Kapitlu Tnejn

Igglorifika lil Jehovah Bħala l-​Uniku Alla Veru

1. Min hu l-​uniku Alla veru?

IL-​BIBBJA tgħid li għalkemm hemm ħafna li huma meqjusin bħala allat, “għalina Alla wieħed hemm: il-​Missier.” (1 Korintin 8:​5, 6) Dan l-​“Alla wieħed” huwa Jehovah, il-​Ħallieq taʼ l-​affarijiet kollha. (Dewteronomju 6:4; Apokalissi 4:11) Ġesù rrefera għalih bħala “Alla tiegħi u Alla tagħkom.” (Ġwann 20:17) Hu ssieħeb maʼ Mosè, li iktar qabel kien qal: “Il-​Mulej hu Alla [veru], u m’hemmx ieħor ħliefu.” (Dewteronomju 4:35) Jehovah huwa ferm iktar superjuri minn kwalunkwe oġġett taʼ qima, bħall-​idoli, il-​bnedmin magħmulin allat, jew l-​għadu tiegħu Satana x-​Xitan, “l-​alla taʼ din id-​dinja.” (2 Korintin 4:​3, 4) B’kuntrast maʼ dan kollu, Jehovah huwa, bħalma sejjaħlu Ġesù, ‘Alla waħdu veru.’—Ġwann 17:3.

2. Hekk kif nitgħallmu dwar Alla, ħajjitna kif għandha tiġi effettwata?

² Nies grati li jitgħallmu dwar il-​kwalitajiet sbieħ t’Alla, kif ukoll dwar dak li għamel u li għadu jrid jagħmel, jinġibdu lejh. Hekk kif imħabbithom lejn Jehovah tikber, huma jħossuhom imqanqlin biex jigglorifikawh. Kif? Mod wieħed hu billi jgħidu lil oħrajn dwaru. Wieħed “jistqarr b’xufftejh biex ikollu s-​salvazzjoni,” jgħid Rumani 10:10. Mod ieħor hu billi jimitawh fil-​kliem u fl-​għemil. ‘Ixbhu lil Alla, bħala wlied maħbuba,’ jgħid Efesin 5:1. Biex inwettqu dan b’mod sħiħ, irridu nkunu nafu x’inhuma l-​kwalitajiet veri taʼ Jehovah.

3. Liema huma l-​kwalitajiet prinċipali t’Alla?

³ Fil-​Bibbja hemm ħafna stqarrijiet li jidentifikaw il-​kwalitajiet meraviljużi t’Alla. L-​erbaʼ attributi prinċipali tiegħu huma l-​għerf, il-​ġustizzja, il-​qawwa, u l-​imħabba. ‘Għand Alla hemm l-​għerf.’ (Ġob 12:13) ‘Ġusti t-​triqat tiegħu.’ (Dewteronomju 32:4) Hu għandu ‘l-​qawwa.’ (Isaija 40:26) ‘Alla hu mħabba.’ (1 Ġwann 4:8) Madankollu, mill-​erbaʼ kwalitajiet prinċipali t’Alla, liema minnhom l-​iktar li tispikka, l-​iktar waħda fosthom li tindika x’tip t’Alla hu?

“Alla Hu Mħabba”

4. Liema kwalità t’Alla kienet fundamentali biex qanqlitu joħloq l-​univers u l-​affarijiet ħajjin kollha?

⁴ Ikkunsidra x’qanqal lil Jehovah biex joħloq l-​univers u l-​ħlejjaq intelliġenti kemm spirti u kemm umani. Kien l-​għerf jew il-​qawwa tiegħu? Le, għax għalkemm Alla użahom, ma kinux dawk il-​forzi li qanqluh. U l-​ġustizzja tiegħu ma kinitx titlob li hu jaqsam ir-​rigal tal-​ħajja maʼ ħaddieħor. Pjuttost, l-​imħabba kbira t’Alla qanqlitu biex jaqsam il-​ferħ taʼ l-​eżistenza intelliġenti m’oħrajn. L-​imħabba qanqlitu biex iħejji l-​iskop li l-​bnedmin ubbidjenti għandhom jgħixu għal dejjem f’Ġenna taʼ l-​art. (Ġenesi 1:28; 2:15) L-​imħabba ġagħlitu jagħmel arranġamenti biex ineħħi l-​kundanna li d-​dnub taʼ Adam ġab fuq l-​umanità.

5. Skond il-​Bibbja, Jehovah huwa l-​personifikazzjoni taʼ liema kwalità, u għala?

⁵ B’hekk, mill-​kwalitajiet kollha t’Alla, l-​iktar li tispikka hija l-​imħabba. Hija l-​eżistenza, jew in-​natura tiegħu. Huma kemm huma importanti l-​għerf, il-​ġustizzja, u l-​qawwa tiegħu, il-​Bibbja qatt ma tgħid li Jehovah hu xi waħda minnhom. Imma tgħid li hu mħabba. Iva, Jehovah huwa l-​personifikazzjoni taʼ l-​imħabba. Din hija mħabba gwidata mill-​prinċipji, mhux mill-​emozzjonijiet. L-​imħabba t’Alla hija mmexxija mill-​prinċipji tal-​verità u s-​sewwa. Hija l-​ogħla għamla taʼ mħabba, li bħala eżempju tagħha għandna lil Alla Jehovah innifsu. Din l-​imħabba hija espressjoni taʼ nuqqas sħiħ taʼ egoiżmu u dejjem tintwera bil-​provi.

6. X’jagħmilha possibbli għalina biex nimitaw lil Alla, avolja hu superjuri minna?

⁶ Hija din il-​kwalità meraviljuża taʼ l-​imħabba li tgħinna nimitaw lil Alla. Bħala bnedmin inferjuri, imperfetti, u li niżbaljaw, forsi naħsbu li qatt ma nistgħu nimitawh b’suċċess. Imma għandna eżempju ieħor taʼ l-​imħabba kbira taʼ Jehovah: Hu konxju u jifhem il-​limitazzjonijiet tagħna u ma jistenniex il-​perfezzjoni minna. Hu jaf li ninsabu ’l bogħod ħafna mill-​perfezzjoni. (Salm 51:7 [51:​5, NW]) Għalhekk Salm 130:​3, 4 jgħid: “Jekk tal-​ħtijiet int tagħti kas, Mulej, Sidi, min jistaʼ jżomm sħiħ? Imma għandek hemm il-​maħfra.” Iva, Jehovah huwa “Alla li jagħder u jħenn; tqil biex jagħdab u kbir fit-​tjieba.” (Eżodu 34:6) “Għax int, Sidi, twajjeb u taħfer.” (Salm 86:5) Kemm hu taʼ faraġ dan! Kemm huwa pjaċevoli li taqdi lil dan Alla meraviljuż u li tesperjenza l-​mod kif jieħu ħsiebna bil-​ħniena u bl-​imħabba!

7. L-​imħabba taʼ Jehovah kif tistaʼ tidher fix-​xogħol tal-​ħolqien tiegħu?

⁷ L-​imħabba taʼ Jehovah tistaʼ tidher ukoll fix-​xogħol tal-​ħolqien tiegħu. Aħseb dwar kemm Jehovah ipprovdielna affarijiet biex ingawduhom, bħall-​ġmiel tal-​muntanji, il-​foresti, il-​widien, u l-​oċeani. Hu tana varjetà kbira taʼ ikel biex nieħdu pjaċir bit-​togħma tiegħu u biex isostnina. Ukoll, Jehovah ipprovda kull xorta taʼ fjuri sbieħ u jfuħu kif ukoll t’annimali li tant nitgħaxxqu bihom. Hu għamel affarijiet li bihom il-​bnedmin jieħdu pjaċir, avolja ma kellux għalfejn. Veru, peress li fil-​preżent qed ngħixu f’din id-​dinja mill-​agħar u għandna l-​imperfezzjoni ma nistgħux ingawdu l-​ħolqien tiegħu b’mod sħiħ. (Rumani 8:22) Imma immaġina ftit x’se jagħmel Jehovah għalina fil-​Ġenna taʼ l-​art! Is-​salmista jassigurana: “Int tiftaħ idek, u xxabbaʼ ’l kulħadd bil-​ġid.”—Salm 145:16.

8. Liema hu l-​iktar eżempju li jispikka taʼ l-​imħabba taʼ Jehovah għalina?

⁸ Liema hu l-​iktar eżempju li jispikka taʼ l-​imħabba taʼ Jehovah għall-​umanità? Il-​Bibbja tispjega: “Għax Alla hekk ħabb lid-​dinja li ta lil Ibnu l-​waħdieni, biex kull min jemmen fih ma jintilifx, iżda jkollu l-​ħajja taʼ dejjem.” (Ġwann 3:16) Għamlu dan Jehovah minħabba t-​tjubija tal-​bniedem? Rumani 5:8 jwieġeb: “Alla wriena l-​imħabba tiegħu meta Kristu miet għalina, aħna li konna għadna midinbin.” Tabilħaqq, Alla bagħat lill-​Iben perfett tiegħu fuq l-​art biex jissagrifika ħajtu bħala prezz tal-​fidwa biex jifdina mill-​kundanna tad-​dnub u l-​mewt. (Mattew 20:28) Dan fetaħ it-​triq biex nies li jħobbu lil Alla setgħu jiksbu ħajja taʼ dejjem. Għall-​grazzja t’Alla, l-​imħabba tiegħu testendi lejn dawk kollha li jridu jagħmlu r-​rieda tiegħu, għax il-​Bibbja tgħidilna: “Alla ma jħares lejn wiċċ ħadd, imma jilqaʼ lil kull min għandu l-​biżaʼ tiegħu u jagħmel is-​sewwa, ikun minn liema poplu jkun.”—Atti 10:​34, 35.

9. Kif għandna niġu influwenzati mill-​fatt li Jehovah ta lil Ibnu bħala fidwa għalina?

⁹ Il-​fatt li Jehovah ta lil Ibnu bħala fidwa għalina, u b’hekk fetħilna t-​triq għall-​ħajja taʼ dejjem, kif għandu jinfluwenza l-​mod kif nużaw ħajjitna issa? Dan għandu jkabbar imħabbitna għal Alla veru, Jehovah. Fl-​istess ħin, għandu jġagħalna nkunu rridu nagħtu widen lil Ġesù, li jirrappreżenta lil Alla. “[Ġesù] miet għal kulħadd biex dawk li jgħixu ma jgħixux għalihom infushom, imma għal dak li miet . . . għalihom.” (2 Korintin 5:15) Kemm huwa pjaċevoli li nsegwu l-​passi taʼ Ġesù, għax hu kien xempju taʼ kif wieħed jimita l-​imħabba u l-​mogħdrija taʼ Jehovah! Dan jidher mill-​kliem li Ġesù qal lill-​umlin: “Ejjew għandi, intom ilkoll li tinsabu mħabbtin u mtaqqlin, u jiena nserraħkom. Ħudu fuqkom il-​madmad tiegħi u tgħallmu minni, għaliex jiena taʼ qalb ħelwa u umli, u intom issibu l-​mistrieħ għal ruħkom. Għax il-​madmad tiegħi ħelu u t-​toqol tiegħi ħafif.”—Mattew 11:​28-30.

Nuru Mħabba Lejn Oħrajn

10. Liema huma xi modi kif nistgħu nuru l-​imħabba għall-​Kristjani sħabna?

¹⁰ Kif nistgħu nuru li għandna l-​istess tip taʼ mħabba għall-​Kristjani sħabna bħal dik li Jehovah u Ġesù għandhom għalina? Innota kemm għandna modi kif nistgħu nagħmlu dan: “L-​imħabba taf tistabar u tħenn; l-​imħabba m’hijiex għajjura, ma tintefaħx biha nfisha, ma titkabbarx fuq l-​oħrajn; ma tagħmilx dak li m’hux xieraq; ma tfittixx dak li hu tagħha, xejn ma tinkorla; ma żżommx f’qalbha għad-​deni, ma tifraħx bl-​inġustizzja, imma tifraħ bil-​verità; kollox tagħder, kollox temmen, kollox tittama, kollox tissaporti. L-​imħabba ma tintemm qatt.”—1 Korintin 13:​4-8; 1 Ġwann 3:​14-18; 4:​7-12.

11. Lejn min iktar għandna nuru mħabba, u kif?

¹¹ Lejn min iktar għandna nuru mħabba, u kif? Ġesù qal: “Morru, mela, agħmlu dixxipli mill-​ġnus kollha, u għammduhom fl-​isem tal-​Missier u taʼ l-​Iben u taʼ l-​Ispirtu s-​Santu, u għallmuhom iħarsu dak kollu li ordnajtilkom jien.” (Mattew 28:​19, 20) Dan jinvolvi li naqsmu l-​aħbar tajba, li Alla dalwaqt se jagħmel dinja ġdida li se tkun ġenna taʼ l-​art, maʼ dawk li għadhom m’humiex Kristjani sħabna. Ġesù wera b’mod ċar li mħabbitna m’għandhiex tkun biss lejn dawk taʼ l-​istess twemmin bħalna, għax hu qal: “Jekk intom tħobbu [biss] lil min iħobbkom, xi ħlas jistħoqqilkom? M’hux il-​pubblikani wkoll jagħmluh dan? U jekk issellmu lil ħutkom biss, xi tkunu tagħmlu żejjed? M’hux il-​pagani wkoll jagħmluh dan?”—Mattew 5:​46, 47; 24:14; Galatin 6:10.

‘Imxi f’Isem Jehovah’

12. Għala l-​isem t’Alla jistaʼ japplika biss għalih?

¹² Aspett importanti ieħor li bih nigglorifikaw lil Alla veru hu li nsiru nafu l-​isem uniku tiegħu, Jehovah, nużawh, u ngħallmuh lil oħrajn. Is-​salmista esprima din ix-​xewqa ħerqana: “Biex jagħrfu li Jaħweh hu ismek, li int waħdek l-​Għoli fuq l-​art kollha.” (Salm 83:19 [83:​18, NW]) L-​isem Jehovah, jew Jaħweh, ifisser “Hu Jikkaġuna li Jsir.” Hu dak Alla Grandjuż li jfassal u dejjem iwettaq b’suċċess l-​iskopijiet tiegħu. Alla veru biss jistaʼ bi dritt iġorr dan l-​isem, għax il-​bnedmin qatt ma jistgħu jkunu żguri li l-​isforzi tagħhom se jirnexxu. (Ġakbu 4:​13, 14) Jehovah biss jistaʼ jgħid li kelmtu “ttemm” dak li jibgħatha tagħmel. (Isaija 55:11) Ħafna jitqanqlu meta jaraw għall-​ewwel darba l-​isem t’Alla fil-​Bibbji tagħhom u jitgħallmu xi jfisser. (Eżodu 6:3) Imma se jibbenefikaw minn dan l-​għarfien biss jekk ‘jimxu f’isem il-​Mulej [Jehovah], għal dejjem.’—Mikea 4:5.

13. X’hemm involut f’li tagħraf isem Jehovah u timxi f’ismu?

¹³ Rigward l-​isem t’Alla, Salm 9:11 (9:​10, NW) jistqarr: “Fik jittama min jagħraf lil ismek.” Dan jinvolvi iktar milli sempliċement tkun taf l-​isem Jehovah, għax b’hekk ma jfissirx li bilfors tafda fih. Tagħraf l-​isem t’Alla jfisser li tifhem u tkun grat lejn Jehovah għall-​kwalitajiet tiegħu, li tirrispetta l-​awtorità tiegħu, tobdi l-​kmandamenti tiegħu, u tafdah f’kollox. (Proverbji 3:​5, 6) B’mod simili, li nimxu f’isem Jehovah jinvolvi li niddedikaw ħajjitna lilu u li nirrappreżentawh bħala aduraturi tiegħu, billi tassew nużaw ħajjitna fi qbil mar-​rieda t’Alla. (Luqa 10:27) Qed tagħmel dan int?

14. Jekk irridu naqdu lil Jehovah għal dejjem, x’għandna bżonn nagħmlu minbarra li nħossuna obbligati?

¹⁴ Jekk irridu naqdu lil Jehovah għal dejjem, m’għandniex nagħmlu dan sempliċement għax aħna obbligati. L-​appostlu Pawlu ħeġġeġ lil Timotju, li kien ilu jaqdi lil Jehovah għal ħafna snin: ‘Ħarreġ lilek innifsek bid-​devozzjoni lejn Alla bħala l-​mira tiegħek.’ (1 Timotju 4:​7, NW) Id-​devozzjoni tiġi minn qalb mimlija gratitudni lejn il-​persuna li lilha se tingħata. “Id-​devozzjoni lejn Alla” tesprimi unur u rispett profond lil Jehovah personalment. Din hija turija taʼ rabta kollha mħabba lejh minħabba l-​istima kbira għalih u għall-​mogħdijiet tiegħu. Iġġagħalna nkunu rridu li kulħadd ifaħħar u jonora lil ismu. Għandna nikkultivaw id-​devozzjoni lejn Alla f’ħajjitna jekk irridu nimxu f’isem Jehovah, l-​uniku Alla veru, għal dejjem.—Salm 37:4; 2 Pietru 3:11.

15. Kif nistgħu nagħtu d-​devozzjoni esklużiva tagħna lil Alla?

¹⁵ Biex naqdu lil Alla b’mod aċċettabbli, irridu nqimu biss lilu, ladarba hu “Alla għajjur,” li jesiġi devozzjoni esklużiva. (Eżodu 20:5) Ma nistgħux inħobbu lil Alla u fl-​istess ħin inħobbu lid-​dinja mill-​agħar, li l-​alla tagħha hu Satana. (Ġakbu 4:4; 1 Ġwann 2:​15-17) Jehovah jaf eżattament liema tip taʼ persuna kull wieħed u waħda minna qed jipprova jkun. (Ġeremija 17:10) Jekk tassew inħobbu s-​sewwa, hu jarah dan u jgħinna nissaportu l-​provi tagħna taʼ kuljum. Billi jappoġġana bl-​ispirtu qaddis u qawwi tiegħu, hu se jgħinna nirbħu kontra l-​ħażen li tant huwa mifrux f’din id-​dinja. (2 Korintin 4:7) Hu se jgħinna wkoll inżommu t-​tama qawwija tagħna taʼ ħajja taʼ dejjem fuq l-​art magħmula ġenna. Xi prospett glorjuż dan! Għandna nħossuna grati ferm għal dan u għandna naqdu minn qalbna lil Alla veru, Jehovah, li se jagħmel dan kollu possibbli.

16. Xi trid tagħmel flimkien maʼ miljuni oħra?

¹⁶ Miljuni taʼ nies mad-​dinja kollha aċċettaw bil-​ferħ l-​istedina tas-​salmista li kiteb: “Xandru l-​kobor tal-​Mulej miegħi; ħa ngħollu ismu flimkien.” (Salm 34:4 [34:​3, NW]) Jehovah jistiednek tkun fost il-​kotriet li dejjem jiżdiedu fil-​ġnus kollha li qed jagħmlu dan.

Diskussjoni Bħala Reviżjoni

• X’tip taʼ persuna hu Jehovah? Kif nibbenefikaw milli jkollna fehma ċara tal-​kwalitajiet tiegħu?

• Kif nistgħu ngħinu nies oħra jitgħallmu l-​verità dwar Alla?

• X’hemm involut f’li tagħraf isem Jehovah u timxi f’ismu?

[Stampi f’paġna 14]

Jehovah, bl-​imħabba kbira li għandu, se ‘jiftaħ idu, u jxabbaʼ ’l kulħadd bil-​ġid’