Barkiet Akbar Permezz tal-​Patt il-​Ġdid

“Hu aqwa l-​patt li tiegħu [Kristu] huwa l-​medjatur.”—LHUD 8:6.

1. Min ta prova li kien in-​‘nisel tal-​mara’ mwiegħed f’Għeden, u lil dan kif ‘insaħaqlu għarqubu’?

WARA li Adam u Eva dinbu, Jehovah ddikjara ġudizzju fuq Satana, dak il-​wieħed li qarraq b’Eva, billi qallu: “Jien inqajjem mibegħda bejnek u bejn il-​mara, bejn nislek u nisilha, u hu jisħaqlek rasek u int tisħaqlu għarqubu.” (Ġenesi 3:15) Meta Ġesù tgħammed fix-​Xmara Ġordan fis-​sena 29 E.K., tfaċċa sa fl-​aħħar in-​Nisel imwiegħed f’Għeden. Mal-​mewt tiegħu fuq zokk tat-​tortura fis-​sena 33 E.K., ġiet imwettqa parti minn dik il-​profezija antika. Satana kien ‘saħaq għarqub’ in-​Nisel.

2. Skond kliem Ġesù stess, il-​mewt tiegħu kif tibbenefika lill-​umanità?

² B’ferħ, dik il-​ferita, għalkemm ikkaġunat uġigħ terribbli, ma kinitx permanenti. Ġesù ġie mqajjem mill-​mewt bħala spirtu immortali u telaʼ għand Missieru fis-​sema, fejn offra l-​valur tad-​demm imxerred tiegħu bħala “fidwa għall-​kotra.” B’hekk, twettaq il-​kliem tiegħu stess: “Hekk jeħtieġ li jkun merfugħ Bin il-​bniedem, biex kull min jemmen, fih ikollu l-​ħajja taʼ dejjem. Għax Alla hekk ħabb lid-​dinja li ta lil Ibnu l-​waħdieni, biex kull min jemmen fih ma jintilifx, iżda jkollu l-​ħajja taʼ dejjem.” (Mattew 20:28; Ġwann 3:14-16; Lhud 9:12-14) Il-​patt il-​ġdid għandu rwol fundamentali fit-​twettiq tal-​profezija taʼ Ġesù.

Il-​Patt il-​Ġdid

3. Il-​patt il-​ġdid meta beda jidher li kien qed jopera għall-​ewwel darba?

³ Ftit qabel mewtu, Ġesù qal lis-​segwaċi tiegħu li d-​demm imxerred tiegħu kien id-​“demm tal-​Patt [il-ġdid].” (Mattew 26:28; Luqa 22:20) Għaxart ijiem wara li telaʼ s-​sema, il-​patt il-​ġdid beda jidher li kien qed jopera meta ġie mferraʼ l-​ispirtu qaddis fuq madwar 120 dixxiplu miġburin f’kamra fis-​sular taʼ fuq ġewwa Ġerusalemm. (Atti 1:15; 2:1-4) Il-​fatt li dawn il-​120 iddaħħlu fil-​patt il-​ġdid wera li l-​patt taʼ “qabel”, il-​patt tal-​Liġi, issa sar antikwat.—Lhud 8:13.

4. Kien il-​patt il-​qadim xi falliment? Spjega.

⁴ Kien il-​patt il-​qadim xi falliment? Xejn affattu. Veru li ladarba dan issa ġie ssostitwit, Iżrael naturali ma kienx għadu l-​poplu speċjali t’Alla. (Mattew 23:38) Imma dak kien minħabba d-​diżubbidjenza taʼ Iżrael u minħabba li ċaħdu l-​Midluk taʼ Jehovah. (Eżodu 19:5; Atti 2:22, 23) Qabel ma ġiet issostitwita l-​Liġi, madankollu, din wettqet ħafna. Għal sekli sħaħ, ipprovdiet mezz biex wieħed javviċina lil Alla u protezzjoni mir-​reliġjon falza. Kien fiha fatturi li taw stampa bil-​quddiem tal-​patt il-​ġdid u, bis-​sagrifiċċji ripetuti tagħha, uriet kemm il-​bniedem għandu bżonn disperatament tal-​fidwa mid-​dnub u l-​mewt. Tabilħaqq, il-​Liġi kienet “tmexxina qisna tfal lejn Kristu.” (Galatin 3:19, 24; Rumani 3:20; 4:15; 5:12; Lhud 10:1, 2) Madankollu, kien permezz tal-​patt il-​ġdid li l-​barka mwiegħda lil Abraham kellha tiġi mwettqa għalkollox.

Il-​Ġnus Imberkin Permezz tan-​Nisel t’Abraham

5, 6. Fit-​twettiq spiritwali bażiku tal-​patt Abrahamiku, min hu n-​Nisel t’Abraham, u liema ġens kien l-​ewwel f’li jirċievi barka permezz tiegħu?

⁵ Jehovah wiegħed lil Abraham: “Jitbierku b’nislek il-​ġnus kollha taʼ l-​art.” (Ġenesi 22:18) Taħt il-​patt il-​qadim, ħafna barranin taʼ qalb ġwejda ġew imberkin permezz tas-​sħubija tagħhom maʼ Iżrael, in-​nisel nazzjonali t’Abraham. Fit-​twettiq spiritwali bażiku tiegħu, madankollu, in-​Nisel t’Abraham kien bniedem wieħed perfett. Pawlu dan spjegah meta qal: “[I]l-wegħdiet saru lil Abraham ‘u lin-​nisel’ tiegħu. L-​iskrittura ma tgħidx ‘u lin-​nislijiet’, bħallikieku wieħed: ‘lin-​nisel tiegħek’, li hu Kristu.”—Galatin 3:16.

⁶ Iva, Ġesù hu n-​Nisel t’Abraham, u permezz Tiegħu l-​ġnus jirċievu barka bil-​wisq iktar superjuri minn kwalunkwe ħaġa possibbli għal Iżrael naturali. Tabilħaqq, l-​ewwel ġens li rċieva din il-​barka kien Iżrael innifsu. Ftit wara Pentekoste tas-​sena 33 E.K., l-​appostlu Pietru qal lil grupp taʼ Lhud: “Intom ulied il-​profeti u werrieta tal-​Patt li Alla għamel maʼ missirijietkom meta qal lil Abraham, ‘F’nislek jitbierku l-​ġnus kollha taʼ l-​art.’ Kien għalikom l-​ewwel li Alla qajjem il-​Qaddej tiegħu u bagħtu jberikkom, billi kull wieħed minnkom jerġaʼ lura minn ħżunitu.”—Atti 3:25, 26.

7. Liema ġnus ġew imberkin permezz taʼ Ġesù, in-​Nisel t’Abraham?

⁷ Wara ftit il-​barka ġiet estiża għas-​Samaritani u mbagħad għall-​Ġentili. (Atti 8:14-17; 10:34-48) F’xi żmien bejn is-​snin 50 u 52 E.K., Pawlu kiteb lill-​Kristjani fil-​Galazja fl-​Asja Minuri: “L-​Iskrittura, li rat sa minn qabel li Alla kellu jiġġustifika l-​Ġentili permezz tal-​fidi, ħabbret minn qabel lil Abraham: ‘Fik jitbierku l-​ġnus kollha’. Għalhekk dawk li jgħixu bil-​fidi jitbierku maʼ Abraham li kien jemmen.” (Galatin 3:8, 9; Ġenesi 12:3) Għalkemm ħafna Kristjani fil-​Galazja kienu nies mill-​“ġnus kollha,” huma ġew imberkin permezz taʼ Ġesù minħabba l-​fidi tagħhom. B’liema mod?

8. Għall-​Kristjani taʼ żmien Pawlu, x’kien jinkludi li jitbierku permezz tan-​Nisel t’Abraham, u kemm, finalment, jirċievu dik il-​barka?

⁸ Pawlu qal lill-​Kristjani Galatin, kienu minn liema sfond kienu: “Jekk intom taʼ Kristu, intom ukoll nisel Abraham, werrieta skond il-​wegħda.” (Galatin 3:29) Għal dawk il-​Galatin, il-​barka permezz tan-​Nisel t’Abraham kienet tinkludi li jkunu parteċipanti fil-​patt il-​ġdid u wkoll li jkunu werrieta sħab maʼ Ġesù, imseħbin maʼ Ġesù fin-​nisel t’Abraham. Ma nafux kemm kienet il-​popolazzjoni taʼ Iżrael tal-​qedem. Nafu biss li kienet saret ‘kotrana bħar-​ramel tal-​baħar.’ (1 Slaten 4:20) Madankollu, nafuh in-​numru finali taʼ l-​imseħbin taʼ Ġesù fin-​nisel spiritwali​—144,000. (Apokalissi 7:4; 14:1) Dawk il-​144,000 joħorġu minn “kull tribù u lsien, minn kull poplu u ġens” taʼ l-​umanità u jieħdu sehem f’li jamministraw għal jerġaʼ oħrajn il-​barkiet tal-​patt Abrahamiku.—Apokalissi 5:9.

Profezija Mwettqa

9. Dawk fil-​patt il-​ġdid kif għandhom il-​liġi taʼ Jehovah ġewwa fihom?

⁹ Meta kien qed ibassar dwar il-​patt il-​ġdid, Ġeremija kiteb: “Dan ikun il-​patt li għad nagħmel maʼ dar Iżrael wara dawk il-​jiem, oraklu tal-​Mulej. [I]nqiegħed il-​liġi tiegħi fosthom u niktibha f’qalbhom.” (Ġeremija 31:33) Karatteristika taʼ dawk fil-​patt il-​ġdid hija, li huma jaqdu lil Jehovah sforz l-​imħabba tagħhom. (Ġwann 13:35; Lhud 1:9) Il-​liġi taʼ Jehovah hija miktuba ġewwa qalbhom, u huma jixtiequ b’mod ħerqan jagħmlu r-​rieda tiegħu. Veru li f’Iżrael tal-​qedem xi individwi leali kienu jħobbu l-​liġi taʼ Jehovah intensament. (Salm 119:97) Imma ħafna minnhom ma kinux, u madankollu baqgħu parti mill-​ġens. Ħadd ma jistaʼ jibqaʼ fil-​patt il-​ġdid jekk il-​liġi t’Alla ma tkunx miktuba f’qalbu.

10, 11. Għal dawk fil-​patt il-​ġdid, Jehovah b’liema mod ‘ikun Alla tagħhom,’ u kif se jkunu jafuh ilkoll kemm huma?

¹⁰ Jehovah kompla jgħid dan rigward dawk fil-​patt il-​ġdid: “Jiena nkun Alla tagħhom u huma jkunu l-​poplu tiegħi.” (Ġeremija 31:33) F’Iżrael tal-​qedem, kienu ħafna li qiemu l-​allat tal-​ġnus, imma dawn xorta baqgħu Iżraeliti. Fuq il-​bażi tal-​patt il-​ġdid, Jehovah ħalaq ġens spiritwali, “Iżrael taʼ Alla,” biex jieħu post Iżrael naturali. (Galatin 6:16; Mattew 21:43; Rumani 9:6-8) Madankollu, ħadd ma se jibqaʼ parti mill-​ġens spiritwali ġdid jekk jieqaf milli jqim lil Jehovah u lilu waħdu.

¹¹ Jehovah qal ukoll: “Ilkoll kemm huma jkunu jafuni, miż-​żgħir sal-​kbir.” (Ġeremija 31:34) F’Iżrael, ħafna sempliċement injoraw lil Jehovah, billi fil-​fatt qalu: “Ma jagħmel il-​Mulej la ġid, lanqas deni!” (Sofonija 1:12) Ħadd ma se jibqaʼ parti mill-​Iżrael t’Alla jekk jinjora lil Jehovah jew iniġġes il-​qima pura. (Mattew 6:24; Kolossin 3:5) L-​Iżraeliti spiritwali huma “dawk li jkunu jagħrfu lil Alla tagħhom.” (Danjel 11:32) Huma jitgħaxxqu li ‘jagħrfu lil dak Alla waħdu veru, u lil Ġesù Kristu.’ (Ġwann 17:3) Li jkunu jafu lil Ġesù japprofondixxi l-​għarfien tagħhom dwar Alla ladarba, b’mod uniku, Ġesù “għarrafhulna [lil Alla].”—Ġwann 1:18; 14:9-11.

12, 13. (a) Jehovah fuq liema bażi jaħfer id-​dnubiet taʼ dawk fil-​patt il-​ġdid? (b) Inkwantu għall-​maħfra tad-​dnubiet, il-​patt il-​ġdid kif inhu superjuri għall-​patt il-​qadim?

¹² Fl-​aħħar, Jehovah wiegħed: “Jien naħfrilhom ħżunithom, u ħtijiethom aktar ma niftakarhomx.” (Ġeremija 31:34b) Il-​Liġi taʼ Mosè kienet tinkludi mijiet taʼ regolamenti bil-​miktub li l-​Iżraeliti ġew mitlubin li jobduhom. (Dewteronomju 28:1, 2, 15) Dawk kollha li kienu jiksru l-​Liġi kienu joffru sagrifiċċji biex jgħattu dnubiethom. (Levitiku 4:1-7; 16:1-31) Ħafna Lhud bdew jemmnu li setgħu jsiru twajbin permezz taʼ xogħlijiethom stess skond il-​Liġi. Il-​Kristjani, iżda, jirrealizzaw li qatt ma jistgħu jaqilgħu t-​tjieba permezz taʼ xogħlijiethom stess. Ma jistgħux jevitaw li jidinbu. (Rumani 5:12) Taħt il-​patt il-​ġdid, waqfa taʼ tjieba quddiem Alla hija possibbli biss fuq il-​bażi tas-​sagrifiċċju taʼ Ġesù. Madankollu, waqfa bħal din hija għotja, qalb tajba mhix mistħoqqa mingħand Alla. (Rumani 3:20, 23, 24) Jehovah għadu jesiġi l-​ubbidjenza mingħand il-​qaddejja tiegħu. Pawlu jgħid li dawk fil-​patt il-​ġdid għandhom lil ‘Kristu bħala l-​liġi tagħhom.’—1 Korintin 9:21.

¹³ Għaldaqstant, għall-​Kristjani wkoll hemm sagrifiċċju għad-​dnub, imma dan huwa wieħed bil-​wisq iktar taʼ valur mis-​sagrifiċċji taħt il-​patt tal-​Liġi. Pawlu kiteb: “Kull qassis ieħor [taħt il-​patt tal-​Liġi] imur kuljum biex jaqdi l-​ministeru tiegħu, u joffri u jerġaʼ joffri l-​istess sagrifiċċju, bla ma jistgħu qatt ineħħu d-​dnubiet. Imma Kristu, wara li offra sagrifiċċju wieħed għad-​dnubiet, qagħad għal dejjem fuq in-​naħa tal-​lemin taʼ Alla.” (Lhud 10:11, 12) Ladarba l-​Kristjani fil-​patt il-​ġdid jeżerċitaw fidi fis-​sagrifiċċju taʼ Ġesù, Jehovah jiddikjarahom twajbin, mingħajr dnub, u b’hekk f’pożizzjoni biex jiġu midlukin bħala wliedu spiritwali. (Rumani 5:1; 8:33, 34; Lhud 10:14-18) Meta dawn jidinbu minħabba l-​imperfezzjoni umana, huma jistgħu jitolbu bil-​ħniena lil Jehovah biex jaħfrilhom, u Jehovah jaħfrilhom fuq il-​bażi tas-​sagrifiċċju taʼ Ġesù. (1 Ġwann 2:1, 2) Madankollu, jekk jagħżlu korsa taʼ dnub apposta, huma jitilfu l-​waqfa taʼ tjieba tagħhom u l-​privileġġ li jkunu parteċipanti fil-​patt il-​ġdid.—Lhud 2:2, 3; 6:4-8; 10:26-31.

Il-​Patt il-​Qadim u Dak Ġdid

14. Liema ċirkonċiżjoni kienet meħtieġa taħt il-​patt tal-​Liġi? taħt il-​patt il-​ġdid?

¹⁴ L-​irġiel fil-​patt il-​qadim kienu jiġu ċirkonċiżi bħala sinjal li kienu taħt il-​Liġi. (Levitiku 12:2, 3; Galatin 5:3) Wara li bdiet il-​kongregazzjoni Kristjana, xi wħud ħassew li l-​Kristjani li ma kinux Lhud kellhom jiġu ċirkonċiżi wkoll. Imma l-​appostli u l-​anzjani f’Ġerusalemm, iggwidati mill-​Kelma t’Alla u mill-​ispirtu qaddis, indunaw li dan ma kienx neċessarju. (Atti 15:1, 5, 28, 29) Ftit tas-​snin wara, Pawlu qal: “Mhux dak li jidher li hu Lhudi minn barra hu Lhudi, lanqas min għandu ġismu ċirkonċiż; il-​Lhudi veru hu dak li hu Lhudi minn ġewwa; iċ-​ċirkonċiżjoni vera hi dik tal-​qalb, opra taʼ l-​ispirtu u mhux tal-​Liġi miktuba.” (Rumani 2:28, 29) Iċ-​ċirkonċiżjoni litterali, saħansitra għal-​Lhud naturali, ma kellhiex iktar valur spiritwali f’għajnejn Jehovah. Għal dawk fil-​patt il-​ġdid, il-​qalb, mhux il-​ġisem, trid tiġi ċirkonċiża. Kull ħaġa fil-​ħsieb, fix-​xewqat, u fil-​motivazzjonijiet tagħhom li ma togħġobx lil Jehovah jew hija maħmuġa f’għajnejh trid tiġi mqaċċta ’l barra.a Ħafna llum huma testimonjanza ħajja taʼ kif il-​qawwa taʼ l-​ispirtu qaddis tittrasforma l-​mod taʼ kif kienu jaħsbuha b’dan il-​mod.—1 Korintin 6:9-11; Galatin 5:22-24; Efesin 4:22-24.

15. Iżrael naturali u Iżrael t’Alla kif jikkomparaw maʼ xulxin inkwantu għal ħakma rjali?

¹⁵ Fl-​arranġament tal-​patt tal-​Liġi, Jehovah kien is-​Sultan taʼ Iżrael, u maż-​żmien eżerċita s-​sovranità tiegħu permezz taʼ slaten umani f’Ġerusalemm. (Isaija 33:22) Jehovah hu wkoll Sultan taʼ l-​Iżrael t’Alla, Iżrael spiritwali, u mis-​sena 33 E.K. ’l hawn, hu saltan permezz taʼ Ġesù Kristu, li rċieva “kull setgħa fis-​sema u fl-​art.” (Mattew 28:18; Efesin 1:19-23; Kolossin 1:13, 14) Illum, l-​Iżrael t’Alla jirrikonoxxi lil Ġesù bħala s-​Sultan tas-​Saltna tas-​sema t’Alla, li ġiet stabbilita fl-​1914. Ġesù hu Sultan bil-​wisq aħjar milli saħansitra kienu Ħeżekija, Ġosija, u s-​slaten l-​oħrajn leali f’Iżrael tal-​qedem.—Lhud 1:8, 9; Apokalissi 11:15.

16. L-​Iżrael t’Alla liema tip taʼ saċerdozju hu?

¹⁶ Iżrael mhux biss kien saltna imma kellu wkoll saċerdozju midluk. Fis-​sena 33 E.K., l-​Iżrael t’Alla ħa post Iżrael naturali u sar il-​“qaddej” taʼ Jehovah, ix-​“xhieda” tiegħu. (Isaija 43:10) Il-​kliem taʼ Jehovah lil Iżrael iddokumentat f’Isaija 43:21 u f’Eżodu 19:5, 6 beda japplika minn dakinhar għal Iżrael spiritwali t’Alla. Il-​ġens spiritwali ġdid t’Alla kien issa “ġens maħtur, saċerdozju rjali, nazzjon qaddis, poplu li Alla kiseb għalih [“għal pussess speċjali,” NW],” responsabbli biex ‘ixandar it-​tifħir t’Alla.’ (1 Pietru 2:9) Dawk kollha fl-​Iżrael t’Alla, irġiel u nisa, jifformaw saċerdozju kollettiv. (Galatin 3:28, 29) Bħala l-​parti sekondarja tan-​nisel t’Abraham, huma issa jgħidu: “Ifirħu u għajjtu bil-​ferħ, ja ġnus, lill-​poplu tiegħu.” (Dewteronomju 32:43) Dawk taʼ Iżrael spiritwali li għadhom fuq l-​art jifformaw “l-​irsir leali u diskret.” (Mattew 24:45-47, NW) Servizz sagru aċċettabbli għal Alla jistaʼ jingħata biss, fi sħubija magħhom.

Is-​Saltna t’Alla ​—It-​Twettiq Finali

17. Liema twelid jesperjenzaw dawk fil-​patt il-​ġdid?

¹⁷ L-​Iżraeliti li twieldu wara l-​1513 Q.E.K. daħlu fil-​patt tal-​Liġi malli twieldu. Dawk li lilhom Jehovah jieħu fil-​patt il-​ġdid jesperjenzaw twelid ukoll​—fil-​każ tagħhom, twelid spiritwali. Ġesù semma dan lil Nikodemu l-​Fariżew meta qallu: “Tassew tassew ngħidlek li jekk wieħed ma jitwelidx mill-​ġdid, ma jistax jara s-​Saltna taʼ Alla.” (Ġwann 3:3) Il-​120 dixxiplu f’Pentekoste tas-​sena 33 E.K. kienu l-​ewwel bnedmin imperfetti li ġarrbu dan it-​twelid ġdid. Billi ġew iddikjarati twajbin taħt il-​patt il-​ġdid, huma rċevew l-​ispirtu qaddis bħala “rahan” tal-​wirt irjali tagħhom. (Efesin 1:14) Huma kienu ‘twieldu mill-​ispirtu’ biex isiru wlied adottati t’Alla, u dan għamilhom ħut Ġesù u b’hekk “werrieta maʼ Kristu.” (Ġwann 3:6; Rumani 8:16, 17) Il-​fatt li huma ‘twieldu mill-​ġdid’ fetaħ it-​triq għal prospetti taʼ l-​għaġeb.

18. It-​twelid mill-​ġdid jiftaħ it-​triq għal liema prospetti taʼ l-​għaġeb għal dawk fil-​patt il-​ġdid?

¹⁸ Meta kien qiegħed jaġixxi bħala medjatur tal-​patt il-​ġdid, Ġesù għamel patt ieħor mas-​segwaċi tiegħu, li jgħid: “Bħalma Missieri ħejja saltna għalija, hekk ukoll jiena nħejji għalikom.” (Luqa 22:29) Dan il-​patt tas-​Saltna ħejja l-​mogħdija għat-​twettiq taʼ viżjoni rimarkevoli, iddokumentata f’Danjel 7:13, 14, 22, 27. Danjel ra “bħal iben taʼ bniedem” qiegħed jiġi mogħti l-​awtorità taʼ sultan mix-​“Xiħ fl-​għomor,” Alla Jehovah. Imbagħad Danjel ra li “l-​qaddisin irċevew is-​saltna.” Ġesù hu dak “bħal iben taʼ bniedem” li, fl-​1914, irċieva s-​Saltna mingħand Alla Jehovah. Id-​dixxipli tiegħu midlukin bl-​ispirtu huma “l-​qaddisin” li għandhom sehem miegħu f’dik is-​Saltna. (1 Tessalonikin 2:12) Kif?

19, 20. (a) Għal dawk fil-​patt il-​ġdid, liema twettiq finali u glorjuż se jkollha l-​wegħda taʼ Jehovah lil Abraham? (b) Liema mistoqsija oħra jeħtieġ li tiġi kkunsidrata?

¹⁹ Wara l-​mewt tagħhom, dawn il-​midlukin ikunu bħal Ġesù mqajmin mill-​mewt bħala ħlejjaq spirti immortali biex jaqdu miegħu bħala slaten u qassisin fis-​sema. (1 Korintin 15:50-53; Apokalissi 20:4, 6) X’tama glorjuża din! “Għad isaltnu [bħala slaten] fuq l-​art,” mhux sempliċement fuq l-​art taʼ Kangħan. (Apokalissi 5:10) Se ‘jirtuhom bwieb l-​għedewwa tiegħu’? (Ġenesi 22:17) Iva, u b’mod konklussiv, meta jaraw b’għajnejhom il-​qerda tal-​prostituta reliġjuża ostili, Babilonja l-​Kbira, u meta dawn il-​midlukin irxoxtati jieħdu sehem maʼ Ġesù f’li jirgħa l-​ġnus “b’xettru tal-​ħadid” u f’li jisħaq ras Satana. Huma b’hekk ikollhom sehem f’li jwettqu l-​aħħar dettall tal-​profezija f’Ġenesi 3:15.—Apokalissi 2:26, 27; 17:14; 18:20, 21; Rumani 16:20.

²⁰ Xorta waħda, forsi nistaqsu, Il-​patt Abrahamiku u l-​patt il-​ġdid jinvolvu biss lil dawn il-​144,000 ruħ leali? Le, hemm oħrajn li m’humiex direttament f’dawn il-​pattijiet li se jiġu mberkin permezz tagħhom, bħalma se naraw fl-​artiklu li jmiss.

[Nota taʼ taħt]

Tiftakar?

◻ Il-​patt il-​ġdid meta beda jidher li kien qed jopera għall-​ewwel darba?

◻ X’ġie mwettaq permezz tal-​patt il-​qadim?

◻ Min hu primarjament in-​Nisel t’Abraham, u f’liema sekwenza ġew imberkin il-​ġnus permezz taʼ dak in-​Nisel?

◻ X’inhu t-​twettiq finali tal-​patt Abrahamiku u tal-​patt il-​ġdid għall-​144,000?

[Stampa f’paġna 15]

Il-​maħfra tad-​dnubiet għandha tifsira iktar profonda għal dawk taħt il-​patt il-​ġdid milli għal dawk taħt il-​patt il-​qadim