Kapitlu 65
Vjaġġ Sigriet lejn Ġerusalemm
HIJA l-Ħarifa tas-sena 32 E.K., u l-Festa tal-Egħrejjex kienet viċin. Ġesù kien baqaʼ fil-biċċa l-kbira ġol-Galilija mill-Qbiż tas-sena 31 E.K. ’l hawn, meta l-Lhud ippruvaw joqtluh. X’aktarx li minn dak in-nhar ’il hawn Ġesù żar lil Ġerusalemm biss biex jattendi t-tliet festi taʼ kull sena tal-Lhud.
Ħut Ġesù issa jħeġġuh: “Itlaq minn hawn u mur ġewwa l-Ġudea.” Ġerusalemm hija l-belt prinċipali tal-Ġudea u ċ-ċentru reliġjuż tal-pajjiż kollu. Ħutu jirraġunaw: “Ħadd ma jagħmel xejn fis-sigriet waqt li hu nnifsu jkun qed ifittex li jkun magħruf pubblikament.”
Għalkemm Ġakbu, Xmun, Ġużeppi, u Ġuda ma jemmnux li ħuhom il-kbir, Ġesù, huwa tabilħaqq il-Messija, huma jriduh juri l-qawwiet mirakolużi tiegħu lil dawk kollha li huma miġburin għall-festa. Ġesù, madankollu, huwa konxju tal-periklu. “Id-dinja m’għandha ebda raġuni biex tobgħodkom,” hu jgħid, “imma lili tobgħodni, għaliex jien nagħti xiehda dwarha li x-xogħlijiet tagħha huma mill-agħar.” Mela Ġesù jgħid lil ħutu: “Intom itilgħu għall-festa; jien għadni m’inix tielaʼ għal din il-festa.”
Il-Festa tal-Egħrejjex hija ċelebrazzjoni taʼ sebat ijiem. Fit-tmien jum tinġieb għall-egħluq b’attivitajiet solenni. Il-festa timmarka t-tmiem tas-sena agrikola u hija żmien taʼ ferħ kbir u taʼ radd il-ħajr. Bosta jiem wara li ħut Ġesù jitilqu biex jattendu flimkien mal-ġemgħa prinċipali taʼ vjaġġaturi, hu u d-dixxipli tiegħu jitilqu fis-sigriet, ’il bogħod mill-għajn tal-pubbliku. Huma jgħaddu minn ġos-Samarija, u mhux minn ħdejn ix-Xmara Ġordan, minfejn igħaddu l-biċċa l-kbira tan-nies.
Ladarba Ġesù u dawk li qegħdin miegħu se jkollhom bżonn fejn joqogħdu f’raħal tas-Samaritani, hu jibgħat lil xi messaġġiera qabilhom biex jagħmlu t-tħejjijiet. In-nies, madankollu, jirrifjutaw li jagħmlu xi ħaġa għal Ġesù wara li jsiru jafu li hu sejjer lejn Ġerusalemm. B’rabja, Ġakbu u Ġwanni jistaqsu: “Mulej, tridna ngħidu lin-nar biex jinżel mis-sema u jeqridhom għalkollox?” Ġesù jċanfarhom talli jissuġġerixxu ħaġa bħal din, u huma jivvjaġġaw lejn raħal ieħor.
Huma u għaddejjin mit-triq, wieħed skrib igħid lil Ġesù: “Għalliem, jien se nsegwik hu fejn hu li int dalwaqt tmur.”
“Il-volpijiet għandhom il-għerien u l-agħsafar tas-sema għandhom il-bejtiet,” iwieġeb Ġesù, “imma Bin il-bniedem ma għandu mkien fejn imidd rasu.” Ġesù qiegħed jispjega li l-iskrib se jġarrab tbatija jekk isir is-segwaċi Tiegħu. U donnu jidher li l-iskrib huwa kburi wisq biex jaċċetta dan l-istil taʼ ħajja.
Lil raġel ieħor, Ġesù jgħidlu: “Kun is-segwaċi tiegħi.”
“Ippermettili l-ewwel li nitlaq u nidfen lil missieri,” iwieġeb ir-raġel.
“Ħalli l-mejtin jidfnu l-mejtin tagħhom,” iwieġeb Ġesù, “imma int itlaq ’il hemm u ddikjara barra l-pajjiż is-saltna t’Alla.” Missier ir-raġel evidentement kien għadu ma mietx, għax kieku miet, kieku ibnu ma kienx se jkun qiegħed hawn jismaʼ lil Ġesù. L-iben mid-dehra qed jitlob il-ħin biex jistenna l-mewt taʼ missieru. Hu mhux lest li jpoġġi s-Saltna t’Alla l-ewwel fil-ħajja tiegħu.
Huma u sejrin fit-triq lejn Ġerusalemm, raġel ieħor igħid lil Ġesù: “Jien se nsegwik, Mulej; imma l-ewwel ippermettili ngħid saħħa lil dawk taʼ dari.”
Bi tweġiba Ġesù jgħid: “Ebda bniedem li poġġa idu fuq moħriet u jħares lejn l-affarijiet taʼ warajh ma hu xieraq għas-saltna t’Alla.” Dawk li se jkunu dixxipli taʼ Ġesù jridu jiffokaw għajnejhom fuq is-servizz tas-Saltna. Bħalma radda x’aktarx li ma tibqax dritta jekk dak li jaħrat ma jibqax iħares dritt quddiemu, hekk ukoll kulmin iħares lura lejn din is-sistema qadima taʼ affarijiet jistaʼ jieħu gambetta fit-triq li twassal għall-ħajja eterna. Ġwann 7:2-10; Luqa 9:51-62; Mattew 8:19-22.
▪ Min huma ħut Ġesù, u kif iħossuhom dwaru?
▪ Is-Samaritani għala huma daqshekk insolenti, u Ġakbu u Ġwanni x’iridu jagħmlu?
▪ Ġesù liema tliet konversazzjonijiet għandu fit-triq, u kif jenfasizza hu l-ħtieġa taʼ servizz taʼ li tissagrifika lilek innifsek?