Ibqaʼ Mqajjem fiż-​“Żmien tat-​Tmiem”

“Ibqgħu ħarsu, ibqgħu mqajmin, għax ma tafux meta ż-​żmien maħtur hu.”—MARK 13:33.

1. Kif għandna nirreaġixxu hekk kif ġrajjiet eċċitanti jseħħu f’dan iż-​“żmien tat-​tmiem”?

HEKK kif ġrajjiet eċċitanti jseħħu f’dan iż-​“żmien tat-​tmiem,” il-​Kristjani kif għandhom jirreaġixxu? (Danjel 12:4) Huma ma jitħallewx fid-​dubju. Ġesù Kristu lissen il-​profezija li fiha s-​sinjal kompost li ġarrab twettieq f’dan is-​seklu 20. Hu bassar il-​ħafna fatturi li mmarkaw lil dan il-​perijodu mill-​1914 ’il hawn bħala uniku. Billi kien familjari mal-​profezija taʼ Danjel rigward “iż-​żmien tat-​tmiem,” Ġesù kompla bil-​profezija kbira tiegħu stess billi ħeġġeġ lid-​dixxipli tiegħu biex ‘jibqgħu mqajmin’.—Luqa 21:36.

2. Għala hemm ħtieġa kbira biex nibqgħu mqajmin spiritwalment?

² Għala jibqgħu mqajmin? Għaliex dan huwa l-​iktar żmien perikoluż fl-​istorja umana. Jekk il-​Kristjani jċedu għal ngħas spiritwali f’dan iż-​żmien se jkun taʼ diżastru. Jekk insiru sodisfatti bina nfusna jew inħallu lil qlubna jitqalu bl-​anzjetajiet tal-​ħajja, se nkunu fil-​periklu. F’​Luqa 21:34, 35, Ġesù Kristu wissiena: “Oqogħdu attenti għalikom infuskom li qlubkom qatt ma jitqalu b’ikel żejjed u xorb żejjed u anzjetajiet tal-​ħajja, u f’daqqa waħda dak il-​jum ikun minnufih fuqkom bħal nassa. Għax se jiġi fuq dawk kollha li qegħdin igħammru fuq wiċċ l-​art kollha”.

3, 4. (a) Ġesù x’ried ifisser meta qal li l-​jum taʼ qilla t’Alla kien se jiġi f’daqqa fuq in-​nies “bħal nassa”? (b) Ladarba Alla ma jonsobx in-​nassa, għala dak il-​jum se jaqbad lin-​nies inġenerali għall-​għarrieda?

³ Kien għal raġuni tajba li Ġesù qal li l-​jum taʼ Jehovah se jkun ‘minnufih bħal nassa’. Nassa hija taʼ spiss imgħammra b’ingassa, u tintuża biex jinqabdu l-​għasafar u l-​annimali. In-​nassa għandha grillu, u kulmin jidħol fiha jolqot il-​grillu. In-​nassa mbagħad tinġibed u tingħalaq, u l-​vittma jinqabad. Dan kollu jiġri malajr malajr. Bl-​istess mod, qal Ġesù, uħud inattivi spiritwalment se jittieħdu b’sorpriża u se jinqabdu f’“jum il-​qilla” t’Alla.—Proverbji 11:4.

⁴ Huwa Alla Jehovah dak li jonsob in-​nassa għan-​nies? Le, m’huwiex qed jistenna biex jaqbad lin-​nies għall-​għarrieda biex jeqridhom. Imma dak il-​jum se jaqbad lin-​nies inġenerali għaliex huma ma jagħtux konsiderazzjoni primarja lis-​Saltna t’Alla. Huma jitilqu għal rashom fil-​ġiri tal-​ħajja, waqt li jinjoraw it-​tifsir tal-​iżviluppi taʼ madwarhom. Dan, madankollu, ma jbiddilx l-​iskeda t’Alla. Hu għandu ż-​żmien iffissat tiegħu biex jagħmel il-​kontijiet. U, bi ħniena, hu ma jħallix lill-​ bnedmin fil-​għama dwar il-​ġudizzju tiegħu li ġej.—Mark 13:10.

5, 6. (a) Minħabba l-​ġudizzju li ġej, il-​Ħallieq xi provvediment taʼ mħabba għamel għall-​ħlejjaq umani, imma b’liema riżultat ġenerali? (b) X’se jiġi kkunsidrat biex igħinna nibqgħu mqajmin?

⁵ Din it-​twissija minn qabel hija provvediment taʼ mħabba min-​naħa tal-​ħallieq il-​Kbir, li huwa nteressat fil-​benesseri taʼ ħlejjaq umani hawn fuq il-​banketta simbolika tiegħu. (Isaija 66:1) Hu jgħożżhom lill-​abitanti tal-​post fejn riġlejh jintqal li qegħdin jistrieħu. Mela permezz tal-​ambaxxaturi u tal-​mibgħutin speċjali tiegħu fuq l-​art, hu jwissihom dwar ġrajjiet li ġejjin fuqhom. (2 Korintin 5:20) Iżda, minkejja t-​twissija kollha li tingħata, dawk il-​ġrajjiet se jaslu fuq il-​familja umana bla mistennijin daqs li kieku huma daħlu ġewwa nassa. Għala? Għaliex il-​biċċa l-​kbira tan-​nies huma reqdin spiritwalment. (1 Tessalonkin 5:6) Għadd komparattivament żgħir biss jagħtu kas tat-​twissija u se jsalvaw għal ġod-​dinja ġdida t’Alla.—Mattew 7:13, 14.

⁶ Kif, allura, nistgħu nibqgħu mqajmin f’dan iż-​żmien tat-​tmiem sabiex niġu magħdudin fost dawk li se jsalvaw? Ejjew ninnotaw sebaʼ affarijiet li nistgħu nagħmlu.

Iġġieled id-​Distrazzjoni

7. Ġesù liema twissija ta rigward id-​distrazzjoni?

⁷ L-​ewwel, irridu niġġieldu d-​distrazzjoni. F’​Mattew 24:42, 44, Ġesù qal: “Ibqgħu għassu, għalhekk, għaliex ma tafux f’liema jum ġej il-​Mulej tagħkom. Minħabba f’dan intom ukoll uru li intom lesti, għaliex f’siegħa li ma taħsbux li hi, ġej Bin il-​bniedem”. Il-​lingwaġġ li Ġesù juża hawn jindika li f’dan iż-​żmien kritiku, se jkun hawn ħafna distrazzjoni, u d-​distrazzjoni tistaʼ twassal għal distruzzjoni, jew qerda› Fi żmien Noè n-​nies kienu jitħassbu dwar ħafna affarijiet. Bħala riżultat, in-​nies distratti “ma tawx kas” taʼ x’kien qed jiġri, u d-​Dilluvju kinishom ilkoll. Għaldaqstant, Ġesù wissa: “Hekk se tkun il-​preżenza taʼ Bin il-​bniedem”.—Mattew 24:37-39.

8, 9. (a) L-​interessi ordinarji tal-​ħajja kif jistgħu jkunu taʼ distrazzjoni għalina b’mod perikoluż? (b) Pawlu u Ġesù liema twissijiet jagħtuna?

⁸ Żomm f’moħħok, ukoll, li fit-​twissija tiegħu f’​Luqa 21:34, 35, Ġesù kien qed jiddiskuti l-​fatturi ordinarji tal-​ħajja, bħalma huma l-​ikel, ix-​xorb, u l-​anzjetajiet dwar kif tikseb il-​għixien. Dawn huma affarijiet komuni għal-​bnedmin kollha, inklużi d-​dixxipli tal-​Mulej Ġesù. (Qabbel Mark 6:31) Dawn l-​affarijiet jistgħu jkunu bla ħsara fihom infushom, imma jekk jitħallew, jistgħu jġagħluna niġu distratti, jippreokkupawna, u b’hekk iġibu ngħas spiritwali perikoluż fuqna.

⁹ Għalhekk, ejjew ma nittrasskurawx il-​ħaġa taʼ l-​ogħla importanza—li niksbu approvazzjoni divina. Minflok ma ningħataw għalkollox għall-​affarijiet ordinarji tal-​ħajja, ejjew nużawhom biss sal-​punt limitat meħtieġ biex isostnuna. (Filippin 3:8) M’għandhomx jegħlbu l-​interessi tas-​Saltna. Kif igħid Rumani 14:17, “is-​Saltna t’Alla ma tfissirx ikel u xorb, imma tfisser tjieba u paċi u ferħ bi spirtu qaddis”. Ftakar fil-​kliem taʼ Ġesù meta qal: “Ibqgħu, allura, fittxu l-​ewwel is-​saltna u t-​tjieba tiegħu, u dawn l-​affarijiet l-​oħra kollha se jiżdidulkom”. (Mattew 6:33) Jerġaʼ, f’​Luqa 9:62, Ġesù ddikjara: “Ebda bniedem li poġġa idu fuq moħriet u jħares lejn l-​affarijiet taʼ warajh ma hu xieraq sewwa għas-​saltna t’Alla”.

10. X’periklu jeżisti jekk ma nżommux għajnejna jħarsu dritt ’il quddiem lejn il-​mira?

¹⁰ Ladarba nibdew naħartu, b’mod figurattiv, irridu nżomm f’linja dritta. Wieħed li x’ħin jaħrat iħares lura ma jaħratx radda dritta. Hu jiġi distratt u jistaʼ faċilment jiżżvija jew jieqaf minħabba xi ostaklu. Ħalli ma nkunux bħall-​mara taʼ Lot, li ħarset lura u baqgħet ma salvatx. Hemm bżonn li nżommu għajnejna jħarsu dritt ’il quddiem lejn il-​mira. Biex nagħmlu hekk irridu niġġieldu lid-​distrazzjoni.—Ġenesi 19:17, 26; Luqa 17:32.

Itlob bil-​Ħeġġa Kollha

11. Ġesù x’enfasizza wara li wissiena dwar il-​periklu tad-​distrazzjoni?

¹¹ Hemm, madankollu, iktar x’nistgħu nagħmlu biex nibqgħu mqajmin. It-​tieni ħaġa importanti hi: Itlob bil-​ħeġġa kollha. Wara li wissiena biex ma niġux distratti wara l-​ġiri ordinarju tal-​ħajja, Ġesù ta dan il-​parir: “Ibqgħu mqajmin, allura, il-​ħin kollu billi tagħmlu tħannin biex forsi jirnexxilkom taħarbu minn dawn l-​affarijiet kollha li huma ddestinati li jseħħu, u tieqfu quddiem Bin il-​bniedem”.—Luqa 21:36.

12. Liema xorta taʼ talb hu meħtieġ, u b’liema riżultat?

¹² B’hekk, irridu nagħmlu tħannin kontinwu rigward i-periklu tas-​sitwazzjoni tagħna u l-​bżonn tagħna li noqogħdu attenti. Mela ejjew immorru għand Alla bit-​talba b’petizzjonijiet ħerqana. Pawlu jgħid f’​Rumani 12:12: “Ipperseveraw fit-​talb”. U f’​Efesin 6:18, naqraw: “B’kull għamla taʼ talb u tħannin..., ibqgħu itolbu f’kull okkażjoni fl-​ispirtu. U għal dak il-​għan ibqgħu mqajmin bla ma tieqfu”. Dan mhux sempliċement każ li toffri talb bħal li kieku kien xi ħaġa każwali taʼ ebda importanza. L-​istess eżistenza tagħna hija fil-​periklu. Aħna għalhekk irridu nappellaw bil-​ħeġġa għal għajnuna divina. (Qabbel Ebrej 5:7) B’dak il-​mod se nżommu lilna nfusna fuq in-​naħa taʼ Jehovah. Xejn ma jkun iktar taʼ benefiċċju f’li jgħinna nwettqu dan milli li ‘l-​ħin kollu nagħmlu tħannin’. Jehovah imbagħad se jżommna mqajmin u għassa. Kemm hu importanti, allura, li nippersistu fit-​talb!

Żomm Qrib tal-​Organizzazzjoni t’Alla u x-​Xogħol Tagħha

13. Liema tip taʼ sħubija hi meħtieġa biex nibqgħu mqajmin?

¹³ Aħna rridu naħarbu dawn l-​affarijiet kollha li se jiġu fuq id-​dinja. Irridu nieqfu quddiem Bin il-​bniedem, billi jkollna l-​approvazzjoni tiegħu. Għal dan il-​għan hemm it-​tielet ħaġa li nistgħu nagħmlu: Inżommu bla ma nieqfu mal-​organizzazzjoni teokratika taʼ Jehovah. Aħna rridu nassoċjaw bla riżerva maʼ dik l-​organizzazzjoni u nieħdu sehem fl-​attivitajiet tagħha. B’dan il-​mod se nidentifikaw lilna nfusna b’mod ċar bħala Kristjani li qegħdin għassa.

14, 15. (a) Li nkunu attivi f’liema xogħol se jgħinna nibqgħu mqajmin? (b) Min jiddetermina meta x-​xogħol tal-​ippridkar ikun spiċċa, u kif għandna nħossuna dwaru? (ċ) Wara t-​tribulazzjoni l-​kbira, x’se naraw meta nħarsu lura lejn l-​ippridkar tas-​Saltna li sar?

¹⁴ Konnessa mill-​qrib hi r-​rabaʼ ħaġa li tistaʼ tgħinna nibqgħu mqajmin. Aħna rridu nkunu fost dawk li qegħdin iwissu lin-​nies dwar it-​tmiem li riesaq taʼ din is-​sistema taʼ affarijiet. It-​tmiem komplet taʼ din is-​sistema qadima taʼ affarijiet ma jseħħx sakemm “din l-​aħbar tajba tas-​saltna” tiġi ppridkata sal-​punt li Alla li Jistaʼ Kollox ippropona. (Mattew 24:14) Ix-​Xhieda taʼ Jehovah m’humiex dawk li jiddeterminaw meta x-​xogħol tal-​ippridkar ġie mwettaq. Jehovah jirriżerva dak id-​dritt għalih innifsu. (Mark 13:32, 33) Aħna, iżda, determinati li naħdmu iebes kemm hu possibbli u sakemm hu neċessarju f’li nippridkaw dwar l-​aqwa gvern li l-​umanità tistaʼ qatt ikollha, is-​Saltna t’Alla.It-“tribulazzjoni kbira” se tfaqqaʼ waqt li nkunu għadna nieħdu sehem f’dan ix-​xogħol. (Mattew 24:21) Għaż-​żmien futur kollu, uħud salvati se jkunu jistgħu jħarsu lura u b’qalbhom kollha jikkonfermaw li Ġesù Kristu ma kienx profeta falz. (Rivelazzjoni 19:11) Ix-​xogħol tal-​ippridkar se jkun twettaq sa grad bil-​wisq akbar milli kien mistenni mill-​uħud li jipparteċipaw fih.

¹⁵ Għaldaqstant, fiż-​żmien sinjifikanti meta dan ix-​xogħol se jkun twettaq għas-​sodisfazzjon t’Alla stess, iktar nies se jkunu wisq probabbli qegħdin jipparteċipaw fih milli fi kwalunkwe perijodu qabel dan. Kemm se nkunu grati li kellna sehem f’dan ix-​xogħol grandjuż! L-​appostlu Pietru jiżżgurana li Jehovah “ma jixtieqx li xi ħadd jinqered imma jixtieq li kulħadd jasal għall-​indiema”. (2 Pietru 3:9) Għaldaqstant, il-​forza attiva t’Alla li Jistaʼ Kollox qiegħda topera llum b’mod iktar intensiv minn qatt qabel, u x-​Xhieda taʼ Jehovah jixtiequ jkomplu f’din l-​attività mqanqla mill-​ispirtu. Għalhekk żomm qrib tal-​organizzazzjoni taʼ Jehovah, u kun attiv fil-​ministeru pubbliku tagħha. Dan se jkun għajnuna f’li int tibqaʼ mqajjem.

Nagħmlu Eżami Tagħna Nfusna

16. Għala għandna nagħmlu eżami tagħna nfusna dwar l-​istat spiritwali preżenti tagħna?

¹⁶ Hemm il-​ħames ħaġa li nistgħu nagħmlu sabiex nibqgħu mqajmin. Individwalment, aħna għandna nagħmlu eżami tagħna nfusna dwar l-​istat preżenti tagħna. Dan huwa xieraq issa iżjed minn qatt qabel. Irridu nagħtu prova dwar fuq in-​naħa taʼ min ninsabu weqfin b’mod reżolut. F’​Galatin 6:4, Pawlu qal: “Ħalli kull wieħed jagħti prova taʼ x’inhu xogħlu stess”. Agħmel eżami tiegħek innifsek fi qbil mal-​kliem taʼ Pawlu fl-​1 Tessalonkin 5:6-8: “Ħalli ma nibqgħux reqdin bħalma jagħmlu l-​bqija, imma ħalli noqogħdu mqajmin u nibqgħu f’sensina. Għax dawk li jorqdu mdorrijin jorqdu bil-​lejl, u dawk li jiskru s-​soltu jiskru bil-​lejl. Imma nkwantu għalina li nappartjenu lill-​jum, ħalli nibqgħu f’sensina u nilbsu l-​kurazza tal-​fidi u l-​imħabba u bħala elmu t-​tama tas-​salvazzjoni”.

17. Meta nagħmlu eżami tagħna nfusna, x’mistoqsijiet għandna nistaqsu lilna nfusna?

¹⁷ Xi ngħidu għalina? Meta neżaminaw lilna nfusna fid-​dawl tal-​Iskrittura, naraw li aħna qegħdin nibqgħu mqajmin, billi għandna bħala elmu t-​tama tas-​salvazzjoni? Aħna persuni li b’mod pożittiv isseparajna lilna nfusna mis-​sistema qadima taʼ affarijiet u m’għadniex inżommu l-​ideat tagħha? Għandna verament l-​ispirtu tad-​dinja ġdida t’Alla? Ninsabu konxji biżżejjed dwar fejn se tispiċċa din is-​sistema? Jekk inhu hekk, il-​jum taʼ Jehovah mhux se jaqbadna bħal li kieku konna ħallelin.—1 Tessalonkin 5:4.

18. Liema mistoqsijiet oħrajn nistgħu jkollna bżonn nistaqsu lilna nfusna, u b’liema riżultat?

¹⁸ Xi ngħidu, iżda, jekk l-​eżami tagħna nfusna jirrivela li aħna qegħdin nistinkaw biex nistabbilixxu mod taʼ ħajja sabiħa, komda, komfortabbli, u rilassata? Xi ngħidu jekk niskopru li l-​għajnejn spiritwali tagħna saru tqal bil-​għeja u bin-​ngħas? Qegħdin aħna qisna f’ħolma, niġru wara xi fantasija tad-​dinja? Jekk inhu hekk, allura ejjew inqumu mill-​irqad!—1 Korintin 15:34.

Immedita fuq Profeziji li Twettqu

19. Liema huma xi wħud mill-​profeziji li rajna jitwettqu?

¹⁹ Issa niġu għas-​sitt ħaġa li se tgħinna nibqgħu mqajmin: Immedita fuq il-​ħafna profeziji li twettqu f’dan iż-​żmien tat-​tmiem. Diġà għaddejna is-​77 sena minn mindu ntemmu ż-​żminijiet maħtura tal-​ġnus fl-​1914. Hekk kif inħarsu lura lejn iktar minn tliet kwarti taʼ seklu, nistgħu naraw kif profezija wara l-​oħra twettqet—ir-​restawrazzjoni tal-​qima vera; il-​ħelsien tal-​fdal midlukin, flimkien maʼ sħabhom, f’ġenna spiritwali; l-​ippridkar tal-​aħbar tajba tas-​Saltna fuq skala globali; id-​dehra taʼ folla kbira. (Isaija 2:2, 3; Kapitlu 35; Żakkarija 8:23; Mattew 24:14; Rivelazzjoni 7:9) U l-​viżjonijiet taʼ l-​appostlu Ġwanni fir-​rakkont taʼ Rivelazzjoni qegħdin issa jersqu lejn il-​quċċata tagħhom.

20. X’konvinzjoni għandhom ix-​Xhieda taʼ Jehovah, u x’taw prova fil-​fatt li huma?

²⁰ Għalhekk, iktar minn qatt qabel, ix-​Xhieda taʼ Jehovah huma konvinti b’mod sod dwar kemm hi korretta l-​fehma tagħhom tat-​tifsir tal-​kwistjonijiet dinjin mill 1914 ’il hawn. Billi għandhom din il-​konvinzjoni, huma taw prova li huma l-​istrumenti f’idejn Alla l-​Iktar Għoli. Huma dawk li ġew fdati biex ixandru l-​messaġġ divin f’dan iż-​żmien sinjifikanti. (Rumani 10:15, 18) Iva, il-​kliem taʼ Jehovah għaż-​żmien tat-​tmiem seħħ. (Isaija 55:11) Dan, mill-​banda l-​oħra, għandu jqanqalna biex inkomplu sakemm naraw it-​twettieq finali tal-​wegħdiet kollha t’Alla permezz taʼ Ġesù Kristu.

Is-​Salvazzjoni iktar qrib minn dak iż-​Żmien meta Sirna Nemmnu

21. X’inhi s-​sebaʼ ħaġa li tgħinna biex nibqgħu mqajmin spiritwalment?

²¹ Fl-​aħħar, is-​sebaʼ għajnuna biex nibqgħu mqajmin: Żomm dejjem f’moħħok li s-​salvazzjoni tagħna hi iktar qrib minn dak iż-​żmien meta sirna nemmnu fil-​bidu. Iktar importanti, l-​ivvindikar tas-​sovranità universali taʼ Jehovah u t-​taqdis taʼ ismu huma ħafna iktar qrib. Mela l-​ħtieġa li nibqgħu mqajmin hija iżjed urġenti minn qatt qabel. L-​appostlu Pawlu jikteb: “Intom tafu l-​istaġun, li diġà saret is-​siegħa għalikom biex tistenbħu mir-​raqda, għax issa s-​salvazzjoni tagħna hi iktar qrib minn dak iż-​żmien meta sirna nemmnu. Il-​lejl daħal sewwa; il-​jum qorob.”—Rumani 13:11, 12.

22. L-​avviċinar tas-​salvazzjoni tagħna kif għandu jeffettwana?

²² Bis-​salvazzjoni tagħna tant iktar qrib, irridu bil-​fors nibqgħu mqajmin! Ma rridux inħallu kwalunkwe interessi persunali jew dinjin jegħlbu lill-​apprezzament tagħna għal dak li Jehovah qed jagħmel għall-​poplu tiegħu matul dan iż-​żmien tat-​tmiem. (Danjel 12:3) Irridu nuru iżjed persistenza minn qatt qabel sabiex ma niġux żvijati mill-​mogħdija li l-​Kelma t’Alla b’mod ċar tordnalna. (Mattew 13:22) L-​evidenza turi b’mod ċar li din id-​dinja tinsab fl-​aħħar jiem tagħha. Dalwaqt se titwarrab mill-​eżistenza għal dejjem biex tagħmel il-​wisaʼ għal dinja ġdida taʼ tjieba.—2 Pietru 3:13.

23. Jehovah b’liema mod se jgħinna, u b’liema riżultat imbierek?

²³ Ejjew, allura, b’kull mezz nibqgħu mqajmin. Bħal qatt qabel, oqgħod attent dwar fejn ninsabu fil-​mixja taż-​żmien. Ftakar, Jehovah qatt ma jorqod f’din il-​kwistjoni. Minflok, hu dejjem se jgħinna biex nibqgħu mqajmin f’dan iż-​żmien tat-​tmiem. Il-​lejl kważi għadda. Il-​jum qed joqrob. Mela ibqaʼ mqajjem! Dalwaqt se nġarrbu l-​iktar jum sabiħ fosthom kollha, hekk kif is-​Saltna Messjanika twettaq il-​għan taʼ Jehovah għall-​art!—Rivelazzjoni 21:4, 5.

X’Inhuma t-​Tweġibiet Tiegħek?

◻ Ġesù x’ried ifisser meta qal li l-​jum tal-​qilla t’Alla se jiġi fuq in-​nies “bħal nassa”?

◻ Għala għandna niġġieldu kontra d-​distrazzjoni, u kif nistgħu nagħmlu dan?

◻ Liema xorta taʼ talb hu meħtieġ sabiex nibqgħu mqajmin?

◻ Għala nagħmlu eżami tagħna nfusna dwar l-​istat spiritwali tagħna?

◻ X’parti tilgħab il-​profezija f’li nibqgħu mqajmin?