Il-​Paċi Dejjiema Meta Se Tiġi Tassew?

IL-​GWERRA hija waħda mill-​affarijiet kostanti tal-​istorja, u ma naqsitx biċ-​ċiviltà jew bid-​demokrazija,” kitbu Will u Ariel Durant fil-​ktieb tagħhom The Lessons of History. “Il-​paċi hija ekwilibriju mhux stabbli, li tistaʼ tiġi ppreservata biss bis-​supremazija rikonoxxuta jew poter ugwali.”

Tabilħaqq, minkejja sforzi intensi, paċi dejjiema sa issa ħarbitilha lill-​umanità. Għala? Ir-​raġuni hi li l-​kaġuni tal-​gwerra huma bil-​wisq iktar imħawlin fil-​fond mill-​glied politiku, territorjali, jew soċjali li naraw fil-​wiċċ. Will u Ariel Durant għamlu l-​osservazzjoni: “Il-​kaġuni tal-​gwerra huma l-​istess bħall-​kaġuni tal-​kompetizzjoni fost l-​individwi: il-​ħerqa biex jakkwistaw, dejjem lesti li jiġġieldu, il-​kburija; ix-​xewqa għall-​ikel, art, materjal, iż-​żejt, u li jkun padrun.”

Madankollu, l-​Bibbja b’mod partikulari tidentifika l-​għerq tal-​ġlied u l-​gwerra bejn individwi u fuq skala akbar. Naqraw: “Minn liema sors hemm il-​gwerer u minn liema sors hemm il-​glied fostkom? M’humiex minn dan is-​sors, jiġifieri, mix-​xenqat tagħkom għal pjaċir senswali li jkomplu konflitt fil-​membri tagħkom? Intom tixtiequ, u madankollu m’għandkomx. Tkomplu toqtlu u tixxennqu, u madankollu m’għandkomx il-​ħila tiksbu. Intom tkomplu tiġġieldu u tagħmlu gwerra.” —Ġakbu 4:1, 2.

Il-kwistjoni, mela, tasal għal dan: Biex tiġi l-​vera paċi, irridu neliminaw mhux biss is-​sintomi—gwerer, tixwix, kolpi taʼ stat, rivoluzzjonijiet—imma wkoll il-​għerq tal-​kaġun—is-​suspett, ir-​regħba, l-​mibgħeda, l-​ostilità—fil-​bnedmin kollha. Dawn iridu jeħdulhom posthom l-​azzjonijiet konsistenti maʼ kwalitajiet mhux egoisti bħall-​imħabba, il-​qalb tajba, il-​fiduċja, u l-​ġenerożità. Jeżisti xi ħadd li hu kapaċi li jwettaq dan? Li kieku jiddependi fuq bnedmin tal-​art imperfetti u mortali, it-​tweġiba bil-​fors tkun le. Imma hemm xi ħadd li għalih dan mhux diffiċli ħafna. Dan hu Dak li għandu t-​tweġiba għall-​mistoqsija: Meta tassew li se tiġi l-​paċi?

Il-​Wieħed li Jistaʼ Jġib il-​Paċi

Xi 28 seklu ilu, il-​profeta Isaija kien inspirat biex jiddikjara: “Tweldilna tifel, ingħatalna iben; u l-​ħakma taʼ prinċep se tiġi li tkun fuq spalltu. U ismu se jiġi msejjaħ Kunsillier tal-​Għaġeb, Alla Setgħan, Missier Etern, Prinċep tal-​Paċi. Għall-​abbundanza tal-​ħakma taʼ prinċep u għall-​paċi mhux se jkun hemm tmiem.”—Isaija 9:6, 7.

L-identità taʼ dan il-​wieħed li se jġib paċi bla tmiem iktar tard ġiet irrivelata bħala li ma kien ħadd ħlief Ġesù Kristu, “Bin l-​Iktar Għoli.” (Luqa 1:30-33; Mattew 1:18-23) Imma dan il-​wieħed għala se jkollu suċċess fejn il-​prinċpijiet u l-​ħakkiema l-​oħra kollha fallew? Għandu jiġi nnotat, l-​ewwel ħaġa, li t-​“tifel” imwiegħed ma kellux jibqaʼ għal dejjem tarbija li ma jistaʼ jagħmel xejn, bħalma forsi jpinġuh xi wħud. Minflok, hu kellu jeżerċita l-​“ħakma taʼ prinċep” bħala l-​“Prinċep tal-​Paċi,” għall-​barka eterna tal-​umanità.

Hemm iktar xi tgħid dwar il-​ħakma taʼ Ġesù. Bħala “Kunsillier tal-​Għaġeb,” li għandu fehma straordinarja tan-​natura umana u abbiltà superlattiva, hu se jkun kapaċi jsib il-​qalba taʼ kwistjonijiet diffiċli u b’hekk isolvi l-​problemi kollha xewk li jikkonfrontaw u jiffrustraw lill-​mexxejja dinjija llum. (Mattew 7:28, 29; Mark 12:13-17; Luqa 11:14-20) Imbagħad bħala “Alla Setgħan,” dak il-​wieħed irxoxtat bħal alla, Ġesù Kristu, li issa huwa fuq it-​tron fis-​sema bħala s-​Sultan Messjaniku, se jaħdem għall-​paċi billi jirrepeti fuq skala grandjuża dak li għamel meta kien fuq l-​art—ifejjaq lil dawk b’mard li ma jitfejjaqx, jipprovdi l-​folol b’ikel u xorb, saħansitra jikkontrolla t-​temp. ( Mattew 14:14-21; Mark 4:36-39; Luqa 17:11-14; Ġwann 2:1- 11) Bħala “Missier Etern, ” Ġesù għandu l-​qawwa biex iġib lura għall-​ħajja lil dawk li spiċċaw fil-​mewt u jagħtihom ħajja taʼ dejjem. U hu nnifsu se jgħix għal dejjem, b’hekk jiżżgura li l-​ħakma tiegħu u l-​paċi mhux se jkollhom tmiem.—Mattew 20:28; Ġwann 11:25, 26; Rumani 6:9.

Billi hu armat b’dan il-​mod, Ġesù Kristu biċ-​ċar huwa l-​wieħed li kapaċi jlaħħaq mal-​kaġuni taʼ egħruq fondi taʼ gwerra u ġlied. Hu mhux sempliċement se jagħmel patt taʼ paċi jew pjan għall-​hekk imsejħa eżistenza tal-​ġnus, biex terġa tisfa fix-​xejn minn xi gwerra oħra. Minflok, hu se jneħħi kull inugwaljanza politika, territorali, soċjali, u ekonomika billi jġib lill-​umanità kollha taħt ħakma waħda, dik tas-​Saltna Messjanika tiegħu. Billi jmexxi lin-​nies kollha fil-​qima taʼ dak Alla veru, Jehovah, hu se jelimina dak li taʼ spiss hu l-​kaġun wara l-​gwerra—ir-​reliġjon falza. M’hemm l-​ebda dubju li Ġesù Kristu, il-​Prinċep tal-​Paċi, se jwettaq dan kollu. Il-​mistoqsija hi, Meta?

Ġrajjiet li Jwasslu għal Paċi Dejjiema

Wara l-​irxoxt u t-​tlugħ tiegħu fis-​sema fis-​sena 33 E.K., Ġesù kellu jistenna ż-​żmien maħtur għalih biex jieħu azzjoni. Dan kien skond id-​digriet taʼ Jehovah: “‘Oqgħod bil-​qiegħda fuq il-​leminija tiegħi sakemm inqiegħed l-​egħdewwa tiegħek bħala banketta għal saqajk.’ Il-​bastun tas-​saħħa tiegħek Jehovah se jibgħat ’il barra minn Sijon, billi jgħid: ‘Mur rażżan f’nofs l-​egħdewwa tiegħek.’” (Salm 110:1, 2; Luqa 22:69; Efesin 1:20; Ebrej 10:12, 13) Meta jiġri dak? Għal iktar minn 70 sena, ix-​Xhieda taʼ Jehovah ilhom jipproklamaw madwar id-​dinja l-​aħbar tajba li Ġesù Kristu beda jaħkem fis-​Saltna t’Alla fis-​sema fissena 1914.a

Imma forsi tgħid, ‘Ma kien hemm ebda paċi mill-​1914 ’il hawn. Għal kuntrarju, il-​kundizzjonijiet marru mill-​ħażin għall-​agħar minn dak in-​nhar.’ Għandek raġun biex tbigħ. Dan attwalment jagħti prova li l-​ġrajjiet qed iseħħu kif kien imbassar. Il-​Bibbja tgħidilna li eżatt fiż-​żmien meta “s-​saltna tad-​dinja tassew saret is-​saltna tal-​Mulej tagħna u tal-​Kristu tiegħu, . . . [i]l-ġnus saru nkorlati.” (Rivelazzjoni 11:15, 18) Minflok ma ssottomettew irwieħhom għall-​ħakma taʼ Alla Jehovah u l-​Prinċep tal-​Paċi tiegħu, il-​ġnus daħlu fi ġlieda sfrenata għal dominju dinji u esprimew korla partikulari kontra l-​Kristjani li kienu qed jagħtu xiehda għas-​Saltna stabbilita t’Alla.

Il-ktieb taʼ Rivelazzjon hekk kif Ġesù Kristu ħa s-​setgħa tas-​saltna, hu ħa azzjoni biex ineħħi lil Satana u lid-​demonji tiegħu mis-​sema: “Issa seħħet is-​salvazzjoni u l-​qawwa u s-​saltna t’Alla tagħna u l-​awtorità tal-​Kristu tiegħu, għaliex ix-​xellej taʼ ħutna ġie mixħut ’l isfel, li jixlihom lejl u nhar quddiem Alla tagħna!” Ir-​riżultat? Ir-​rakkont ikompli: “Minħabba f’dan ifirħu, intom is-​smewwiet u intom li toqogħdu fihom! Gwaj għall-​art u għall-​baħar, għaliex ix-​Xitan niżel għandkom, billi għandu rabja kbira, għax jaf li għandu perijodu qasir taʼ żmien.”—Rivelazzjoni 12:10, 12.

Sinjal Finali

Dan jagħtina dehen dwar għala l-​ġnus ma kinux kapaċi jġibu l-​paċi minkejja l-​isforzi kollha tagħhom. Ir-​rabja kbira tax-​Xitan, riflessa fl-​istess korla tal-​ġnus, żammet lid-​dinja aġitata u f’taħwid bħal qatt qabel fl-​istorja umana. Meta se jintemm dan kollu? Il-​Bibbja tipprovdielna ħjiel importanti: “Hu meta hu li qegħdin igħidu: ‘Paċi u sigurtà!’ imbagħad qerda f’daqqa trid tkun minnufih fuqhom.”—1 Tessalonkin 5:3.

Tapprezzah int is-​sinjifikat taʼ din it-​twissija? Ġrajjiet dinjin bħalma huma dawk li tajna dettalji tagħhom fl-​artiklu taʼ qabel juru li l-​ħakkiema u ħafna nies qed jitkellmu dwar paċi u jistennewha bħal qatt qabel. Xi wħud iħossu li bit-​tmiem tal-​Gwerra Bierda, it-​theddida taʼ olokawst nukleari hija xi ħaġa tal-​imgħoddi. Iva, il-​ġnus ilhom igħidu tant dwar paċi u sigurtà. Imma hija s-​sitwazzjoni tad-​dinja verament qed tiċċaqlaq lejn dik id-​direzzjoni? Ftakar, Ġesù qal dwar dawk li jkunu qed igħixu fl-​aħħar jiem, li jibdew fl-​1914: “Verament ingħidilkom li din il-​ġenerazzjoni bl-​ebda mod ma se tgħaddi sakemm dawn l-​affarijiet kollha jseħħu.” (Mattew 24:34) Iva, paċi verament se tiġi matul din il-​ġenerazzjoni imma mhux permezz tal-​isforzi tal-​ġnus. Il-​paċi stabbilita fis-​sod, ġusta, u twajba mwiegħda minn Alla Jehovah tistaʼ tiġi biss permezz tal-​ħakma li qed toqrob tal-​Prinċep tal-​Paċi tiegħu, Ġesù Kristu.—Isaija 9:7.

Jekk inti tixtieq li tara l-​ġurnata meta l-​paċi verament se tiġi u tesperjenzaha mal-​maħbubin tiegħek, mela ħares lejn il-​Prinċep tal-​Paċi u żomm tajjeb f’moħħok il-​kelmiet li jassiguraw tiegħu: “Ibqgħu mqajmin, allura, il-​ħin kollu tagħmlu tħannin biex forsi jirnexxilkom taħarbu minn dawn l-​affarijiet kollha li huma ddestinati li jsehħu, u tieqfu quddiem Bin il-​bniedem.”—Luqa 21:36.

[Nota taʼ taħt]

[Kaxxa f’paġna 6]

IL-​PAĊI IDENTIFIKATA

Illum il-​biċċa l-​kbira tan-​nies jaħsbu dwar il-​paċi bħala li hi n-​nuqqas taʼ gwerra jew ġlied. Din, madankollu, hija definizzjoni ristretta tal-​kelma. Fi żminijiet Bibliċi l-​kelma “paċi” (Ebrej, sha·lohmʹ) jew l-​espressjoni “Jalla jkollok il-​paċi!” kienet tintuża bħala forma komuni taʼ tislima. (Imħallfin 19:20; Danjel 10:19; Ġwann 20:19, 21, 26) Biċ-​ċar, mhix qed tirreferi biss għan-​nuqqas taʼ gwerra. Innota x’qal il-​ktieb The Concept of Peace dwar dan il-​punt: “Meta l-​kelma shalom tiġi wżata għal paċi, dak li kellhom f’moħħhom dawk li wżawha oriġinalment kienet il-​kundizzjoni tad-​dinja jew tas-​soċjeta umana li fiha hemm il-​kompletezza, l-​unità, il-​ħaġa sħiħa, il-​milja....Fejn hemm il-​paċi, kemm is-​sħiħa kif ukoll il-​partijiet li jikkostitwixxu tagħha laħqu sal-​livelli massimi u ottimali tal-​esseri.” Meta Alla jġib il-​paċi, mhux biss il-​bnedmin ma se “jitgħallmu l-​gwerra iktar” imma ‘kull wieħed joqgħod bil-​qiegħda taħt id-​dielja u s-​siġra tat-​tin tiegħu stess.’—Mikea 4:3, 4.

[Stampa f’paġna 7]

In-​nuqqas taʼ paċi nħasset b’mod tremend mill-​Ewwel Gwerra Dinjija ’l hawn.