Jehovah—L-​Akbar Eżempju taʼ Tjubija

“Faħħru lill-​Mulej taʼ l-​eżerċti, għax tajjeb il-​Mulej.”—ĠEREMIJA 33:11.

1. Għala għandna nitqanqlu biex infaħħru lil Alla għat-​tjubija tiegħu?

ALLA JEHOVAH huwa tajjeb f’sens assolut. “Kemm hi kbira [“t-​tjubija,” NW] tiegħu!” esklama l-​profeta Żakkarija. (Żakkarija 9:​17, Karm Żammit) Tabilħaqq, it-​tjubija hija riflessa f’kulma għamel Alla biex jipprepara l-​art għat-​tgawdija tagħna. (Ġenesi 1:31) Qatt ma nistgħu nifhmu l-​liġijiet komplikati kollha li Alla uża meta ħalaq l-​univers. (Koħèlet 3:11; 8:17) Imma l-​ftit li nafu jqanqalna biex infaħħru lil Alla għat-​tjubija tiegħu.

2. X’inhi t-​tjubija?

² X’inhi t-​tjubija? Hija eċċellenza morali, jew virtù. madankollu, m’hijiex biss in-​nuqqas taʼ kull ħażen. It-​tjubija, waħda mill-​frott taʼ l-​ispirtu, hija kwalità pożittiva. (Galatin 5:22, 23, Saydon) Aħna nuru t-​tjubija meta nagħmlu għemejjel tajbin u li huma taʼ benefiċċju għal oħrajn. F’din is-​sistema t’affarijiet, dak li hu meqjus bħala tajjeb għal xi wħud jistaʼ jitqies bħala ħażin għal oħrajn. Madankollu, jekk irridu ngawdu l-​paċi u l-​hena, għandu jkun hemm biss livell wieħed taʼ tjubija. Min għandu d-​dritt jistabbilixxi dan il-​livell?

3. X’juri Ġenesi 2:​16, 17 dwar il-​livell tat-​tjubija?

³ Alla huwa dak li jistabbilixxi l-​livell tat-​tjubija. Fil-​bidu taʼ l-​istorja tal-​bniedem, kien Jehovah li kkmanda lill-​ewwel bniedem: “Mis-​siġar kollha tal-​ġnien tistaʼ tiekol, imma mis-​siġra taʼ tagħrif it-​tajjeb u l-​ħażin, la tikolx minnha, għax dak in-​nhar li tiekol minnha żgur li tmut.” (Ġenesi 2:​16, 17) Iva, il-​bnedmin għandhom jirrikorru għand il-​Ħallieq tagħhom biex ikunu jafu x’inhu tajjeb u x’inhu ħażin.

Turija Mhix Mistħoqqa taʼ Tjubija

4. Alla x’għamel għall-​umanità mindu dineb Adam?

⁴ Il-​prospett tal-​bniedem li jgħix fil-​perfezzjoni għall-​eternità kien mhedded meta Adam dineb u rrifjuta li jirrikonoxxi d-​dritt t’Alla li jistabbilixxi l-​livelli tat-​tjubija. (Ġenesi 3:​1-6) Madankollu, qabel ma Adam tweldulu t-​tfal li wirtu d-​dnub u l-​mewt, Alla bassar li kellu jiġi Nisel perfett. Filwaqt li indirizza lis-​“Serp tal-​qedem,” Satana x-​Xitan, Jehovah iddikjara: “Inqajjem mibegħda bejnek u bejn il-​mara, bejn nislek u nisilha, u hu jisħaqlek rasek u int tisħaqlu għarqubu.” (Apokalissi 12:9; Ġenesi 3:15) L-​iskop taʼ Jehovah kien li jifdi l-​umanità midinba. F’turija taʼ tjubija mhix mistħoqqa, Jehovah għamel tabilħaqq arranġament biex dawk li juru fidi b’mod attiv fis-​sagrifiċċju taʼ fidwa li offra Ibnu l-​għażiż ikunu jistgħu jsalvaw.—Mattew 20:28; Rumani 5:​8, 12.

5. Għalkemm qalbna hi miġbuda lejn il-​ħażen, għala nistgħu nuru xi ftit tat-​tjubija?

⁵ M’għandniex xi ngħidu, minħabba d-​dnub taʼ Adam, aħna writna qalb miġbuda lejn il-​ħażen. (Ġenesi 8:21) B’ferħ, iżda, Jehovah jgħinna nuru xi ftit tat-​tjubija. Il-​fatt li nkomplu nagħmlu dak li tgħallimna mill-​kitbiet imqaddsa u prezzjużi tiegħu mhux biss se ‘jagħtina l-​għerf li jwassal għas-​salvazzjoni’ u ‘jħejjina għal kull ħidma tajba’ imma wkoll jgħinna nagħmlu dak li hu tajjeb f’għajnejh. (2 Timotju 3:​14-17) Iżda, sabiex nibbenefikaw mit-​tagħlim Skritturali u nuru t-​tjubija, irid ikollna l-​attitudni tas-​salmista li kanta: “Twajjeb int [Jehovah], u l-​ġid tagħmel; għallimni l-​kmandamenti tiegħek.”—Salm 119:68.

It-​Tjubija taʼ Jehovah Glorifikata

6. Wara li s-​Sultan David ġiegħel li tinġieb l-​arka tal-​patt f’Ġerusalemm, il-​Leviti kantaw għanja li kien fiha liema espressjoni?

⁶ Is-​Sultan David taʼ Iżrael tal-​qedem għaraf it-​tjubija t’Alla u fittex il-​gwida Tiegħu. “Tajjeb u sewwa l-​Mulej,” qal David. “Għalhekk juri triqtu lill-​ħatja.” (Salm 25:8) L-​istruzzjoni divina li ngħatat lill-​Iżraelin kienet tinkludi għaxar liġijiet importanti—l-​Għaxar Kmandamenti—miktubin fuq żewġ twavel tal-​ġebel u miżmumin f’kaxxa sagra msejħa l-​arka tal-​patt. Wara li David ġiegħel li l-​Arka tinġieb f’Ġerusalemm, il-​belt kapitali taʼ Iżrael, il-​Leviti kantaw għanja li kien fiha din l-​espressjoni: “Roddu ħajr lill-​Mulej, għax hu tajjeb, għax għal dejjem [“il-​qalb tajba bl-​imħabba,” NW] tiegħu.” (1 Kronaki 16:​34, 37-41) Min jaf kemm kien pjaċevoli li tismaʼ dan il-​kliem ħiereġ minn fomm il-​kantanti Leviti!

7. X’ġara wara li l-​Arka tpoġġiet fil-​post l-​Iktar Qaddis u Salamun għamel it-​talba tad-​dedikazzjoni?

⁷ L-​istess kliem taʼ tifħir kien enfasizzat matul id-​dedikazzjoni tat-​tempju taʼ Jehovah li nbena minn Salamun, bin David. Wara li l-​arka tal-​patt tpoġġiet fil-​post l-​Iktar Qaddis tat-​tempju li kien għadu kemm inbena, il-​Leviti bdew ifaħħru lil Jehovah, “għax hu tajjeb, għax għal dejjem [“il-​qalb tajba bl-​imħabba,” NW] tiegħu.” F’dik l-​okkażjoni, it-​tempju mtela mirakolożament bi sħaba li ssimbolizzat il-​preżenza glorjuża taʼ Jehovah. (2 Kronaki 5:​13, 14) Wara t-​talba taʼ dedikazzjoni li għamel Salamun, “niżel nar mis-​sema u kkonsma s-​sagrifiċċju tal-​ħruq u l-​vittmi.” Meta raw dan, “ulied Iżrael . . . inxteħtu lkoll wiċċhom għall-​qiegħa taʼ l-​art, qiemu u faħħru lill-​Mulej: ‘Għax hu tajjeb u għal dejjem [“il-​qalb tajba bl-​imħabba,” NW] tiegħu.’” (2 Kronaki 7:​1-3) Wara festa li damet sejra 14-il ġurnata, l-​Iżraelin marru lura lejn djarhom “kollhom ferħana u qalbhom hienja għall-​ġid kollu li kien għamel il-​Mulej maʼ David u maʼ Salamun u maʼ Iżrael, il-​poplu tiegħu.”—2 Kronaki 7:10.

8, 9. (a) Għalkemm l-​Iżraelin faħħru lil Jehovah għat-​tjubija tiegħu, liema triq qabdu maż-​żmien? (b) X’kien imbassar dwar Ġerusalemm permezz taʼ Ġeremija, u kif twettqet dik il-​profezija?

⁸ B’sogħba, l-​Iżraelin ma komplewx jgħixu fi qbil maʼ l-​għanjiet taʼ tifħir tagħhom lil Alla. Maż-​żmien, in-​nies taʼ Ġuda gglorifikaw lil Jehovah b’xofftejhom biss. (Isaija 29:13) Minflok ma għexu fi qbil mal-​livelli taʼ tjubija t’Alla, huma bdew jagħmlu dak li hu ħażin. U fiex kien jikkonsisti l-​ħażen tagħhom? Huma saru ħatja taʼ idolatrija, immoralità, moħqrija lejn il-​fqar, u dnubiet gravi oħra! B’riżultat taʼ dan, fis-​sena 607 Q.E.K., Ġerusalemm inqerdet u l-​abitanti taʼ Ġuda ttieħdu fil-​jasar f’Babilonja.

⁹ B’dan il-​mod Alla ddixxiplina l-​poplu tiegħu. Minkejja dan, permezz tal-​profeta tiegħu Ġeremija, hu bassar li f’Ġerusalemm kellu jerġaʼ jinstemaʼ l-​leħen taʼ dawk li jgħidu: “Faħħru lill-​Mulej taʼ l-​eżerċti, għax tajjeb il-​Mulej, u [“l-​qalb tajba bl-​imħabba,” NW] tiegħu għal dejjem.” (Ġeremija 33:​10, 11) U hekk ġara tabilħaqq. Wara li l-​art kienet ilha 70 sena ħerba, fis-​sena 537 Q.E.K., kien hemm fdal Lhudi li reġaʼ lura lejn Ġerusalemm. (Ġeremija 25:11; Danjel 9:​1, 2) Huma reġgħu bnew artal fil-​lok fejn kien hemm it-​tempju fuq l-​għolja taʼ Morija u hemmhekk bdew joffru s-​sagrifiċċji. Il-​pedament tat-​tempju tqiegħed wara li kienu ilhom sentejn li ġew lura. Xi żmien eċċitanti! Esdra qal: “Meta l-​bennejja qiegħdu s-​sisien tat-​tempju tal-​Mulej, il-​qassisin, libsin l-​ilbies sagru, resqu bit-​trombi, u l-​Leviti, ulied Asaf, resqu biċ-​ċimbali, biex ifaħħru lill-​Mulej skond l-​ordnijiet taʼ David, sultan taʼ Iżrael. U kantaw għanjiet taʼ tifħir u taʼ radd il-​ħajr lill-​Mulej ‘għax hu tajjeb, għax għal dejjem [“il-​qalb tajba bl-​imħabba,” NW] tiegħu’ għal Iżrael.”—Esdra 3:​1-11.

10. B’liema kliem sinifikanti jibda u jispiċċa Salm 118?

¹⁰ Espressjoni simili taʼ tifħir dwar it-​tjubija taʼ Jehovah tidher f’għadd taʼ salmi. Fosthom insibu Salm 118, li l-​familji Iżraelin kienu jkantawh biex jagħlqu bih iċ-​ċelebrazzjoni tal-​Qbiż. Dak is-​salm jibda u jispiċċa bil-​kliem: “Faħħru lill-​Mulej, għaliex hu tajjeb, għax għal dejjem [“il-​qalb tajba bl-​imħabba,” NW] tiegħu!” (Salm 118:​1, 29) X’aktarx li dan kien l-​aħħar kliem taʼ tifħir li Ġesù Kristu kanta maʼ l-​appostli leali tiegħu fil-​lejl qabel ma miet fis-​sena 33 E.K.—Mattew 26:30.

“Ħallini, Nitolbok, Nara l-​Glorja Tiegħek”

11, 12. Liema dikjarazzjoni semaʼ Mosè meta ngħata ħjiel dwar il-​glorja t’Alla?

¹¹ L-​ewwel darba li saret konnessjoni bejn it-​tjubija taʼ Jehovah u l-​qalb tajba bl-​imħabba tiegħu kien sekli sħaħ qabel Esdra. Dan ġara ftit taż-​żmien wara li l-​Iżraelin kienu qiemu l-​għoġol tad-​deheb fid-​deżert u dawk li għamlu l-​ħażen inqatlu. Mosè talab bil-​ħrara lil Jehovah: “Ħallini, nitolbok, nara l-​glorja tiegħek.” Billi għaraf li Mosè ma setax jara wiċċ Alla u jibqaʼ ħaj, Jehovah qal: “Jiena ngħaddi tjubiti kollha minn quddiemek.”—Eżodu 33:​13-20.

¹² It-​tjubija taʼ Jehovah għaddiet minn quddiem Mosè l-​għada fuq il-​Muntanja Sinaj. Dak il-​ħin Mosè ngħata ħjiel tal-​glorja t’Alla u semaʼ din id-​dikjarazzjoni: “Jaħweh! Jaħweh! Alla li jagħder u jħenn [“mimli ħniena u grazzjuż,” NW]; tqil biex jagħdab u kbir [“fil-​qalb tajba bl-​imħabba u l-​verità,” NW]. Iħares [“il-​qalb tajba bl-​imħabba,” NW] għal elf ġenerazzjoni u jaħfer il-​ħażen, id-​dnub u l-​ħtija; imma ma jħalli xejn għaddej; jikkastiga l-​ħażen tal-​missirijiet f’uliedhom u f’ulied uliedhom sat-​tielet u r-​rabaʼ ġenerazzjoni.” (Eżodu 34:​6, 7) Dan il-​kliem jindika li t-​tjubija taʼ Jehovah hi marbuta mal-​qalb tajba bl-​imħabba u aspetti oħra tal-​personalità tiegħu. Li nikkunsidraw dawn l-​aspetti se jgħinna nuru t-​tjubija. L-​ewwel, ejja nikkunsidraw il-​kwalità li hi msemmija darbtejn f’din id-​dikjarazzjoni meraviljuża dwar it-​tjubija t’Alla.

Alla Abbundanti fil-​Qalb Tajba bl-​Imħabba

13. Fid-​dikjarazzjoni dwar it-​tjubija t’Alla, liema kwalità hija msemmija darbtejn, u dan għala huwa xieraq?

¹³ ‘Jehovah hu Alla kbir fil-​qalb tajba bl-​imħabba, . . . iħares il-​qalb tajba bl-​imħabba għal elf ġenerazzjoni.’ Il-​kelma Ebrajka tradotta “qalb tajba bl-​imħabba” tfisser ukoll “imħabba leali.” Din hija l-​unika kwalità li hi mniżżla darbtejn fid-​dikjarazzjoni li Alla għamel lil Mosè. Kemm hu xieraq dan, ladarba l-​imħabba hija l-​kwalità li tispikka taʼ Jehovah! (1 Ġwann 4:8) L-​espressjoni magħrufa sew taʼ tifħir lil Jehovah “għax hu tajjeb u għal dejjem [“il-​qalb tajba bl-​imħabba,” NW] tiegħu” tenfasizza din il-​kwalità.

14. Min se jgawdi b’mod speċjali t-​tjubija t’Alla u l-​qalb tajba bl-​imħabba tiegħu?

¹⁴ Wieħed mill-​modi kif Jehovah juri t-​tjubija tiegħu huwa permezz taʼ l-​abbundanza tal-​qalb tajba bl-​imħabba tiegħu. Dan jidher speċjalment fil-​mod teneru li bih jieħu ħsieb il-​qaddejja dedikati u leali tiegħu. (1 Pietru 5:​6, 7) Bħalma jistgħu jixhdu x-​Xhieda taʼ Jehovah, hu qed jippreserva l-​qalb tajba bl-​imħabba għal dawk li jħobbuh u jaqduh. (Eżodu 20:6) Il-​ġens taʼ Iżrael naturali ma baqax jesperjenza il-​qalb tajba bl-​imħabba taʼ Jehovah, jew l-​imħabba leali, għaliex dan il-​ġens ċaħad lil Ibnu. Imma t-​tjubija t’Alla u l-​imħabba leali tiegħu lejn il-​Kristjani leali minn kull nazzjon se tibqaʼ għal dejjem.—Ġwann 3:36.

Jehovah​—Ħanin u Grazzjuż

15. (a) B’liema kliem bdiet id-​dikjarazzjoni li semaʼ Mosè fuq il-​Muntanja Sinaj? (b) Il-​ħniena x’’tinvolvi?

¹⁵ Id-​dikjarazzjoni li Mosè semaʼ fuq il-​Muntanja Sinaj bdiet b’din l-​espressjoni: “Jaħweh! Jaħweh! Alla li jagħder u jħenn [“mimli ħniena u grazzjuż,” “NW”].” Il-​kelma Ebrajka tradotta “ħniena” tistaʼ tirreferi għall-​“imsaren” u hija marbuta ħafna mal-​kelma “ġuf.” Għalhekk, il-​ħniena tinvolvi s-​sentimenti taʼ mogħdrija tenera li wieħed ikollu fil-​fond taʼ qalbu. Imma l-​ħniena m’hijiex biss dispjaċir ġenwin. Din għandha tqanqalna biex nagħmlu xi ħaġa biex intaffu t-​tbatija taʼ ħaddieħor. Per eżempju, l-​anzjani Kristjani kollhom imħabba jaraw il-​bżonn li juru ħniena lejn sħabhom fit-​twemmin, u meta jkun xieraq ‘jagħmlu dan bil-​ferħ.’—Rumani 12:8; Ġakbu 2:13; Ġuda 22, 23.

16. Għala nistgħu ngħidu li Jehovah huwa grazzjuż?

¹⁶ It-​tjubija t’Alla tintwera wkoll fil-​ħlewwa tiegħu. Wieħed li jkun ħelu, jew grazzjuż, juri li verament jagħti kas is-​sentimenti t’oħrajn, u juri qalb tajba speċjalment maʼ wħud inferjuri b’mod li jġagħlek tħobbu. Jehovah jagħti l-​aqwa eżempju taʼ ħlewwa meta jittratta mal-​qaddejja leali tiegħu. Per eżempju, permezz taʼ l-​anġli tiegħu, Alla bil-​ħlewwa kollha saħħaħ lill-​profeta xwejjaħ Danjel u informa lit-​tfajla verġni Marija dwar il-​privileġġ li kien se jkollha li tiled lil Ġesù. (Danjel 10:19; Luqa 1:​26-38) Bħala l-​poplu taʼ Jehovah, aħna żgur li rridu napprezzaw il-​mod grazzjuż li bih ikellimna permezz tal-​paġni tal-​Bibbja. Aħna nfaħħruh għal din it-​turija taʼ tjubitu u nħabirku biex inkunu grazzjużi meta nittrattaw maʼ oħrajn. Meta dawk li għandhom kwalifiki spiritwali jipprovaw jgħinu lil xi ħadd taʼ l-​istess twemmin “bi spirtu taʼ ħlewwa,” huma jipprovaw ikunu ġentili, u grazzjużi.—Galatin 6:1.

Alla Tqil biex Jagħdab

17. Għala aħna grati għall-​fatt li Jehovah hu “tqil biex jagħdab”?

¹⁷ “Alla . . .  tqil biex jagħdab.”  Dan il-​kliem jenfasizza aspett ieħor tat-​tjubija taʼ Jehovah. Jehovah bil-​paċenzja kollha jissaporti n-​nuqqasijiet tagħna u jagħtina ċ-​ċans biex negħlbu dgħjufijiet serji u nimxu ’l quddiem spiritwalment. (Lhud 5:12–​6:3; Ġakbu 5:​14, 15) Il-​paċenzja t’Alla hija taʼ benefiċċju wkoll għal dawk li għadhom ma sarux adoraturi tiegħu. Huma għad għandhom iċ-​ċans li jwieġbu għall-​messaġġ tas-​Saltna u jindmu. (Rumani 2:4) Madankollu, għalkemm Jehovah hu paċenzjuż, kultant it-​tjubija tiegħu tqanqlu biex jesprimi r-​rabja tiegħu, bħalma għamel meta l-​Iżraelin qiemu l-​għoġol tad-​deheb biswit il-​Muntanja Sinaj. Ir-​rabja t’Alla dalwaqt se tintwera b’mod saħansitra akbar meta jġib fit-​tmiem is-​sistema mill-​agħar taʼ Satana.—Eżekjel 38:​19, 21-​23.

18. Rigward il-​verità, x’kuntrast hemm bejn Jehovah u l-​mexxejja umani?

¹⁸ ‘Jehovah huwa kbir fil-​verità.’ Kemm huwa differenti Jehovah mill-​mexxejja umani! Dawn iwiegħdu ħafna affarijiet u mbagħad jonqsu li jwettquhom. Għall-​kuntrarju, l-​adoraturi taʼ Jehovah jistgħu joqogħdu fuq kulma jintqal fil-​Kelma ispirata tiegħu. Ladarba Alla huwa kbir, jew abbundanti, fil-​verità, jistaʼ dejjem ikollna fiduċja f’dak li jwiegħed. Fit-​tjubija tiegħu, Missierna tas-​sema ma jonqosx li jwieġeb it-​talb tagħna għall-​verità spiritwali u jipprovdilna dan b’mod abbundanti.—Salm 43:3; 65:3 (65:​2, NW).

19. Liema turija taʼ tjubija li tispikka wera Jehovah lejn il-​midinbin li jindmu?

¹⁹ ‘Jehovah hu Alla li jaħfer il-​ħażen, id-​dnub u l-​ħtija.’ Fit-​tjubija tiegħu, Jehovah hu lest li jaħfer lill-​midinbin li juru ndiema. Aħna żgur li grati ħafna li Missierna tas-​sema kollu mħabba għamel provvediment għall-​maħfra permezz tas-​sagrifiċċju taʼ Ġesù. (1 Ġwann 2:​1, 2) Aħna tabilħaqq ferħanin li dawk kollha li juru fidi b’mod attiv fil-​fidwa jistgħu jgawdu relazzjoni approvata maʼ Jehovah, bit-​tama taʼ ħajja taʼ dejjem fid-​dinja l-​ġdida li wiegħed. Kemm għandna għalfejn infaħħru lil Jehovah għall-​mod kif juri t-​tjubija tiegħu mal-​bnedmin!—2 Pietru 3:13.

20. Xi prova għandna li Alla ma jagħlaqx għajnejh għall-​ħażen?

²⁰ “Ma jħalli xejn għaddej.” Din fil-​fatt hi raġuni oħra għala nfaħħru lil Jehovah għat-​tjubija tiegħu. Għala? Għax aspett vitali tat-​tjubija huwa li din bl-​ebda mod ma tagħlaq għajnejha għall-​ħażen. Iktar minn hekk, “dak in-​nhar li l-​Mulej Ġesù jfeġġ mis-​smewwiet imdawwar bl-​anġli tal-​qawwa tiegħu,” se ssir vendetta fuq “dawk li ma jagħrfux lil Alla, u . . . dawk li ma jobdux l-​Evanġelju.” Dawn se “jitħallsu bil-​piena tat-​telfien taʼ dejjem.” (2 Tessalonikin 1:​6-9) Imbagħad, l-​adoraturi taʼ Jehovah li jibqgħu ħajjin se jgawdu l-​ħajja bis-​sħiħ mingħajr ma jiġu mfixkla mill-​bnedmin li ma jimpurtahomx minn Alla u li m’għandhomx “imħabba għat-​tajjeb.”—2 Timotju 3:​1-3.

Imita t-​Tjubija taʼ Jehovah

21. Għala għandna nuru t-​tjubija?

²¹ Bla dubju, għandna ħafna raġunijiet biex infaħħru u nirringrazzjaw lil Jehovah għat-​tjubija tiegħu. Bħala l-​qaddejja tiegħu, m’għandniex aħna nagħmlu l-​aħjar li nistgħu biex nuru din il-​kwalità? Iva, għax l-​appostlu Pawlu ħeġġeġ lill-​Kristjani sħabu: “Kunu, mela, tixbhu lil Alla, bħala wlied maħbuba.” (Efesin 5:1) Missierna tas-​sema juri t-​tjubija l-​ħin kollu, u hekk għandna nagħmlu aħna.

22. X’se nikkunsidraw fl-​artiklu li jmiss?

²² Jekk aħna dedikati b’qalbna kollha lil Jehovah, bla dubju nixtiequ li nimitaw it-​tjubija tiegħu bil-​ħeġġa kollha. Ladarba aħna d-​dixxendenti tal-​midneb Adam, m’huwiex faċli li nagħmlu dak li hu tajjeb. Madankollu, fl-​artiklu li jmiss, se naraw kif inhu possibbli li aħna nuru t-​tjubija. Se nikkunsidraw ukoll diversi modi kif nistgħu nimitaw lil Jehovah—l-​aqwa eżempju taʼ tjubija—u kif għandna nagħmlu dan.

Int Kif Twieġeb?

• X’inhi t-​tjubija?

• Liema espressjoni Skritturali tenfasizza t-​tjubija taʼ Jehovah?

• X’inhuma xi modi kif tintwera t-​tjubija taʼ Jehovah?

• Għala għandna nimitaw l-​eżempju taʼ Jehovah f’dik li hi tjubija?

[Stampa f’paġna 12]

Jehovah iddixxiplina ’l-poplu tiegħu tal-​qedem għaliex huma m’għexux fi qbil maʼ l-​espressjonijiet taʼ tifħir tagħhom

[Stampa f’paġna 12]

Fdal leali reġaʼ lura lejn Ġerusalemm

[Stampa f’paġna 13]

Mosè semaʼ dikjarazzjoni taʼ l-​għaġeb dwar it-​tjubija taʼ Jehovah

[Stampa f’paġna 15]

It-​tjubija taʼ Jehovah tidher fil-​mod kif hu jkellimna permezz tal-​paġni tal-​Bibbja