Kapitlu 125

Agunija fuq iz-​Zokk

FLIMKIEN maʼ Ġesù żewġ ħallelin qed jiġu maħruġin ’il barra biex jiġu maqtulin. Mhux ’il bogħod mill-​belt, il-​purċissjoni tieqaf fil-​post imsejjaħ Golgota, jew Post il-​Qorriegħa.

Il-priġunieri jiġu mneżżgħin mill-​ilbies tagħhom. Imbagħad jiġi pprovdut inbid imħallat bil-​mirra. Mid-​dehra huwa mħejji min-​nisa taʼ Ġerusalemm, u r-​Rumani ma jċaħħdux din ix-​xarba li ttaffi l-​uġigħ lil dawk li qed jiġu msammrin maʼ zokk. Madankollu, meta Ġesù jduqha, hu jirrifjuta li jixrob. Għala? B’mod evidenti hu jrid ikollu pussess sħiħ tal-​fakultajiet kollha tiegħu matul din il-​prova suprema tal-​fidi tiegħu.

Lil Ġesù issa jmidduh fuq iz-​zokk b’idejh impoġġijin ’il fuq minn rasu. Is-​suldati mbagħad isammru msiemer kbar f’idejh u f’saqajh. Hu jitkawweġ bl-​uġigħ hekk kif l-​imsiemer jinfdu l-​laħam u l-​ligamenti. Meta z-​zokk jittellaʼ dritt ’il fuq, l-​uġigħ tant huwa kbir li ma tissaportihx, għax it-​toqol tal-​ġisem iċarrat il-​ġrieħi tal-​imsiemer. Iżda, minflok ma jhedded, Ġesù jitlob għas-​suldati Rumani: “Missier, aħfrilhom, għax ma jafux x’inhuma jagħmlu.”

Pilatu poġġa fuq iz-​zokk sinjal li jaqra: “Ġesù n-​Nazzarenu s-​Sultan tal-​Lhud.” Mid-​dehra, hu jikteb dan mhux biss għaliex jirrispetta lil Ġesù imma għaliex jistmerr lill-​qassisin Lhud talli għasruh biex ħadu s-​sentenza tal-​mewt taʼ Ġesù mingħandu. Sabiex kulħadd ikun jistaʼ jaqra s-​sinjal, Pilatu jiktbu bi tliet lingwi​—bl-​Ebrajk, bil-​Latin uffiċċjali, u bil-​Grieg komuni.

Il-qassisin ewlenin, inklużi Qajfa u Anna, ma jiħdux pjaċir. Din il-​proklamazzjoni pożittiva tħassar is-​siegħa taʼ trijonf tagħhom. Għalhekk jipprotestaw: “Tiktibx ‘Is-​Sultan tal-​Lhud,’ imma li qal, ‘Jien Sultan tal-​Lhud.’” Irrabjat minħabba li serva bħala strument f’idejn il-​qassisin, Pilatu jwieġeb bi stmerrija soda: “Dak li ktibt ktibt.”

Il-qassisin, flimkien maʼ folla kbira, issa jinġabru fil-​post tal-​eżekuzzjoni, u l-​qassisin jiċħdu x-​xiehda tas-​sinjal. Huma jirrepetu x-​xiehda falza li ngħatat iktar kmieni fil-​provi tas-​Sinedriju. Mhux taʼ min jissorprendi ruħu, għalhekk, li dawk li jgħaddu minn hemm jibdew jitkellmu b’abbuż, billi jxenglu rashom b’żufjett u jgħidu: “O int li kellek twaqqaʼ t-​tempju u tkun bennej tiegħu fi tlett ijiem, salva lilek innifsek! Jekk inti iben t’Alla, inżel minn fuq iz-​zokk tat-​tortura!”

“Lil oħrajn salvahom; lilu nnifsu ma jistax isalva!” igħidu fi qbil il-​qassisin ewlenin u l-​ħbieb reliġjużi tagħhom. “Hu Sultan taʼ Iżrael; ħallih issa jinżel minn fuq iz-​zokk tat-​tortura u aħna se nemmnu bih. Hu poġġa l-​fiduċja tiegħu f’Alla; ħalli Lilu issa jeħilsu jekk Hu jridu, għax hu qal, ‘Jiena Bin Alla.’”

Billi jinqabdu fl-​ispirtu, is-​suldati wkoll jiddieħku b’Ġesù. Huma b’żufjett joffrulu nbid qares, mid-​dehra billi jżommuh eżatt lil hinn mix-​xofftejn nexfin tiegħu. “Jekk inti s-​sultan tal-​Lhud,” huma jinbxu, “salva lilek innifsek.” Saħansitra l-​ħallelin​—wieħed imsammar maʼ zokk fuq il-​lemin taʼ Ġesù, u l-​ieħor fuq ix-​xellug tiegħu​—iwaqqgħuh għaċ-​ċajt. Aħseb ftit dwar dan! L-​aqwa bniedem li qatt għex, iva, il-​wieħed li kellu sehem maʼ Alla Jehovah f’li joħloq l-​affarijiet kollha, b’mod riżolut isofri dan l-​abbuż kollu!

Is-suldati jieħdu l-​ilbiesi taʼ fuq taʼ Ġesù u jaqsmuhom f’erbaʼ partijiet. Huma jitfgħu x-​xorti biex jaraw taʼ min se jsiru dawn. Il-​libsa taʼ taħt, madankollu, hija mingħajr ħjata, billi hi taʼ kwalità superjuri. Mela s-​suldati jgħidu lil xulxin: “Ħa ma nċarrtuhiex, imma ħa niddeterminaw bix-​xorti għaliha taʼ min se tkun.” B’hekk, bla ma jafu, huma jwettqu l-​iskrittura li tgħid: “Huma qassmu l-​ilbiesi taʼ fuq tiegħi bejniethom, u għal-​libsa taʼ taħt tiegħi huma tefgħu x-​xorti.”

Maż-żmien, wieħed mill-​ħallelin isir japprezza li Ġesù verament bil-​fors li hu sultan. Għalhekk, billi jċanfar lil sieħbu, hu jgħid: “Ma tibżaʼ assolutament xejn minn Alla, issa li qiegħed fl-​istess ġudizzju? U aħna, tabilħaqq, b’mod ġust, għax qed nirċievu bis-​sħiħ dak li jixirqilna għal affarijiet li għamilna; imma dan ir-​raġel ma għamel xejn barra minn loku.” Imbagħad hu jindirizza lil Ġesù, bil-​petizzjoni: “Ftakar fija meta tidħol ġos-​saltna tiegħek.”

“Verissmu ngħidlek illum,” iwieġeb Ġesù, “Int se tkun miegħi fil-​Ġenna.” Din il-​wegħda se tiġi mwettqa meta Ġesù jaħkem bħala Sultan fis-​sema u jirxoxta lil dan ir-​raġel ħażin li nidem għal ħajja fuq l-​art fil-​Ġenna li dawk li jibqgħu ħajjin f’Armageddon u sħabhom se jkollhom il-​privileġġ li jikkultivaw. Mattew 27:​33-44; Mark 15:​22-32; Luqa 23:​27, 32-43; Ġwann 19:​17-24.

▪ Ġesù għala jirrifjuta li jixrob l-​inbid imħallat bil-​mirra?

▪ Għala, mid-​dehra, sinjal huwa mqiegħed fuq iz-​zokk taʼ Ġesù, u jagħti bidu għal liema botta u risposta bejn Pilatu u l-​qassisin ewlenin?

▪ Ġesù liema abbuż ieħor jirċievi fuq iz-​zokk, u liema ħaġa b’mod evidenti tqanqlu?

▪ Il-​profezija kif inhi mwettqa b’dak li jsir mill-​ilbies taʼ Ġesù?

▪ Wieħed mill-​ħallelin liema bidla jagħmel, u Ġesù kif se jwettaq it-​talba tiegħu?