It-2 Parti
Art Ħielsa Minn Sofferenza
1, 2. Ħafna nies liema opinjoni differenti għandhom?
MADANKOLLU, miljuni taʼ nies madwar id-dinja għandhom opinjoni totalment differenti. Huma jaraw quddiemhom futur meraviljuż għall-umanità. Igħidu li eżatt hawn fuq l-art dalwaqt se jkun hemm dinja ħielsa għalkollox minn ħażen u minn tbatija. Huma fiduċjużi li dak li hu ħażin dalwaqt se jitneħħa min-nofs u tiġi stabbilita dinja ġdida fjamanta. Huma saħansitra jgħidu li l-pedament taʼ din id-dinja l-ġdida qiegħed jitpoġġa eżatt issa!
2 Dawn in-nies jemmnu li d-dinja l-ġdida se tkun ħielsa minn gwerer, kefrija, kriminalità, inġustizzja, u faqar. Se tkun dinja mingħajr mard, niket, dmugħ, u saħansitra mewt. F’dak iż-żmien in-nies se jaslu għall-perfezzjoni u jgħixu għal dejjem ferħanin f’ġenna tal-art. Iva, dawk li mietu se jiġu saħansitra rxoxtati u se jkollhom l-opportunità li jgħixu għal dejjem!
3, 4. Persuni bħal dawn għala jħossuhom fiduċjużi dwar l-opinjoni tagħhom?
3 Hija din l-opinjoni dwar il-futur sempliċement ħolma, sempliċement tama vojta? Le, assolutament. Hija msejsa fuq fidi bbażata b’mod sod li din il-Ġenna tal-Art li ġejja hija inevitabbli. (Ebrej 11:1) Għala huma daqshekk ċerti? Għaliex il-Ħallieq li jistaʼ kollox tal-univers wigħedha.
4 Rigward il-wegħdi t’Alla, il-Bibbja tgħid: “Lanqas kelma waħda mill-kelmiet tajbin kollha li Jehovah Alla tagħkom qalilkom ma falliet. Kollha seħħew għalikom. Lanqas kelma waħda minnhom ma falliet.” “Alla mhux xi bniedem biex igħid il-gideb . . . Hu nnifsu qalu u mhux se jagħmlu, u hu tkellem u mhux se jwettqu?” “Jehovah tal-armati ħalef, billi qal: ‘Żgur li sewwa sew bħalma stħajjilt jien, hekk irid jiġri; u sewwa sew bħalma tajt parir jien, dak hu li se jseħħ.’”—Ġożwè 23:14; Numri 23:19; Isaija 14:24.
5. Liema mistoqsijiet għandhom bżonn jiġu mwieġba?
5 Madankollu, jekk il-għan t’Alla kien li jistabbilixxi ġenna tal-art ħielsa minn tbatija, għala ppermetta li jiġru affarijiet ħżiena l-ewwelnett? Għala qagħad jistenna sitt elef sena s’issa biex jikkorreġi dak li hu ħażin? Jistgħu dawk is-sekli kollha taʼ sofferenza jindikaw li Alla mhux veru jimpurtah minna, jew saħansitra li ma jeżistix?