Aħbarijiet tas-Saltna Nru. 35

In-Nies Kollha Qatt Se Jħobbu Lil Xulxin?

L-​IMĦABBA LEJN IL-​PROXXMU BIRDET

MILJUNI jħossuhom mifxulin u mdejqin, u m’għandhomx fejn jirrikorru għall-​għajnuna. Waħda negozjanta irtirata osservat: ‘Lejla waħda armla li tgħix fis-​sular tiegħi ħabbtitli fuq il-​bieb u qaltli li kienet qed tħossha waħedha. Jien għedtilha bil-​pulit imma bla tlaqliq li kelli x’nagħmel. Hi skużat ruħha għall-​inkonvenjenza u telqet.’

B’sogħba, dak il-​lejl stess, l-​armla kkommettiet suwiċidju. Wara dan, in-​negozjanta qalet li kienet tgħallmet “lezzjoni iebsa.”

In-nuqqas taʼ mħabba lejn il-​proxxmu huwa taʼ spiss traġiku. Waqt konflitti etniċi fil-​Bosnja u Ħerzegovina, li qabel kienet parti mill-​Jugoslavja, ’il fuq minn miljun ruħ ġew imġegħlin jitilqu minn djarhom u għaxriet taʼ eluf taʼ nies ġew maqtulin. Minn min? “Mill-​ġirien tagħna,” qalet b’sogħba waħda tifla li ġiet imġiegħla titlaq mill-​villaġġ tagħha. “Konna nafuhom.”

Fl-Irwanda mijiet taʼ eluf ġew imbiċċrin, taʼ spiss mill-​ġirien tagħhom stess. “Ħutu u Tutsi [għexu] flimkien, iżżewġu lil xulxin, billi la taw kas u lanqas biss kienu jafu min kien Ħutu u min kien Tutsi,” irrapportat The New York Times. “Imbagħad faqqaʼ xi ħaġa,” u “beda l-​qtil.”

B’mod simili, Lhud u Għarab fl-​Iżrael jgħixu flimkien, imma ħafna jobogħdu lil xulxin. Is-​sitwazzjoni hija l-​istess maʼ ħafna Kattoliċi u Protestanti fl-​Irlanda u numru li dejjem jikber taʼ nies f’pajjiżi oħrajn. Qatt qabel fl-​istorja ma kienet id-​dinja daqstant nieqsa mill-​imħabba.

L-​Imħabba Lejn Il-​Proxxmu Għala Birdet?

Il-Kreatur tagħna jagħti t-​tweġiba. Il-​Kelma tiegħu, il-​Bibbja, lil dan iż-​żmien li ngħixu fih issejjaħlu “l-​aħħar tad-​dinja.” Dan huwa perijodu li matulu, tgħid il-​profezija tal-​Bibbja, in-​nies kellhom ikunu “bla qalb.” Rigward dan iż-​“żmien iebes,” imsejjaħ ukoll fl-​Iskrittura “tmiem id-​dinja,” Ġesù Kristu bassar li “l-​imħabba tibred f’ħafna.” (Korsiv tagħna.)​—2 Timotju 3:​1-5; Mattew 24:​3, 12.

In-nuqqas taʼ mħabba tal-​lum, għalhekk, huwa parti mill-​evidenza li qegħdin ngħixu fl-​aħħar jiem taʼ din id-​dinja. B’ferħ, dan ifisser ukoll li dinja ġdida taʼ tjieba li fiha se tirrenja l-​imħabba dalwaqt se tieħu post din id-​dinja taʼ nies li jiċħdu ’l Alla.​—Mattew 24:​3-14; 2 Pietru 2:5; 3:​7, 13.

Imma veru li għandna raġun biex nemmnu li bidla bħal din hija possibbli​—li n-​nies kollha jistgħu jitgħallmu jħobbu lil xulxin u jgħixu flimkien fil-​paċi maʼ xulxin?

L-​IMĦABBA LEJN IL-​PROXXMU​—REALTÀ

‘IL-​PROXXMU tiegħi min hu?’ staqsa avukat taʼ l-​ewwel seklu lil Ġesù. Bla dubju hu stenna li Ġesù jgħidlu, ‘Sħabek il-​Lhud.’ Imma fi storja dwar Samaritan li aġixxa taʼ proxxmu, Ġesù wera li nies taʼ nazzjonalitajiet oħrajn ukoll huma l-​proxxmu tagħna.​—Luqa 10:​29-37; Ġwann 4:​7-9.

Ġesù enfasizza li, wara l-​imħabba lejn Alla, l-​imħabba lejn il-​proxxmu għandha tiggverna lil ħajjitna. (Mattew 22:​34-40) Imma kien hemm xi grupp taʼ nies li qatt ħabbew verament lill-​proxxmu tagħhom? Il-​Kristjani bikrin hekk għamlu! Kienu magħrufin għall-​imħabba li kellhom lejn ħaddieħor.​—Ġwann 13:​34, 35.

Xi ngħidu għal-​lum? Hija mħabba bħal dik taʼ Kristu pprattikata minn xi ħadd? L-​Encyclopedia Canadiana tosserva: “Ix-​xogħol tax-​Xhieda taʼ Jehovah huwa r-​rinaxximent u t-​twaqqif mill-​ġdid tal-​Kristjanità primittiva pprattikata minn Ġesù u d-​dixxipli tiegħu . . . Kollha huma aħwa.”

Dan x’ifisser? Ifisser li x-​Xhieda taʼ Jehovah ma jħallu xejn​—ebda razza, nazzjonalità, jew sfond etniku—​li jġagħalhom jobogħdu lill-​ġirien tagħhom. Lanqas ma se joqtlu lil xi ħadd, għax b’mod figurattiv bidlu x-​xwabel tagħhom f’sikek tal-​moħriet u l-​lanez tagħhom fi mnieġel. (Isaija 2:4) Ix-​Xhieda, fil-​fatt, huma magħrufin għal li jieħdu l-​inizjattiva biex jgħinu lill-​ġirien tagħhom.​—Galatin 6:10.

Mhux taʼ b’xejn li editorjal fis-​Sacramento Union taʼ Kalifornja nnota: “Biżżejjed ngħidu illi li kieku d-​dinja kollha tgħix fi qbil mat-​twemmin tax-​Xhieda taʼ Jehovah t-​tixrid taʼ demm u l-​mibegħda jintemmu, u l-​imħabba tirrenja sovrana.” Kittieb fir-​rivista Ring taʼ l-​Ungerija rrimarka: “Jien wasalt għall-​konklużjoni illi li kieku x-​Xhieda taʼ Jehovah kienu l-​uniċi nies li jgħixu fuq l-​art, il-​gwerer ma jibqgħux jeżistu, u l-​uniċi dmirijiet tal-​pulizija jkunu li jikkontrollaw it-​traffiku u li joħorġu l-​passaporti.”

Irridu nammettu iżda, li bidla enormi u globali hija meħtieġa biex in-​nies kollha jkunu jħobbu lil xulxin. Din il-​bidla kif se tiġi? (Jekk jogħġbok ara l-​aħħar paġna.)

META N-​NIES KOLLHA SE JKUNU JĦOBBU LIL XULXIN

TALBA li għallem Ġesù Kristu turi li bidla drammatika hija fil-​qrib. Fil-​Priedka famuża tiegħu taʼ fuq il-​Muntanja, Ġesù għallimna nitolbu: “Tiġi saltnatek, ikun li trid int, kif fis-​sema, hekkda fl-​art.”​—Mattew 6:10.

X’inhi s-​Saltna t’Alla? Hija gvern reali, wieħed li jaħkem mis-​sema. Huwa għalhekk li tissejjaħ “[i]s-Saltna tas-​Smewwiet.” Ġesù, il-​“Prinċep tas-​sliem,” inħatar minn Missieru biex ikun il-​ħakkiem tagħha.​—Mattew 10:7; Isaija 9:​5,6; Salm 72:​1-8.

Meta tiġi s-​Saltna t’Alla, x’se jiġrilha din id-​dinja mimlija mibegħda? Is-​“saltna” se “tfarrak u ttemm” lill-​gvernijiet korrotti kollha taʼ din id-​dinja. (Danjel 2:44) Il-​Bibbja tispjega: “[I]d-dinja . . . tgħaddi, iżda min jagħmel ir-​rieda taʼ Alla jibqaʼ għal dejjem.”​—1 Ġwann 2:17.

Dwar id-​dinja l-​ġdida t’Alla, il-​Bibbja tgħid: “[I]l-ġwejdin għad jirtu l-​art, u bi sliem kotran jitgħaxxqu.” (Salm 37:​9-11, 29; Proverbji 2:​21, 22) Xi żmien glorjuż se jkun dak! “Ma jkunx hemm iżjed mewt, anqas biki jew għajat jew tbatija ma jkun hemm iżjed.” (Apokalissi 21:4) Saħansitra dawk mejtin se jerġgħu jgħixu, u l-​art kollha kemm hi se tiġi mibdula f’ġenna litterali.​—Isaija 11:​6-9; 35:​1, 2; Luqa 23:43; Atti 24:15.

Biex ngħixu fid-​dinja l-​ġdida t’Alla, irridu nħobbu lil xulxin, saħansitra bħalma jgħallimna Alla biex nagħmlu. (1 Tessalonikin 4:9) Student tal-​Bibbja mill-​Orjent qal: “Jien inħares ’il quddiem lejn iż-​żmien meta, bħalma twiegħed il-​Bibbja, in-​nies kollha se jkunu tgħallmu jħobbu lil xulxin.” U nistgħu nkunu ċerti li Alla se jżomm il-​wegħdi tiegħu! “Hekk tkellimt,” hu jgħid, “u hekk nagħmel.”​—Isaija 46:11.

Imma biex tgawdi l-​barkiet taħt is-​Saltna t’Alla, trid tieħu għarfien tal-​Bibbja, bħalma qegħdin jagħmlu miljuni taʼ nies taʼ qalb onesta madwar id-​dinja. (Ġwann 17:3) Il-​brochure taʼ 32 paġna Alla X’Jirrikjedi Minna? se jgħinek. Ikseb kopja billi timla l-​kupun ipprovdut fil-​paġna taʼ qabel u tibagħtu fl-​indirizz li japplika għalik.

[Tagħrif f’paġna 2]

Suldat moħbi u funeral fil-​Bosnija: Reuters/Corbis-Bettmann