‘Kunu Qaddisin, Għax Qaddis Jien’

“Għandkom tkunu qaddisin, għax qaddis jien, il-​Mulej Alla tagħkom.”—LEVITIKU 19:2.

1. Min huma xi nies li d-​dinja tikkunsidrahom bħala qaddisin?

IL-​BIĊĊA l-​kbira tar-​reliġjonijiet ewlenin tad-​dinja għandhom lil dawk li jqisuhom bħala qaddisin. Mother Teresa taʼ fama fl-​Indja hija taʼ spiss meqjusa bħala qaddisa minħabba d-​dedikazzjoni tagħha għall-​fqar. Il-​papa jissejjaħ il-​“Missier Qaddis.” José María Escrivá, il-​fundatur tal-​moviment Kattoliku modern Opus Dei, huwa meqjus minn xi Kattoliċi bħala “mudell għall-​qdusija.” L-​Induiżmu għandu s-​swamis, jew l-​irġiel qaddisin tiegħu. Gandhi kien meqjum bħala raġel qaddis. Il-​Buddiżmu għandu l-​patrijiet qaddisin tiegħu, u l-​Islam il-​profeta qaddis tiegħu. Imma x’ifisser eżattament li tkun qaddis?

2, 3. (a) X’ifissru l-​kelmiet “qaddis” u “qdusija”? (b) Liema huma xi mistoqsijiet li jeħtieġu tweġiba?

² Il-​kelma “qaddis” ġiet definita bħala li tkun “1. . . . assoċjat maʼ qawwa divina; sagru. 2. Meqjus b’qima jew venerazzjoni jew denju tagħha . . . 3. Li tgħix fi qbil maʼ sistema spiritwali jew reliġjuża stretta jew morali ħafna . . . 4. Speċifikat jew miżmum separat għal skop reliġjuż.” Fil-​kuntest Bibliku, qdusija tfisser “indafa jew purità reliġjuża; stat sagru.” Skond il-​pubblikazzjoni taʼ referenza tal-​Bibbja Insight on the Scriptures, “[il-kelma] oriġinali Ebrajka qoʹdhesh iġġorr il-​ħsieb taʼ separatezza, esklussività, jew santifikazzjoni għal Alla, . . . stat taʼ li tkun miżmum separat għas-​servizz t’Alla.”a

³ Il-​ġens taʼ Israel kien ikkmandat biex ikun qaddis. Il-​Liġi t’Alla stqarret: “Jiena l-​Mulej Alla tagħkom, għalhekk għandkom titqaddsu, u tkunu qaddisin, għax jien qaddis.” Min kien is-​Sors taʼ qdusija? Kif setgħu Israeliti imperfetti jsiru qaddisin? U x’lezzjonijiet nistgħu nsibu għalina nfusna llum fis-​sejħa taʼ Jehovah għall-​qdusija?—Levitiku 11:44.

Kif Israel Kien Relatat Mas-​Sors Taʼ Qdusija

4. Il-​qdusija taʼ Jehovah kif kienet eżemplifikata f’Israel?

⁴ Kull ħaġa li kienet relatata mal-​qima taʼ Israel lejn Alla Jehovah kellha tiġi meqjusa bħala qaddisa u tiġi trattata hekk. Dak għala? Għaliex Jehovah innifsu hu l-​oriġini u s-​sors taʼ qdusija. Ir-​rakkont taʼ Mosè dwar it-​tħejjija tat-​tabernaklu qaddis u tal-​ħwejjeġ u dekorazzjonijiet tikkonkludi bil-​kliem: “Għamlu wkoll l-​istrixxa rqiqa tad-​deheb fin għall-​kuruna mqaddsa, u naqqxu u kitbu fuqha: ‘Qaddis lill-​Mulej.’” Din l-​istrixxa tleqq taʼ deheb pur kienet imwaħħla mat-​turbant tal-​qassis il-​kbir, u kienet tissinjifika li hu kien miżmum separat għal servizz taʼ qdusija speċjali. Hekk kif kienu jaraw dan is-​sinjal imnaqqax ileqq fid-​dawl tax-​xemx, l-​Israeliti kienu jiġu mfakkrin regolarment dwar il-​qdusija taʼ Jehovah.—Eżodu 28:36; 29:6; 39:30.

5. Israeliti imperfetti kif setgħu jitqiesu bħala qaddisin?

⁵ Imma l-​Israeliti kif setgħu jsiru qaddisin? Kien biss permezz tar-​relazzjoni mill-​qrib tagħhom maʼ Jehovah u l-​qima pura tagħhom lejh. Kienu jinħtieġu għarfien eżatt dwar ‘l-​Iktar Wieħed Qaddis’ sabiex iqimuh bi qdusija, bi ndafa fiżika u spiritwali. (Proverbji 2:1-6; 9:10) L-​Israeliti għalhekk kellhom iqimu lil Alla b’motiv pur u qalb pura. Kwalunkwe għamla taʼ qima ipokrita kienet mistmerra minn Jehovah.—Proverbji 21:27.

Għala Jehovah Iddenunzja Lil Israel

6. Il-​Lhud fi żmien Malakija kif stmaw il-​mejda taʼ Jehovah?

⁶ Dan ġie muri ċar meta l-​Israeliti kienu b’nofs qalb qegħdin iġibu fit-​tempju sagrifiċċji inferjuri u difettużi. Permezz tal-​profeta tiegħu Malakija, Jehovah iddenunzja l-​offerti inferjuri tagħhom: “ ‘Ma għandix pjaċir bikom,’ igħid il-​Mulej taʼ l-​eżerċti, ‘u minn idejkom ma nilqax offerti.’ . . . ‘Imma intom tipprofanawh meta tgħidu li l-​mejda tas-​Sid hija mniġġsa u l-​ikel taʼ fuqha hu taʼ min imaqdru. U intom tgħidu: “Ara, xi dwejjaq!”, u taqbdu tonfħu,’ igħid il-​Mulej taʼ l-​eżerċti. ‘Intom iġġibu vittmi misruqa u dak li hu magħtub u dak li hu marid, u dan iġġibuh bħala offerta. U jien se nilqagħha minn idejkom?’ igħid il-​Mulej taʼ l-​eżerċti.”—Malakija 1:10, 12, 13.

7. Il-​Lhud liema azzjonijiet mhux qaddisin kienu qegħdin jagħmlu fil-​ħames seklu Q.E.K.?

⁷ Malakija kien użat minn Alla biex jiddenunzja l-​prattiċi foloz tal-​Lhud, probabbilment matul il-​ħames seklu Q.E.K. Il-​qassisin kienu qegħdin jagħtu eżempju ħażin, u l-​kondotta tagħhom ċertament li ma kenitx qaddisa. In-​nies, billi segwew dik it-​tmexxija, kienu laxki fil-​prinċipji tagħhom, saħansitra sal-​punt li jiddivorzjaw lin-​nisa tagħhom, possibilment sabiex setgħu jieħdu nisa iżgħar pagani. Malakija kiteb: “Għax bejnek u bejn il-​mara taʼ żgħożitek hemm xhud il-​Mulej li int qarraqt biha,b għad li hi s-​sieħba tiegħek u l-​mara li magħha ntrabatt. . . . Ħarsu rwieħkom, mela, u qisu li ħadd ma jqarraq bil-​mara taʼ żgħożitu. ‘Għax jiena d-​divorzju nobogħdu,’ igħid il-​Mulej, Alla taʼ Israel.”—Malakija 2:14-16.

8. Xi wħud fil-​kongregazzjoni Kristjana kif ġew effettwati mill-​ħarsa moderna dwar id-​divorzju?

⁸ Fiż-​żminijiet moderni, f’ħafna pajjiżi fejn id-​divorzju jinkiseb faċilment, ir-​rata taʼ divorzji telgħet mas-​sema. Saħansitra l-​kongregazzjoni Kristjana ġiet effettwata. Minflok ma jfittxu l-​għajnuna taʼ l-​anzjani biex jegħlbu l-​ostakli u jipprovaw iġagħlu liż-​żwieġ tagħhom jirnexxi, xi wħud għaġġlu wisq biex warrbuh fil-​ġenb. Taʼ spiss it-​tfal ikollhom iħallsu prezz emozzjonali għoli.—Mattew 19:8, 9.

9, 10. Kif għandna nirriflettu dwar il-​qima tagħna lejn Jehovah?

⁹ Bħalma rajna hawn fuq, minħabba l-​kundizzjoni spiritwali tal-​biki fi żmien Malakija, Jehovah ikkundanna ċar u tond il-​qima degradanti taʼ Ġuda u wera li hu kien se jaċċetta biss qima pura. M’għandux dan iġagħalna nirriflettu fuq il-​kwalità tal-​qima tagħna lejn Alla Jehovah, il-​Mulej Sovran taʼ l-​univers, is-​Sors taʼ qdusija vera? Qegħdin aħna verament noffru lil Alla servizz qaddis? Inżommu aħna lilna nfusna f’kundizzjoni spiritwali nadifa?

¹⁰ Dan ma jfissirx li rridu nkunu perfetti, li huwa impossibbli, jew li għandna nqabblu lilna nfusna m’oħrajn. Imma jfisser li kull Kristjan għandu jagħti lil Alla qima li hija l-​aqwa tiegħu jew tagħha fiċ-​ċirkostanzi taʼ l-​individwu. Dan jirreferi għall-​kwalità tal-​qima tagħna. Is-​servizz sagru tagħna għandu jkun l-​aqwa li nistgħu nagħtu​—servizz qaddis. Dan kif jitwettaq?—Luqa 16:10; Galatin 6:3, 4.

Qlub Puri Jwasslu Għal Qima Pura

11, 12. Minn fejn titnissel kondotta mhix qaddisa?

¹¹ Ġesù għallem biċ-​ċar li dak li hemm fil-​qalb se jsir evidenti b’dak li wieħed jgħid u jagħmel. Ġesù qal lill-​Fariżej li kienu tajbin f’għajnejhom infushom, u madankollu mhux qaddisin: “Ja nisel il-​lifgħat, kif tistgħu titkellmu tajjeb meta intom ħżiena? Għax mill-​milja tal-​qalb jitkellem il-​fomm.” Iktar tard hu wera li azzjonijiet mill-​agħar joħorġu minn ħsibijiet mill-​agħar fil-​qalb, jew il-​bniedem ġewwieni. Hu qal: “Imma dak li joħroġ mill-​fomm joħroġ mill-​qalb, u dan hu li jtebbaʼ lill-​bniedem. Għax mill-​qalb joħorġu ħsibijiet ħżiena, qtil, adulterji, żina, serq, xhieda qarrieqa, dagħa. Dawn huma li jtebbgħu lill-​bniedem.”—Mattew 12:34; 15:18-20.

¹² Dan jgħinna nifhmu li azzjonijiet mhux qaddisin m’humiex sempliċement spontanji jew mingħajr bażi minn qabel. Huma r-​riżultat taʼ ħsibijiet li jniġġsu li kienu qegħdin jitlajjaw fil-​qalb​—xewqat sigrieti u forsi fantasiji. Hu għalhekk li Ġesù setaʼ jgħid: “Smajtu xi ntqal, ‘La tagħmilx adulterju.’ Imma jiena ngħidilkom li kull min iħares lejn mara u jixtieqha jkun ġa għamel adulterju magħha f’qalbu.” Fi kliem ieħor, il-​fornikazzjoni u l-​adulterju jkunu diġà rabbew l-​għeruq fil-​qalb qabel ma tittieħed kwalunkwe azzjoni. Imbagħad, taħt ċirkostanzi addattati, il-​ħsibijiet mhux qaddisin isiru kondotta mhix qaddisa. Fornikazzjoni, adulterju, sodomija, serq, dagħa, u apostasija jsiru xi ftit mir-​riżultati evidenti.—Mattew 5:27, 28; Galatin 5:19-21.

13. Liema huma xi eżempji dwar kif ħsibijiet mhux qaddisin jistgħu jwasslu għal atti mhux qaddisin?

¹³ Dan jistaʼ jintwera b’diversi modi. F’xi pajjiżi, postijiet tal-​logħob qegħdin jinbtu bħall-​ħaxix ħażin, u b’hekk iżidu l-​opportunità għal-​logħob taʼ l-​azzard. Wieħed jistaʼ jiġi ttantat biex jagħtiha għal din it-​taparsi soluzzjoni biex jipprova jsolvi l-​problemi finanzjarji tiegħu. Raġunar qarrieq jistaʼ jqanqal lil xi ħu biex jirrofta jew idgħajjef il-​prinċipji Bibliċi tiegħu.c F’każ ieħor, aċċess faċli għall-​pornografija, kemm jekk permezz tat-​televiżjoni, videos, kompjuters, jew kotba, jistaʼ jwassal lil Kristjan għal kondotta mhix qaddisa. Kulma jkun irid huwa li jittraskura l-​armar spiritwali tiegħu, u qabel ma jinduna, ikun waqaʼ fl-​immoralità. Imma fil-​biċċa l-​kbira tal-​każi t-​tkaxkira għal ġod-​dnub tibda fil-​moħħ. Iva, f’sitwazzjonijiet bħal dawn, jitwettaq il-​kliem taʼ Ġakbu: “Kull bniedem imġarrab jinġibed u jitħajjar mill-​passjoni tiegħu stess. Imbagħad il-​passjoni, meta tnissel, twelled id-​dnub.”—Ġakbu 1:14, 15; Efesin 6:11-18.

14. Ħafna kif fiequ mill-​kondotta mhix qaddisa tagħhom?

¹⁴ B’ferħ, ħafna Kristjani li jidinbu bi dgħjufija juru ndiema vera, u l-​anzjani jkunu jistgħu jġeddu lil uħud bħal dawn spiritwalment. Saħansitra ħafna li jiġu maqtugħin mis-​sħubija minħabba nuqqas taʼ ndiema eventwalment jiġu f’sensihom u jiġu stabbiliti mill-​ġdid fil-​kongregazzjoni. Huma jaslu biex jirrealizzaw kemm Satana għelibhom faċilment meta ħallew ħsibijiet mhux qaddisin irabbu l-​għeruq fil-​qalb.—Galatin 6:1; 2 Timotju 2:24-26; 1 Pietru 5:8, 9.

L-​Isfida​—Li Niffaċċjaw Id-​Dgħjufijiet Tagħna

15. (a) Għala għandna niffaċċjaw id-​dgħjufijiet tagħna? (b) X’jistaʼ jgħinna nirrikonoxxu d-​dgħjufijiet tagħna?

¹⁵ Aħna rridu nagħmlu sforz biex inkunu nafu lil qalbna stess oġġettivament. Lesti aħna li niffaċċjaw id-​dgħjufijiet tagħna, nammettuhom, u mbagħad naħdmu biex negħlbuhom? Lesti li nistaqsu lil xi ħabib onest kif nistgħu nitjiebu, u mbagħad nieħdu l-​parir? Biex nibqgħu qaddisin irridu negħlbu n-​nuqqasijiet tagħna. Għala? Għaliex Satana jafhom id-​dgħjufijiet tagħna. Hu se juża l-​makakkeriji sottili tiegħu biex jipprovokana għad-​dnub u kondotta mhix qaddisa. Bl-​atti makakki tiegħu, hu jipprova jisseparana mill-​imħabba t’Alla biex b’hekk ma nkunux iżjed imqaddsin u utli għall-​qima taʼ Jehovah.—Ġeremija 17:9; Efesin 6:11; Ġakbu 1:19.

16. Pawlu liema konflitt kellu?

¹⁶ L-​appostlu Pawlu kellu l-​provi u t-​testijiet tiegħu stess, bħalma xehed fl-​ittra tiegħu lir-​Rumani: “Naf li t-​tajjeb ma jgħammarx fija, jiġifieri f’ġismi. Ir-​rieda tajba qiegħda hemm fija, imma li nagħmel it-​tajjeb mhux hemm. M’iniex nagħmel it-​tajjeb li rrid, imma qiegħed nagħmel il-​ħażin li ma rridx. . . . Skond il-​bniedem taʼ ġewwa togħġobni l-​liġi taʼ Alla; iżda nilmaħ fil-​membri taʼ ġismi, liġi oħra titqabad kontra l-​liġi taʼ moħħi u tjassarni taħt il-​liġi tad-​dnub li hemm ġo ġismi.”—Rumani 7:18-23.

17. Pawlu kif ħareġ rebbieħ fit-​taqbida tiegħu mad-​dgħjufijiet?

¹⁷ Issa l-​punt vitali fil-​każ taʼ Pawlu huwa li rrikonoxxa d-​dgħjufijiet tiegħu. Minkejja dawn, hu setaʼ jgħid: “Skond il-​bniedem [spiritwali] taʼ ġewwa togħġobni l-​liġi taʼ Alla.” Pawlu ħabb dak li kien tajjeb u bagħad dak li kien ħażin. Imma xorta waħda kellu ġlieda x’jikkumbatti, l-​istess ġlieda li għandna lkoll kemm aħna​—kontra Satana, id-​dinja, u l-​laħam. Allura kif nistgħu nirbħu l-​battalja biex nibqgħu qaddisin, isseparati minn din id-​dinja u l-​mod kif taħsibha?—2 Korintin 4:4; Efesin 6:12.

Kif Nistgħu Nibqgħu Qaddisin?

18. Kif nistgħu aħna nibqgħu qaddisin?

¹⁸ Il-​qdusija ma tinkisibx billi nieħdu l-​eħfef triq jew billi nċedu għalina nfusna. Dak it-​tip taʼ bniedem dejjem se jsib skużi għall-​kondotta tiegħu u jipprova jitfaʼ l-​ħtija x’imkien ieħor. Forsi għandna bżonn nitgħallmu nsiru responsabbli għall-​azzjonijiet tagħna u ma nkunux bħal xi wħud li jallegaw li d-​destin hu kontrihom minħabba l-​isfond tal-​familja jew il-​ġenetika tagħhom. L-​għerq tal-​kwistjoni jinsab fil-​qalb taʼ l-​individwu. Iħobb hu t-​tjieba? jixxennaq għall-​qdusija? jixtieq il-​barka t’Alla? Is-​salmista għamel ċar il-​bżonn għall-​qdusija meta qal: “Tbiegħed mill-​ħażen u agħmel it-​tajjeb, fittex is-​sliem u imxi warajh.” L-​appostlu Pawlu kiteb: “Qisu li l-​imħabba tagħkom ma tkunx wiċċ b’ieħor; taħmlux il-​ħażen; żommu mat-​tajjeb.”—Salm 34:15 [Salm 34:14, NW]; 97:10; Rumani 12:9.

19, 20. (a) Kif nistgħu nibnu l-​moħħ tagħna? (b) Studju persunali effettiv x’jinvolvi?

¹⁹ Aħna nistgħu ‘nżommu mat-​tajjeb’ jekk nikkunsidraw l-​affarijiet mill-​ħarsa taʼ Jehovah u jekk ikollna l-​moħħ taʼ Kristu. (1 Korintin 2:16) Dan kif jitwettaq? Bi studju regulari u meditazzjoni fuq il-​Kelma t’Alla. Min jaf kemm-il darba ngħata dan il-​parir! Imma neħduh aħna bis-​serjetà biżżejjed? Per eżempju, tistudja int verament din ir-​rivista, billi tiċċekkja t-​testi Bibliċi, qabel ma tiġi għal-​laqgħa? Bi studju ma rridux infissru sempliċement li timmarka xi ftit frażijiet f’kull paragrafu. Artiklu taʼ studju jistaʼ jiġi mgħoddi u mmarkat f’madwar 15-il minuta. Ifisser dak li nkunu studjajna l-​artiklu? Attwalment, dan jistaʼ jeħodlok xi siegħa jew tnejn biex tistudja u tassorbi l-​benefiċċju spiritwali li kull artiklu jippreżenta.

²⁰ Forsi għandna bżonn niddixxiplinaw lilna nfusna biex inwarrbu t-​televiżjoni għal ftit sigħat kull ġimgħa u nikkonċentraw verament fuq il-​qdusija persunali tagħna. L-​istudju regulari tagħna jibnina spiritwalment, billi jattiva l-​moħħ biex jieħu deċiżjonijiet tajbin​—deċiżjonijiet li jwasslu għal ‘atti taʼ kondotta qaddisa.’—2 Pietru 3:11; Efesin 4:23; 5:15, 16.

21. Liema mistoqsija jibqgħalna nwieġbu?

²¹ Il-​mistoqsija issa hi, F’liema oqsma oħrajn t’attività u kondotta nistgħu aħna bħala Kristjani nkunu qaddisin, saħansitra bħalma Jehovah hu qaddis? L-​artiklu li jmiss se jippreżenta materjal fuq xiex nixtarru. (w96 8/1)

[Noti taʼ taħt]

Tiftakar Int?

◻ Is-​Sors taʼ qdusija kif kien identifikat f’Israel?

◻ Il-​qima taʼ l-​Israeliti b’liema modi ma kenitx qaddisa fi żmien Malakija?

◻ Fejn tibda kondotta mhix qaddisa?

◻ Biex inkunu qaddisin, x’irridu nirrikonoxxu?

◻ Kif nistgħu nibqgħu qaddisin?