Min Se Jmexxi lill-Bniedem Lejn il-Paċi?
IL-FATT li l-bnedmin ma jistgħux iġibu l-paċi ifisser li aħna qatt ma se narawha l-paċi? Le. Bħalma Satana, li hu iktar qawwi minna, hu l-aħħar ostaklu għall-paċi fuq l-art, hekk ukoll hemm Wieħed saħansitra iktar qawwi minn Satana li fl-aħħar se jmexxi lill-bniedem lejn il-paċi. Il-Bibbja, li titkellem dwar Satana, titkellem ukoll dwar dan il-Wieħed. Hija tgħid: “Il-ħakma taʼ prinċep se tiġi fuq spalltu. U ismu se jiġi msejjaħ Wieħed tal-Għaġeb li Jagħti l-Pariri, Alla Setgħan, Missier Etern, Prinċep tal-Paċi.” (Isaija 9:6, 7) Min hu dan il-Prinċep tal-Paċi? Ħadd ħlief Ġesù Kristu, u hu jistaʼ jġib il-paċi għax hu bil-wisq iktar ikkwalifikat minna. B’liema modi?
Iktar Minn Kwalifiki Umani
L-ewwelnett Ġesù m’huwiex mortali, m’huwiex suġġett għall-mewt. Veru, hu għex bħala bniedem u miet mewta taʼ sagrifiċċju. Imma mbagħad ġie rxoxtat għall-ħajja immortali fis-sema, u huwa f’din il-kundizzjoni li jsir il-Prinċep tal-Paċi. Għalhekk waħda mill-profeziji tgħid: “Ma se jkun hemm ebda tmiem għal saltnatu.” (Luqa 1:32, 33) Differenti mill-imperatur tal-Orjent Aśoka, Ġesù se jgħix bla tmiem biex jiżżgura li x-xogħol tajjeb tiegħu ma jiġix imħassar minn suċċessuri inferjuri.
Barra minn dan, Ġesù m’huwiex imniġġes mid-dnub. Il-ħakma tiegħu hija bbażata fuq għerf divin u prinċipji tajbin. Il-profeta Isaija bassar: “Fuqu joqgħod l-ispirtu taʼ Jehovah, l-ispirtu tal-għerf u tal-fehma, l-ispirtu tal-parir u tas-setgħa, l-ispirtu tal-għarfien u tal-biżaʼ taʼ Jehovah . . . Mhux se jiġġudika biss b’dak li jidher f’għajnejh, lanqas ma jċanfar sempliċement skond dak li jismaʼ b’widnejh. U bit-tjieba jrid jiġġudika lill-umlin.” (Isaija 11:2-4) Differenti mill-Ewropej taʼ żmien ilu, Ġesù mhux se jippreserva l-paċi f’daru biex imbagħad imur jiġġieled xi gwerra f’artijiet barranin. Taħtu l-paċi se tkun universali.
Barra minn hekk, Ġesù għandu s-setgħa li jġib il-paċi. Il-profezija tgħid: “L-ispirtu taʼ Jehovah . . . , l-ispirtu tal-parir u tas-setgħa,” huwa fuqu. Dan l-ispirtu kien wara l-ħolqien tal-univers kif ukoll wara x-xogħlijiet kollha setgħana taʼ tjieba rrapportati fil-Bibbja. Saħansitra l-opponent il-kbir, Satana, m’għandu l-ebda arma li tistaʼ b’suċċess tilqaʼ l-forza tal-ispirtu t’Alla.
Il-Passi lejn il-Paċi
Ġesù kif se jmexxi lill-bniedem lejn il-paċi? Forsi tiskanta li tkun taf li hu diġà beda. Fil-ktieb profetiku taʼ Rivelazzjoni, Ġesù jidher qed jirċievi mingħand Alla setgħa taʼ sultan f’Saltna tas-sema. (Rivelazzjoni 11:15) Jekk neżaminaw mill-qrib il-profeziji tal-Bibbja u nqabbluhom mal-ġrajjiet fis-seklu tagħna, naraw li Ġesù poġġa fuq it-tron bħala Sultan fis-sema lura fl-1914. (Mattew 24:3-42) Dak kien pass importanti f’li jġib il-paċi għall-art.
Jekk inhu hekk, allura għala faqqgħet l-Ewwel Gwerra Dinjija fl-1914? U għala s-seklu tagħna ra l-agħar gwerer minn qatt qabel fl-istorja? Minħabba li l-ewwel azzjoni tas-Sultan tas-sema kienet li jkeċċi darba għal dejjem lil Satana mis-sema u jitfgħu ’l isfel lejn il-viċinanza tal-art. Ir-riżultat? Il-profezija tgħid: “Gwaj għall-art u għall-baħar, għaliex ix-Xitan niżel għandkom billi għandu rabja kbira, għax jaf li għandu perijodu qasir taʼ żmien.” (Rivelazzjoni 12:7-12) Il-gwerer kbar tas-seklu tagħna għandhom x’jaqsmu mar-rabja taʼ Satana. Imma innota: ir-rabja taʼ Satana hija għal “perijodu qasir taʼ żmien.” Il-kriżi dalwaqt tispiċċa!
Qabel ma tiġi, però, il-Prinċep tal-Paċi jagħmel iktar preparamenti vitali għall-paċi. L-ewwel, il-bnedmin iridu jkunu jafu bil-għan t’Alla biex iġib il-paċi permezz taʼ Kristu. Fi qbil maʼ dan, Ġesù pprofetizza li fi żmienna “din l-aħbar tajba tas-saltna se tkun ippridkata mal-art abitata kollha bħala xiehda lill-ġnus kollha.” (Mattew 24:14) Bi twettieq taʼ dan, l-aħbar tajba qed tiġi ppridkata llum mix-Xhieda taʼ Jehovah f’kull rokna tal-globu.
Imbagħad dawk taʼ qalbhom tajba jridu jiġu edukati fil-mogħdijiet tal-paċi. Il-Bibbja twiegħed: “Uliedek subien kollha se jkunu persuni mgħallmin minn Jehovah, u l-paċi taʼ wliedek subien se tkun abbundanti.” (Isaija 54:13) Miljuni taʼ wħud taʼ qalbhom tajba qed jirċievu din l-edukazzjoni minn issa.
Il-Pass li Jmiss
Huwa issa kważi l-ħin għal pass deċiżiv ieħor fil-proċess taʼ li ssir il-paċi. X’inhu dan? Wieħed li ħafna jafuh b’ismu però ftit jafu l-għan veru tiegħu. Il-Bibbja ssejjaħlu “[i]l-gwerra tal-jum il-kbir t’Alla li Jistaʼ Kollox,” jew Armageddon. (Rivelazzjoni 16:14, 16) Ħafna jaħsbu li Armageddon hi xi gwerra nukleari li se teqred iċ-ċivilizzazzjoni. Bil-kontra, hija att dirett minn Ġesù, il-Prinċep tal-Paċi, biex iwettaq affarijiet li huma vitali għall-paċi.
L-ewwel, Armageddon se tneħħi min-nofs l-ostakli kollha għall-paċi li jagħmlu l-bnedmin. Il-profezija f’Salm 37:10 tgħid: “Ftit ieħor biss, u l-wieħed ħażin mhux se jkun iżjed; u int żgur se tagħti kas taʼ postu, u mhux se jkun hemm.” Iva, Ġesù se jneħħi min-nofs lill-“wieħed ħażin”−dawk li jagħmlu l-gwerer, il-kriminali, it-terroristi, kif ukoll dawk kollha li jirrifjutaw li jaċċettaw lill-kbir Prinċep tal-Paċi—mix-xena tal-art. Mhux se jkollhom iktar dritt li jkomplu jgħixu fuq din il-pjaneta.—Rivelazzjoni 19:19-21.
It-tieni, f’Armageddon din il-profezija taʼ Danjel se tiġi mwettqa: “Fil-jiem taʼ dawk is-slaten Alla tas-sema se jwaqqaf saltna li qatt ma se tiġi meqruda. U s-saltna nfisha mhix se tiġi mgħoddija lil xi poplu ieħor. Hi se tfarrak u ġġib fi tmiem lil dawn is-saltniet kollha, u hija nfisha se tieqaf għal żminijiet indefiniti.” (Danjel 2:44) Il-firdiet nazzjonali li taʼ spiss wasslu għall-gwerra se jiġu maħlulin. Fl-aħħarnett, se jkun hemm gvern dinji taħt ħakkiem li nistgħu nafdawh!
Meta se tiġi Armageddon? Il-Bibbja ma tgħidilniex. Imma l-ġrajjiet dinjin bi twettieq tal-profezija jindikaw li hija qrib ħafna. Il-Bibbja b’mod ċar tbassar ġrajja li se tkun ħabbara immedjata. L-appostlu Pawlu jgħid: “Hu meta hu li qegħdin igħidu: ‘Paċi u sigurta!’ imbagħad qerda f’daqqa għandha tkun minnufih fuqhom.” (1 Tessalonkin 5:3) Imbagħad, immedjatament wara l-qerda f’daqqa li se jkollha l-quċċata f’Armageddon, l-akbar ostaklu għall-paċi se jiġi mneħħi min-nofs. Il-“perijodu qasir taʼ żmien” taʼ Satana se jkun intemm, u hu se jiġi mpoġġi f’sitwazzjoni fejn ma jistax ikompli jikkaġuna nkwiet hawn fuq l-art. (Rivelazzjoni 20:l-3) Xi pjaċir!
Dinja fil-Paċi
Immaġina s-sitwazzjoni f’dak iż-żmien. Is-salmista pprofetizza: “Il-ġwejdin infushom se jkollhom pussess tal-art, u huma tabilħaqq se jsibu l-għaxqa bnina tagħhom fl-abbundanza taʼ paċi.” (Salm 37:11) Dawn il-ġwejdin se jkomplu jwettqu l-profezija sabiħa taʼ Isaija: “Huma se jkollhom jaħdmu sjufhom f’sikek tal-moħriet u l-lanez tagħhom f’imqassijiet taż-żabra. Ġens mhux se jerfaʼ sejf kontra ġens, lanqas ma se jitgħallmu l-gwerra iktar.”—Isaija 2:4.
Fl-aħħar, għall-ewwel darba minn Għeden, il-bnedmin ħajjin kollha se jgawdu l-barka t’Alla Jehovah, u hu se jwettaq il-wegħda tiegħu: “Ħares! it-tinda t’Alla hi mal-bnedmin, u hu se jgħammar magħhom, u huma se jkunu l-popli tiegħu. U Alla nnifsu se jkun magħhom. U se jimsaħ kull demgħa minn għajnejhom, u l-mewt ma tkunx iżjed, u la l-għali u la l-biki u lanqas l-ugigħ ma jkunu iżjed. L-affarijiet taʼ qabel għaddew.”−Rivelazzjoni 21:3, 4.
Tama Soda
Min, mela, se jmexxi lill-bnedmin għall-paċi? Ġesù Kristu, il-Prinċep tal-Paċi maħtur. Hija din it-tama prattika għalina llum? Sewwa, kieku l-wegħdi tal-Bibbja ma kinux taʼ min joqgħod fuqhom, ma jkun hemm ebda tama vera għall-paċi. Il-bnedmin kieku jkomplu jiġġieldu u joqtlu lil xulxin bla tmiem. Imma l-Bibbja hija taʼ min joqgħod fuqha u s-Saltna t’Alla bi Kristu żgur li se ġġib il-paċi. Aħna ninkuraġġuk biex tismaʼ l-aħbar tajba tas-Saltna li x-Xhieda taʼ Jehovah jiġu biha d-dar tiegħek u ara għalik innifsek. Imbagħad, meta jkun il-waqt, jalla tkun fost il-ġwejdin li se jirtu l-art u jitgħaxxqu bl-abbundanza tal-paċi.
[Kumment f’paġna 4]
Ġesù biss għandu l-kwalifiki biex imexxi lill-bnedmin lejn il-paċi
[Kumment f’paġna 5]
llum, l-aħbar tajba tas-Saltna qed tiġi ppridkata f’kull rokna tal-globu