Fittex lil Dawk Disposti Sewwa għall-Ħajja taʼ Dejjem
“Dawk kollha li kienu disposti sewwa għall-ħajja taʼ dejjem saru jemmnu.”—ATTI 13:48.
1. Rigward il-qalb umana, Jehovah liema abbiltà għandu?
ALLA JEHOVAH jistaʼ jaqra l-qalb. Dan kien magħmul ċar meta l-profeta Samwel mar biex jidlek iben taʼ Ġesse bħala sultan taʼ Iżrael. Malli ra lil Elijab, Samwel “qal mill-ewwel: ‘Żgur li l-wieħed midluk tiegħu qiegħed quddiem Jehovah.’ Imma Jehovah qal lil Samwel: ‘Tħarisx lejn id-dehra tiegħu u lejn it-tul tal-istatura tiegħu, għax jien m’aċċettajtux. Għax mhux il-mod kif jara l-bniedem huwa l-mod kif jara Alla, għaliex il-bniedem sempliċi jara dak li jidher lill-għajnejn; imma inkwantu għal Jehovah, hu jara x’inhi l-qalb.’” Għaldaqstant, Samwel ġie ddireġut biex jidlek lil David, li wera li kien ‘jaqbel għal qalb Alla.’—1 Samwel 13:13, 14; 16:4-13.
2. Liema ħaġa rabbiet il-għeruq fil-qalb figurattiva taʼ persuna, u b’hekk x’naqraw dwar dan fl-Iskrittura?
2 Persuna turi ċerta attitudni dominanti. Hi għandha dispożizzjoni partikulari li rabbiet il-għeruq fil-qalb figurattiva tagħha. (Mattew 12:34, 35; 15:18-20) B’hekk, naqraw dwar persuna li ‘qalbha hi disposta biex tiġġieled.’ (Salm 55:21) Jintqalilna li “kulmin hu dispost għad-dagħdigħa għandu ħafna nuqqas.” U naqraw: “Jezistu mseħbin disposti biex ikissru lil xulxin f’biċċiet, imma jeżisti ħabib li jżomm iktar qrib minn ħu.” (Proverbji 18:24; 29:22) B’ferħ, ħafna juru li huma bħal xi Ġentili f’Antijokija tal-qedem fil-Pisidja. Malli semgħu dwar il-provvediment taʼ Jehovah għal salvazzjoni, “bdew jifirħu u jigglorifikaw il-kelma taʼ Jehovah, u dawk kollha li kienu disposti sewwa għall-ħajja taʼ dejjem saru jemmnu.”—Atti 13:44-48.
Dawk li Jemmnu Huma “Puri fil-Qalb”
3, 4. (a) Min huma l-puri fil-qalb? (b) Dawk li huma puri fil-qalb kif jaraw ’l Alla?
3 Dawk li emmnu f’Antijokija saru Kristjani mgħammdin, u dawk li kienu leali fosthom setgħu japplikaw għalihom infushom il-kliem taʼ Ġesù: “Henjin il-puri fil-qalb, ladarba se jaraw ’l Alla.” (Mattew 5:8) Imma min huma ‘l-puri fil-qalb’? U kif “jaraw ’l Alla”?
4 Il-puri fil-qalb huma nodfa minn ġewwa. Tagħhom hi purità taʼ apprezzament, affezzjonijiet, xewqat, u mottivi. (1 Timotew 1:5) Huma jaraw ’l Alla issa għaliex josservawh jaġixxi għan-nom taʼ dawk li jżommu l-integrità. (Qabbel Eżodu 33:20; Ġob 19:26; 42:5.) Il-kelma Griega hawn tradotta “jaraw” tfisser ukoll “li tara bil-moħħ, li tifhem, tkun taf.” Ladarba Ġesù b’mod perfett irrifletta l-personalità t’Alla, dehen fuq dik il-personalità jitgawda mill-“puri fil-qalb,” li jeżerċitaw fidi fi Kristu u fis-sagrifiċċju tiegħu li jpatti għad-dnub, jiksbu maħfra taʼ dnubiethom, u kapaċi jagħtu qima aċċettabbli lil Alla. (Ġwann 14:7-9; Efesin 1:7) Għal dawk midlukin, li jaraw ’l Alla tilħaq il-quċċata tagħha meta jiġu rxoxtati lejn is-sema, fejn attwalment jaraw ’l Alla u lil Kristu. (2 Korintin 1:21, 22; 1 Ġwann 3:2) Imma li jaraw ’l Alla permezz taʼ għarfien eżatt u qima vera hija possibbli għal dawk kollha li huma puri fil-qalb. (Salm 24:3, 4; 1 Ġwann 3:6; 3 Ġwann 11) Huma disposti sewwa għall-ħajja taʼ dejjem fis-sema jew f’ġenna tal-art.—Luqa 23:43; 1 Korintin 15:50-57; 1 Pietru 1:3-5.
5. Kif biss jistaʼ wieħed isir jemmen fi u jkun segwaċi veru taʼ Ġesù Kristu?
5 Dawk li m’humiex disposti sewwa għall-ħajja taʼ dejjem mhux se jsiru wħud li jemmnu. Mhux possibbli għalihom li jeżerċitaw fidi. (2 Tessalonkin 3:2) Barra minn hekk, ħadd ma jistaʼ jsir segwaċi veru taʼ Ġesù Kristu jekk mhux lest li jitgħallem u Jehovah, li jara x’inhi l-qalb, jiġbed lil dik il-persuna. (Ġwann 6:41-47) Naturalment, f’li jippridkaw minn dar għal dar, ix-Xhieda taʼ Jehovah ma jiġġudikaw lil ħadd minn qabel. Huma ma jistgħux jaqraw il-qlub imma jħallu r-riżultati fl-idejn maħbubin t’Alla.
6. (a) X’intqal dwar kuntatt persunali fil-ministeru minn dar għal dar? (b) Liema provvedimenti saru biex igħinu lix-Xhieda taʼ Jehovah isibu lil dawk disposti sewwa għall-ħajja taʼ dejjem?
6 Wieħed studjuż qal b’mod xieraq: “[Pawlu] għallem il-verità pubblikament u minn dar għal dar. Mhux biss minn fuq il-pulptu, imma f’kuntatt persunali maʼ individwi hu ppriedka lil Kristu. Taʼ spiss il-kuntatt persunali huwa ferm iktar effettiv minn kwalunkwe tip jew metodu ieħor f’li wieħed jilħaq l-erwieħ.” (August Van Ryn) Pubblikazzjonijiet bħalma huma t-Theocratic Ministry School Guidebook, Reasoning From the Scriptures, u Our Kingdom Ministry igħinu lix-Xhieda taʼ Jehovah biex jagħtu taħdidiet u biex jieħdu li jistgħu mill-kuntatt persunali fis-servizz tal-għalqa tagħhom. Taʼ għajnuna, ukoll, huma d-demonstrations fil-Laqgħa tas-Servizz u l-pariri fl-Iskola Teokratika tal-Ministeru. Dawk li jattendu għall-iskola jirċievu taħriġ siewi fi kwalitajiet taʼ diskors bħalma huma introduzzjonijiet tajbin, użu xieraq tal-Iskrittura, żvilupp loġiku, argument konvinċenti, użu taʼ tixbihat, u konklużjonijiet effettivi. Ejjew naraw kif il-Bibbja tkabbar dan it-tagħlim li jistaʼ jagħmel lin-nies t’Alla iktar effettivi hekk kif ifittxu lil dawk disposti sewwa għall-ħajja taʼ dejjem.
Introduzzjonijiet li Jqanqlu l-Ħsieb
7. Il-kliem tal-ftuħ tal-Priedka taʼ Ġesù fuq il-Muntanja x’igħallem dwar l-introduzzjonijiet?
7 Mill-eżempju taʼ Ġesù, dawk li qed jippreparaw għall-għoti taʼ xiehda minn dar għal dar jistgħu jitgħallmu xi ħaġa dwar introduzzjonijiet li jqanqlu l-interess. F’li jiftaħ il-Priedka tiegħu taʼ fuq il-Muntanja, hu uża l-kelma “henjin” disaʼ darbiet. Per eżempju, hu qal: “Henjin dawk li huma konxji tal-bżonn spiritwali tagħhom, ladarba s-saltna tas-smewwiet tappartjeni lilhom . . . . Henjin il-kalmi, ladarba se jirtu l-art.” (Mattew 5:3-12) Is-sentenzi kienu diretti u ċari. U dik l-introduzzjoni żgur li qanqlet l-interess u ġiegħlet lis-semmiegħa tiegħu jinvolvu ruħhom, għax min ma jridx ikun hieni?
8. Fil-ministeru minn dar għal dar, suġġett taʼ konversazzoni kif għandu jiġi introdott?
8 Kull suġġett taʼ konversazzjoni wżat fil-ministeru minn dar għal dar għandu jiġi introdott b’mod pożittiv, pjaċevoli. Imma ħadd m’għandu juża introduzzjoni li tixxokkja, bħal, “Għandi messaġġ għalik mill-ispazju.” Veru li l-aħbar tajba għandha sors tas-sema, imma introduzzjoni bħal din tistaʼ verament iġġiegħel lil inkwilin jaħsibha darbtejn jekk ix-Xhud għandux jittieħed bis-serjetà jew jiġix mitlub jitlaq ’il hemm mill-iktar fis possibbli.
Nimmaniġġjaw il-Kelma t’Alla Sewwa
9. (a) L-iskritturi kif għandhom jiġu introdotti, moqrijin, u applikati fil-ministeru? (b) Liema eżempju huwa ċċitat biex juri kif Ġesù uża l-mistoqsijiet?
9 Fil-ministeru tal-għalqa, bħal fuq il-platform, l-iskritturi għandhom jiġu introdotti b’mod xieraq, moqrijin b’enfasi adattat, u applikati b’mod ċar u eżatt. Mistoqsijiet li lil inkwilin iġegħluh jaħseb dwar punti Skritturali jistgħu wkoll ikunu taʼ għajnuna. Għal darb’oħra, il-metodi taʼ Ġesù jgħallmu. Darba minnhom, raġel li l-Liġi taʼ Mosè kien jafha sewwa staqsieh: “Għalliem, billi nagħmel liema ħaġa se niret il-ħajja taʼ dejjem?” Bi tweġiba Ġesù staqsa: “X’hemm miktub fil-Liġi? Kif taqra int?” Bla dubju, Ġesù kien jaf li din kienet mistoqsija li r-raġel setaʼ jwieġeb. Hu fil-fatt wieġeb b’mod korrett, billi qal: “‘Trid tħobb lil Jehovah Alla tiegħek b’qalbek kollha u b’ruħek kollha u b’saħħtek kollha u b’moħħok kollu,’ u, ‘lil ġarek bħalek innifsek.’” Din it-tweġiba ġiegħlet lil Ġesù jfaħħru, u d-diskussjoni kompliet sejra.—Luqa 10:25-37.
10. X’għandna nżommu f’moħħna safejn hu kkonċernat is-suġġett taʼ konversazzjoni, u x’għandu jiġi evitat meta nistaqsu xi mistoqsijiet lill-inkwilini?
10 Dawk li jagħtu xiehda minn dar għal dar għandhom jenfasizzaw it-tema tas-suġġett taʼ konversazzjoni u jagħmlu ċar ir-raġuni għala qed jinqraw l-iskritturi tal-Bibbja li jiżżviluppaw dak is-suġġett. Ladarba x-Xhud qed jipprova jilħaq il-qalb tal-inkwilin, hu jrid jevita li jistaqsi mistoqsijiet imbarazzanti. F’li nużaw il-Kelma t’Alla, ‘jalla dak li ngħidu jkun dejjem bil-ħlewwa, imħawwar bil-melħ.’—Kolossin 4:6.
11. F’li nużaw l-Iskrittura biex nikkorreġu ideat żballjati, liema eżempju għandna mit-tentazzjoni taʼ Ġesù minn Satana?
11 Speċjalment fi żjajjar lura jistaʼ jkun hemm bżonn li nikkorreġu ideat żballjati billi nuru l-Iskrittura attwalment x’tgħid jew xi tfisser. Ġesù għamel xi ħaġa bħal din f’li jirribatti lil Satana, li qal: “Jekk int iben t’Alla, inxteħet ’l isfel [mill-apramorta tat-tempju, bħal suwiċidju potenzjali]; għax huwa miktub, ‘Hu se jagħti lill-anġli tiegħu kmand dwarek, u se jġorruk fuq idejhom, biex f’ebda ħin ma taħbat sieqek maʼ xi ġebla.’” Salm 91:11, 12, ikkwotat minn Satana, ma jiġġustifikax li wieħed iqiegħed fil-periklu l-ħajja, rigal mingħand Alla. Billi rrealizza li kienet ħaġa ħażina li jġarrab lil Jehovah billi jieħu ċans bil-ħajja tiegħu, Ġesù qal lil Satana: “Jerġaʼ hu miktub, ‘Ma tridx tqiegħed lil Jehovah Alla tiegħek għall-prova.’” (Mattew 4:5-7) Naturalment, Satana mhux xi wieħed li qed ifittex il-verità. Imma meta nies raġonevoli jesprimu ideat żballjati li jfixklu l-progress spiritwali tagħhom, il-ministru tal-Kelma t’Alla għandu bit-tattika juri l-Iskrittura verament x’tgħid u xi tfisser. Dan hu kollu parti milli “timmaniġġja l-kelma tal-verità sewwa”—waħda mil-lezzjonijiet importanti mgħallmin fl-Iskola Teokratika tal-Ministeru.—2 Timotew 2:15.
Il-Persważjoni Għandha l-Post Tagħha
12, 13. Għala huwa sewwa li tuża l-persważjoni fil-ministeru?
12 Il-persważjoni għandha post xieraq fil-ministeru Kristjan. Per eżempju, Pawlu ħeġġeġ lill-ħaddiem sieħbu Timotew biex ikompli fl-affarijiet li kien tgħallem u li kien ‘ipperswadut biex jemmen.’ (2 Timotew 3:14) F’Korintu, Pawlu “kien jagħti taħdida fis-sinagoga kull sibt u kien jipperswadi lil Lhud u lil Griegi.” (Atti 18:1-4) F’Efesu, hu b’suċċess ‘ta taħdidiet u uża l-persważjoni dwar is-saltna t’Alla.’ (Atti 19:8) U meta kien arrestat f’dar f’Ruma, l-appostlu sejjaħ lin-nies għandu u taħom xiehda, “billi uża l-persważjoni,” u xi wħud saru jemmnu.—Atti 28:23, 24.
13 Jipprova kemm jipprova x-Xhud biex ikun persważiv, naturalment, dawk biss li huma disposti sewwa għall-ħajja taʼ dejjem se jsiru wħud li jemmnu. Argumenti konvinċenti u spjegazzjonijiet ċari, ippreżentati bit-tattika, jistgħu jipperswaduhom biex jemmnu. Imma x’iktar jistaʼ jkun taʼ għajnuna f’li nipperswaduhom?
Kun Loġiku u Konvinċenti
14. (a) L-iżvilupp loġiku u li jiftiehem x’jinvolvi? (b) L-argument konvinċenti x’jitlob?
14 Waħda mill-kwalitajiet taʼ diskors enfasizzata fl-Iskola Teokratika tal-Ministeru hija l-iżvilupp loġiku u li jiftiehem. Dan jinvolvi li wieħed ipoġġi l-ideat prinċipali kollha u l-materjal rilevanti f’ordni raġonevoli. Essenzjali wkoll huwa l-argument konvinċenti, li jitlob li jitpoġġa pedament tajjeb u li tiġi pprovduta prova soda. Fula maqsuma maʼ dan hemm li tgħin lis-semmiegħa jirraġunaw billi żżomm bażi komuni, tiżżviluppa l-punti b’mod adekwat, u tapplikahom b’mod effettiv. Għal darb’oħra, l-Iskrittura tipprovdi linji taʼ gwida.
15. (a) Pawlu kif ġibed l-attenzjoni lejh u stabbilixxa bażi komuni meta tkellem fuq il-Għolja taʼ Marte? (b) Fid-diskors taʼ Pawlu, x’evidenza għandna taʼ żvilupp loġiku u li jiftiehem?
15 Dawn il-kwalitajiet taʼ diskors huma evidenti fid-diskors rinomat tal-appostlu Pawlu fuq il-Għolja taʼ Marte f’Ateni tal-qedem. (Atti 17:22-31) L-introduzzjoni tiegħu ġibdet l-attenzjoni u stabbiliet bażi komuni, għax hu qal: “Irġiel taʼ Ateni, nilmaħ li fl-affarijiet kollha intom tidhru iktar mogħtijin għall-biżaʼ tal-allat milli huma oħrajn.” Għalihom, dan bla dubju deher li kien kumpliment. Wara li semma artal iddedikat “Lil Alla Mhux Magħruf,” Pawlu ssokta bl-iżvilupp loġiku u li jiftiehem u bl-argument konvinċenti tiegħu. Hu wera b’mod ċar li dan Alla li huma ma kinux jafuh kien “għamel id-dinja u l-affarijiet kollha taʼ ġo fiha.” Mhux bħal Atena jew allat Griegi oħra, ‘hu ma jgħammarx f’tempji magħmulin bl-idejn, lanqas m’għandu bżonn ikun moqdi minn idejn umani.’ L-appostlu mbagħad indika li dan Alla tana l-ħajja u ma jagħmilniex inteftfu bl-amment għalih. Pawlu mbagħad irraġuna li l-Ħallieq tagħna, li għalaq għajnejh għal żminijiet taʼ injoranza idolatruża, ‘qiegħed igħid lill-bnedmin li huma lkoll kullimkien għandhom jindmu.’ Dan b’mod loġiku wassal għall-punt li ‘Alla se jiġġudika lill-abitanti tal-art fit-tjieba bi bniedem maħtur li lilu rxoxta mill-imwiet.’ Ladarba Pawlu kien qed “jiddikjara l-aħbar tajba dwar Ġesù u l-irxoxt,” dawk in-nies taʼ Ateni kienu jafu li dan l-Imħallef kellu jkun Ġesù Kristu.—Atti 17:18.
16. Il-ministeru taʼ dak li jkun kif jistaʼ jiġi effettwat mid-diskors taʼ Pawlu fuq il-Għolja taʼ Marte u b’taħriġ fl-lskola Teokratika tal-Ministeru?
16 Veru, Pawlu ma kienx qed jagħti xiehda minn dar għal dar fuq il-Għolja taʼ Marte. Imma mit-taħdida tiegħu u mit-taħriġ mogħti fl-Iskola Teokratika tal-Ministru, ix-Xhieda taʼ Jehovah jistgħu jitgħallmu ħafna li jistaʼ jtejjeb il-ministeru tal-għalqa tagħhom. Iva, dan kollu jgħin biex jagħmilhom ministri iktar effettivi, saħansitra bħalma l-iżvilupp loġiku u l-argument konvinċenti taʼ Pawlu pperswadew lil xi wħud minn dawk in-nies taʼ Ateni biex isiru wħud li jemmnu.—Atti 17:32-34.
Uża Tixbihat li Jgħallmu
17. Liema xorta taʼ tixbihat għandhom jintużaw fil-ministeru?
17 L-Iskola Teokratika tal-Ministeru tgħin ukoll lill-ministri t’Alla biex jużaw tixbihat tajbin fil-għoti taʼ xiehda minn dar għal dar u f’aspetti oħra tal-ministeru tagħhom. Biex nenfasizzaw punti importanti, tixbihat sempliċi li huma taʼ togħma tajba għandhom jintużaw. Ix-Xhud għandu jeħodhom minn sitwazzjonijiet familjari u joqgħod attent biex japplikahom b’mod ċar. It-tixbihat taʼ Ġesù kienu jilħqu dawn il-ħtiġijiet kollha.
18. Mattew 13:45, 46 kif jistaʼ jkun taʼ siwi fil-ministeru?
18 Per eżempju, ikkunsidra l-kliem taʼ Ġesù: “Is-saltna tas-smewwiet hi bħal negozjant li jivvjaġġa biex ifittex perli mill-aħjar. Malli sab perla waħda taʼ valur għoli, telaq u minnufih biegħ l-affarijiet kollha li kellu u xtraha.” (Mattew 13:45, 46) Il-perli huma ħaġar prezzjuż li jinstab ġewwa l-arzelli tal-ġajdri u molluski oħra. Imma ftit biss mill-perli huma “mill-aħjar.” In-negozjant kellu d-dehen meħtieġ biex japprezza l-valur li jisboq taʼ din il-perla waħda u kien lest li jagħti kollox biex jakkwistaha. Forsi waqt żjara lura jew studju tal-Bibbja fid-dar, din it-tixbieha tistaʼ tiġi wżata biex turi li individwu li verament japprezza s-Saltna t’Alla se jaġixxi bħal dak in-negozjant. Wieħed bħal dan se jagħti lis-Saltna prijorità fil-ħajja, billi hu konxju li hi tiswa kwalunkwe sagrifiċċju.
Ikkonkludi B’Mottiv
19. Fil-ministeru minn dar għal dar, il-konklużjonijiet x’għandhom juruh lill-inkwilin?
19 Fl-Iskola Teokratika tal-Ministeru, in-nies t’Alla jitgħallmu wkoll li l-konklużjoni taʼ taħdida jew taʼ diskussjoni għandha jkollha relazzjoni diretta mat-tema u għandha turi lis-semmiegħa x’iridu jagħmlu u tinkuraġġihom biex jagħmluh. Fil-ministeru minn dar għal dar, l-inkwilin irid jiġi muri b’mod definittiv liema korsa hu mistenni li jieħu, bħalma hi li jaċċetta pubblikazzjoni bbażata fuq il-Bibbja jew li jaqbel li jkollu żjara lura.
20. Liema eżempju mill-aħjar taʼ konklużjoni li tqanqal għandna f’Mattew 7:24-27?
20 Il-konklużjoni tal-Priedka taʼ Ġesù fuq il-Muntanja tipprovdi eżempju mill-aħjar. Permezz taʼ tixbieha li tiftiehem faċilment, Ġesù wera li tkun il-korsa għaqlija li wieħed jagħti kas il-kliem tiegħu. Hu kkonkluda: “Għalhekk kulmin jismaʼ dawn il-qwiel minn tiegħi u jagħmilhom se jkun imxebbah maʼ raġel għaqli, li bena daru fuq il-blata. U x-xita niżlet u l-għargħar ġew u l-irjieħ nefħu u ħabtu kontra dik id-dar, imma ma ċedietx, għax kienet ġiet imsejsa fuq il-blata. Iktar minn hekk, kulmin qed jismaʼ dawn il-qwiel minn tiegħi u ma jagħmilhomx se jkun imxebbah maʼ raġel iblah, li bena daru fuq ir-ramel. U x-xita niżlet u l-għargħar ġew u l-irjieħ nefħu u laqtu lil dik id-dar u ċediet, u l-waqgħa tagħha kienet kbira.” (Mattew 7:24-27) Kemm juri tajjeb dan li l-ministri t’Alla għandhom jagħmlu ħilithom biex iqanqlu lill-inkwilini!
21. Id-diskussjoni tagħna x’uriet, imma x’irid jiġi rikonoxxut?
21 Il-punti li semmejna juru kif l-Iskola Teokratika tal-Ministeru tistaʼ tgħin lil ħafna biex ikunu xandara kkwalifikati tas-Saltna. Naturalment, li nkunu kkwalifikati b’mod adekwat jiġi primarjament minn Alla. (2 Korintin 3:4-6) U jkun kemm ikun ikkwalifikat il-ministru, ħadd ma jistaʼ jipperswadi lin-nies biex isiru jemmnu jekk ma jinġibdux minn Alla permezz taʼ Kristu. (Ġwann 14:6) Iżda, in-nies t’Alla għandhom ċertament jieħdu vantaġġ mill-provvedimenti spiritwali kollha magħmulin minn Jehovah waqt li jfittxu lil dawk disposti sewwa għall-ħajja taʼ dejjem.
X’lnhuma t-Tweġibiet Tiegħek?
◻ Min huma “l-puri fil-qalb,” u kif “jaraw ’l Alla”?
◻ Liema fatturi għandhom jiġu kkunsidrati meta nintroduċu l-messaġġ tas-Saltna fix-xogħol taʼ minn dar għal dar?
◻ Il-Kelma t’Alla kif tistaʼ tiġi mmaniġġjata sewwa fil-ministeru?
◻ Liema ħaġa se tgħin biex tagħmel preżentazzjonijiet loġiċi, konvinċenti fis-servizz tal-għalqa?
◻ X’għandna niftakru dwar tixbihat użati fil-ministeru?
◻ X’għandu jiġi mwettaq bil-konklużjonijiet użati fix-xogħol taʼ għoti taʼ xiehda?
[Stampa f’paġna 12]
Ġesù qal li “il-puri fil-qalb” kellhom “jaraw ’l Alla.” Dan x’kien ifisser?
[Stampa f’paġna 14]
L-iskritturi għandhom jiġu introdotti b’mod xieraq, moqrijin b’enfasi kif imiss, u applikati b’manjiera ċara, eżatta