Nilqgħu l-​Isfida tal-​Lealtà

‘Ilbsu l-​bniedem il-​ġdid, maħluq skond Alla, fil-​ġustizzja u l-​qdusija [“lealtà,” NW] ġejja mill-​verità.’—EFESIN 4:24.

1. Aħna għala obbligati li nuru lealtà lil Alla Jehovah?

LI TILQAʼ l-​isfida tal-​lealtà għandu ħafna aspetti. L-​iktar importanti huwa li tilqaʼ l-​isfida tal-​lealtà lejn Alla Jehovah. Verament, meta nqisu min hu Jehovah u x’għamel għalina, u minħabba li aħna ddedikati lilu, aħna obbligati li nagħtuh lealtà. Kif nuru lealtà lejn Alla Jehovah? Mod primarju huwa billi nkunu leali lejn il-​prinċipji taʼ tjieba taʼ Jehovah.

2, 3. Liema relazzjoni hemm bejn il-​lealtà u t-​tjieba?

² Biex nilqgħu dik l-​isfida, irridu nagħtu kas tal-​kliem misjub fl-​1 Pietru 1:15, 16: “Bħalma qaddis hu dak li sejħilkom, kunu intom ukoll qaddisin fl-​imġiba tagħkom kollha, għax hu miktub: ‘Kunu qaddisin, għax qaddis jien.’” Lealtà lejn Alla Jehovah se ġġegħelna nobduh f’kull ħin, billi nġibu l-​ħsibijiet, il-​kliem, u l-​azzjonijiet tagħna f’armonija mar-​rieda qaddisa tiegħu. Dan ifisser li nżommu kuxjenza tajba, bħalma niġu kkmandati fl-1 Timotju 1:3-5: “Issa l-​iskop taʼ din it-​twissija [biex ma tiġix mgħallma duttrina differenti jew tingħata attenzjoni għal stejjer foloz] hi l-​imħabba li toħroġ minn qalb safja, minn kuxjenza tajba u minn fidi sinċiera.” Veru, ħadd minna m’hu perfett, imma għandna nkunu qegħdin nipprovaw nagħmlu l-​aħjar li nistgħu, hux tassew?

³ Lealtà lejn Jehovah se żżommna milli b’mod egoist nagħmlu kompromess fi prinċipji taʼ tjieba. Tabilħaqq, il-​lealtà se żżommna milli nkunu minn ġewwa mod u minn barra ieħor. Il-​lealtà hija dak li kellu f’moħħu s-​salmista meta kanta: “Urini, Mulej, triqatek, biex nimxi fis-​sewwa tiegħek; tini qalb waħda, biex ikolli l-​biżaʼ taʼ ismek.” (Salm 86:11) Il-​lealtà tirrikjedi dak li ġie deskritt b’mod xieraq bħala “ubbidjenza lejn dak li ma jistax jiġi inforzat.”

4, 5. Il-​lealtà se ġġegħelna noqogħdu attenti, li ma mmorrux nagħmlu liema ħaġa?

⁴ Lealtà lejn Alla Jehovah se żżommna wkoll milli nagħmlu kwalunkwe ħaġa li tistaʼ ġġib tmaqdir fuq ismu u fuq is-​Saltna tiegħu. Per eżempju, żewġ Kristjani darba tant ġew f’diffikultà bejniethom li b’mod mhux xieraq irrikorrew għal qorti tad-​dinja. L-​imħallef staqsa, ‘Intom it-​tnejn Xhieda taʼ Jehovah?’ Evidentement ma setax jifhem x’kienu qegħdin jagħmlu fil-​qorti. Xi tmaqdir kien dak! Lealtà lejn Alla Jehovah kellha ġġiegħel lil dawk l-​aħwa jagħtu kas tal-​parir taʼ l-​appostlu Pawlu: “Mhux ġa nuqqas għalikom li jkollkom kawżi bejnietkom? Il-​għala ma issofrux l-​inġustizzja? Il-​għala ma tagħżlux li tħallu min iqarraq bikom?” (1 Korintin 6:7) Ċertament, il-​korsa taʼ lealtà lejn Alla Jehovah hija li ssofri telf persunali iktar milli ġġib tmaqdir fuq Jehovah u l-​organizzazzjoni tiegħu.

⁵ Lealtà lejn Alla Jehovah tinvolvi wkoll li wieħed ma jċedix għall-​biżaʼ mill-​bniedem. “Min jibżaʼ mill-​bniedem jaqaʼ fi xkiel; imma min jittama fil-​Mulej ikun fil-​kenn.” (Proverbji 29:25) B’hekk, aħna ma nagħmlux kompromess meta niġu ffaċċjati minn persekuzzjoni, imma nsegwu l-​eżempju mħolli minn Xhieda taʼ Jehovah f’dik li qabel kienet l-​Unjoni Sovjetika, fil-​Malawi, fl-​Etjopja, u f’tant u tant pajjiżi oħrajn.

6. Il-​lealtà żżommna lura milli nassoċjaw maʼ min?

⁶ Jekk aħna leali lejn Alla Jehovah, se nevitaw li nagħmlu ħbieb maʼ dawk kollha li huma l-​għedewwa tiegħu. Huwa għalhekk li d-​dixxiplu Ġakbu kiteb: “Nisa adulteri! Ma tafux li l-​ħbiberija mad-​dinja hija l-​għadu taʼ Alla? Min mela jrid isir ħabib tad-​dinja huwa għadu taʼ Alla.” (Ġakbu 4:4) Aħna rridu li jkollna l-​lealtà li s-​Sultan David wera meta qal: “Kemm nobgħodhom, Mulej, lil dawk li jobogħduk, kemm nistmellhom lil dawk li jqumu kontrik! B’mibegħda mill-​akbar nobgħodhom, għalija huma egħdewwa tiegħi.” (Salm 139:21, 22) Ma rridux li nissieħbu soċjalment maʼ min jidneb apposta, għax m’għandna xejn inkomuni magħhom. M’għandhiex il-​lealtà lejn Alla żżommna lura milli nissieħbu soċjalment m’għedewwa taʼ Jehovah bħal dawn, kemm jekk personalment jew permezz tal-​medju tat-​televixin?

Niddefendu Lil Jehovah

7. Il-​lealtà se tgħinna biex nagħmlu liema ħaġa rigward Jehovah, u Eliħu kif għamel dan?

⁷ Il-​lealtà se tqanqalna biex niddefendu lil Alla Jehovah. X’eżempju mill-​aħjar taʼ dan għandna f’Eliħu! Ġob 32:2, 3 jgħidilna: “Hawn xegħlet il-​korla taʼ Eliħu. . . . Inkorla għal Ġob għax baqaʼ jżomm li għandu raġun fil-​kawża tiegħu maʼ Alla; inkorla wkoll għat-​tlitt iħbieb tiegħu għax ma sabux xi jweġbuh u hekk jiġi li taw tort lil Alla.” F’Ġob kapitli 32 sa 37, Eliħu jiddefendi lil Jehovah. Per eżempju, qal: “Stenna, Ġob, ftit ieħor ħalli nurik, raġunijiet oħra favur Alla. . . . Ħa nagħti raġun lill-​Ħallieq tiegħi. . . . Ma jwarrabx għajnejh minn fuq il-​ġusti.”—Ġob 36:2-7.

8. Għala għandna bżonn niddefendu lil Jehovah?

⁸ Għala hemm bżonn li niddefendu lil Jehovah? Illum, Alla tagħna Jehovah jiġi offiż b’ħafna u ħafna modi. Hemm min isostni li ma jeżistix, li hu parti minn Trinità, li jitturmenta lin-​nies eternament f’infern jaqbad, li b’mod dgħajjef qiegħed jipprova jikkonverti lid-​dinja, li ma jimpurtahx mill-​umanità, u affarijiet bħal dawn. Aħna nuru l-​lealtà tagħna lejh billi niddefenduh u nagħtu prova li Jehovah tassew jeżisti; li hu Alla għaref, ġust, jistaʼ kollox, u taʼ mħabba; li għandu ħin stipulat għal kollox; u li meta jasal iż-​żmien stipulat tiegħu, se jtemm il-​ħażen kollu u jagħmel l-​art kollha ġenna. (Koħelet 3:1) Dan jirrikjedi li nużaw kull opportunità biex nagħtu xiehda għall-​isem u s-​Saltna taʼ Jehovah.

Lealtà Lejn L-​Organizzazzjoni Taʼ Jehovah

9. Xi wħud dwar liema kwistjonijiet kixfu n-​nuqqas taʼ lealtà tagħhom?

⁹ Issa niġu għall-​kwistjoni taʼ li nkunu leali lejn l-​organizzazzjoni viżibbli taʼ Jehovah. Ċertament, aħna obbligati li nuruha lealtà, inkluż “l-​irsir leali u diskret,” li permezz tiegħu l-​kongregazzjoni Kristjana hija mitmugħa spiritwalment. (Mattew 24:45-47, NW) Nassumu li tidher xi ħaġa fil-​pubblikazzjonijiet tal-​Watch Tower li ma nifhmux jew ma naqblux magħha fil-​preżent. X’se nagħmlu? Nieħdu għalina u nitilqu l-​organizzazzjoni? Dak huwa li xi wħud għamlu meta It-​Torri Taʼ L-​Għassa, ħafna snin ilu, applika l-​patt il-​ġdid għall-​Millennju. Oħrajn ħadu għalihom għal dak li It-​Torri Taʼ L-​Għassa darba qal fuq il-​kwistjoni tan-​newtralità. Li kieku dawk li tfixklu fuq dawn il-​kwistjonijiet kienu leali lejn l-​organizzazzjoni u lejn ħuthom, huma kienu jistennew sakemm Jehovah jikkjarifika dawn il-​kwistjonijiet, bħalma għamel fiż-​żmien stipulat tiegħu. B’hekk, il-​lealtà tinkludi li wieħed jistenna bil-​paċenzja sakemm fehma aġġornata tiġi ppubblikata mill-​irsir leali u diskret.

10. Il-​lealtà se żżommna lura milli nkunu kurjużi dwar liema ħaġa?

¹⁰ Lealtà lejn l-​organizzazzjoni viżibbli taʼ Jehovah tfisser ukoll li wieħed ma jkollu x’jaqsam xejn maʼ l-​apostati. Kristjani leali m’humiex se jkunu kurjużi dwar x’għandhom x’jgħidu nies bħal dawn. Veru, dawk li qegħdin jintużaw minn Alla Jehovah biex jidderieġu x-​xogħol tiegħu fuq l-​art m’humiex perfetti. Imma l-​Kelma t’Alla x’tgħidilna biex nagħmlu? Nitilqu l-​organizzazzjoni t’Alla? Le. L-​affezzjoni taʼ l-​aħwa għandha żżommna leali lejha, u għandna nkomplu ‘nħobbu ’l xulxin b’qalbna kollha u bil-​qawwa kollha.’—1 Pietru 1:22.

Lealtà Lejn Anzjani Leali

11. Il-​lealtà se tgħinna biex ngħassu kontra liema ħsieb negattiv?

¹¹ Meta fil-​kongregazzjoni tintqal jew issir xi ħaġa li nsibuha diffiċli biex nifhmu, il-​lealtà se żżommna milli niġġudikaw il-​motivi u se tgħinna biex nieħdu l-​pożizzjoni li forsi din hija kwistjoni taʼ ġudizzju. M’huwiex ferm aħjar li tikkonċentra fuq il-​kwalitajiet tajbin taʼ l-​anzjani maħturin u kredenti oħrajn sħabna milli tikkonċentra fuq in-​nuqqasijiet tagħhom? Iva, irridu noqogħdu għassa kontra kull ħsieb negattiv bħal dan, għaliex dan għandu x’jaqsam maʼ li wieħed ikun żleali! Il-​lealtà se tgħinna wkoll biex nobdu d-​direttiva taʼ Pawlu ‘biex ma nkasbru ’l ħadd.’—Titu 3:1, 2.

12, 13. L-​anzjani liema sfidi partikulari jridu jiffaċċjaw?

¹² Il-​lealtà tippreżenta sfidi partikulari lill-​anzjani. Waħda minn dawn l-​isfidi hija l-​kwistjoni tal-​konfidenzjalità. Membru taʼ kongregazzjoni għandu mnejn jiftaħ qalbu m’anzjan. Lealtà lejn dak li jkun se żżomm lura lill-​anzjan milli jikser il-​prinċipju tal-​konfidenzjalità. Hu se jagħti kas tal-​parir fi Proverbji 25:9: “Tikxifx dak li taf [“kliem konfidenzjali,” NW] fuq ħaddieħor.” Dak ifisser lanqas saħansitra lil martu stess!

¹³ L-​anzjani għandhom ukoll testijiet oħrajn taʼ lealtà x’jilqgħu. Se jkunu huma wħud li jridu jintgħoġbu, jew se jgħinu bil-​kuraġġ u bil-​ħlewwa lil dawk li jeħtieġu korrezzjoni, saħansitra jekk dawn huma qraba jew ħbieb intimi tagħhom? Lealtà lejn l-​organizzazzjoni taʼ Jehovah se ġġiegħel lil dawk minna li huma anzjani biex nipprovaw ngħinu lil kulmin jeħtieġ għajnuna spiritwali. (Galatin 6:1, 2) Għalkemm se nkunu qalbna tajba, il-​lealtà se tagħmilna sinċieri m’anzjan seħibna, sewwa sew bħalma Pawlu tkellem maʼ l-​appostlu Pietru apertament. (Galatin 2:11-14) Mill-​banda l-​oħra, l-​indokraturi jridu joqogħdu attenti, li ma jmorrux jaġixxu b’mod mhux għaqli jew juru parzjalità jew b’xi mod ieħor jabbużaw mill-​awtorità tagħhom, u b’hekk jagħmluha diffiċli għal dawk taħt il-​ħarsien tagħhom li jkunu leali lejn l-​organizzazzjoni t’Alla.—Filippin 4:5.

14, 15. Liema fatturi jistgħu jittestjaw il-​lealtà taʼ membri tal-​kongregazzjoni?

¹⁴ Hemm aspetti oħrajn fil-​kwistjoni taʼ li wieħed jilqaʼ l-​isfida tal-​lealtà lejn il-​kongregazzjoni u l-​anzjani tagħha. Jekk ikun hemm xi ftit tat-​taħwid fil-​kongregazzjoni, dan jagħtina opportunità biex nuru lealtà lejn Jehovah u lejn dawk li jirrappreżentawh. (Ara It-​Torri Taʼ L-​Għassa, tal-​15 taʼ Settembru, 1987, paġni 15-17.) Meta jkun sar qtugħ mis-​sħubija, il-​lealtà tirrikjedi li aħna nappoġġjaw lill-​anzjani, mhux nipprovaw nispekulaw jekk kienx hemm raġunijiet suffiċjenti għall-​azzjoni li tkun ittieħdet.

¹⁵ Lealtà lejn il-​kongregazzjoni titlob minna wkoll li nappoġġjaw il-​ħames laqgħat kollha taʼ kull ġimgħa sal-​punt li jippermettu ċ-​ċirkostanzi u l-​abbiltajiet tagħna. Il-​lealtà tirrikjedi mhux biss li aħna nattenduhom regolarment imma wkoll li nippreparaw għalihom u nagħmlu kummenti li jibnu meta jkollna ċ-​ċans.—Lhud 10:24, 25.

Lealtà Fiż-​Żwieġ

16, 17. Kristjani miżżewġin liema sfidi taʼ lealtà jridu jiffaċċjaw?

¹⁶ Lejn min iktar obbligati nuru lealtà? Jekk aħna miżżewġin, minħabba l-​wegħdi tagħna taż-​żwieġ, irridu nilqgħu l-​isfida taʼ li nkunu leali lejn is-​sieħba jew is-​sieħeb tagħna. Lealtà lejn is-​sieħba jew is-​sieħeb tagħna se żżommna lura milli nagħmlu l-​iżball li nkunu iżjed ħelwin maʼ nisa jew irġiel oħrajn milli nkunu mal-​mara jew ir-​raġel tagħna stess. Lealtà lejn is-​sieħba jew is-​sieħeb tagħna tirrikjedi wkoll li ma nikxfux maʼ barranin id-​dgħjufijiet jew in-​nuqqasijiet tas-​sieħba jew sieħeb tagħna. Huwa eħfef li nilmentaw m’oħrajn milli li naħdmu iebes biex inżommu l-​linji taʼ komunikazzjoni miftuħin mal-​mara jew ir-​raġel tagħna, li huwa dak li għandna nagħmlu fi qbil mar-​Regola tad-​Deheb. (Mattew 7:12) Fil-​fatt, l-​istat taż-​żwieġ tassew jippreżenta sfida għal-​lealtà Kristjana tagħna.

¹⁷ Biex nilqgħu din l-​isfida taʼ lealtà, mhux biss irridu nevitaw li nkunu ħatjin taʼ kondotta ħażina serja imma rridu ngħassu wkoll lill-​istess ħsibijiet u sentimenti tagħna. (Salm 19:15 [Salm 19:14, NW]) Per eżempju, jekk il-​qlub qarreqin tagħna huma rgħibin għal pjaċir u eċċitament, ikun faċli ferm għalina li b’mod egoistiku navvanzaw mill-​punt taʼ li nammiraw xi ħaġa għal li nixtiequha. Billi jħeġġeġ il-​fedeltà fiż-​żwieġ, is-​Sultan Salamun iwissi lill-​irġiel miżżewġin b’mod figurattiv biex ‘jixorbu l-​ilma mill-​bir tagħhom stess.’ (Proverbji 5:15) U Ġesù qal: “Kull min iħares lejn mara u jixtieqha jkun ġa għamel adulterju magħha f’qalbu.” (Mattew 5:28) Irġiel miżżewġin li darrew lilhom infushom jaraw materjal pornografiku jissograw li jiġu mħajrin jikkommettu adulterju, billi b’hekk iqarrqu bin-​nisa tagħhom u jkunu żleali lejhom. Għall-​istess raġuni, mara miżżewġa li tinħakem mill-​ispirtu taʼ soap operas li jittrattaw dwar episodji adulterużi tistaʼ tiġi ttantata li ssir żleali lejn żewġha. Billi nkunu verament leali lejn is-​sieħba jew is-​sieħeb tagħna, madankollu, insaħħu r-​rabta taż-​żwieġ, u ngħinu lil xulxin fl-​isforzi tagħna biex nogħġbu lil Alla Jehovah.

Għajnuniet Biex Inżommu Leali

18. Apprezzament għal liema ħaġa se jgħinna nkunu leali?

¹⁸ X’se jgħinna nilqgħu l-​isfida tal-​lealtà f’dawn l-​erbaʼ oqsma: lealtà lejn Jehovah, lejn l-​organizzazzjoni tiegħu, lejn il-​kongregazzjoni, u lejn is-​sieħba jew is-​sieħeb tagħna fiż-​żwieġ? Għajnuna waħda hija li napprezzaw li l-​fatt li nilqgħu l-​isfida tal-​lealtà huwa marbut maʼ l-​ivvindikar tas-​sovranità taʼ Jehovah. Iva, billi nibqgħu leali aħna nuru li nqisu lil Jehovah bħala Sovran Universali. B’hekk nistgħu wkoll ikollna rispett għalina nfusna u t-​tama taʼ ħajja taʼ dejjem fid-​dinja ġdida taʼ Jehovah. Nistgħu ngħinu lilna nfusna biex nibqgħu leali billi nikkunsidraw eżempji mill-​aħjar taʼ lealtà, billi nibdew minn Jehovah u nibqgħu sejrin sa dawk imsemmijin fil-​Bibbja u fil-​pubblikazzjonijiet tagħna tal-​Watch Tower, inklużi rakkonti fil-​Yearbook.

19. Il-​fidi liema rwol għandha f’li nkunu leali?

¹⁹ Fidi qawwija f’Alla Jehovah u biżaʼ li ma nogħġbuhx se jgħinuna nilqgħu l-​isfida tal-​lealtà. Aħna nsaħħu l-​fidi tagħna f’Jehovah u l-​biżaʼ tagħna minnu billi nistudjaw b’mod diliġenti l-​Kelma t’Alla u billi nieħdu sehem fil-​ministeru Kristjan. Dan se jgħinna biex naġixxu fi qbil mal-​parir taʼ Pawlu mniżżel f’Efesin 4:23, 24: “Għandkom tiġġeddu b’tibdila spiritwali tal-​fehma tagħkom u tilbsu l-​bniedem il-​ġdid, maħluq skond Alla, fil-​ġustizzja u l-​qdusija [“lealtà,” NW] ġejja mill-​verità.”

20. Fuq kollox, liema kwalità se tgħinna nkunu leali lejn Jehovah u lejn dawk kollha li lilhom aħna obbligati nuru lealtà?

²⁰ Apprezzament għall-​kwalitajiet taʼ Jehovah jgħinna nkunu leali. Fuq kollox, imħabba mhix egoista għal Missierna tas-​sema u gratitudni għal dak kollu li għamel għalina, billi nħobbuh b’qalbna u b’ruħna u b’moħħna u b’saħħitna kollha se jgħinuna nkunu leali lejh. Barra minn hekk, li jkollna l-​imħabba li Ġesù qal kellha tidentifika lis-​segwaċi tiegħu se jgħinna nkunu leali lejn il-​Kristjani kollha fil-​kongregazzjoni u fil-​familja tagħna. Fi kliem ieħor, hija attwalment kwistjoni taʼ li tkun jew egoist jew mhux egoist. Nuqqas taʼ lealtà jfisser li tkun egoist. Il-​lealtà tfisser li ma tkunx egoist.—Mark 12:30, 31; Ġwann 13:34, 35.

21. Il-​kwistjoni taʼ li nilqgħu l-​isfida tal-​lealtà kif tistaʼ tinġabar fil-​qosor?

²¹ Fil-​qosor: Il-​lealtà hija l-​kwalità ġenwina murija minn Alla Jehovah, minn Ġesù Kristu, u mill-​qaddejja veri kollha taʼ Jehovah. Biex ikollna relazzjoni tajba m’Alla Jehovah, irridu nilqgħu l-​isfida taʼ lealtà lejh billi ngħixu fi qbil mal-​ħtiġijiet taʼ tjieba tiegħu, billi ma jkollna xejn x’naqsmu maʼ l-​għedewwa tiegħu, u billi niddefendu lil Jehovah b’għoti taʼ xiehda formali u informali. Irridu nilqgħu wkoll l-​isfida taʼ li nkunu leali lejn l-​organizzazzjoni viżibbli taʼ Jehovah. Irridu nkunu leali lejn il-​kongregazzjonijiet tagħna u leali lejn is-​sieħba jew is-​sieħeb tagħna fiż-​żwieġ. Billi nilqgħu b’suċċess l-​isfida tal-​lealtà, se nkunu qegħdin nieħdu sehem fl-​ivvindikar tas-​sovranità taʼ Jehovah, u se nkunu qegħdin inżommu miegħu fil-​kwistjoni. B’dan il-​mod se niksbu l-​favur tiegħu u se nirċievu l-​premju taʼ ħajja taʼ dejjem. Dak li l-​appostlu Pawlu qal dwar id-​devozzjoni lejn Alla jistaʼ jingħad ukoll dwar li aħna nilqgħu l-​isfida tal-​lealtà. Huwa taʼ benefiċċju kemm għall-​ħajja issa u kemm għal dik li għad trid tiġi.​—Salm 18:26 [Salm 18:25, NW]; 1 Timotju 4:8. (w96 3/15)

Kif Twieġeb Int?

◻ B’liema modi nistgħu nilqgħu l-​isfida tal-​lealtà lejn Alla?

◻ Lealtà lejn l-​organizzazzjoni taʼ Jehovah x’tirrikjedi minna?

◻ L-​anzjani kif jistgħu jilqgħu l-​isfida tal-​lealtà?

◻ Kristjani miżżewġin liema sfida li tinvolvi l-​lealtà jridu jilqgħu?

◻ Liema kwalitajiet se jgħinuna nilqgħu l-​isfida tal-​lealtà?

[Stampa f’paġna 14]

Lealtà lejn membri tal-​kongregazzjoni se żżomm lura lill-​anzjani milli jikxfu affarijiet kunfidenzjali

[Stampi f’paġna 15]

Lealtà lejn is-​sieħba jew is-​sieħeb issaħħaħ ir-​rabta taż-​żwieġ