“Sibna lill-Messija”!

“L-​ewwel [Indrì] sab lil ħuh stess, Xmun, u qallu:‘Sibna lill-​Messija’ (li tfisser, meta tiġi tradotta, Kristu).”−ĠWANN 1:41.

1. Ġwanni l-​Għammied liema xiehda ta dwar Ġesù taʼ Nazzaret, u Indrì x’ikkonkluda dwaru?

INDRÌ ta ħarsa twila u profonda lejn ir-​raġel Lhudi msejjaħ Ġesù taʼ Nazzaret. Ma kellux id-​dehra taʼ xi sultan, jew taʼ xi bniedem għaref, jew taʼ xi rabbi. Ma kellux ilbies irjali, lanqas xagħar griż, lanqas idejn rotob u ġilda bajdanija. Ġesù kien żagħżugħ—kellu madwar 30 sena—bl-​idejn mimlijin kallijiet u l-​ġilda kulur il-​bronż taʼ wieħed li jaħdem b’idejh. Mela Indrì setaʼ ma ssorprendiex ruħu meta sar jaf li kien mastrudaxxa. Madankollu, Ġwanni l-​Għammied qal dwar dan ir-​raġel: “Ara, il-​Ħaruf t’Alla!” Il-​jum taʼ qabel, Ġwanni kien qal xi ħaġa saħansitra iktar tal-​għaġeb: “Dan il-​wieħed hu l-​Iben t’Alla.” Setaʼ dan ikun veru? Indrì qattaʼ xi ħin jismaʼ lil Ġesù dak in-​nhar. Ma nafux x’qal Ġesù; tassew nafu li l-​kelmiet tiegħu biddlu l-​ħajja taʼ Indrì. Hu għaġġel biex isib lil ħuh, Xmun, u esklama, “Sibna lill-​Messija”!—Ġwann 1:34-41.

2. Għala huwa importanti li nikkunsidraw l-​evidenza inkwantu għal jekk Ġesù kienx il-​Messija mwiegħed?

² Indrì u Xmun (li lilu Ġesù ta l-​isem ġdid taʼ Pietru) iktar tard saru appostli taʼ Ġesù. Wara iktar minn sentejn bħala dixxiplu tiegħu, Pietru qal lil Ġesù: “Int il-​Kristu [Messija], l-​Iben t’Alla l-​ħaj.” (Mattew 16:16) L-​appostli u d-​dixxipli leali fl-​aħħarnett taw prova li kienu lesti li jissograw il-​ħajjiet tagħhom fuq dak it-​twemmin. Illum, miljuni taʼ nies sinċieri huma daqstant iddedikati. Imma fuq liema evidenza? L-​evidenza, wara kollox, tagħmel id-​differenza bejn il-​fidi u li tiblaʼ kollox bl-​amment. (Ara Ebrej 11:1.) Mela ejjew nikkunsidraw tliet linji ġenerali taʼ evidenza li jagħtu prova li Ġesù kien tabilħaqq il-​Messija.

L-​Arblu tar-​Razza taʼ Ġesù

3. Il-​Vanġeli taʼ Mattew u Luqa liema dettal jagħtu dwar l-​arblu tar-​razza taʼ Ġesù?

³ L-​arblu tar-​razza taʼ Ġesù huwa l-​ewwel evidenza li l-​Iskrittura Griega Kristjana tagħti b’appoġġ lejn l-​istat tiegħu taʼ Messija. Il-​Bibbja bassret li l-​Messija kellu jiġi mill-​arblu tar-​razza tal-​familja tas-​Sultan David. (Salm 132:11, 12; Isaija 11:1, 10) Il-​Vanġelu taʼ Mattew jibda: “Il-​ktieb tal-​istorja taʼ Ġesù Kristu, bin David, bin Abraham.” Mattew jappoġġja lil din l-​istqarrija qalbiena billi jsemmi d-​dixxendenza taʼ Ġesù permezz tal-​arblu tar-​razza tal-​missier adottiv tiegħu, Ġużeppi. (Mattew 1:l-16) Il-​Vanġelu taʼ Luqa jsemmi l-​arblu tar-​razza taʼ Ġesù permezz tal-​omm naturali tiegħu, Marija, lura permezz taʼ David u Abraham sa Adam. (Luqa 3:23-38)a B’hekk il-​kittieba tal-​Vanġelu jiddokumentaw bir-​reqqa l-​istqarrija tagħhom li Ġesù kien werriet taʼ David, kemm f’sens legali u kemm f’sens naturali.

4, 5. (a) In-​nies taʼ żmien Ġesù sfidawha d-​dixxendenza tiegħu minn David, u dan għala huwa sinjifikanti? (b) Referenzi li m’humiex Bibliċi kif jappoġġjaw lill-​arblu tar-​razza taʼĠesù?

⁴ Saħansitra l-​iktar opponent xettiku tal-​istat taʼ Messija taʼ Ġesù ma jistax jiċħad l-​istqarrija taʼ Ġesù li hu bin David. Għala? Hemm żewġ raġunijiet. Waħda, dik l-​istqarrija kienet ripetuta maʼ kullimkien f’Ġerusalemm għal għexur taʼ snin qabel ma l-​belt ġiet meqruda fis-​sena 70 E.K. (Qabbel Mattew 21:9; Atti 4:27; 5:27, 28. ) Kieku l-​istqarrija kienet falza, l-​opponenti kollha taʼ Ġesù—u kellu ħafna—setgħu taw prova li Ġesù kien frodi sempliċement billi jiċċekkjaw l-​arblu tar-​razza tiegħu fil-​ġenealoġiji fl-​arkivji pubbliċi.b Imma l-​istorja m’għandha ebda rekord taʼ xi ħadd li sfida d-​dixxendenza taʼ Ġesù mis-​Sultan David. B’mod evidenti, l-​istqarrija felħet għall-​attakki kollha. Bla dubju Mattew u Luqa kkopjaw l-​ismijiet li jispikkaw għar-​rakkonti tagħhom direttament mir-​reġistri pubbliċi.

⁵ It-​tieni, sorsi barra mill-​Bibbja jikkonfermaw l-​aċċettar ġenerali tal-​arblu tar-​razza taʼ Ġesù. Per eżempju, it-​Talmud jirrekordja lil rabbi tar-​rabaʼ seklu bħal li qed jagħmel attakk defamatorju fuq Marija, omm Ġesù, talli ‘lagħbet il-​parti taʼ mara żienja maʼ mastrudaxxi’; imma l-​istess passaġġ jammetti li “hi kienet id-​dixxendenta taʼ prinċpijiet u ħakkiema.” Eżempju iktar bikri huwa Hegesippus, kittieb tal-​istorja tat-​tieni seklu. Hu rrakkonta li meta Ċesri Domizjanu r-​Ruman ried jeqred lid-​dixxendenti kollha taʼ David, xi għedewwa tal-​Kristjani bikrin iddenunzjaw lil ulied l-​ulied taʼ Ġuda, Indrì tar-​rispett taʼ Ġesù, “bħala li kienu tal-​familja taʼ David.” Jekk Ġuda kien dixxendent magħruf taʼ David, ma kienx Ġesù wkoll? Bla dubju!—Galatin 1:19; Ġuda 1.

Profeziji Messjaniċi

6 Il-​profeziji Messjaniċi kemm huma abbundanti fl-​Iskrittura Ebrajka?

⁶ Linja oħra taʼ evidenza li Ġesù kien il-​Messija hija l-​profezija mwettqa. Profeziji li japplikaw għall-​Messija huma kotrana fl-​Iskrittura Ebrajka. Fix-​xogħol tiegħu The Life and Times of Jesus the Messiah, Alfred Edersheim jirrekordja 456 passaġġ fl-​Iskrittura Ebrajka li rabbini tal-​qedem kienu jqisuhom bħala messjaniċi. Madankollu, ir-​rabbini kellhom ħafna ideat żballjati dwar il-​Messija; ħafna mill-​passaġġi li huma ppuntaw lejhom assolutament m’humiex messjaniċi. Xorta waħda, l-​inqas l-​inqas hemm għadd kbir taʼ profeziji li jidentifikaw lil Ġesù bħala l-​Messija.—Qabbel Rivelazzjoni 19:10.

7. X’inhuma ftit mill-​profeziji li Ġesù wettaq waqt li kien fuq l-​art?

⁷ Fosthom hemm: il-​belt tat-​twelid tiegħu (Mikea 5:2; Luqa 2:4-11); it-​traġedja tal-​qtil taʼ massa taʼ trabi li seħħ wara t-​twelid tiegħu (Ġeremija 31:15; Mattew 2:16-18); kellu jissejjaħ ’il barra mill-​Eġittu (Ħosea 11:1; Mattew 2:15); ħakkiema tal-​ġnus kellhom jingħaqdu flimkien biex jeqirduh (Salm 2:1, 2; Atti 4:25-28) it-​tradiment tiegħu għal 30 biċċa tal-​fidda (Żakkarija 11:12; Mattew 26:15); saħansitra l-​manjiera tal-​mewt tiegħu.—Salm 22:16, nota taʼ taħt; Ġwann 19:18, 23; 20:25, 27.c

Il-​Wasla Tiegħu Pprofetizzata

8. (a) Liema profezija turi eżatt meta l-​Messija kellu jasal? (b) Liema żewġ fatturi jridu jkunu magħrufin sabiex wieħed jifhem din il-​profezija?

⁸ Ejjew niffokaw fuq sempliċement profezija waħda. F’​Danjel 9:25, lil-​Lhud intqalilhom meta l-​Messija kellu jiġi. Naqraw: “Għandek tkun taf u jkollok id-​dehen li mill-​ħruġ tal-​kelma biex Ġerusalemm tiġi restawrata u mibnija mill-​ġdid sal-​Messija l-​Mexxej, se jkun hemm sebaʼ ġimgħat, ukoll tnejn u sittin ġimgħa.” Mal-​ewwel daqqa t’għajn din il-​profezija tistaʼ tidher li hi moħbija. Imma f’sens iktar wiesgħa, titlobna biex insibu biss żewġ biċċiet taʼ informazzjoni: punt taʼ tluq u medda taʼ żmien. Biex nagħtu stampa, kieku kellek mappa li ppuntat lejn teżor midfun “50 qasba lejn il-​Lvant tal-​bir fil-​ġnien tal-​belt,” tistaʼ ssib li d-​direzzjonijiet ifixkluk—speċjalment kieku ma kontx taf fejn kien dan il-​bir, jew kemm kienet twila‘qasba.’ Ma kontx tfittixhom dawk iż-​żewġ fatti sabiex tkun tistaʼ ssib it-​teżor? Sewwa, il-​profezija taʼ Danjel hija simili ħafna, ħlief li qegħdin nidentifikaw żmien taʼ bidu u qegħdin inkejlu l-​perijodu li jsegwi.

9, 10. (a) X’inhu l-​punt taʼ bidu li minnu d-​69 ġimgħa jiġu mkejlin? (b) Id-​69 ġimgħa kemm kienu twal, u dan kif nafuh?

⁹ L-​ewwel, għandna bżonn inkunu nafu minfejn se nibdew, id-​data meta ‘ħarġet il-​kelma biex Ġerusalemm tiġi restawrata u mibnija mill-​ġdid.’ Imbagħad, għandna bżonn inkunu nafu d-​distanza minn dak il-​punt, sewwa sew kemm kienu twal dawn id-​69 (7 + 62) ġimgħa. Dawn iż-​żewġ biċċiet taʼ informazzjoni ma rridux ħafna biex insibuhom. Neħemija jgħidilna b’mod espliċitu mhux ħażin li l-​kelma ħarġet biex jinbena mill-​ġdid il-​ħajt taʼ madwar Ġerusalemm, billi jagħmilha sa fl-​aħħar belt restawrata, “fil-​għoxrin sena taʼ Artaxerxes is-​sultan.” (Neħemija 2:1, 5, 7, 8) Dak ipoġġi l-​punt taʼ bidu tagħna fis-​sena 455 Q.E.K.d

¹⁰ Issa nkwantu għal dawn id-​69 ġimgħa, jistgħu jkunu ġimgħat litterali taʼ sebat ijiem? Le, għax il-​Messija ma deherx sempliċement naqra iktar minn sena wara s-​sena 455 Q.E.K. B’hekk il-​biċċa l-​kbira tal-​istudjużi tal-​Bibbja u għadd taʼ traduzzjonijiet (inkluż it-​Tanakh Lhudi f’nota taʼ taħt għal dan il-​vers) jaqblu li dawn huma ġimgħat “taʼ snin.” Din l-​idea taʼ ‘ġimgħa taʼ snin,’ jew ċiklu taʼ sebaʼ snin, kienet familjari għal-​Lhud tal-​qedem. Sewwa sew bħalma kienu josservaw jum taʼ sabat kull sebaʼ jum, kienu josservaw sena taʼ sabat kull sebaʼ sena. (Eżodu 20:8-11; 23:10, 11) Mela 69 ġimgħa taʼ snin jammontaw għal 7 snin għal 69 darba, jew 483 sena. Kulma baqgħalna nagħmlu hu li ngħoddu. Mis-​sena 455 Q.E.K., billi ngħoddu 483 sena naslu sas-​sena 29 E.K.—is-​sena stess meta Ġesù ġie mgħammed u sar ma·shi’ach, il-​Messija!—Ara “Seventy Weeks,” Insight on the Scriptures, it-​2 Volum, paġna 899.

11. Kif nistgħu nwieġbu lil dawk li jgħidu li dan hu biss mod modern taʼ interpretazzjoni tal-​profezija taʼ Danjel?

¹¹ Xi wħud jistgħu joġġezzjonaw li dan hu sempliċement mod modern taʼ kif wieħed jinterpreta l-​profezija biex taqbel mal-​istorja. Jekk inhu hekk, in-​nies fi żmien Ġesù għala kienu qegħdin jistennew li l-​Messija jidher f’dak iż-​żmien? Luqa, kittieb Kristjan tal-​istorja, Taċitus u Swetonjus, kittieba Rumani tal-​istorja, Josefus, kittieb Lhudi tal-​istorja, u Filo, filosfu Lhudi, kollha għexu qrib dan iż-​żmien u taw xiehda dwar dan l-​istat taʼ stennija. (Luqa 3:15) Xi studjużi llum jinsistu li kienet l-​oppressjoni Rumana li ġiegħlet lil-​Lhud jixxennqu għal u jistennew lill-​Messija f’dawk il-​jiem. Il-​Lhud għala, iżda, stennew lill-​Messija f’dak iż-​żmien minflok ma stennewh matul il-​persekuzzjoni brutali Griega sekli qabel? Taċitus għala qal li kienu l-​“profeziji misterjużi” li wasslu lil-​Lhud biex jistennew lil ħakkiema potenti biex jiġu mill-​Ġudea u “jakkwistaw imperu universali”? Abba Hillel Silver, fil-​ktieb tiegħu A History of Messianic Speculation in Israel, jirrikonoxxi li “l-​Messija kien mistenni madwar it-​tieni kwart tal-​ewwel seklu E.K.,” mhux minħabba persekuzzjoni Rumana, imma minħabba “I-kronoloġija popolari taʼ dak iż-​żmien,” meħuda f’parti mill-​ktieb taʼ Danjel.

Identifikat minn Fuq

12. Jehovah kif identifika lil Ġesù bħala l-​Messija?

¹² It-​tielet tip taʼ evidenza tal-​istat taʼ Messija taʼ Ġesù huwa x-​xiehda t’Alla nnifsu. Skond Luqa 3:21, 22, wara li Ġesù ġie mgħammed, ġie midluk bl-​iktar forza sagra u potenti fl-​univers, l-​ispirtu qaddis t’Alla Jehovah stess. U b’leħnu stess, Jehovah irrikonoxxa li kien approva lil Ibnu, Ġesù. F’żewġ okkażjonijiet oħrajn, Jehovah tkellem direttament maʼ Ġesù mis-​sema, u b’hekk indika l-​approvazzjoni Tiegħu: darba, quddiem tlieta mill-​appostli taʼ Ġesù, u darb’oħra, quddiem folla taʼ nies li kienu qegħdin iħarsu. (Mattew 17:l-5; Ġwann 12:28, 29) Iktar minn hekk, anġli kienu mibgħutin minn fuq biex jikkonfermaw l-​istat taʼ Ġesù bħala Kristu, jew Messija.—Luqa 2:10, 11.

13, 14. Jehovah kif wera l-​approvazzjoni tiegħu taʼ Ġesù bħala Messija?

¹³ Jehovah wera l-​approvazzjoni tiegħu dwar il-​wieħed midluk tiegħu billi tah il-​qawwa biex iwettaq xogħlijiet kbar. Per eżempju, Ġesù lissen profeziji li ddettaljaw l-​istorja bil-​quddiem—xi wħud jestendu sa żmienna stess.e Hu wettaq ukoll mirakli, bħal meta tamaʼ lill-​folol bil-​ġuħ u fejjaq lill-​morda. Hu saħansitra rxoxta lill-​mejtin. Ivvintaw sempliċement is-​segwaċi tiegħu stejjer taʼ dawn l-​atti setgħana wara li ġraw? Sewwa, Ġesù wettaq ħafna mill-​mirakli tiegħu quddiem nies li raw b’għajnejhom, kultant eluf taʼ nies f’daqqa. Saħansitra l-​għedewwa taʼ Ġesù ma setgħux jiċħdu li hu attwalment għamel dawn l-​affarijiet. (Mark 6:2; Ġwann 11:47) Barra minn hekk, kieku s-​segwaċi taʼ Ġesù kienu inklinati biex jivvintaw rakkonti bħal dawn, allura għala kienu huma daqshekk onesti meta rrakkontaw in-​nuqqasijiet tagħhom stess? Verament, kienu jkunu lesti huma li jmutu għal fidi bbażata fuq sempliċi ħrejjef li huma personalment ivvintaw? Le. Il-​mirakli taʼ Ġesù huma fatti tal-​istorja.

¹⁴ Ix-​xiehda t’Alla dwar Ġesù bħala l-​Messija kienet tmur iktar lil hinn. Permezz tal-​ispirtu qaddis hu assigura li evidenza dwar l-​istat taʼ Messija taʼ Ġesù ġiet miktuba u saret parti mill-​ktieb li l-​iktar li ġie tradott u mqassam maʼ kullimkien fl-​istorja kollha.

Il-​Lhud Għala m’Aċċettawhx lil Ġesù?

15. (a) Kemm huma estensivi l-​kredenzjali taʼ Ġesù li jidentifikawh bħala Messija? (b) Liema stennijiet tal-​Lhud wasslu lil ħafna minnhom biex ma jaċċettawx lil Ġesù bħala l-​Messija?

¹⁵ B’kollox, allura, dawn it-​tliet kategoriji taʼ evidenza jinkludu litteralment mijiet taʼ fatti li jidentifikaw lil Ġesù bħala l-​Messija. M’huwiex dak biżżejjed? Immaġina biss li qiegħed tapplika għal-​liċenzja tas-​sewqan jew għal credit card u jintqallek li tliet biċċiet taʼ identifikażzjoni ma kinux biżżejjed—trid iġġib mijiet. Kemm m’huwiex raġonevoli! Dażgur, allura, Ġesù huwa identifikat bis-​sħiħ fil-​Bibbja. Għala, iżda, ħafna min-​nies taʼ Ġesù stess ċaħdu din l-​evidenza kollha li hu kien il-​Messija? Għaliex l-​evidenza, hi kemm hi importanti għall-​fidi ġenwina, ma tiggarantix fidi. B’sogħba, ħafna nies jemmnu dak li jridu jemmnu, saħansitra quddiem evidenza li tegħleb. Fil-​każ tal-​Messija, il-​biċċa l-​kbira tal-​Lhud kellhom ideat definiti ferm dwar dak li riedu. Riedu messija politiku, wieħed li kellu jtemm l-​oppressjoni Rumana u jirrestawra lil Iżrael għal glorja li tixbah b’mod materjalistiku lil dik taʼ żmien Salamun. Kif, allura, setgħu huma jaċċettaw lil dan l-​iben umli taʼ mastrudaxxa, dan in-​Nazzarenu li ma wera ebda interess fil-​politika jew fir-​rikkezzi? Kif, speċjalment, setaʼ hu jkun Messija wara li sofra u miet iddiżonorat fuq zokk tat-​tortura?

16. Is-​segwaċi taʼ Ġesù għala kellhom jirranġaw l-​istennijiet tagħhom stess inkwantu għall-​Messija?

¹⁶ Id dixxipli taʼ Ġesù stess kienu mħawdin bil-​mewt tiegħu. Wara l-​irxoxt glorjuż tiegħu, huma b’mod evidenti ttamaw li hu kellu ‘jirrestawra s-​saltna lil Iżrael’ mill-​ewwel. (Atti 1:6) Imma huma ma ċaħdux lil Ġesù bħala Messija sempliċement minħabba li din it-​tama persunali ma twettqitx. Huma eżerċitaw fidi fih ibbażata fuq l-​evidenza kbira li kellhom, u l-​fehma tagħhom kibret bil-​mod il-​mod; il-​misteri ċċaraw. Huma ġew li jaraw li l-​Messija ma setax iwettaq il-​profeziji kollha dwaru matul iż-​żmien qasir tiegħu bħala bniedem fuq din l-​art. Per eżempju, profezija waħda tkellmet dwar li hu wasal b’mod umli, riekeb fuq il-​felu taʼ ħmar, waqt li oħra tkellmet dwar li hu ġej fi glorja fuq is-​sħab! Kif setgħu t-​tnejn li huma jkunu veri? Ovvjament kellu jiġi t-​tieni darba.—Danjel 7:13; Żakkarija 9:9.

Għala l-​Messija Kellu Jmut

17. Il-​profezija taʼ Danjel kif għamlitha ċara li l-​Messija kellu jmut, u għal liema raġuni kellu jmut?

¹⁷ Iktar minn hekk, il-​profeziji Messjaniċi għamluha ċara li l-​Messija kellu jmut. Per eżempju, l-​istess profezija li bassret meta l-​Messija kellu jasal bassret fil-​vers li jmiss: “Wara t-​tnejn u sittin ġimgħa [li segwew lis-​sebaʼ ġimgħat] il-​Messija se jiġi mqaċċat.” (Danjel 9:26) Il-​kelma Ebrajka ka·rath’ użata hawnhekk għal “[i]mqaċċat” hija l-​istess kelma wżata għas-​sentenza tal-​mewt taħt il-​Liġi taʼ Mosè. Bla dubju l-​Messija kellu jmut. Għala? Vers 24 jagħtina t-​tweġiba: “Biex jispiċċa d-​dnub, u biex issir tpattija għall-​iżball, u biex tinġieb it-​tjieba għal żminijiet indefiniti.” II-Lhud kienu jafu sewwa li sagrifiċċju, mewt, biss setaʼ jpatti għall-​iżball.—Levitiku 17:11; qabbel Ebrej 9:22.

18. (a) Isaija kapitlu 53 kif juri li l-​Messija jrid isofri u jmut? (b) Din il-​profezija tqajjem liema paradoss apparenti?

¹⁸ Isaija kapitlu 53 jitkellem dwar il-​Messija bħala Qaddej speċjali taʼ Jehovah li kellu jsofri u jmut biex igħatti d-​dnubiet taʼ ħaddieħor. Vers 5 igħid: “Hu kien qiegħed jiġi minfud għan-​nuqqasijiet tagħna; kien qiegħed jiġi mfarrak għall-​iżballji tagħna.” Din l-​istess profezija, wara li tgħidilna li dan il-​Messija jrid imut bħala “offerta taʼ ħtija,” tirrivela li dan l-​istess Wieħed “se jtawwal jiemu, u f’idu dak li huwa l-​għaxqa taʼ Jehovah se jirnexxi.” (Vers 10) M’huwiex dak paradoss? Kif setaʼ l-​Messija jmut, u mbagħad ‘itawwal jiemu’? Kif setaʼ jiġi offrut bħala sagrifiċċju u wara jagħmel ‘dak li huwa l-​għaxqa taʼ Jehovah jirnexxi’? Kif, tabilħaqq, setaʼ jmut u jibqaʼ mejjet mingħajr ma jwettaq il-​profeziji l-​iktar importanti dwaru, jiġifieri li kellu jsaltan għal dejjem bħala Sultan u jġib paċi u hena lid-​dinja kollha?—Isaija 9:6, 7.

19. L-​irxoxt taʼ Ġesù kif jirrikonċilja l-​profeziji li jidhru li huma kontradittorji dwar il-​Messija?

¹⁹ Dan li donnu jidher li hu paradoss ġie solvut b’miraklu wieħed spettakulari. Ġesù ġie rxoxtat. Mijiet taʼ Lhud taʼ qalb onesta saru xhieda li raw b’għajnejhom din ir-​realtà glorjuża. (1 Korintin 15:6) L-​appostlu Pawlu iktar tard kiteb: “Dan ir-​raġel [Ġesù Kristu] offra sagrifiċċju wieħed għad-​dnubiet b’mod perpetwu u qagħad bil-​qiegħda fuq il-​leminija t’Alla, minn dak iż-​żmien ’il quddiem jistenna sakemm l-​għedewwa tiegħu jitqiegħdu bħala banketta għal saqajh.” (Ebrej 10:10, 12, 13) Iva, kien wara li Ġesù ġie rxoxtat għall-​ħajja fis-​sema, u wara perijodu taʼ ‘stennija,’ li kellu fl-​aħħarnett jiġi mqiegħed fuq it-​tron bħala Sultan u jaġixxi kontra l-​għedewwa taʼ Missieru, Jehovah. Fl-​irwol tiegħu bħala Sultan tas-​sema, Ġesù l-​Messija jmiss il-​ħajja taʼ kull persuna li qiegħda tgħix issa. B’liema mod? L-​artiklu tagħna li jmiss se jikkunsidra dan.

[Noti taʼ taħt]

Kif Twieġeb Int?

◻ Għala neżaminaw l-​evidenza inkwantu għal jekk Ġesù hux il-​Messija mwiegħed?

◻ L-​arblu tar-​razza ta Ġesù kif jappoġġja lill-​istat tiegħu bħala Messija?

◻ Profeziji fil-​Bibbja kif igħinu biex jagħtu prova li Ġesù kien il-​Messija?

◻ Jehovah b’liema modi kkonferma personalment l-​identità taʼ Ġesù bħala l-​Messija?

◻ Ħafna Lhud għala m’aċċettawx lil Ġesù bħala l-​Messija, u dawn ir-​raġunijiet għala kienu bla bażi soda?