Savati fi Żmien Mimli Gwaj
L-ISTABBILIMENT tan-negozju b’ħames sulari f’Seoul, il-Korea, waqaʼ f’salt, b’mijiet taʼ nies maqbudin ġewwa! Ħaddiema tas-salvataġġ ħadmu lejl u nhar biex isalvaw kemm jistaʼ jkun ħajjiet. Iktar ma beda jgħaddi ż-żmien, iktar beda jonqos iċ-ċans li jinstabu iżjed nies midfunin taħt il-muntanja taʼ konkrit u ħadid.
Hekk kif ġiet maqtugħa kull tama li jinstabu iżjed vittmi, ġrat xi ħaġa taʼ l-iskantament. Instemgħet tnehida fjakka u muġugħa minn taħt it-terrapien. Il-ħaddiema tas-salvataġġ ħaffru bil-ġenn b’idejhom stess sabiex jeħilsu lil waħda mara taʼ 19-il sena li kienet ilha midfuna ħajja għal 16-il ġurnata sħaħ. Xaft taʼ lift li kien waqaʼ kien għamel toqba taʼ protezzjoni fuqha u żamm tunnellati taʼ konkrit milli jaqgħu fuqha. Għalkemm kienet ixxottat sew mill-ilma u midruba, hi ħelsitha mill-mewt!
Illum il-ġurnata, rari jgħaddi xahar li ma jkunx fih rapporti taʼ xi diżastru jew ieħor, kemm jekk inhu xi terremot, xi maltempata kbira, xi żbroffar taʼ xi vulkan, xi aċċident, jew ġuħ. U stejjer spettakolari taʼ wħud li jiġu salvati b’xogħol taʼ salvataġġ jinteressaw u jaffaxxinaw lill-miljuni li jisimgħu l-aħbarijiet. Madankollu, twissija taʼ gwaj li ġej—wieħed akbar minn dak li qatt rat l-istorja umana—ġiet injorata mill-biċċa l-kbira tan-nies. (Mattew 24:21) Il-Bibbja tiddeskrivi dan l-avveniment b’dan il-kliem: “Araw! Il-ħsara tgħaddi minn ġens għal ġens, u riefnu kbir se jqum minn truf l-art. U jkunu l-maqtulin mill-Mulej dakinhar, mxerrda minn tarf sa tarf taʼ l-art. Ma jibkuhomx, ma jiġbruhomx, ma jidfnuhomx; u jsiru demel fuq wiċċ l-art.”—Ġeremija 25:32, 33.
Kliem li jaħsdek! Imma kuntrarju għad-diżastri naturali u għall-aċċidenti, dan il-gwaj mhux se jkun tbiċċir indiskriminanti. Fil-fatt, huwa possibbli li wieħed jibqaʼ ħaj—li int tibqaʼ ħaj!
Żmien T’Urġenza
Biex jagħraf sew dan il-fatt, wieħed l-ewwelnett irid jifhem għalfejn se jseħħ dan il-gwaj. Attwalment, hija l-unika soluzzjoni vera għall-problemi taʼ l-umanità. Ftit huma dawk illum li jħossuhom fiż-żgur u fis-sigurtà. Minkejja l-aqwa sforzi tax-xjenza, il-mard li jittieħed qed ikompli jkisser il-popolazzjoni tad-dinja. Gwerer li rriżultaw minn differenzi reliġjużi, tribwali, u politiċi qegħdin jaħsdu ħajjiet umani bl-eluf. Il-ġuħ iżid mal-miżerja u s-sofferenza taʼ rġiel, nisa, u tfal innoċenti. Tmermir fil-moralità qed igerrem l-istess pedament tas-soċjetà; saħansitra t-tfal ġew korrotti.
B’reqqa straordinarja, profezija tal-Bibbja miktuba iżjed minn 1,900 sena ilu tiddeskrivi s-sitwazzjoni tagħna. Din tgħid: “Kun af dan, li fl-aħħar jiem jiġu żmenijiet imwiegħra.”—2 Timoteus 3:1, Saydon; qabbel Mattew 24:3-22.
Taħseb li huwa raġonevoli li Alla taʼ mħabba se jkun indifferenti għall-għawġ tagħna? Il-Bibbja tgħid: “Hu li hu tassew Alla, li sawwar l-art, għamilha u wettaqha, ma ħalaqhiex għall-baħħ, sawwarha biex jgħammru fiha.” (Isaija 45:18) Iva, minflok ma jħalli lil din il-pjaneta sabiħa tiġi meqruda u l-abitanti kollha tagħha jiġu fi tmiem, Alla se jintervjeni. Il-mistoqsija hi, Kif se jagħmel hekk?
Agħżel Il-Ħajja!
Il-Bibbja twieġeb f’Salm 92:8 (Salm 92:7, New World Translation): “Mqar jekk iħaddru bħall-ħaxix il-ħżiena, u jwarrdu dawk kollha li jagħmlu l-ħażen, lkoll għad jinqerdu għal dejjem.” Is-soluzzjoni t’Alla għall-problemi tad-dinja hija l-eliminar tal-ħażen innifsu. B’ferħ, dan ma jfissirx li hemm għalfejn jiġu eliminati n-nies kollha. Salm 37:34 jassigurana: “Ittama fil-Mulej u ħares triqtu, hu jerfgħek biex tikseb l-art; mbagħad tara l-ħżiena meqruda.”
Dan il-kliem jindika li hemm ċans li niġu salvati minn l-akbar gwaj li qatt se ġġarrab l-umanità. Alla tana għażla. Il-kliem li bih Mosè wissa lill-Iżraeliti hekk kif kienu lesti biex jidħlu fl-Art Imwiegħda japplika daqstant għalina llum: “Jien . . . qegħedt quddiemek, il-barka u s-saħta. Agħżel il-ħajja biex tgħix int u nislek.”—Dewteronomju 30:19. (w97 8/15)
[Sors taʼ l-Istampa f’paġna 3]
Yunhap News Agency/Sipa Press