Kapitlu 42
Ġesù Jċanfar lill-Fariżej
JEKK hu bil-qawwa taʼ Satana li hu jkeċċi d-demonji, jargumenta Ġesù, allura Satana maqsum kontra tiegħu stess. “Jew se tagħmlu s-siġra mill-aħjar u l-frott tagħha mill-aħjar,” hu jkompli, “jew tagħmlu s-siġra mħassra u l-frott tagħha mħassar; għax mill-frott tagħha s-siġra tingħaraf.”
Hija bluha li takkuża li l-frott tajjeb taʼ li jkeċċi d-demonji hu riżultat taʼ li Ġesù jaqdi lil Satana. Jekk il-frott hu mill-aħjar, is-siġra ma tistax tkun imħassra. Mill-banda l-oħra, il-frott imħassar tal-Fariżej bl-akkużi assurdi u bl-oppożizzjoni bla bażi tagħhom kontra Ġesù jagħti prova li huma nfushom imħassrin. “Nisel il-lifgħat,” jesklama Ġesù, “kif tistgħu tlissnu affarijiet tajbin, meta intom mill-agħar? Għax mill-abbundanza tal-qalb il-fomm jitkellem.”
Ladarba kliemna jirrifletti l-qagħda taʼ qlubna, dak li ngħidu jipprovdi l-bażi għal ġudizzju. “Ingħidilkom,” igħid Ġesù, “li kull qawl bla profitt li jitkellmu l-bnedmin, se jagħtu kont għalih f’Jum il-Ġudizzju; għax bi kliemek int se tiġi ddikjarat twajjeb, u bi kliemek int se tiġi kkundannat.”
Minkejja x-xogħlijiet setgħana kollha taʼ Ġesù, l-iskribi u l-Fariżej jitolbuh: “Għalliem, irridu naraw xi sinjal mingħandek.” Għalkemm dawn l-irġiel partikulari minn Ġerusalemm forsi ma kinux raw personalment il-mirakli tiegħu, hemm evidenza dwarhom minn dawk li raw b’għajnejhom li ma tistax tiċħadha. Mela Ġesù jgħid lill-mexxejja Lhud: “Ġenerazzjoni mill-agħar u adulteruża tibqaʼ tfittex xi sinjal, imma ebda sinjal ma se jingħatalha ħlief is-sinjal taʼ Ġona l-profeta.”
Biex jispjega x’irid ifisser, Ġesù jissokta: “Sewwa sew bħalma Ġona kien f’żaqq il-ħuta kbira tlett ijiem u tlett iljieli, hekk Bin il-bniedem se jkun fil-qalba tal-art tlett ijiem u tlett iljieli.” Wara li kien imbalaʼ mill-ħuta, Ġona ħareġ bħal li kieku kien irxoxtat, u għalhekk Ġesù qed ibassar li hu se jmut u fit-tielet jum se jitqajjem ħaj. Iżda, l-mexxejja Lhud, saħansitra meta Ġesù iktar tard jiġi rxoxtat, jiċħduh “is-sinjal taʼ Ġona.”
B’hekk Ġesù jgħid li n-nies taʼ Niniveh li nidmu wara li ppridkalhom Ġona se jqumu fil-ġudizzju biex jikkundannaw lil-Lhud li ċaħdu lil Ġesù. B’mod simili, hu jiġbed xebh mar-reġina taʼ Xeba, li ġiet minn trufijiet l-art biex tismaʼ l-għerf taʼ Salamun u li stagħġbet b’dak li rat u semgħet. “Imma, ħares!” jinnota Ġesù, “xi ħaġa iktar minn Salamun qiegħda hawn.”
Ġesù mbagħad jagħti t-tixbieha taʼ raġel li minnu joħroġ spirtu mhux nadif. Ir-raġel, madankollu, ma jimliex il-vojt b’affarijiet tajbin, u b’hekk isir ippossessat minn sebaʼ spirti mill-agħar oħra. “Hekk se jkun ukoll maʼ din il-ġenerazzjoni mill-agħar,” jgħid Ġesù. Il-ġens taʼ Iżrael ġie mnaddaf u kien ġarrab tibdil—bħat-tluq temporanju taʼ spirtu mhux nadif. Imma ċ-ċaħda tal-profeti t’Alla minn dak il-ġens, li laħqet il-quċċata f’oppożizzjoni tiegħu għal Kristu nnifsu, jikxef li l-qagħda mill-agħar tiegħu hi ferm agħar minn kif kienet fil-bidu.
Waqt li Ġesù qed jitkellem, jaslu ommu u ħutu u jieħdu pożizzjoni f’tarf il-folla. Mela xi ħadd igħid: “Ħares! Ommok u ħutek qegħdin bil-wieqfa barra, ifittxu li jkellmuk.”
“Min hi ommi, u min huma ħuti?” jistaqsi Ġesù. Billi juri b’idu lejn id-dixxipli tiegħu, hu jgħid: “Ħares! Ommi u ħuti! Għax kulmin jagħmel ir-rieda taʼ Missieri li hu fis-sema, l-istess hu ħija, u oħti, u ommi.” B’dan il-mod Ġesù juri li hi kemm hi għażiża r-rabta tiegħu maʼ qrabatu, ferm iktar għażiża hi r-relazzjoni tiegħu mad-dixxipli tiegħu. Mattew 12:33-50; Mark 3:31-35; Luqa 8:19-21.
▪ Il-Fariżej kif jonqsu li jagħmlu kemm is-“siġra” u kemm il-“frott” mill-aħjar?
▪ X’inhu “is-sinjal taʼ Ġona,” u kif jiġi iktar tard miċħud?
▪ Il-ġens Iżraelit tal-ewwel seklu kif inhu bħar-raġel li minnu ħareġ spirtu mhux nadif?
▪ Ġesù kif jenfasizza r-relazzjoni mill-qrib tiegħu mad-dixxipli tiegħu?