Tfittxija Għal Ordni Dinjija Ġdida
“M’HEMM l-ebda mappa li tiggwidana fejn aħna sejrin, lejn din id-dinja l-ġdida li aħna stess għamilna. Hekk kif id-dinja tagħti ħarsa lura lejn disgħin sena taʼ gwerra, taʼ ġlied, taʼ suspett, ejjew ukoll inħarsu ’l quddiem—lejn seklu ġdid, lejn millennju ġdid, taʼ paċi, ħelsien u prosperità.”
Il-president tal-Istati Uniti George Bush għamel dawk il-kummenti fl-1 taʼ Jannar 1990. F’messaġġ li jixbah lil dan, il-president Sovjetiku Mikhail Gorbachev imbagħad ippropona kooperazzjoni fis-snin 90 biex jeħles “lid-dinja minn biżaʼ u nuqqas taʼ fiduċja, armamenti mhux neċessarji, minn kunċetti politiċi antikwati u duttrini militari, u tfixkil bejn popli u stati.” Hekk irraportat il-Mainichi Daily News tal-Ġappun tat-3 taʼ Jannar, 1990.
Ovvjament kien hemm tamiet kbar. Hekk kien għadhom sa sena wara. Fil-messaġġ tal-Istat tal-Unjoni fid-29 taʼ Jannar, 1991, il-President Bush irrefera għall-gwerra fil-Golf Persjan u qal: “Dak li hemm involut huwa iktar minn pajjiż żgħir wieħed [il-Kuwajt], hija idea kbira—ordni dinjija ġdida fejn diversi ġnus qed jingħaqdu flimkien f’kawża komuni biex jilħqu l-aspirazzjonijiet universali tal-umanità: paċi u sigurtà, ħelsien u l-ħakma tal-liġi.”
Mhux Tfittxija Mingħajr Inkwiet
Ħafna problemi jfixklu lill-bniedem fit-tfittxija tiegħu għal ordni dinjija ġdida. Konflitti bl-armi żgur li huma fin-nofs. Billi rreferiet għall-ostilitajiet li kienu għaddejjin minnhom l-Iraq u l-Kuwajt, ir-rivista Time tat-28 taʼ Jannar, 1991, qalet: “Hekk kif niżlu l-bombi u l-missili ġew sparati, it-tamiet għal ordni dinjija ġdida nbidlu f’diżordni familjari.” Il-ġurnal żied: “Ħadd m’għandu jkollu xi illużjoni li dik l-ordni dinjija ġdida li tant ftaħru biha qiegħda hawn jew saħansitra qiegħda fil-qrib.”
Kooperazzjoni internazzjonali qatt ma ġiet milħuqa, u dan ifixkel l-isforzi tal-bniedem biex jistabbilixxi ordni dinjija ġdida. F’rapport li deher fil-pubblikazzjoni The World & I (Jannar 1991), xi studjużi eżaminaw “il-politika barranija l-ġdida tas-superpotenzi u l-impatt li x’aktarx li kien se jkollha fuq l-ordni dinjija ġdida.” L-editur ikkonkluda: “L-istorja tissuġġerixxi li l-linja taʼ bejn il-gwerra u l-paċi hija waħda fina fl-aqwa taż-żminijiet. Kooperazzjoni internazzjonali, partikularment bejn il-qawwiet il-kbar, hija kruċjali għas-suċċess tal-bidla mill-Gwerra Bierda għal ordni dinjija ġdida.”
Problemi tal-ambjent ukoll qed jostakolaw lill-ordni dinjija ġdida li ħafna tant joħolmu dwarha. Fi State of the World 1991 (rapport tal-Worldwatch Institute), Lester R.Brown qal: “Ħadd ma jistaʼ jgħid b’ċertezza kif se tkun l-ordni dinjija ġdida. Imma jekk aħna se nfasslu futur promettenti għall-ġenerazzjoni li jmiss, mela l-isforz enormi meħtieġ biex titraġġaʼ lura d-degradazzjoni ambjentali tal-pjaneta se jiddomina l-affarijiet dinjin għal ħafna għaxriet taʼ snin oħra.” Ir-rapport innota li t-tniġġis tal-arja kien “laħaq livelli li jheddu s-saħħa f’mijiet taʼ bliet u livelli li jagħmlu ħsara lill-prodotti tal-biedja f’tant u tant pajjiżi.” Huwa żied: “Hekk kif in-numru tal-abitanti li jgħixu fuq il-pjaneta jikber, in-numru taʼ speċi taʼ pjanti u annimali jonqos. Il-qerda u t-tniġġis tal-postijiet fejn jimirħu l-annimali qed inaqqsu d-diversita bioloġika tal-art. Temperaturi li dejjem qed jogħlew u l-ozone layer li dejjem qed jonqos jistgħu jżidu mat-telf.”
Jidher ċar, mela, li t-tfittxija tal-bniedem għal ordni dinjija ġdida hija mimlija problemi. It-tfittxija se tkun taʼ suċċess? Jistaʼ jingħad li dinja ġdida hija fil-qrib? Jekk inhu hekk, kif se tinġieb?