min jirċevihom?

13. X’ifisser li persuna tirċievi “rxoxt taʼ ħajja”?

¹³ Rajna b’mod ċar li meta l-​mejtin joħorġu mill-​qabar, ma jiġux iġġudikati fuq l-​għemejjel tagħhom taʼ l-​imgħoddi. Minflok, jiġu ġġudikati fuq il-​bażi taʼ dak li jagħmlu matul Jum il-​Ġudizzju. Mela meta Ġesù semma lil “dawk li għamlu affarijiet tajbin” u “dawk li pprattikaw affarijiet vili,” kien qiegħed jirreferi għall-​affarijiet tajbin u l-​affarijiet ħżiena li kellhom jagħmlu matul Jum il-​Ġudizzju. Minħabba l-​affarijiet tajbin li jagħmlu, ħafna minn dawk irxoxtati se jimxu ’l quddiem għall-​perfezzjoni umana sat-​tmiem taʼ Jum il-​Ġudizzju t’1,000 sena. B’hekk il-​miġja lura tagħhom mill-​imwiet se tagħti prova li tkun “irxoxt taʼ ħajja,” għax huma jaslu għall-​​ħajja perfetta bla dnub.

14. X’ifisser li persuna tirċievi “rxoxt taʼ ġudizzju”?

¹⁴ Min-naħa l-​oħra, xi ngħidu dwar “dawk li pprattikaw affarijiet vili” jew ħżiena matul Jum il-​Ġudizzju? Il-​miġja lura tagħhom mill-​imwiet se tagħti prova li tkun “irxoxt taʼ ġudizzju.” X’ifisser dan? Ifisser ġudizzju jew kundanna għall-​mewt. Mela dawn il-​persuni se jiġu meqrudin matul jew fl-​għeluq taʼ Jum il-​Ġudizzju. Ir-​raġuni hija li huma jagħmlu affarijiet ħżiena; b’mod stinat jirrifjutaw li jitgħallmu u li jipprattikaw it-​tjieba.

META JIBDA JUM IL-​ĠUDIZZJU

15. X’jiġri eżatt qabel jibda Jum il-​Ġudizzju?

¹⁵ L-appostlu Ġwanni ra ġo viżjoni dak li jseħħ eżatt qabel Jum il-​Ġudizzju. Hu kiteb: “Rajt tron kbir abjad u lil dak bil-​qiegħda fuqu. Minn quddiemu l-​art u s-​sema ħarbu lil hinn, . . . U rajt il-​mejtin, il-​kbar u ż-​żgħar, bil-​wieqfa quddiem it-​tron . . . U l-​mejtin ġew iġġudikati.” (Rivelazzjoni 20:​11, 12) Mela qabel ma jibda Jum il-​Ġudizzju, is-​sistema t’affarijiet preżenti magħmula mill-​“art u s-​sema” se tgħaddi. Dawk biss li jaqdu ’l Alla se jibqgħu ħajjin, waqt li dawk mill-​agħar kollha jinqerdu f’Armageddon.​—1 Ġwann 2:17.

16. (a) Min minbarra l-​mejtin se jiġi ġġudikat matul Jum il-​Ġudizzju? (b) Minn liema ħaġa se jiġu ġġudikati?

¹⁶ B’hekk, m’humiex biss il-​“mejtin” irxoxtati li se jiġu ġġudikati matul Jum il-​Ġudizzju. Il-​“ħajjin” li jsalvaw f’Armageddon, kif ukoll xi tfal li jistaʼ jkollhom, ukoll se jiġu ġġudikati. (2 Timotew 4:1) Fil-​viżjoni tiegħu Ġwanni ra kif isirilhom ġudizzju. “U rombli ġew miftuħin,” hu kiteb. “U l-​mejtin ġew iġġudikati minn dawk l-​affarijiet miktubin fir-​rombli skond l-​għemejjel tagħhom. U l-​baħar radd lil dawk mejtin fih, u l-​mewt u Ħades raddew lil dawk mejtin fihom, u ġew iġġudikati individwalment skond l-​għemejjel tagħhom.”​—Rivelazzjoni 20:​12, 13.

17. X’inhuma r-​“rombli” li minnhom se jiġu ġġudikati l-​“ħajjin” u l-​“mejtin”?

¹⁷ X’inhuma r-​“rombli” li jiġu miftuħin u li minnhom “[i]l-mejtin” kif ukoll il-​“ħajjin” jiġu ġġudikati? B’mod evidenti se jkunu xi ħaġa oħra miżjuda mal-​Bibbja Mqaddsa preżenti tagħna. Huma kitbiet jew kotba mnebbħin li fihom il-​liġijiet u l-​istruzzjonijiet taʼ Jehovah. Billi jaqraw dawn, in-​nies kollha fuq l-​art se jkunu jistgħu jsiru jafu r-​rieda t’Alla. Imbagħad, fuq il-​bażi tal-​liġijiet u l-​istruzzjonijiet f’dawn ir-​“rombli,” kulħadd fuq l-​art se jiġi ġġudikat. Dawk li jobdu l-​affarijiet miktubin fihom se jirċievu l-​benefiċċji tas-​sagrifiċċju taʼ rahan taʼ Kristu, u gradwalment se javanzaw għall-​perfezzjoni umana.

18. (a) X’se tkun is-​sitwazzjoni fi tmiem Jum il-​Ġudizzju? (b) Il-​“mejtin” b’liema mod jieħdu l-​ħajja fit-​tmiem taʼ l-​1,000 sena?

¹⁸ Mat-tmiem taʼ Jum il-​Ġudizzju t’1,000 sena ħadd fuq l-​art ma se jkun f’kundizzjoni li jmut minħabba d-​dnub t’Adam. Verament, fis-​sens l-​iktar sħiħ kulħadd se jkun ħa l-​ħajja. Dan huwa dak li tirreferi għalih il-​Bibbja meta tgħid: “Il-​bqija tal-​mejtin [dawk barra l-​144,000 li jmorru fis-​sema] ma ħadux il-​ħajja sa ma ntemmu l-​elf sena.” (Rivelazzjoni 20:5) Ir-​referenza hawnhekk għall-​“bqija tal-​mejtin” ma tfissirx li oħrajn jiġu rxoxtati fit-​tmiem taʼ Jum il-​Ġudizzju t’1,000 sena. Minflok, tfisser li l-​persuni kollha jieħdu l-​ħajja billi fl-​aħħar jaslu għall-​perfezzjoni umana. Huma se jkunu fl-​istess qagħda perfetta bħalma kienu Adam u Eva fil-​ġnien t’Għeden. Imbagħad x’se jiġri?

WARA JUM IL-​ĠUDIZZJU

19. Kristu x’jagħmel fit-​tmiem taʼ Jum il-​Ġudizzju?

¹⁹ Wara li jkun għamel dak kollu li Alla tah biex jagħmel, Ġesù Kristu “jgħaddi s-​Saltna ’l Alla u Missier tiegħu.” Dan ikun fit-​tmiem taʼ Jum il-​Ġudizzju t’1,000 sena. Sa dak iż-​żmien l-​għedewwa kollha se jkunu tneħħew min-​nofs. L-​aħħar fost dawn hija l-​mewt li ntirtet minn Adam. Din se tinqered! Imbagħad is-​saltna ssir il-​propjetà t’Alla Jehovah. Hu jaħkimha direttament bħala Sultan.​—1 Korintin 15:​24-28.

20. (a) Jehovah x’se jagħmel biex jiddetermina l-​ismijiet taʼ min għandhom jinkitbu fil-​“ktieb tal-​ħajja”? (b) Għala hija xierqa prova finali fuq il-​bnedmin?

²⁰ Jehovah kif se jiddetermina l-​ismijiet taʼ min għandhom jiġu miktubin fir-​“romblu tal-​ħajja,” jew il-​“ktieb tal-​ħajja”? (Rivelazzjoni 20:​12, 15) Dan se jkun permezz taʼ prova fuq il-​bnedmin. Ftakar kif Adam u Eva naqsu taħt prova bħal din, u kif Ġob, meta ttestjat, żamm l-​integrità. Imma l-​biċċa l-​kbira tal-​bnedmin li jgħixu sat-​tmiem taʼ l-​1,000 sena qatt ma se tkun ġiet ittestjata l-​fidi tagħhom. Qabel ma ġew irxoxtati huma ma kinux jafu dwar l-​iskopijiet taʼ Jehovah. Kienu parti mis-​sistema t’affarijiet mill-​agħar taʼ Satana; kienu ‘m’humiex twajbin.’ Imbagħad, wara l-​irxoxt tagħhom, kien faċli għalihom li jaqdu lil Jehovah minħabba li kienu jgħixu fil-​Ġenna mingħajr oppożizzjoni mix-​Xitan. Imma se jaqdu lil Jehovah dawn il-​biljuni taʼ bnedmin, li mbagħad ikunu perfetti, jekk Satana jiġi mogħti l-​opportunità biex jipprova jwaqqafhom milli jkomplu jagħmlu dan? Jistaʼ Satana jagħmlilhom dak li għamel lil Adam u Eva li kienu perfetti?

21. (a) Jehovah kif se jpoġġi lill-​bnedmin taħt prova? (b) Meta l-​prova titlesta, x’se jiġrilhom dawk kollha involuti?

²¹ Biex iwieġeb dawn il-​mistoqsijiet, Jehovah iħoll lil Satana u lid-​demonji tiegħu minn ġo l-​abbiss fejn kienu matul l-​1,000 sena. X’inhu r-​riżultat? Il-​Bibbja turi li Satana jirnexxilu jdawwar lil xi nies milli jaqdu lil Jehovah. Dawn ikunu bħar-​“ramel tal-​baħar,” li jfisser li l-​għadd tagħhom m’huwiex determinat. Wara li ssir din il-​prova, Satana u d-​demonji tiegħu, u dawk ukoll li ma jgħaddux mill-​prova, jintefgħu fl-​“għadira tan-​nar” simbolika, li hija t-​tieni mewt (eterna). (Rivelazzjoni 20:​7-10, 15) Imma dawk li ismijiethom jinstabu miktubin fil-​“ktieb tal-​ħajja” se jibqgħu fil-​ġenna taʼ l-​art glorjuża. Li jkollhom ismijiethom miktubin fil-​“ktieb tal-​ħajja” jfisser li Jehovah jiġġudikahom li huma twajbin perfettament fil-​qalb, fil-​moħħ u fil-​ġisem u b’hekk denji li jgħixu għal dejjem fil-​ġenna fuq l-​art.

JUM IL-​ĠUDIZZJU PREŻENTI

22. Biex ngħixu ħalli naraw Jum il-​Ġudizzju u l-​prova finali fuq l-​umanità, minn liema ħaġa rridu issa ngħaddu ħajjin?

²² Mela l-​Bibbja tagħti tagħrif dwar ġrajjiet li se jseħħu ’l fuq minn 1,000 sena fil-​futur. U turi li m’hemmx raġuni għalfejn nibżgħu minn dak li ġej. Imma l-​mistoqsija hija: Se tkun hemmhekk int biex tgawdi l-​affarijiet tajbin li Alla Jehovah għandu maħżunin? Dan se jiddependi minn jekk int tgħaddix minn jum taʼ ġudizzju li jsir qabel, jiġifieri, il-​‘jum preżenti taʼ ġudizzju u taʼ qerda tan-​nies taʼ mingħajr Alla.’​—2 Pietru 3:7.

23. (a) F’liema żewġ klassijiet qegħdin jiġu mifrudin in-​nies illum? (b) X’se jiġrilha kull klassi, u għala?

²³ Iva, minn mindu Kristu ġie lura u qagħad fuq it-​tron tiegħu tas-​sema, il-​bnedmin kollha kienu u għadhom taħt ġudizzju. Dan “jum il-​ġudizzju” preżenti jiġi qabel jibda Jum il-​Ġudizzju t’1,000 sena. Matul il-​ġudizzju preżenti n-​nies qegħdin jiġu mifrudin bħala “mogħoż” fuq in-​naħa tax-​xellug taʼ Kristu jew bħala “ngħaġ” fuq il-​lemin tiegħu. Il-​“mogħoż” se jinqerdu għaliex jonqsu li jgħinu lill-​“aħwa” midlukin taʼ Kristu fis-​servizz tagħhom lejn Alla. Maż-​żmien, dawn il-​“mogħoż” juru lilhom infushom li huma midinbin bla ndiema, mill-​agħar, imwebbsin f’li jipprattikaw in-​nuqqas taʼ tjieba. In-​“ngħaġ,” mill-​banda l-​oħra, se jiġu mberkin bil-​ħajja taħt il-​ħakma tas-​Saltna għaliex jappoġġjaw lill-​“aħwa” taʼ Kristu b’kull mod.​—Mattew 25:​31-46.

[Stampi f’paġna 178]

Ġesù għala qal li se jkun iktar taʼ min jissaportih f’Jum il-​Ġudizzju għal dawk f’Sodom?