Il-Ħajja—Għotja Mingħand Alla
ERBGĦA u għoxrin siegħa kuljum, il-qalb tagħna tippompja demm prezzjuż fil-ġisem tagħna. Norqdu, u l-pulmuni tagħna jkomplu jespandu u jiċkienu. Nieklu xi ikla, u l-ikel jissajjar fl-istonku b’mod awtomatiku. Dan kollu jiġri kuljum, bi ftit jew xejn sforz konxju min-naħa tagħna. Dawn il-proċessi misterjużi u tal-għaġeb, li spiss jittieħdu bħala ħaġa fatta, huma parti mill-għotja li nsejħulha l-ħajja. F’sens wieħed hija għotja li tistaʼ tissejjaħ mirakoluża.
Ikkunsidra l-proċess tat-tnissil u tat-twelid tal-bniedem. Għalkemm il-ġisem normalment jirrifjuta tessuti barranin, il-ġuf jagħmel eċċezzjoni għal bajda fertilizzata. Minflok ma jirrifjuta lit-tarbija mhix imwielda li qiegħda tikber bħala waħda mit-tessuti barranin, imantniha u jipproteġiha sakemm tkun lesta biex toħroġ bħala tarbija. Mingħajr l-abbiltà tal-ġuf li jagħmel din l-eċċezzjoni kruċjali għar-regola taʼ li jirrifjuta tessuti barranin, it-twelid uman kien ikun impossibbli.
Xorta waħda, il-ħajja għal tarbija li għadha kif twieldet kienet tkun qasira li ma kienx għal żvilupp li jseħħ fil-ġuf meta tarbija mhix imwielda jkollha biss madwar erbaʼ xhur. F’dak iż-żmien tibda terdaʼ sabagħha l-kbir, u b’hekk teżerċita l-muskoli li iktar tard igħinuha biex tiġi mżoqqa minn sider ommha. U din hi biss waħda mill-ħafna kwistjonijiet taʼ ħajja jew mewt li jiġu solvuti ferm qabel it-twelid taʼ tarbija.
Meta tarbija mhix imwielda tkun fil-ġuf, hemm toqba fil-ħajt tal-qalb tagħha. Din it-toqba, madankollu, tagħlaq b’mod awtomatiku fit-twelid. Barra minn hekk, reċipjent kbir tad-demm li jevita lill-pulmuni waqt li t-tarbija mhix imwielda tkun fil-ġuf b’mod awtomatiku jiċkien ferm fit-twelid; id-demm issa jmur fil-pulmuni, fejn jistaʼ jiġi ossiġenat meta t-tarbija tieħu l-ewwel nifs tagħha.
Dan kollu huwa biss il-bidu. Matul il-ħajja, sensiela taʼ sistemi ddisinnjati b’mod eleganti (bħalma hi s-sistema respiratorja, is-sistema ċirkolatorja, s-sistema nervuża u s-sistema endokrina) se jwettqu u jikkordinaw il-funzjonijiet tagħhom b’effiċjenza li tbellah lill-fehma tal-bniedem—kollox biex tiġi mtawla l-ħajja. Mhux taʼ b’xejn li kittieb tal-qedem qal b’referenza għal Alla: “Jien se nfaħħrek għaliex b’mod li jnebbaħ il-biżaʼ jien magħmul b’mod tal-għaġeb. Xogħlijietek huma tal-għaġeb, bħalma ruħi taf sewwa.”—Salm 139:14.
Biċ-ċar, il-kittieb taʼ dawk il-kelmiet sbieħ ma kienx jemmen li l-ħajja saret sempliċement b’kombinazzjoni jew aċċidentalment jew ġiet bl-evoluzzjoni. Kieku dak kien il-każ, ma kien ikollna ebda obbligi jew responsabbiltajiet reali inkwantu għal kif għandna nużaw il-ħajjiet tagħna. Madankollu, il-mekkaniżmi tal-ħajja jirriflettu b’mod ċar id-disinn, u d-disinn jitlob disinnjatur. Il-Bibbja tagħtina dan il-prinċipju: “M’għandniex xi ngħidu, kull dar hija mibnija minn xi ħadd, imma dak li bena kollox hu Alla.” (Ebrej 3:4) Huwa għalhekk vitali li ‘nkunu nafu li Jehovah huwa Alla. Huwa hu li għamilna, u mhux aħna nfusna.’ (Salm 100:3) Iva, il-ħajja hija iktar minn kumbinazzjoni sabiħa; hija għotja mingħand Alla nnifsu.—Salm 36:9.
Peress li dan hu l-każ, x’obbligi għandna lejn id-Donatur tal-ħajja? Kif jistenna minna li nużaw il-ħajjiet tagħna? Dawn u mistoqsijiet relatati se jiġu kkunsidrati fl-artiklu li jmiss.