Sabu l-​Paċi f’Dinja taʼ Taqlib

L-​ISTAMPA fuq il-​qoxra taʼ din ir-​rivista turi xena taʼ battalja bl-​armi mill-​Bożnja u l-​Erżegovina. Tistaʼ l-​paċi teżisti f’post bħal dan? B’sorpriża, it-​tweġiba hija iva. Waqt li komunitajiet Kattoliċi Rumani, Ortodossi tal-​Lvant, u Musulmani f’dik l-​art traġika jiġġieldu għat-​territorju, ħafna individwi jixxennqu għall-​paċi, u xi wħud sabuha.

Il-familja Djorem kienu residenti f’Sarajevo, u kienu Xhieda taʼ Jehovah. F’nofs it-​taqlib kollu f’dik il-​belt, huma żammew id-​drawwa li jżuru lill-​ġirien biex jaqsmu magħhom l-​aħbar tajba tas-​Saltna t’Alla. (Mattew 24:14) Għala? Għaliex il-​familja Djorem kienu jafu li din is-​Saltna hija reali, li diġà hija stabbilita fis-​smewwiet, u li hija l-​aqwa u l-​unika tama għall-​paċi taʼ l-​umanità. Ix-​Xhieda taʼ Jehovah għandhom fiduċja sħiħa f’dik li l-​appostlu Pawlu sejjaħ ‘aħbar taʼ sliem.’ (Efesin 2:17) Grazzi għal nies bħal Bozo u Hena Djorem, ħafna qegħdin isibu l-​paċi fil-​Bożnja u fl-​Erżegovina.

Paċi Vera Trid Tiġi

Hemm iktar xi tgħid dwar il-​familja Djorem. L-​ewwel, iżda, ħalli nitkellmu dwar koppja oħra li kisbet fiduċja fis-​Saltna t’Alla. Jisimhom Artur u Arina. Huma u t-​tfal żgħar tagħhom kienu jgħixu f’repubblika fit-​territorju taʼ dik li qabel kienet l-​Unjoni Sovjetika. Meta faqqgħet gwerra ċivili, Artur iġġieled għal naħa minnhom. Malajr, iżda, staqsa lilu nnifsu, ‘Għala qiegħed niġġieled kontra dawn in-​nies li qabel kienu l-​ġirien tiegħi?’ Hu telaq mill-​pajjiż u, wara ħafna diffikultajiet, wasal bil-​familja żagħżugħa tiegħu fl-​Estonja.

Waqt żjara f’St. Petersburg, Artur iltaqaʼ max-​Xhieda taʼ Jehovah u kien impressjonat b’dak li tgħallem dwar is-​Saltna t’Alla. Ir-​rieda taʼ Jehovah hija li dalwaqt ferm is-​Saltna t’Alla se tkun l-​uniku stat taʼ ħakkiem fuq l-​umanità. (Danjel 2:44) Imbagħad l-​art se tkun post taʼ sliem, mingħajr iktar gwerer ċivili jew konflitti internazzjonali. Isaija pprofetizza dwar dak iż-​żmien: “Ma jagħmlux aktar deni u anqas ħsara fuq il-​muntanja qaddisa kollha tiegħi, għax mimlija hi l-​art bil-​għarfien tal-​Mulej bħalma l-​baħar hu miksi bl-​ilmijiet.”—Isaija 11:9.

Waqt li nnota l-​istampa taʼ dik l-​art futura mimlija paċi fi ktieb li jgħin biex tiġi studjata l-​Bibbja li wieħed Xhud urieh, Artur irrimarka li hu qabel kien jgħix f’post li kien jixbah lil dak. Issa, iżda, dan kien qed jiġi rrovinat bil-​gwerra ċivili. Lura fl-​Estonja, Artur u l-​familja tiegħu qegħdin jitgħallmu iktar dwar is-​Saltna t’Alla permezz taʼ Studju tal-​Bibbja max-​Xhieda taʼ Jehovah.

Paċi F’Nofs It-​Taqlib

Salm 37:37 jgħid: “Ħares lejn min hu tajjeb, ara l-​bniedem sewwa; għax ulied iħalli min iħobb is-​sliem.” Fil-​fatt, il-​paċi taʼ wieħed li hu bla ħtija u rett f’għajnejn Alla m’hijiex limitata għall-​futur tiegħu. Hu jgawdiha issa stess. Dan kif inhu possibbli? Ikkunsidra l-​esperjenza taʼ raġel jismu Paul.

Paul jgħix f’kamp tar-​refuġjati mwarrab fil-​Lbiċ taʼ l-​Etjopja, għalkemm fil-​fatt ġej minn pajjiż ġar. F’art twelidu, hu ltaqaʼ maʼ wieħed mix-​Xhieda taʼ Jehovah li kien jaħdem maʼ kumpanija taż-​żejt, u dan ir-​raġel tah ktieb li jgħin biex tiġi studjata l-​Bibbja, Il-​Verità Li Twassal Għal Ħajja Eterna.a Paul qatt ma ltaqaʼ max-​Xhud iktar imma studja l-​ktieb bir-​reqqa. Il-​gwerra ċivili ġagħlitu jmur f’kamp tar-​refuġjati fl-​Etjopja, u hemmhekk tkellem m’oħrajn dwar dak li kien tgħallem. Grupp żgħir aċċetta dan bħala l-​verità. Ibbażat fuq dak li kienu tgħallmu, huma ma damux ma bdew jippridkaw lil oħrajn fil-​kamp.

Paul kiteb lill-​kwartieri ġenerali tal-​Watch Tower Society fejn talabhom l-​għajnuna. Ministru mibgħut minn Addis Ababa stagħġeb meta sab 35 ruħ jistennewh, lesti li jitgħallmu iktar dwar is-​Saltna t’Alla. Arranġamenti ġew magħmulin biex tingħata għajnuna fuq bażi regulari.

Kif jistaʼ jingħad li nies bħal Paul igawdu l-​paċi? Ħajjiethom m’humiex faċli, imma għandhom fidi f’Alla. Meta jiġu effettwati mit-​taqlib taʼ din id-​dinja, huma japplikaw il-​parir tal-​Bibbja: “Tħabbtu raskom b’xejn. Fit-​talb tagħkom itolbu u uru lil Alla xi jkollkom bżonn, iżżuh ħajr.” Bħala riżultat, huma għandhom kuntentizza li hija rari llum. Il-​kliem taʼ l-​appostlu Pawlu lill-​kongregazzjoni taʼ Filippi japplika għalihom: “U s-​sliem taʼ Alla, sliem li jgħaddi kull ma l-​moħħ jistaʼ jifhem, iżommilkom qalbkom u moħħkom sħaħ fi Kristu.” Tabilħaqq, huma jħossu relazzjoni mill-​qrib maʼ Jehovah, dak “Alla tas-​sliem.”—Filippin 4:6, 7, 9.

Paċi Tal-​Preżent

Is-​Sultan inkurunat tas-​Saltna t’Alla hu Ġesù Kristu, imsejjaħ fil-​Bibbja il-​“Prinċep tas-​sliem.” (Isaija 9:5 [Isaija 9:6, NW]) Dwaru l-​profeta tal-​qedem qal: “Hu jxandar il-​paċi lill-​ġnus, il-​ħakma tiegħu tkun minn baħar sa baħar, u mix-​xmara taʼ l-​Ewfrat sat-​trufijiet.” (Żakkarija 9:10) Kliem ispirat bħal dan kellu effett profond fuq il-​ħajja taʼ raġel jismu José.

Darba waħda José kien il-​ħabs. Kien terrorista u kien ġie arrestat waqt li kien qiegħed jagħmel preparazzjonijiet biex jisplodi kwartieri tal-​pulizija. Ħaseb li l-​vjolenza biss kienet tistaʼ ġġiegħel lill-​gvern itejjeb il-​kundizzjonijiet f’pajjiżu. Waqt li kien il-​ħabs, ix-​Xhieda taʼ Jehovah bdew jistudjaw il-​Bibbja mal-​mara tiegħu.

Wara li José ġie meħlus, hu wkoll studja l-​Bibbja, u malajr il-​kliem f’​Salm 85:9; [Salm 85:8, NW] beda japplika għalih: “Ħa nismaʼ xi jgħid Alla: il-​Mulej is-​sliem ixandar, għall-​poplu u l-​ħbieb tiegħu.” Madankollu, dak il-​vers jikkonkludi bi twissija biex “jafdaw fih.” Għaldaqstant, wieħed li jfittex il-​paċi taʼ Jehovah mhux se jaqbad u jaġixxi b’mod indipendenti jew f’oppożizzjoni lejn ir-​rieda Tiegħu.

Illum, José u martu huma ministri Kristjani. Jidderieġu lil oħrajn lejn is-​Saltna taʼ Jehovah bħala s-​soluzzjoni għal problemi li José qabel ipprova jsolvi b’bombi magħmulin id-​dar. Lesti li jafdaw il-​Bibbja li tgħid: “Il-​Mulej ukoll jagħti l-​ġid tiegħu.” (Salm 85:13 [Salm 85:12, NW]) Tabilħaqq, José dan l-​aħħar żar il-​kwartieri li kien ippjana li jeqred. Għala? Sabiex ikellem lill-​familji hemmhekk dwar is-​Saltna t’Alla.

Poplu Paċifiku

F’​Salm 37:10,11, il-​Bibbja tgħid: “Ftit ieħor, u l-​ħażin ma jkunx aktar; għad tħares fejn kien, u ma ssibux. Imma l-​ġwejdin għad jirtu l-​art, u bi sliem kotran jitgħaxxqu.” Xi prospett glorjuż!

Innota, iżda, li l-​paċi taʼ Jehovah hija biss għall-​“ġwejdin.” Dawk li jħobbu l-​paċi jistgħu jkollhom bżonn jitgħallmu jkunu ġwejdin. Dan kien minnu fil-​każ taʼ Kieth, li jgħix fi New Zealand. Kieth kien deskritt bħala “mibni sod u b’personalità qawwija, aggressiv, u jħobb jargumenta.” Kien membru taʼ gajj u kien jgħix f’dar li kienet qisha fortizza, b’ġonna mħarsin minn tlett iklieb taʼ l-​għassa biex ma jħallu ’l ħadd jidħol. Martu, omm is-​sitt itfal tiegħu, kienet iddivorzjatu.

Meta Kieth iltaqaʼ max-​Xhieda taʼ Jehovah, l-​aħbar tajba kellha effett profond fuqu. Malajr hu u wliedu kienu qegħdin jattendu l-​laqgħat max-​Xhieda. Qataʼ xagħaru li kien twil sa qaddu u beda jitkellem dwar is-​Saltna t’Alla maʼ dawk li kien jassoċja magħhom qabel. Xi wħud minn dawn ukoll bdew jistudjaw il-​Bibbja.

Bħal miljuni oħrajn taʼ qalb twajba madwar id-​dinja, Kieth kien beda japplika l-​kliem taʼ l-​appostlu Pietru: “Min irid iħobb ’il ħajtu u jara jiem hienja, . . . ħa jaħrab il-​ħażen u jagħmel it-​tajjeb, ifittex is-​sliem u jqis li jiksbu.” (1 Pietru 3:10, 11) Il-​mara li Kieth kellu qabel aċċettat li terġaʼ tiżżewġu, u issa qiegħed jitgħallem “ifittex is-​sliem u jqis li jiksbu.”

Il-paċi taʼ Jehovah kienet mezz taʼ salvataġġ għal bosta, inkluż wieħed li darba kien atleta mwieled fl-​ex U.S.S.R. Dan ir-​raġel rebaħ il-​midalji fl-​Olimpjadi, imma sar diżilluż u dar għad-​drogi u l-​alkoħol. Wara 19-il sena kollhom ġrajjiet li kienu jinkludu sentenza taʼ tliet snin f’kamp tax-​xogħol fis-​Siberja, vjaġġ klandestin mistoħbi fuq vapur għall-​Kanada, u darbtejn jilgħabha mal-​mewt minħabba l-​vizzju tad-​drogi, talab ’l Alla għall-​għajnuna biex isib skop ġenwin fil-​ħajja. Studju tal-​Bibbja maʼ Xhieda taʼ Jehovah li jitkellmu bir-​Russu għenu jsib it-​tweġiba għall-​mistoqsijiet tiegħu. Illum dan ir-​raġel, bħal miljuni oħrajn, sab paċi m’Alla u miegħu nnifsu.

It-​Tama Taʼ L-​Irxoxt

Finalment, ħalli nirritornaw għal Bozo u Hena Djorem f’Sarajevo. Din il-​koppja kellhom tifla taʼ ħames snin, Magdalena. F’Lulju li għadda, it-​tlieta li huma kienu telqu mid-​dar biex għal darb’oħra jieħdu sehem fl-​attività tagħhom taʼ ppridkar meta lkoll kemm huma safaw maqtulin minn splużjoni taʼ bomba. Xi ngħidu dwar il-​paċi li ppridkaw lil oħrajn dwarha? Uriet il-​bomba li ħasditilhom ħajjiethom li din ma kenitx paċi vera?

Bl-ebda mod! F’din is-​sistema t’affarijiet, traġedji jsiru. Nies jinqatlu minn bombi jew balal. Oħrajn imutu b’mard jew f’aċċidenti. Ħafna jmutu kaġun tax-​xjuħija. Dawk li jgawdu l-​paċi t’Alla m’humiex eżentati, imma l-​possibiltà taʼ ġrajjiet bħal dawn ma tħallihomx bla tama.

Ġesù wiegħed lill-​ħabiba tiegħu Marta: “Jien hu l-​qawmien u l-​ħajja. Kull min jemmen fija, wkoll jekk imut, igħix.” (Ġwann 11:25) Il-​familja Djorem dan emmnuh, bħalma jagħmlu x-​Xhieda taʼ Jehovah kollha. U l-​familja Djorem kellhom fidi illi jekk imutu, kienu se jiġu rxoxtati f’dinja li mbagħad tkun verament post taʼ paċi. Alla Jehovah se “jixxottalhom kull demgħa minn għajnejhom: ma jkunx hemm iżjed mewt, anqas biki jew agħjat jew tbatija ma jkun hemm iżjed, għax għabu l-​ħwejjeġ taʼ qabel.”—Apokalissi 21:4.

Ftit qabel miet, Ġesù qal lis-​segwaċi tiegħu: “Jiena nagħtikom is-​sliem. . . . Tħallux qalbkom titħawwad.” (Ġwann 14:27) Aħna nithennew mal-​familja Djorem li kellhom dik il-​paċi u li żgur se jgawduha iktar bis-​sħiħ fl-​irxoxt. Aħna henjin għal dawk kollha li jqimu lil Jehovah, dak Alla taʼ paċi. Uħud bħal dawn għandhom paċi tal-​moħħ. Igawdu paċi m’Alla. Jikkultivaw il-​paċi m’oħrajn. U għandhom fiduċja għal futur mimli paċi. Iva, sabu l-​paċi, għalkemm jgħixu f’dinja taʼ taqlib. Tabilħaqq, dawk kollha li jqimu ’l Alla bl-​ispirtu u l-​verità jgawdu l-​paċi. Jalla int ukoll issib paċi bħal din. (w96 1/1)

[Nota taʼ taħt]

[Stampi f’paġna 7]

Sabu l-​paċi minkejja li jgħixu f’dinja taʼ taqlib