Timotju ried jgħin lin-nies

Timotju kien żagħżugħ li kien jieħu pjaċir jgħin lin-​nies. Hu vvjaġġa lejn ħafna postijiet biex jgħin lil oħrajn. Minħabba dan, kellu ħajja eċċitanti ħafna. Tixtieq tismaʼ dwarha?—

Meta kien tifel, Timotju kien jgħix f’belt jisimha Listra. Meta kien żgħir, in-​nanna tiegħu Lojs u ommu, Ewniċe, bdew jgħallmuh dwar Ġeħova. Hekk kif Timotju kiber, ried jgħin lil oħrajn jitgħallmu dwar Ġeħova.

Meta Timotju kien għadu żagħżugħ, Pawlu talbu jivvjaġġa miegħu lejn postijiet oħrajn. Timotju qallu: ‘Iva!’ Kien lest li jmur jgħin lil oħrajn.

Timotju vvjaġġa maʼ Pawlu lejn belt fil-​Maċedonja jisimha Tessalonika. Biex jaslu hemmhekk, kellhom jimxu ħafna u mbagħad jaqbdu dgħajsa. Meta sa fl-​aħħar waslu, għenu lil ħafna nies jitgħallmu dwar Ġeħova. Imma xi nies kienu rrabjati u pprovaw iweġġgħuhom. Allura Pawlu u Timotju kellhom jitilqu u jippritkaw f’postijiet oħra.

Xi xhur wara, Pawlu talab lil Timotju jmur lura Tessalonika biex jara kif kienu l-​aħwa. Kellu bżonn kuraġġ kbir biex jerġaʼ jmur f’dik il-​belt perikoluża! Imma Timotju mar għax kien inkwetat dwar l-​aħwa t’hemmhekk. Hu mar lura għand Pawlu b’aħbar tajba. L-​aħwa f’Tessalonika kienu sejrin tajjeb ħafna!

Timotju ħadem maʼ Pawlu għal ħafna snin. Pawlu darba kiteb li Timotju kien l-​aħjar wieħed li setaʼ jibgħat biex jgħin lill-​kongregazzjonijiet. Timotju kien iħobb lil Ġeħova u lin-​nies.

Inti tħobbhom lin-​nies u trid tgħinhom jitgħallmu dwar Ġeħova?— Jekk iva, jistaʼ jkollok ħajja mimlija ferħ u eċċitament, bħalma kellu Timotju!