L-​Ospitalità Kristjana f’Dinja Mifruda

“Mela, nies bħal dawn aħna fid-​dmir li nilqgħuhom [“b’mod ospitabbli,” NW], ħalli b’hekk nissieħbu magħhom fil-​ħidma għat-​tixrid tal-​verità.”—3 ĠWANN 8.

1. Il-​Ħallieq liema għotjiet l-​iktar mixtiqin ta lill-​umanità?

“IL-​BNIEDEM ma għandux ħaġ’oħra hienja taħt ix-​xemx ħlief li jiekol u jixrob, u jkun ferħan; ħa jkunu dawn sħabu fit-​taħbit li jkollu tul il-​għomor li Alla jagħtih taħt ix-​xemx.” (Koħelet 8:15) B’dak il-​kliem il-​kongregatur Ebrew tal-​qedem jgħidilna li Alla Jehovah mhux biss irid li l-​ħolqien uman tiegħu jkun ferħan u hieni imma wkoll jipprovdilu mezz biex jagħmel dan. Matul l-​istorja tal-​bniedem xewqa komuni waħda fost in-​nies kullimkien tidher li hija li jieħdu gost u jiddevertu.

2. (a) L-​umanità kif abbużaw mill-​iskop li Jehovah kellu għalihom? (b) X’inhu r-​riżultat?

² Illum ngħixu f’soċjetà edonistika li fiha n-​nies huma preokkupati bil-​ġiri wara l-​pjaċiri u d-​divertiment. Il-​biċċa l-​kbira tan-​nies saru wħud li “jingħataw għal l-​imħabba tagħhom infushom . . . iħobbu aktar il-​pjaċiri milli ’l Alla,” bħalma bassret il-​Bibbja. (2 Timotju 3:1-4) Dan, m’għandniex xi ngħidu, huwa tgħawwiġ sfaċċat taʼ l-​iskop t’Alla Jehovah. Meta l-​ġiri wara d-​divertiment isir il-​mira prinċipali, jew meta li wieħed jogħġob lilu nnifsu jsir l-​uniku objettiv, m’hemm ebda sodisfazzjon veru, u ‘kollox isir frugħa u ġiri wara r-​riħ.’ (Koħelet 1:14; 2:11) Minħabba f’hekk id-​dinja hija mimlija b’nies li jħossuhom waħedhom u frustrati, li, mill-​banda l-​oħra, iwassal għal ħafna mill-​problemi fis-​soċjetà. (Proverbji 18:1) In-​nies jibdew jissuspettaw f’xulxin u jsiru mifrudin b’mod razzjali, etniku, soċjali, u ekonomiku.

3. Kif nistgħu nsibu l-​ferħ u s-​sodisfazzjon veri?

³ Kemm kien ikun differenti kieku n-​nies imitaw il-​mod li bih Jehovah jittratta m’oħrajn​—billi jkunu qalbhom tajba, ġenerużi, ospitabbli! Hu għamilha ċara li s-​sigriet tal-​veru hena ma jinsabx f’li aħna nipprovaw nissodisfaw ix-​xewqat tagħna stess. Minflok, din hija ċ-​ċavetta: “Min jagħti hu aktar hieni minn min jieħu.” (Atti 20:35) Biex insibu ferħ u sodisfazzjon veri, irridu negħlbu l-​ostakli u l-​firdiet li jistgħu jillimitawna. U rridu nitwessgħu lejn dawk li qegħdin jaqdu lil Jehovah flimkien magħna. Huwa essenzjali li nagħtu kas il-​parir: “Mela nies bħal dawn aħna fid-​dmir li nilqgħuhom [“b’mod ospitabbli,” NW], ħalli b’hekk nissieħbu magħhom fil-​ħidma għat-​tixrid tal-​verità.” (3 Ġwann 8) Li nuru ospitalità lejn uħud denji, sal-​punt li jippermettulna ċ-​ċirkostanzi tagħna, ikun vantaġġuż b’żewġ modi​—dan jibbenefika kemm lil min jagħti u kemm lil min jirċievi. Min, allura, huma fost dawk li jixirqilhom li lilhom għandna ‘nilqgħu b’mod ospitabbli’?

‘Ħudu Ħsieb L-​Iltiema u R-​Romol’

4. Liema bidla fir-​relazzjonijiet tal-​familja tidher saħansitra fost xi wħud min-​nies taʼ Jehovah?

⁴ Familji stabbli u żwiġijiet henjin huma xi ħaġa rari llum. Ir-​rati li dejjem jogħlew taʼ divorzju u n-​numru li dejjem jiżdied t’ommijiet mhux miżżewġin madwar id-​dinja bidlu drastikament il-​familja tradizzjonali. Bħala riżultat, ħafna li saru Xhieda taʼ Jehovah fis-​snin riċenti ġejjin minn familji mkissrin. Jew huma divorzjati jew separati mill-​imseħbin tagħhom, jew jgħixu ġewwa familji b’ġenitur wieħed. Barra minn hekk, bħalma bassar Ġesù, il-​verità li għallem irriżultat fi frid f’ħafna familji.—Mattew 10:34-37; Luqa 12:51-53.

5. Ġesù x’qal li jistaʼ jkun sors taʼ inkuraġġiment għal dawk ġewwa familji mifrudin?

⁵ Iqawwilna qlubna li naraw uħud ġodda jieħdu waqfa soda għall-​verità, u taʼ spiss infarrġuhom bil-​wegħda inkuraġġanti taʼ Ġesù: “Tassew, ngħidilkom, li fost dawk kollha li minħabba fija u l-​Bxara t-​tajba jħallu lil darhom jew lil ħuthom jew lil ommhom jew lil missierhom jew lil uliedhom jew l-​egħlieqi tagħhom, ma hemm ħadd fosthom li minn issa, f’din id-​dinja stess, ma jirċevix, għal mitt darba iktar, djar u aħwa u ommijiet u wlied u egħlieqi flimkien maʼ persekuzzjonijiet, u l-​ħajja taʼ dejjem fiż-​żmien li ġej.”—Mark 10:29, 30.

6. Kif nistgħu nsiru ‘aħwa, ommijiet, u tfal’ għall-​“iltiema u r-​romol” fostna?

⁶ Min, iżda, huma dawn ‘l-​aħwa u ommijiet u wlied’? Sempliċement billi wieħed jara xi numru kbir taʼ nies f’Sala tas-​Saltna, spiss taʼ xi mija jew ftit iktar, li jsejħu lilhom infushom aħwa ma jġagħalx awtomatikament lil dak li jkun iħoss li dawn huma l-​aħwa, l-​ommijiet u t-​tfal tiegħu. Ikkunsidra dan il-​punt: Id-​dixxiplu Ġakbu jfakkarna li sabiex il-​qima tagħna tkun aċċettabbli għal Jehovah, aħna rridu ‘nżuru [‘nieħdu ħsieb,’ NW] l-​iltiema u r-​romol fil-​hemm tagħhom u nżommu ruħna bla tinġis ’il bogħod mid-​dinja.’ (Ġakbu 1:27) Dan ifisser li ma rridux inħallu l-​attitudnijiet tad-​dinja taʼ kburija minħabba l-​qagħda ekonomika u taʼ superjorità fil-​klassi soċjali jġagħluna ma nurux mogħdrija lejn dawn “l-​iltiema u r-​romol.” Minflok, irridu nieħdu l-​inizjattiva biex nestendu s-​sħubija u l-​ospitalità tagħna lejhom.

7. (a) X’inhu l-​veru skop taʼ li wieħed ikun ospitabbli lejn l-​“iltiema u r-​romol”? (b) Min ukoll għandu mnejn ikun jistaʼ jkollu sehem f’li juri ospitalità Kristjana?

⁷ Li nuru ospitalità lejn l-​“iltiema u r-​romol” mhux dejjem jinvolvi li nagħmlu tajjeb għal dak li jistaʼ jonqoshom materjalment. Familji b’ġenitur wieħed jew djar mifrudin reliġjożament m’humiex neċessarjament imqaxqxin finanzjarjament. Madankollu, is-​sħubija bnina, l-​atmosfera tal-​familja, is-​sħubija maʼ persuni taʼ etajiet differenti, u l-​qsim t’affarijiet spiritwali tajbin​—dawn huma aspetti taʼ ħajja li wieħed għandu jgħożż. B’hekk, li wieħed jiftakar li, mhux kemm hija elaborata dik l-​okkażjoni, imma l-​ispirtu taʼ mħabba u unità li jgħodd, kemm tkun ħaġa sabiħa li, xi kultant, saħansitra l-​“iltiema u r-​romol” jistgħu jieħdu sehem f’li juru l-​ospitalità lejn Kristjani sħabhom!—Qabbel 1 Slaten 17:8-16.

Hemm Xi Barranin Fostna?

8. Liema bidla tidher f’ħafna kongregazzjonijiet tax-​Xhieda taʼ Jehovah?

⁸ Aħna qegħdin ngħixu fi żmien taʼ ċaqliq enormi taʼ popolazzjonijiet. “Iktar minn 100 miljun ruħ madwar id-​dinja qegħdin jgħixu f’pajjiżi li tagħhom m’humiex ċittadini, u 23 miljun ruħ jiġu mġegħlin jitilqu minn djarhom fil-​pajjiżi tagħhom stess,” jgħid il-​World Press Review. Riżultat dirett taʼ dan kien li f’ħafna nħawi, speċjalment fi bliet akbar, il-​kongregazzjonijiet tan-​nies taʼ Jehovah li darba kienu komposti fil-​biċċa l-​kbira minn nies taʼ razza jew nazzjonalità waħda issa fihom nies minn partijiet differenti tad-​dinja. Forsi hekk hu fejn toqgħod int. Kif, iżda, għandna nqisu lil dawn “l-​għorba” u “barranin,” bħalma għandu mnejn issejħilhom id-​dinja, li l-​lingwa, id-​drawwiet, u l-​mod taʼ ħajja tagħhom jistgħu jkunu differenti minn tagħna?

9. Liema nasba serja tistaʼ tonsobna rigward il-​ħarsa tagħna dwar l-​“għorba” u l-​“barranin” li deħlin fil-​kongregazzjoni Kristjana?

⁹ Fi kliem sempliċi, ma rridux inħallu kwalunkwe tendenzi xenofobiċi jġagħluna nħossu li aħna b’xi mod jew ieħor jixirqilna iktar il-​privileġġ li nkunu nafu l-​verità minn dawk li ġew minn pajjiż barrani jew hekk-imsejjaħ pagan; lanqas m’għandna nħossu li donnhom dawn in-​nies ġodda qegħdin jiddeffsu f’li jużaw is-​Sala tas-​Saltna jew propjetajiet oħrajn. L-​appostlu Pawlu kellu jfakkar lil xi Kristjani Lhud fl-​ewwel seklu, li kellhom opinjonijiet bħal dawn, li verament ħadd ma kien jixraqlu; kienet il-​qalb tajba mhix mistħoqqa t’Alla li għamlitha possibbli għal xi ħadd, kien min kien, li jikseb is-​salvazzjoni. (Rumani 3:9-12, 23, 24) Aħna għandna nithennew li l-​qalb tajba mhix mistħoqqa t’Alla qiegħda issa tilħaq tant nies li kienu, b’xi mod jew ieħor, ġew imċaħħdin l-​opportunità li jisimgħu l-​aħbar tajba. (1 Timotju 2:4) Kif nistgħu nuru li aħna ngħożżuhom b’mod ġenwin?

10. Kif nistgħu nuru li aħna ospitabbli b’mod ġenwin lejn il-​“barranin” fostna?

¹⁰ Nistgħu nsegwu t-​twissija taʼ Pawlu: “Ilqgħu lil xulxin bħalma Kristu wkoll laqaʼ lilkom, għall-​glorja taʼ Alla.” (Rumani 15:7) Billi aħna konxji li nies minn pajjiżi jew sfondi oħrajn taʼ spiss huma fi żvantaġġ, għandna nuruhom qalb tajba u tħassib meta dan inkunu nistgħu nagħmluh. Għandna nilqgħuhom f’nofsna, nittrattaw lil kull wieħed minnhom “bħal wieħed taʼ ġewwa,” u ‘nħobbuhom bħalna nfusna.’ (Levitiku 19:34) Dan għandu mnejn ma jkunx faċli li nagħmluh, imma se jirnexxilna jekk niftakru l-​parir: “Timxux max-​xejra taʼ din id-​dinja, iżda nbidlu skond it-​tiġdid taʼ fehmietkom, biex iseħħilkom tagħarfu xinhi r-​rieda taʼ Alla, xinhu li jogħġbu, xinhu perfett.”—Rumani 12:2.

Aqsam Mal-​Qaddisin

11, 12. Liema konsiderazzjoni speċjali ġiet murija lil ċerti qaddejja taʼ Jehovah f’(a) Israel tal-​qedem (b) l-​ewwel seklu?

¹¹ Fost dawk li verament jixirqilhom il-​konsiderazzjoni u l-​ospitalità tagħna hemm il-​Kristjani maturi li jaħdmu iebes għall-​ġid spiritwali tagħna. Jehovah għamel provvedimenti speċjali għall-​qassisin u l-​Leviti f’Israel tal-​qedem. (Numri 18:25-29) Fl-​ewwel seklu, il-​Kristjani kienu mħeġġin ukoll biex jieħdu ħsieb taʼ dawk li kienu jaqduhom f’inkarigi speċjali. Ir-​rakkont fit-3 Ġwann 5-8 jagħtina ħjiel tar-​rabta mill-​qrib taʼ mħabba li eżistiet fost il-​Kristjani bikrin.

¹² Ix-​xwejjaħ appostlu Ġwanni stmaha ħafna l-​qalb tajba u l-​ospitalità li Gajju kien wera lejn ċerti aħwa li jivvjaġġaw u li ntbagħtu biex iżuru lill-​kongregazzjoni. Dawn l-​aħwa​—inkluż Demetrijus, x’aktarx dak li wassal l-​ittra—​kienu kollha stranġieri jew li Gajju ma kienx jafhom qabel. Imma ġew milqugħin b’mod ospitabbli minħabba li “dan għamluh għall-​isem [t’Alla].” Ġwanni poġġieha b’dan il-​mod: “Mela nies bħal dawn aħna fid-​dmir li nilqgħuhom [“b’mod ospitabbli,” NW], ħalli b’hekk nissieħbu magħhom fil-​ħidma għat-​tixrid tal-​verità.” —3 Ġwann 1, 7, 8.

13. Min fostna llum speċjalment jixraqlu li jiġi ‘milqugħ b’mod ospitabbli’?

¹³ Illum, ġewwa l-​organizzazzjoni taʼ Jehovah, hemm ħafna li qegħdin jitħabtu b’mod vigoruż għan-​nom tas-​sħubija kollha kemm hi taʼ l-​aħwa. Dawn jinkludu l-​indokraturi li jivvjaġġaw, li jużaw il-​ħin u l-​enerġija tagħhom ġimgħa wara l-​oħra f’li jibnu l-​kongregazzjonijiet; il-​missjunarji, li jħallu lill-​familji u lill-​ħbieb warajhom biex jippridkaw f’pajjiżi barranin; dawk li jaqdu fi djar taʼ Betel jew fl-​uffiċċji tal-​fergħat, li joffru s-​servizzi tagħhom volontarjament biex jappoġġjaw ix-​xogħol tax-​xandir taʼ madwar id-​dinja; u dawk fis-​servizz taʼ pijunier, li jqattgħu l-​maġġor parti tal-​ħin u taʼ l-​enerġija tagħhom fil-​ministeru taʼ l-​għalqa. Bażikament, dawn ilkoll jaħdmu iebes, mhux għal xi glorja jew gwadann persunali, imma sforz l-​imħabba għall-​fratellanza Kristjana u għal Jehovah. Huma jixirqilhom li nimitawhom minħabba d-​devozzjoni tagħhom b’ruħhom kollha u jixirqilhom li jiġu ‘milqugħin b’mod ospitabbli.’

14. (a) Kif inhu li nsiru Kristjani aħjar meta nuru l-​ospitalità lejn uħud leali? (b) Ġesù għala qal li Marija għażlet “l-​aħjar sehem”?

¹⁴ Meta ‘nilqgħu persuni bħal dawn b’mod ospitabbli,’ bħalma wera l-​appostlu Ġwanni, aħna “nissieħbu magħhom fil-​ħidma għat-​tixrid tal-​verità.” F’ċertu sens bħala riżultat insiru Kristjani aħjar. Dan huwa għaliex ix-xogħlijiet Kristjani jinkludu li nagħmlu l-ġid lill-​kredenti sħabna. (Proverbji 3:27, 28; 1 Ġwann 3:18) Niġu ppremjati b’mod ieħor ukoll. Meta Marija u Marta laqgħu lil Ġesù f’darhom, Marta riedet tilqaʼ lil Ġesù kif jixraq billi ppreparatlu “ħafna ħwejjeġ [“affarijiet,” NW].” Marija wriet ospitalità b’mod differenti. Hi “niżlet bil-​qiegħda f’riġlejn il-​Mulej tisimgħu x’kien qiegħed igħid,” u Ġesù faħħarha talli kienet għażlet “l-​aħjar sehem.” (Luqa 10:38-42) Konversazzjonijiet u diskussjonijiet maʼ dawk bi snin twal taʼ esperjenza taʼ spiss ikunu l-​iktar ħaġa sinjifikanti f’xi lejla fil-​kumpanija tagħhom.—Rumani 1:11, 12.

F’Okkażjonijiet Speċjali

15. Liema okkażjonijiet speċjali jistgħu jkunu żminijiet henjin għan-​nies taʼ Jehovah?

¹⁵ Għalkemm il-​veri Kristjani ma jiħdux sehem fi drawwiet popolari jew josservaw btajjel u festi dinjin, hemm okkażjonijiet fejn jiltaqgħu flimkien biex igawdu l-​kumpanija taʼ xulxin. Per eżempju, Ġesù attenda għall-​festa taʼ tieġ f’Kana u kkontribwixxa għall-​ferħ taʼ dik l-​okkażjoni billi wettaq l-​ewwel miraklu tiegħu hemmhekk. (Ġwann 2:1-11) Bl-​istess mod illum, in-​nies taʼ Jehovah iqattgħu ħinijiet henjin flimkien f’okkażjonijiet speċjali simili, u ċelebrar u festeġġjar xierqa isebbħu dawn l-​okkażjonijiet. X’inhu, iżda, xieraq?

16. Liema linji taʼ gwida għandna dwar kondotta xierqa saħansitra f’okkażjonijiet speċjali?

¹⁶ Mill-​istudju tagħna tal-​Bibbja, nitgħallmu x’inhi l-​kondotta xierqa għall-​Kristjani, u dan aħna nattwawh f’kull ħin. (Rumani 13:12-14; Galatin 5:19-21; Efesin 5:3-5) Okkażjonijiet soċjali, sew f’konnessjoni maʼ tiġijiet u sew għal xi raġuni oħra, ma jagħtuniex il-​liċenzja biex nabbandunaw il-​livelli Kristjani tagħna jew biex nagħmlu xi ħaġa li s-​soltu ma nagħmluhiex; lanqas m’aħna obbligati nsegwu d-​drawwiet kollha tal-​pajjiż li ngħixu fih. Ħafna minn dawn huma bbażati fuq prattiċi reliġjużi foloz jew superstizzjonijiet, u oħrajn jinvolvu kondotta li b’mod ċar m’hijiex aċċettabbli għall-​Kristjani.—1 Pietru 4:3, 4.

17. (a) Liema fatturi juru li l-​festa tat-​tieġ taʼ Kana kienet organizzata tajjeb u li kien hemm superviżjoni xierqa? (b) Liema ħaġa tindika li Ġesù approva dik l-​okkażjoni?

¹⁷ Meta naqraw Ġwann 2:1-11, m’huwiex diffiċli biex naraw li din kienet okkażjoni elaborata u li kien hemm numru ġmielu taʼ mistednin. Madankollu, Ġesù u d-​dixxipli tiegħu kienu “mistednin” formalment; huma ma qabdux u marru hemmhekk, avolja minn taʼ l-​anqas xi wħud minnhom x’aktarx li kienu jiġu minn dak li stieden għall-​festa. Ninnotaw ukoll li kien hemm dawk li kienu “qaddejja” kif ukoll “direttur, [NW]” li kellu jagħti direzzjonijiet inkwantu x’kellu jiġi servut u x’kellu jsir. Dan kollu jindika li l-​ħaġa kienet organizzata tajjeb u kien hemm superviżjoni xierqa. Ir-​rakkont jikkonkludi billi jistqarr li Ġesù, b’dak li għamel fit-​tieġ “wera l-​glorja tiegħu.” Kien hu se jagħżel dik l-​okkażjoni biex jagħmel hekk kieku dan kien xi festin mimli frattarija u bla kontroll? Bla dubju li le.

18. X’irid jiġi kkunsidrat bis-​serjetà inkwantu għal kwalunkwe okkażjoni soċjali?

¹⁸ Xi ngħidu, allura, dwar kwalunkwe okkażjoni speċjali li għandna mnejn norganizzaw? Irridu niftakru li l-​iskop li nilqgħu lil oħrajn b’ospitalità huwa biex inkunu nistgħu lkoll “nissieħbu magħhom fil-​ħidma għat-​tixrid tal-​verità.” B’hekk, m’huwiex biżżejjed li taqbad u tittimbra lil xi okkażjoni bħala tax-​“Xhieda.” Tistaʼ tistaqsi l-​mistoqsija, Hija din fil-​fatt xiehda li turi x’aħna u x’nemmnu? Qatt m’għandna nqisu okkażjonijiet bħal dawn bħala opportunitajiet biex naraw sa fejn nistgħu naslu f’li nimpikaw mad-​dinja fil-​modi tagħha, f’li nagħtuha għall-​“ġibda tal-​ġisem u l-​ġibda tal-​għajnejn u l-​kburija tal-​ħajja.” (1 Ġwann 2:15, 16) Minflok, dawn l-​okkażjonijiet iridu jirriflettu kif jixraq l-​irwol tagħna bħala Xhieda taʼ Jehovah, u għandna nkunu ċerti li dak li nagħmlu jġib glorja u unur lil Jehovah.—Mattew 5:16; 1 Korintin 10:31-33.

‘Kunu Ospitabbli Mingħajr Tgergir’

19. Għala jeħtieġ li “nkunu ospitabbli lejn xulxin mingħajr tgergir”?

¹⁹ Hekk kif il-​kundizzjonijiet tad-​dinja jkomplu jiddeterjoraw u n-​nies isiru iktar u iktar mifrudin, jeħtieġ li nagħmlu dak kollu li nistgħu biex insaħħu l-​għaqda soda li teżisti fost il-​veri Kristjani. (Kolossin 3:14) Għal dan l-​għan irid ikollna “mħabba sħiħa lejn xulxin,” bħalma ħeġġiġna Pietru. Imbagħad, f’termini prattiċi, hu żied: “Kunu ospitabbli lejn xulxin mingħajr tgergir.”(1 Pietru 4:7-9, NW) Lesti aħna li nieħdu l-​inizjattiva biex nuru ospitalità lejn ħutna, biex noħorġu barra minn triqitna biex nuru qalb tajba u nkunu t’għajnuna? Jew ingergru meta tiġi opportunità bħal din? Jekk nagħmlu hekk, aħna nġibu fix-​xejn il-​ferħ li jistaʼ jkollna u nitilfu wkoll il-​premju taʼ hena talli nagħmlu l-​ġid.—Proverbji 3:27; Atti 20:35.

20. Liema barkiet hemm lesti għalina jekk nipprattikaw li nkunu ospitabbli fid-​dinja mifruda tal-​lum?

²⁰ Li naħdmu id f’id maʼ Kristjani sħabna, u li nkunu qalbna tajba u ospitabbli lejn xulxin, se jġib barkiet bla tarf. (Mattew 10:40-42) Lil uħud bħal dawn Jehovah wegħedhom li kellu ‘jeħodhom igħammru fil-​kenn tiegħu. Ma [kellhomx] ibatu iktar ġuħ, anqas għatx ma jagħmel bihom iktar.’ Li wieħed ikun fil-​kenn taʼ Jehovah ifisser li jgawdi l-​protezzjoni u l-​ospitalità tiegħu. (Apokalissi 7:15, 16; Isaija 25:6) Iva, preċiż quddiemna hemm il-​prospett li ngawdu l-​ospitalità taʼ Jehovah għal dejjem.—Salm 27:4; Salm 61:4, 5 [Salm 61:3, 4, NW]. (w96 10/1)

Tistaʼ Tispjega?

◻ X’ma rridux ninjoraw jekk irridu nsibu ferħ u sodisfazzjon veri?

◻ Min huma l-​“iltiema u r-​romol,” u kif għandna ‘nieħdu ħsiebhom’?

◻ Kif għandna nqisu l-​“għorba” u l-​“barranin” fostna?

◻ Min illum jixraqlu konsiderazzjoni partikulari?

◻ Okkażjonijiet speċjali kif għandhom jirriflettu l-​ispirtu veru t’ospitalità?

[Stampi f’paġna 30, 31]

F’okkażjonijiet taʼ ffesteġġjar nistgħu nuru ospitalità lejn il-​barranin, l-​iltiema, dawk fis-​servizz full-time, u mistednin oħrajn