Jehovah, Dak li Jagħmel Affarijiet tal-​Għaġeb

“Inti kbir u qiegħed tagħmel affarijiet tal-​għaġeb; inti Alla, inti waħdek”—SALM 86:10

1, 2. (a) L-​invenzjonijiet tal-​bniedem kif effettwaw lid-​dinja? (b) Fejn nistgħu nsibu tama taʼ affarijiet aħjar?

IL-​BNIEDEM modern jistaʼ jiftaħar li l-​invenzjonijiet tiegħu huma tal-​għaġeb—id-​dawl bajdani, it-​telekomunikazzjonijiet, il-​video, il-​karozza, l-​ivvjaġġar bl-​ajruplani tal-​jet, u t-​teknoloġija komputerizzata. Dawn dawru lid-​dinja f’komunità waħda. Imma x’komunità! Minflok il-​paċi, ir-​riżq, u l-​abbundanza għal kulħadd, l-​umanità hi kkastigata bi gwerer qattiela, bi kriminalità, bit-​terroriżmu, bit-​tinġis, bil-​mard u bil-​faqar. U l-​armi nukleari mxerrdin madwar id-​dinja, għalkemm imnaqqsin fin-​numru, xorta waħda jistgħu jeqirdu lill-​umanità għal diversi drabi. Iktar minn hekk, waqt li l-​politikanti jsiru iktar u iktar korrotti, is-​sinjuri jsiru iktar sinjuri, u l-​foqra iktar foqra. Jistaʼ xi ħadd isib soluzzjoni?

² Iva! Għax hemm Xi Ħadd li jiggarantixxi ħelsien, “wieħed li hu ogħla mill-​wieħed għoli”, Alla Jehovah. (Ekkleżjasti 5:8) Hu nebbaħ il-​kitba tas-​salmi, li jipprovdu ħafna faraġ u parir għaqli fi żminijiet taʼ hemm. David kiteb iktar minn 70 salm. Fosthom hemm Salm 86, li għandu l-​iskrizzjoni sempliċi taʼ fuq: “Talba taʼ David”. Hija talba li tistaʼ tagħmilha tiegħek.

Milqut imma Leali

3. F’dawn iż-​żminijiet, David jipprovdi liema eżempju nkuraġġanti għalina?

³ David kiteb dan is-​salm meta kien milqut. Aħna llum, li qegħdin ingħixu matul “l-​aħħar jiem” tas-​sistema taʼ Satana, dawn iż-​“żminijiet kritiċi li iebes biex issib tarfhom”, niffaċċjaw provi simili. (2 Timotew 3:1; ara wkoll Mattew 24:9-13.) Bħalna, David sofra anzjetajiet u dipressjoni minħabba l-​problemi li kienu qegħdin jeffettwawh. Imma hu qatt ma ħalla lil dawk il-​provi jdajfu l-​fiduċja leali tiegħu fil-​Ħallieq tiegħu. Hu għajjat: “mejjel, O Jehovah, widintek. Weġibni, għax jien milqut u fqir. O tassew għasses lil ruħi, għax jien leali. Salva lill-​qaddej tiegħek—inti Alla tiegħi—li qiegħed jafda fik”.—Salm 86:1, 2.

4. Kif għandna nuru l-​fiduċja tagħna?

⁴ Aħna nistgħu nkunu fiduċjużi, bħalma kien David, li “dak Alla tal-​faraġ kollu”, Jehovah, se jdawwar widintu lejn din l-​art u jismaʼ t-​talb umli tagħna. (2 Korintin 1:3, 4) Billi nafdaw b’għajnejna magħluqin f’Alla tagħna, nistgħu nsegwu l-​parir taʼ David: “Ixħet it-​tagħbija tiegħek fuq Jehovah innifsu, u hu nnifsu se jsostnik. Hu qatt ma se jħalli lit-​twajjeb jixxengel”.—Salm 55:22.

Intimità maʼ Jehovah

5. (a) Xi traduzzjonijiet bil-​għaqal kif irranġaw l-​iżballji taʼ skribi Lhud? (b) Salm 85 u 86 b’liema mod ikabbru lil Jehovah? (Ara nota taʼ taħt.)

⁵ F’​Salm 86, David juża l-​espressjoni “O Jehovah” 11-il darba. Kemm hi ferventi t-​talba taʼ David, u kemm hi mill-​qrib l-​intimità tiegħu maʼ Jehovah! Iktar tard, użu intimu bħal dan tal-​isem t’Alla sar taʼ togħma ħażina għal xi skribi Lhud, b’mod partikulari s-​Soferim. Huma rabbew biżaʼ superstizzjuż taʼ li jagħmlu użu ħażin mill-​isem. Billi ttraskuraw il-​fatt li l-​bniedem kien ġie maħluq fix-​xbiha t’Alla, huma għaġġlu biex jattribwixxu lil Alla attributi li l-​bnedmin għandhom ukoll. Mela f’7 mill-​11-il darba li l-​isem divin jinstab fit-​test Ebrajk taʼ dan is-​salm wieħed, huma poġġew it-​titlu ’Adho-nai’ (Mulej) flok l-​isem YHWH (Jehovah). Aħna nistgħu nkunu grati ferm li n-​New World Translation of the Holy Scriptures, kif ukoll għadd taʼ traduzzjonijiet oħra bir-​reqqa, irrestawraw l-​isem divin għall-​post xieraq tiegħu fil-​Kelma t’Alla. Bħala riżultat, ir-​relazzjoni tagħna maʼ Jehovah hija enfasizzata kif għandha tkun.a

6. B’liema modi nistgħu nuru li l-​isem taʼ Jehovah huwa prezzjuż għalina?

⁶ It-​talba taʼ David tkompli: “Urini favur, O Jehovah, għax lilek nibqaʼ nsejjaħ il-​jum kollu. Agħmel lil ruħ il-​qaddej tiegħek tifraħ, għax lejk, O Jehovah,jien ingħolli lill-​istess ruħi”. (Salm 86:3, 4) Innota li David baqaʼ jsejjaħ lil Jehovah “il-​jum kollu”. Tabilħaqq, hu spiss talab matul il-​lejl, bħal meta kien maħrub fix-​xagħri. (Salm 63:6, 7) Bl-​istess mod illum, xi Xhieda meta kienu mheddin bi stupru jew assalt kriminali ieħor għajtu lil Jehovah. Kultant huma ssorprendew ruħhom bir-​riżultat hieni.b L-​isem taʼ Jehovah huwa prezzjuż għalina, saħansitra bħalma kien għal “Ġesù Kristu, bin David” meta kien fuq l-​art. Ġesù għallem lid-​dixxipli tiegħu biex jitolbu għat-​taqdis tal-​isem taʼ Jehovah u għarrafhom x’jirrappreżenta dak l-​isem.—Mattew 1:1; 6:9; Ġwann 17:6, 25, 26.

7. Liema eżempji għandna taʼ li Jehovah jerfaʼ ’l fuq lill-​istess ruħ tal-​qaddejja tiegħu, u kif għandna nwieġbu?

⁷ David għolla lil ruħu, lilu nnifsu kollu kemm hu, lejn Jehovah. Hu jinkuraġġina biex nagħmlu l-​istess ħaġa, billi qal f’Salm 37:5: “Gerbeb fuq Jehovah il-​mogħdija tiegħek, u oqgħod fuqu, u hu nnifsu se jaġixxi”. B’hekk it-​talba tagħna lil Jehovah biex hu jagħmel lil ruħna tifraħ se tiġi mwieġba. Ħafna qaddejja taʼ Jehovah li jżommu l-​integrità jkomplu jsibu ferħ kbir fis-​servizz tiegħu—minkejja tbatijiet, persekuzzjonijiet, u mard. Ħutna f’inħawi mfarrkin bil-​gwerra fl-​Afrika, bħalma huma l-​Angola, il-​Liberja, il-​Mozambique, u ż-​Zaire, komplew ipoġġu s-​servizz taʼ Jehovah l-​ewwel fil-​ħajjiet tagħhom.c Hu verament ġagħalhom jifirħu bi ħsad spiritwali kotran. Bħalma ssaportew huma, hekk irridu nagħmlu aħna. (Rumani 5:3-5) U hekk kif nissaportu, niġu assigurati: “Il-​viżjoni hi għad għal żmien maħtur, u tibqaʼ tilheġ lejn it-​tmiem. . . Mhix se tkun tard”. (Ħabakkuk 2:3) B’fiduċja sħiħa f’Jehovah, jalla aħna wkoll inkomplu ‘nilhġu lejn it-​tmiem’.

It-​Tjubija taʼ Jehovah

8. Liema intimità jistaʼ jkollna maʼ Jehovah, u kif wera hu t-​tjubija tiegħu?

⁸ David jagħmel iktar talb imqanqal: “Int, O Jehovah, tajjeb u lest li taħfer; u l-​qalb tajba bl-​imħabba lejn dawk kollha li qegħdin isejħulek hi abbundanti. Tassew agħti widen, O Jehovah, lit-​talba tiegħi; u tassew oqgħod attent għal-​leħen tat-​tħannin tiegħi. Fil-​jum tal-​hemm tiegħi jien se nsejjaħ lilek, għax int se tweġibni”. (Salm 86:​5-7) “O Jehovah”​—darba wara l-​oħra aħna niġu mqanqlin mill-​intimità taʼ din l-​espressjoni! Hija intimità li tistaʼ tiġi kkultivata l-​ħin kollu permezz tat-​talb. David talab f’okkażjoni oħra: “Id-​dnubiet taʼ żgħożiti u l-​irvellijiet tiegħi O tiftakarhomx. Skond il-​qalb tajba bl-​imħabba tiegħek ftakarni int innifsek, minħabba fit-​tjubija tiegħek, O Jehovah”. (Salm 25:7) Jehovah huwa l-​istess personifikazzjoni tat-​tjubija ​—f’li jipprovdi r-​rahan taʼ Ġesù, f’li juri ħniena lil midinbin li jindmu, u f’li jixħet qalb tajba bl-​imħabba fuq ix-​Xhieda leali tiegħu li japprezzaw.​—Salm 100:​3-5; Malakija 3:10.

9. Midinbin li jindmu liema assigurazzjoni għandhom jikkunsidraw bis-​serjetà?

⁹ Għandna aħna nitnikktu minħabba żballji tal-​passat? Jekk qegħdin issa nagħmlu passaġġi dritti għal saqajna, niġu nkuraġġiti meta niftakru l-​assigurazzjoni tal-​appostlu Pietru lil dawk li jindmu li “staġuni taʼ serħan” se jiġu mingħand Jehovah. (Atti 3:19) Ejjew nibqgħu qrib lejn Jehovah fit-​talb permezz tal-​Feddej tagħna, Ġesù, li b’imħabba qal: “Ejjew għandi, intom ilkoll li qegħdin taħdmu iebes u mgħobbijin wisq, u jien se nserraħkom. Ħudu l-​madmad tiegħi fuqkom u tgħallmu minni, għax jien kalm u umli fil-​qalb, u intom se ssibu serħan għal erwieħkom”. Hekk kif Xhieda leali jitolbu lil Jehovah illum fl-​isem prezzjuż taʼ Ġesù, huma tabilħaqq isibu serħan.​—Mattew 11:​28, 29; Ġwann 15:16.

10. Il-​ktieb taʼ Salmi jagħti liema prominenza lill-​qalb tajba bl-​imħabba taʼ Jehovah?

¹⁰ Il-​ktieb taʼ Salmi jirreferi għall-​“qalb tajba bl-​imħabba” taʼ Jehovah iktar minn mitt darba. Qalb tajba bl-​imħabba bħal din żgur li hi abbundanti! Fl-​ewwel erbaʼ versi tiegħu, Salm 118 jappella lill-​qaddejja t’Alla biex jiżżu ħajr lil Jehovah, billi jirrepetu erbaʼ darbiet, “għax il-​qalb tajba bl-​imħabba tiegħu hi għal żmien indefinit”. Salm 136 jenfasizza l-​kwalità apprezzata tal-​“qalb tajba bl-​imħabba tiegħu” 26 darba. Niżżballjaw kif niżżballjaw​—u bħalma jgħid Ġakbu 3:​2, “aħna lkoll nieħdu gambetta ħafna drabi”​—jalla nkunu lesti li nfittxu l-​maħfra taʼ Jehovah, fiduċjużi fil-​ħniena u l-​qalb tajba bl-​imħabba tiegħu. Il-​qalb tajba bl-​imħabba tiegħu hija espressjoni tal-​imħabba leali tiegħu lejna. Jekk aħna lealment inkomplu nagħmlu r-​rieda t’Alla, hu se juri l-​imħabba leali tiegħu f’li jsaħħaħna biex inlaħħqu maʼ kull prova.​—1 Korintin 10:13.

11. Azzjoni mill-​anzjani kif tistaʼ tgħin biex jitneħħew sentimenti taʼ ħtija?

¹¹ Jistaʼ jkun hemm drabi meta niġu mogħtijin gambetta minn oħrajn. Abbuż emozzjonali jew fiżiku waqt it-​tfulija ħalla lil xi wħud b’sentimenti taʼ ħtija jew taʼ li ma jiswew għalxejn. Vittma bħal dan jistaʼ jsejjaħ lil Jehovah, fiduċjuż li hu se jwieġeb. (Salm 55:​16, 17) Anzjan b’qalb tajba jistaʼ jieħu interess f’li jgħin lil wieħed bħal dan biex jaċċetta l-​fatt li ma kinetx il-​ħtija tal-​vittma. Wara da, telefonata kordjali minn żmien għal żmien mill-​anzjan tistaʼ tgħin lil dak il-​wieħed sakemm hu (jew hi) jkollu l-​ħila sa fl-​aħħar ‘iġorr it-​tagħbija’​—Galatin 6:​2, 5.

12. Il-​hemmijiet kif immoltiplikaw, imma kif nistgħu aħna nlaħħqu magħhom b’suċċess?

¹² Hemm ħafna cirkostanzi oħrajn taʼ hemm li n-​nies taʼ Jehovah iridu jitqabdu magħhom illum. Billi bdew bl-​Ewwel Gwerra Dinjija fl-​1914, gwajiet kbar bdew jolqtu lil din l-​art. Bħalma ġie mbassar minn Ġesù, dawn kienu “bidu taʼ weġgħat taʼ hemm”. Il-​hemmijiet immoltiplikaw hekk kif imxejna ’l quddiem iktar fil-​fond fil-​“konklużjoni tas-​sistema taʼ affarijiet”. (Mattew 24:​3, 8) Il-​“perijodu qasir taʼ żmien” tax-​Xitan qiegħed jiqsar lejn it-​tmiem taʼ quċċata tiegħu. (Rivelazzjoni 12:12) “Bħal iljun igħajjat” ifittex il-​priża, dak l-​Avversarju l-​kbir qiegħed juża kull qerq disponibbli biex jifridna mill-​merħla t’Alla u jeqridna. (1 Pietru 5:8) Imma mhux se jirnexxilu! Għax, bħal David, aħna nankraw il-​fiduċja tagħna kompletament f’dak Alla wieħed tagħna, Jehovah.

13. Ġenituri u t-​tfal tagħhom kif jistgħu jagħmlu użu tajjeb mit-​tjubija taʼ Jehovah?

¹³ Bla dubju, David naqqax f’qalb ibnu Salamun il-​ħtieġa li jistrieħ fuq it-​tjubija taʼ Jehovah. B’hekk, Salamun setaʼ jistruwixxi lil ibnu stess: “Afda f’Jehovah b’qalbek kollha u tistrieħx fuq il-​fehma tiegħek stess. Fil-​mogħdijiet kollha tiegħek agħti kas tiegħu, u hu nnifsu se jiddritta l-​passaġġi tiegħek. Issirx għaref f’għajnejk stess. Ibżaʼ minn Jehovah u dur lil hinn mill-​ħażen.” (Proverbji 3:​5-7) Il-​ġenituri llum għandhom bl-​istess mod igħallmu liċ-​ċkejknin tagħhom kif jitolbu b’fiduċja lil Jehovah u kif ilaħħqu mal-​assalti taʼ dinja bla qalb​—bħall-​pressjoni biex jagħmlu bħat-​tfal taʼ mparhom fl-​iskola u t-​tentazzjonijiet biex jikkommettu l-​immoralità. Li tipprattika prinċipji tal-​Bibbja maʼ wliedek kuljum jistaʼ jimpressjona fuq il-​qlub żgħażagħ tagħhom imħabba vera lejn Jehovah u dipendenza bit-​talb fuqu.​—Dewteronomju 6:​4-9; 11:​18, 19.

Ix-​Xogħlijiet taʼ Jehovah li Xejn ma Jistaʼ Jitqabbel Magħhom

14, 15. X’inhuma xi ftit mix-​xogħlijiet taʼ Jehovah li xejn ma jistaʼ jitqabbel magħhom?

¹⁴ B’konvinzjoni profonda David igħid: “M’hemm ħadd bħalek fost l-​allat, O Jehovah, lanqas ma hemm xi xogħlijiet bħal tiegħek.” (Salm 86:8) Ix-​xogħlijiet taʼ Jehovah huma akbar, iktar grandjużi, iktar maestużi, milli kwalunkwe bniedem jistaʼ saħansitra jimmaġina. Bħalma rat ix-​xjenza moderna, l-​univers maħluq​—l-​immensità tiegħu, l-​armonija tiegħu, il-​ġmiel tiegħu​—ta prova li hu bil-​wisq iktar stupend minn dak kollu li David kien jaf bih. Madankollu, saħansitra hu kien imqanqal biex igħid: “Is-​smewwiet qegħdin jiddikjaraw il-​glorja t’Alla; u dwar ix-​xogħol taʼ jdejh il-​firxa qiegħda tgħid.”​—Salm 19:1.

¹⁵ Ix-​xogħlijiet taʼ Jehovah jidhru b’mod tal-​għaġeb, ukoll, fil-​mod kif hu ppożizzjona u ħejja l-​art biex tipprovdi l-​lejl u n-​nhar, l-​istaġuni, żmien iż-​żrigħ u l-​ħsad, u kotra taʼ affarijiet tal-​għaxqa għat-​tgawdija futura tal-​bniedem.U aħna nfusna kemm aħna magħmulin u mgħammrin b’mod tal-​għaġeb, biex b’hekk nistgħu ngawdu x-​xogħlijiet taʼ Jehovah li hawn madwarna!​—Ġenesi 2:​7-9; 8:22; Salm 139:14.

16. Liema hi l-​akbar espressjoni tat-​tjubija taʼ Jehovah, u din wasslet għal liema xogħlijiet oħrajn li xejn ma jistaʼ jitqabbel magħhom?

¹⁶ Wara li l-​ewwel ġenituri tagħna kienu m’obdewx lil Alla, u b’hekk taw bidu għall-​hemmijiet li jikkastigaw lill-​umanità sal-​lum, Jehovah mill-​imħabba tiegħu nkariga lil Ibnu, li sar il-​“bniedem Ġesù Kristu,” biex jifdi lill-​umanità fuq l-​art u mbagħad biex isaltan mis-​sema bħala Sultan twajjeb. Minn fost il-​bnedmin leali Alla saħansitra għażel “ħolqien ġdid” li se jaħkem maʼ Kristu bħala “sema ġdid” benevolenti fuq soċjetà taʼ “art ġdida” li se tinkludi biljuni taʼ bnedmin irxoxtati. (Rumani 5:15; 2 Korintin 5:17; Rivelazzjoni 21:​1, 5-7; 1 Korintin 15:​22-26) Ix-​xogħlijiet taʼ Jehovah b’hekk se jimxu ’l quddiem lejn quċċata glorjuża! Verament, aħna nistgħu nesklamaw: “O Jehovah,. . . Kemm hi abbundanti t-​tjubija tiegħek, li int żammejtha bħal teżor għal dawk li qegħdin jibżgħu minnek!”​—Salm 31:​17-19.

17. Inkwantu għax-​xogħlijiet taʼ Jehovah, Salm 86:9 kif qed jiġi mwettaq issa?

¹⁷ Ix-​xogħlijiet taʼ Jehovah li qegħdin isiru llum jinkludu dak li David jiddeskrivi f’​Salm 86:9: “Il-​ġnus kollha li lilhom int għamilt se jiġu huma nfushom, u se jmilu quddiemek, O Jehovah, u se jagħtu glorja lil ismek.” Wara li sejjaħ minn fost l-​umanità lil dawk li baqaʼ mill-​ħolqien ġdid tiegħu, il-​“merħla ċkejkna” taʼ werrieta tas-​Saltna, Jehovah issokta jiġbor minn fost il-​“ġnus kollha” “folla kbira” taʼ “ngħaġ oħra”, miljuni li wkoll jeżerċitaw fidi fid-​demm imxerred taʼ Ġesù. Lil dawn hu bniehom f’organizzazzjoni dinamika, l-​unika soċjetà globali taʼ dawk li jħobbu l-​paċi fuq l-​art illum. Billi josservaw dan, il-​qtajja tas-​sema jinxteħtu quddiem Jehovah, billi jiddikjaraw: ‘Il-​barka u l-​glorja u l-​għerf u r-​radd il-​ħajr u l-​unur u l-​qawwa u s-​saħħa jkunu għal dejjem taʼ dejjem.’ Il-​folla kbira wkoll tigglorifika lill-​isem taʼ Jehovah, billi taqdih “lejl u nhar”, bit-​tama li tibqaʼ ħajja wara t-​tmiem taʼ din id-​dinja u tgħix għal dejjem fuq art magħmula ġenna.​—Luqa 12:32; Rivelazzjoni 7:​9-17; Ġwann 10:16.

Il-​Kobor taʼ Jehovah

18. Jehovah kif wera li hu ‘Alla waħdu’?

¹⁸ David wara da jiġbed l-​attenzjoni lejn l-​istat taʼ Jehovah bħala Alla, billi jgħid: “Inti kbir u qiegħed tagħmel affarijiet tal-​għaġeb; inti Alla, inti waħdek.” (Salm 86:10) Mill-​qedem, Jehovah kien qiegħed juri li huwa, tabilħaqq, ‘Alla waħdu’. Kien it-​tirann Farawni tal-​Eġittu li sfida b’arroganza lil Mosè: “Min hu Jehovah, biex għandi nobdi lil leħnu u nibgħat lil Iżrael lil hinn? Jien lanqas xejn ma nafu lil Jehovah.” Imma malajr sar jaf kemm hu kbir Jehovah! Alla li Jistaʼ kollox umilja lill-​allat u lill-​qassisin li jipprattikaw is-​seħer tal-​Eġittu billi bagħat kastigi katastrofiċi, billi ħanxar lill-​ulied subien imweldin l-​ewwel tal-​Eġittu, u billi qered għalkollox lil Farawni u lill-​armata magħżula tiegħu fil-​Baħar l-​Aħmar.Verament, m’hemm ebda wieħed bħal Jehovah fost l-​allat!​—Eżodu 5:2; 15:​11, 12.

19, 20. (a) Il-​għanja taʼ Rivelazzjoni 15:​3, 4 meta se jkollha l-​akbar espressjoni tagħha? (b) Kif nistgħu aħna saħansitra issa nieħdu sehem fix-​xogħol taʼ Jehovah?

¹⁹ Bħala Alla waħdu, Jehovah issokta jagħmel affarijiet tal-​għaġeb fi tħejjija biex jeħles lill-​adoraturi ubbidjenti tiegħu mill-​Eġittu tal-​lum​—id-​dinja taʼ Satana. Hu ġiegħel li l-​ġudizzji divini tiegħu jiġu pproklamati fl-​art kollha bħala xhieda permezz tal-​kampanja taʼ ppridkar l-​iktar estensiva fl-​istorja kollha, u b’hekk wettaq il-​profezija taʼ Ġesù f’​Mattew 24:14. Fi żmien qasir, “[i]t-tmiem” irid jiġi, meta Jehovah se juri l-​kobor tiegħu fuq skala li qatt ma kien hemm hawn bħalha qabel billi ma jħalli ebda traċċa taʼ ħażen fuq l-​art. (Salm 145:20) Imbagħad il-​għanja taʼ Mosè u l-​għanja tal-​Ħaruf se jilħqu l-​ogħla grad: “Kbar u tal-​għaġeb huma ix-​xogħlijiet tiegħek, Alla Jehovah, li Tistaʼ Kollox. Ta tjieba u veri huma mogħdijietek, Sultan tal-​eternità. Min mhux tassew se jibżaʼ minnek, Jehovah, u jigglorifika lil ismek, għaliex int waħdek inti leali?”​—Rivelazzjoni 15:​3, 4.

²⁰ Jalla aħna min-​naħa tagħna nkunu żelużi f’li nitkellmu maʼ oħrajn dwar dawn il-​għanijiet tal-​għaġeb t’Alla. (Qabbel Atti 2:11.) Jehovah se jkompli jagħmel affarijiet kbar u tal-​għaġeb fi żmienna u fil-​futur, kif l-​artiklu li jmiss tagħna se jiddeskrivi.

[Noti taʼ taħt]

Tiftakar

◻ It-​talba taʼ Salm 86 għala għandna nagħmluha t-​talba persunali tagħna?

◻ Kif nistgħu nsibu l-​intimità maʼ Jehovah?

◻ Jehovah kif jesprimi t-​tjubija tiegħu lejna?

◻ X’inhuma xi ftit mix-​xogħlijiet taʼ Jehovah li xejn ma jistaʼ jitqabbel magħhom?

◻ Jehovah kif inhu ‘Alla waħdu’ f’dak li hu kobor?

[Stampa f’paġna 8]

Fl-​“art ġdida” li ġejja, ix-​xogħlijiet tal-​għaġeb taʼ Jehovah se jixhdu favur il-​glorja u t-​tjubija tiegħu