Ħajja Aħjar—Dalwaqt!

IMMAĠINA wieħed li jbassar it-​temp u li t-​tbassiriet tiegħu kważi dejjem iseħħu. Jekk hu jbassar waqt l-​aħbarijiet taʼ fil-​għaxija li se tagħmel ix-​xita l-​ġurnata taʼ wara, ma toqgħodx taħsibha biex tieħu l-​umbrella miegħek meta titlaq mid-​dar l-​għada fil-​għodu. Ir-​rekord tal-​passat tiegħu rebaħ il-​fiduċja tiegħek. Int taġixxi fuq dak li jgħid hu.

Issa, kemm hija taʼ min joqgħod fuqha l-​wegħda taʼ Jehovah taʼ ħajja aħjar fuq art magħmula ġenna? Sewwa, x’jindika r-​rekord tal-​passat tiegħu? It-​twettieq taʼ profeziji tal-​Bibbja jistabbilixxi b’mod ċar ir-​rekord taʼ Jehovah. Hu Alla t’ eżattezza li ma tfallix u taʼ verità. (Ġożwe 23:14; Isaija 55:11) Tant huma taʼ min joqgħod fuqhom il-​wegħdiet t’Alla Jehovah li xi drabi hu fil-​fatt jitkellem dwar avvenimenti futuri mwegħdin bħal li kieku diġà seħħew. Per eżempju, wara l-​wegħda tiegħu taʼ dinja ġdida fejn fiha l-​mewt u l-​vistu m’humiex se jkunu iktar, naqraw: “Magħmula huma [l-barkiet imwegħdin].” Fi kliem ieħor, “Huma Fatt!”—Apokalissi 21:5, 6.

Iva, it-​twettieq tal-​wegħdiet tal-​passat taʼ Jehovah jagħtina fiduċja fit-​twettieq tal-​wegħda tiegħu taʼ ħajja aħjar għall-​umanità. Imma meta se tiġi din il-​ħajja aħjar?

Ħajja Aħjar​—Meta?

Ħajja ħafna aħjar se tiġi dalwaqt! Nistgħu nibqgħu ċerti minn dak għax il-​Bibbja tgħid li ħafna affarijiet ħżiena kellhom iseħħu fuq l-​art eżatt qabel ma l-​Ġenna kellha tintroduċi ħajja aħjar. Dawk l-​affarijiet ħżiena qegħdin iseħħu issa.

Per eżempju, Ġesù Kristu bassar li kien se jkun hemm gwerer kbar. Hu qal: “Iqum ġens kontra ġens u saltna kontra saltna.” (Mattew 24:7) Din il-​profezija seħħet. Matul is-​snin 1914 sa l-​1945, kien hemm żewġ gwerer dinjin, u dawn ġew segwiti minn numru kbir taʼ gwerer oħrajn li fihom nazzjonijiet iġġieldu maʼ xulxin. “Fuq bażi taʼ medja kull sena, in-​numru taʼ mwiet kaġun tal-​gwerra f’dan il-​perijodu [mit-II Gwerra Dinjija ’l hawn] kien iktar mid-​doppju taʼ l-​imwiet fis-​seklu 19 u sebaʼ darbiet iktar milli fis-​seklu 18.”​—World Military and Social Expenditures 1993.

It-tixrid taʼ mard huwa evidenza oħra taʼ kemm ħajja aħjar fil-​Ġenna hija qrib. Ġesù bassar li kien se jkun hemm ‘mard li jittieħed f’ħafna bnadi.’ (Luqa 21:11) Seħħet din il-​profezija? Iva. Wara l-​ewwel gwerra dinjija, l-​influwenza Spanjola qatlet ’il fuq minn 20 miljun ruħ. Minn dak iż-​żmien ’l hawn, il-​kanċer, il-​mard tal-​qalb, il-​malarja, l-​AIDS, u mardiet oħrajn qatlu miljuni taʼ nies. F’pajjiżi li qegħdin jiżviluppaw, mard li ġej minn ilma kkontaminat (inkluż dijarrea u infezzjonijiet taʼ dud fl-​imsaren) jaħsdu miljuni taʼ ħajjiet kull sena.

Ġesù qal ukoll li kellu: “[I]kun hawn ġuħ kbir.” (Mattew 24:7) Bħalma ġie nnotat fl-​artiklu taʼ qabel, il-​foqra tad-​dinja m’għandhomx biżżejjed x’jieklu. Din hija parti oħra mill-​evidenza li ħajja ħafna aħjar fil-​Ġenna dalwaqt tiġi.

“L-​art titheżheż bil-​kbir,” qal Ġesù. (Luqa 21:​11) Dan ukoll twettaq fi żmienna. Mill-​1914 ’l hawn qerda minn terremoti devastanti ħasdet mijiet t’eluf taʼ ħajjiet.

Il-Bibbja tkompli tgħid li “l-​aħħar tad-​dinja” kellu jkun immarkat minn bidla fin-​nies. Kellhom “jingħataw għall-​imħabba tagħhom infushom u tal-​flus,” u t-​tfal kellhom “ma jisimgħux mill-​ġenituri.” In-​nies inġenerali kellhom ikunu “[j]ħobbu aktar il-​pjaċiri milli ’l Alla.” (2 Timotju 3:1-5) Ma taqbilx int li ħafna toqgħodilhom din id-​deskrizzjoni?

Waqt li iktar u iktar nies jipprattikaw affarijiet ħżiena, hemm żjieda fl-​illegalità. Dan ukoll kien imbassar. Skond Mattew 24:12, Ġesù tkellem dwar li kellu “joktor il-​ħażen.” X’aktarx li int se taqbel li l-​kriminalità hija agħar issa milli kienet snin ilu. In-​nies kullimkien huma beżgħanin li se jiġu misruqin, imbroljati, jew imweġġgħin b’xi mod.

Il-gwerer, il-​mard maʼ kullimkien, in-​nuqqas taʼ ikel, it-​terremoti, iż-​żjieda fil-​kriminalità, u bidla għall-​agħar fir-​relazzjonijiet umani​—dawn kollha huma evidenti llum, eżatt bħalma bassret il-​Bibbja. ‘Imma dawn il-​ħwejjeġ ma ġrawx tul l-​istorja taʼ l-​umanità kollha?’ tistaʼ tistaqsi. ‘X’inhu differenti rigward żmienna?’

Hemm xi aspetti sinjifikanti ferm taʼ dak li qiegħed jiġri llum. Il-​Bibbja ma tgħidx li kwalunkwe fattur, bħalma huwa n-​nuqqas taʼ ikel, kellu għalih waħdu jkun prova li qegħdin fiż-​żmien tat-​tmiem u li ħajja aħjar hija qrib. Il-​profeziji tal-​Bibbja rigward iż-​żmien tat-​tmiem kellhom jiġu mwettqin fuq ġenerazzjoni taʼ mingħajr Alla.—Mattew 24:34-39; Luqa 17:26, 27.

Iktar minn hekk, hija ħaġa stramba ġmielha li xi fatturi tal-​profezija taʼ Ġesù​—speċjalment dawk rigward in-​nuqqas taʼ ikel u l-​mard maʼ kullimkien​—qegħdin iseħħu llum. Għala? Għaliex il-​kisbiet xjentifiċi qatt ma kienu akbar. L-​għarfien mediku u l-​forom taʼ kura qatt ma kienu iktar avanzati jew mifruxin. Alla biss setaʼ jbassar fil-​Kelma tiegħu, il-​Bibbja, li waqt żmien bħal dan, il-​mard u l-​ġuħ kellhom imorru għall-​agħar, mhux għall-​aħjar.

Ladarba l-​profeziji tal-​Bibbja kollha dwar iż-​żmien tat-​tmiem, jew “l-​aħħar tad-​dinja,” qegħdin iseħħu, x’nistgħu nikkonkludu? Li ħajja aħjar hija qrib! Imma kif se tiġi mwettqa?

Ħajja Aħjar​—Kif?

Taħseb int li l-​bnedmin jistgħu jġibu l-​Ġenna? Matul l-​istorja sa dan il-​jum stess, kien hemm bosta tipi taʼ gvern uman. Xi wħud minnhom ipprovaw iebes ħafna biex jissodisfaw il-​bżonnijiet tal-​poplu. Madankollu, ħafna problemi qegħdin imorru għall-​agħar. Kemm f’pajjiżi sinjuri u kemm f’artijiet foqra, il-​gvernijiet jitħabtu maʼ l-​abbuż mid-​droga, abitazzjonijiet inferjuri, faqar, kriminalità, qagħad, u gwerer.

Saħansitra jekk il-​gvernijiet jistgħu jsolvu xi wħud minn dawn il-​problemi, qatt ma jistgħu jipprovdu ħelsien komplet min-​nuqqas taʼ saħħa; lanqas ma jistgħu jġibu fi tmiem ix-​xjuħija u l-​mewt. B’mod ċar, il-​bnedmin qatt ma se jġibu Ġenna fuq din l-​art.

Il-Bibbja tgħid b’mod għaqli: “La tittamawx fil-​kbarat, għax il-​bniedem ma jsalvakomx.” F’min, allura, għandna nafdaw? Il-​Bibbja twieġeb: “Hieni min f’Alla taʼ Ġakobb isib il-​għajnuna tiegħu, min għandu t-​tama fil-​Mulej, Alla tiegħu.” (Salm 146:3, 5) Jekk inpoġġu t-​tama tagħna f’Alla Jehovah, qatt ma se nkunu diżappuntati.

Żgur li l-​Wieħed li għandu l-​għerf u l-​qawwa biex joħloq l-​art, ix-​xemx, u l-​kwiekeb jistaʼ wkoll jagħmel l-​art ġenna. Hu jistaʼ jagħmilha possibbli għall-​bnedmin li jgawdu ħajja aħjar. Hu x’inhu dak li Alla Jehovah għandu l-​intenzjoni li jagħmel, hu jistaʼ u sejjer iwettqu. Il-​Kelma tiegħu tgħid: “Għal Alla ma hemm xejn li ma jistax isir.” (Luqa 1:37) Imma Alla kif se jġib ħajja aħjar?

Jehovah se jġib ħajja ferm aħjar għall-​umanità permezz tas-​Saltna tiegħu. U x’inhi s-​Saltna t’Alla? Hija gvern reali b’Ħakkiem maħtur-minn-Alla, Ġesù Kristu. Is-​Saltna t’Alla tinsab fis-​sema, imma dalwaqt se ġġib barkiet meraviljużi u ħajja ferm aħjar għar-​residenti taʼ l-​art magħmula Ġenna.—Isaija 9:6, 7.

Jistaʼ jkun li int diġà familjari mat-​talba mudell taʼ Ġesù, li tinsab fil-​Bibbja f’Mattew 6:9-13. Parti minn dik it-​talba ’l Alla tgħid: “Tiġi saltnatek, ikun li trid int, kif fis-​sema, hekka fl-​art.” F’armonija maʼ dik it-​talba, is-​Saltna t’Alla se “tiġi” biex twettaq l-​iskop t’Alla Jehovah għall-​art. U huwa l-​iskop tiegħu li l-​art issir ġenna.

Tqum mistoqsija waħda taʼ l-​aħħar: Xi trid tagħmel int biex tgawdi ħajja aħjar fil-​Ġenna li ġejja?

Dak Li Għandek Bżonn Tagħmel

Alla Jehovah b’imħabba jestendi l-​prospett taʼ ħajja aħjar fil-​Ġenna lil kull min jagħmel ir-​rieda tiegħu. Il-​Bibbja tgħidilna: “Il-​ġusti jirtu l-​art, u jgħammru fiha għal dejjem.” (Salm 37:29) Imma liema ħaġa tagħmel lil persuna twajba f’għajnejn Alla?

Biex nogħoġbu lil Jehovah għandna bżonn nitgħallmu iktar dwar x’iridna nagħmlu. Jekk nieħdu l-​għarfien dwar Alla u napplikawh f’ħajjietna, nistgħu ngħixu għal dejjem. F’talba ’l Alla, Ġesù qal: “Din hi l-​ħajja taʼ dejjem: li jagħarfu lilek, Alla waħdek veru, u lil Ġesù Kristu, li inti bgħatt.”—Ġwann 17:3.

Il-ktieb li jgħidilna dwar Alla Jehovah u Ġesù Kristu huwa l-​Kelma t’Alla, il-​Bibbja. Din hija waħda mir-​rigali l-​iktar prezzjużi taʼ Jehovah. Il-​Bibbja qisha ittra mingħand missier taʼ mħabba lil uliedu. Din tgħidilna dwar il-​wegħda t’Alla li jġib ħajja aħjar għall-​umanità u turina kif nistgħu niksbuha. Il-​Bibbja tgħarrafna x’għamel Alla fil-​passat u x’se jagħmel fil-​futur. Tagħtina wkoll parir prattiku dwar kif nittrattaw b’suċċess mal-​problemi tagħna issa. Tabilħaqq, il-​Kelma t’Alla tgħallimna kif insibu xi ftit taʼ l-​hena saħansitra f’din id-​dinja mħawda.—2 Timotju 3:16, 17.

Ix-Xhieda taʼ Jehovah jieħdu pjaċir jirranġawlek għal studju tal-​Bibbja f’darek mingħajr ħlas. Tgħallem kif int jistaʼ jkollok ħajja iktar hienja issa, bil-​prospett taʼ ħajja ferm aħjar fil-​futur qarib. (w95 11/15)

[Stampa f’paġna 5]

Il-​profeziji tal-​Bibbja jindikaw li ħajja aħjar hija qrib

[Stampa f’paġna 7]

Is-​Saltna t’Alla se tintroduċi ħajja aħjar għall-​umanità